Ang mga Animated Video Nagtandog sa Matarong nga mga Tagipusuon

Si Caleb, ang bata nga lalaki sa serye sang video nga Mangin Abyan ni Jehova sa jw.org, popular gid subong sa bilog nga kalibutan. Ang iya una nga video natranslate na sa sobra 130 ka lenguahe kag ginatos ka sulat ang nabaton parte sa serye sini nga video.

Ini nga sulat naghalin sa 11 kag 8 anyos nga mag-utod nga babayi: “Gusto namon maghatag sing amot sa bug-os kalibutan nga pagbantala nga hilikuton. Nagsagod kami sing duha ka tinday nga baka kag ginbaligya ini. Ang ila mga ngalan amo sanday Big Red kag Earl. Gusto namon ihatag ini nga kuarta kay basi magamit ninyo ini sa paghimo sing dugang pa nga pelikula nga Mangin Abyan ni Jehova. Nami siguro kon si Caleb may manghod nga babayi, tapos mamag-o sia kay madula na ang tanan nga atension sa iya. Ang video ni Caleb paborito gid namon!”

Madamo nga kabataan ang nakasaulo sang bug-os nga video, lakip ang kanta kag bisan ang linya sang narrator. Ang isa ka sister nagsulat nga sa ila kongregasyon nga may 100 ka manugbantala, may 40 ini ka kabataan nga ang kalabanan sa ila wala pa mag-dies anyos. Ara sia sa ikatlo nga raya sang ginkanta ang ambahanon 120 sa pagtakop sang miting. Nagtulo ang iya mga luha samtang malipayon nga ginakanta sang tanan nga bata ang “ila ambahanon.”

Suno sa isa ka lola, pagkatapos matan-aw sing duha ka beses sang iya apo nga babayi ang video, nagsiling ini: “Dapat ko tinluan ang akon kuarto para wala sing may matapakan nga hampanganan kag madisgrasya.” Pursigido gid sia sa sini amo nga gusto niya tinluan anay ang iya kuarto antes magkaon.

Sa isa ka kaumhan sa Bagatnan nga Aprika, madamo nga kabataan ang nagapakadto-pakari sa balay sang Saksi kada adlaw. Abi sang iban nagabaligya gihapon sing dulse ini nga pamilya. Pero gin-imbitar gali ini nga mga kabataan sang iban nga bata para magtan-aw sang video nga Magpamati, Magtuman, kag Pakamaayuhon Ka sa ila lenguahe nga Xhosa. Isa ka bes, 11 ka bata ang nagtan-aw, kag nasaulo nila ang bilog nga kanta.

Sa Ecuador, may mag-utod nga lalaki nga indi Saksi nga nagahambal sing Quichua. Sila amo sanday Isaac, otso anyos, kag Saul, singko anyos. Imbes nga ibakal sing pagkaon ang ila balon, ginatipon nila ini para ibakal sing mga pusilpusil, espada, kag tawotawo. Isa ka adlaw, ginsugo sila sang ila iloy nga tinluan ang ila kuarto kag ibutang ang tanan nga hampanganan sa kahon sa idalom sang katre. Sang ulihi, may nagregalo sa ila sing DVD nga Mangin Abyan ni Jehova, kag gintan-aw nila ini. Pagkadason nga semana, samtang nagapaninlo ang iloy, nakita niya nga taraktarak na lang ang unod sang kahon. Gani ginpamangkot niya sila, “Diin na ang inyo mga hampanganan?” Nagsabat sila, “Indi ato gusto ni Jehova, ti ginhaboy namon.” Kon maghampang ang kaingod nila nga mga bata sing masingki nga mga hampanganan, ginasilingan sila ni Isaac: “Indi kamo maghampang sina. Indi ina gusto ni Jehova!”