Isa ka Gatos ka Tuig ang Nagligad—1913

GINPABUTYAG sang Enero 1, 1913 nga The Watch Tower, ang ginbatyag sang kalabanan sang ginkutlo sini ang ginsiling sang Amerikano nga manunulat nga si Herbert Kaufman: “Indi na uso ang tinaga nga ‘imposible’ . . . Ang mga damgo sang una nangin matuod na subong.” Sugod sang 1913, ang mga tawo nangin positibo sa ila palaabuton.

Ang isa ka rason kon ngaa positibo ang mga tawo amo ang pag-uswag sang teknolohiya. Halimbawa sa Estados Unidos, ang Ford Motor Company nagbukas sang bag-o nga pabrika sa Highland Park, Michigan. Gulpi lang nga nagnubo ang presyo sang salakyan, amo nga madamo na ang makabakal sini. Paano ini natabo? Ang bag-o nga pabrika may assembly line. Bangod sini, mas madasig nga naasembol ang kilala nga Model T nga salakyan, amo nga nangin barato ini.

Ang katawhan ni Jehova positibo man pero sa lain nga rason. Madugay na nga ginapahibalo sang mga Estudyante sang Biblia nga ang 1914 isa ka importante nga tuig sa kasaysayan sang katawhan, kag ginapaabot gid nila ini. Samtang nagahilapit ini, nangin makugi pa gid sila sa hilikuton.

Sang Hunyo 1913, ginhiwat ang isa ka adlaw nga kombension sa Kansas City, Missouri, U.S.A. Amo ini ang umpisa sang serye sang kombension. Pagkasunod nga apat ka semana, ang sobra 200 ka kauturan nagsakay sa tren pakadto sa nakatundan nga Estados Unidos kag Canada. Sa sini nga mga kombension, ang mga bag-uhan ginhatagan sing kahigayunan nga makapamangkot. Madamo ang nagpangabay sing dugang nga impormasyon. Sang ulihi, ginduaw sang mga Estudyante sang Biblia ining mga interesado.

Sang 1913, ang katapo sang ulong talatapan sa Brooklyn nangin masako sa paghimo sing “Photo-Drama of Creation.” Walo ini ka oras nga narekord nga pamulongpulong base sa Biblia kag may musika nga ginadunganan sing de-kolor nga mga slide kag motion picture. Nagalaum ang mga Estudyante sang Biblia nga madamo nga interesado ang makatan-aw sang “Photo-Drama.” Bisan pa sina nga tion mga 5,100 lang ang aktibo nga manugbantala sang maayong balita, gusto nila nga “madamo ang makatan-aw sini sa bug-os nga kalibutan tubtob posible.”

Ano ang matabo sa 1914? Ano ang mangin reaksion sang mga tawo sa “Photo-Drama”? Ano ang matabo sa tigragas, sa katapusan sang Panag-on sang mga Gentil? Nalangkag gid ang mga Estudyante sang Biblia sa sabat sa sining mga pamangkot, kag nagasalig sila sa bulig ni Jehova.

Ang nagahilapit nga Dakung Inaway, sang ulihi gintawag nga Bug-os Kalibutan nga Inaway I, amo ang magadula sa positibo nga pagtamod sang mga tawo. Ang nagauswag nga teknolohiya indi amo ang solusyon sang mga problema sang tawo. Ang matabo sa masunod nga tuig may daku nga pagbag-o sa mga Estudyante sang Biblia kag sa bug-os nga kalibutan.