Mga Balita sa Lainlain nga Pungsod

Ginapaambit Nila ang Ila Gin-download

Bisan indi pa lapnag ang Internet sa Cuba, maka-Internet ang mga tawo sa mga shop nga ginbuksan sang kompanya sang telepono. Pero mahal ang bayad. Gani, para makabenepisyo ang mga kauturan sa jw.org, ginpalig-on sang sanga ang mga kongregasyon nga magpili sang isa ka manugbantala nga mag-download sang mga publikasyon, rekording, kag mga video sa Web site dayon ipaambit ini sa iban nga Saksi sa ila kongregasyon. Nangin madinalag-on gid ini nga kahimusan.

Mas Importante ang Kingdom Hall Sangsa Cell Phone

Si Teona, nga napulo ka tuig, kag ang iya manghod nga babayi nga walo ka tuig nga si Tamuna, nagaistar sa Republic of Georgia. Gusto nila nga makabakal sing cell phone. Gani nagpromisa ang ila lola nga hatagan sila sing parte sang iya pension kada bulan. Makapasubo nga napatay ang ila lola. Pero ginhatag gihapon sa mga bata ang katapusan nga pension sang ila lola para makabakal sila sing cell phone. Pagkatapos nga mapamensaran ini, nagsulat ang mga bata sa ila kongregasyon: “Duha na lang ka semana masugod na ang pagpatindog sang aton bag-o nga Kingdom Hall diri sa T’erjola. Gusto gid sang amon lola nga magbulig sa sini nga proyekto, gani nagdesisyon kami nga ihatag ang iya katapusan nga pension sa kongregasyon sa baylo nga magbakal sing cell phone. Palihug patindugi kami sang manami nga Kingdom Hall!”

Ang Griegong Kasulatan sa Tetum nga Lenguahe

Sang Enero 17, 2014, sa Dili, Timor-Leste, ginpagua ni Geoffrey Jackson sang Nagadumala nga Hubon ang Bag-ong Kalibutan nga Badbad sang Cristianong Griegong Kasulatan sa Tetum, ang lenguahe nga ginagamit sang kalabanan sa pungsod. Sang una, ang Iglesia Katolika lang ang nagaimprinta kag nagapanagtag sang Griegong Kasulatan sa Tetum, kag wala ini ginabaligya sa mga Saksi ni Jehova ukon sa mga tawo nga nagatuon sa mga Saksi. Pero, ini nga mga kopya madamo sing sala, may ginabuhin, daan ang mga tinaga, kag may sala sa pag-imprinta. May kaangtanan sa Bag-ong Kalibutan nga Badbad, si Darren, nga isa ka misyonero sa Timor-Leste, nagsiling: “Madamo sang taga-Timor-Leste ang nagadayaw sang Bag-ong Kalibutan nga Badbad bangod sa pagkasibu sini kag nangabay sila gilayon sing mga kopya. Para sa ila, mahapos ini basahon, kag ginaapresyar nila ang dalagku nga mga letra, ilabi na kay madamo sang mga balay diri ang wala sing suga. Madamo sang nakatigayon sang kopya ang nagatuon na sa Biblia.”

‘Gintamod Ako ni Jehova nga Takus’

Sang Enero 2014, nag-uswag ang translation sang Romany, ang lenguahe nga ginagamit sa Macedonia. Naporma ang permanente nga translation team, kag gin-aprobahan sila nga magtranslate sang mga publikasyon sa sini nga lenguahe nga ginagamit ang Roman kag Cyrillic nga letra. Nakabulig gid ini sa mga nagahambal sing Romany, nga naanad sa Cyrillic, nga amo ang opisyal nga ginagamit sa Macedonia.

Madamo sang nagahambal sing Romany ang natandog gid bangod sa pag-aman sang organisasyon ni Jehova sang mga literatura sa ila lenguahe. Ang isa ka sister nagsiling: “Bangod nagahambal ako sing Romany, ginapakanubo ako sang iban nga rasa, gani nagapasalamat gid ako kay Jehova nga gintamod niya ako nga takus sa pagbaton sing literatura sa akon lenguahe. Paagi sini nangin suod pa gid ako sa iya.”

Pagbag-o sang Pagdumala

Sang Pebrero 1, 2014, ang sanga talatapan sa Estados Unidos amo na ang nagadumala sang mga teritoryo kag kongregasyon sa Jamaica kag sa Cayman Islands. Nahiusa gid ang sobra 1.2 ka milyon ka manugbantala nga sakop sang sanga sa Estados Unidos! Nalakip sa sini ang 50 ka estado sang U.S., Bahamas, Bermuda, British kag U.S. Virgin Islands, Puerto Rico, kag Turks kag Caicos Islands.

Ang mga Payunir sa Japan

Ang mga kauturan sa Japan padayon nga makugi sa pagpayunir, kag ang kadamuon sang regular payunir sa sini nga pungsod amo ang ikap-at nga pinakamadamo sa bilog nga kalibutan. Sa umpisa sang 2014 nga tuig sang pag-alagad, 2,646 ang bag-o nga nagpayunir, buot silingon, 65,668 na ang kabilugan nga payunir. Sang Marso 2014, sobra katunga sang tanan nga manugbantala ang nakigbahin sa pila ka sahi sang pagpayunir.