Ang JW Broadcasting ‘Nagapabakod kag Nagapaumpaw sa Amon!’

SANG 2014, ginsugdan ang estasyunan sang TV sa Internet nga ginatawag JW Broadcasting, kag sugod sadto madamo nga tumalan-aw sa bilog nga kalibutan ang napalig-on kag napaumpawan. Sa karon, matan-aw na ini sa sobra 90 ka lenguahe. Halimbawa, na-translate na sa Ewe, Ga, kag Twi (makita diri) ang mga programa, kag nalangkag gid sa sini ang sobra 130,000 ka manugbantala sa Benin, Côte d’Ivoire, Ghana, kag Togo.a

“Kon yara ako sa amon kuarto kag nagapamati sa mga miembro sang Nagadumala nga Hubon kag sa ila mga kabulig, pamatyag ko si Jehova ang nagaistorya sa akon,” siling ni Agatha nga asawa sang isa ka manugtatap sang sirkito sa Ghana. “Kon wala ang JW Broadcasting, paano ayhan ang isa ka imol nga kaangay sa akon makatigayon sining hamili nga pribilehiyo? Bangod sini, nagsuod pa gid kami sa aton pinalangga nga kauturan sa bilog nga kalibutan.”

Ang report halin sa Zambia nagsiling: “Bisan pigado, nagpanikasog gid ang mga manugbantala sa madamo nga kongregasyon agod makabenepisyo sa JW Broadcasting. Halimbawa, ang kongregasyon sang Misako mga 30 ka kilometro halin sa pinakamalapit nga banwa kag yara sa kaumhan nga madamo sing sapa nga nagasulog kon tingulan.” Si Simon nga isa ka ministeryal nga alagad nga nagaboluntaryo sa sini nga kongregasyon, nagsiling: “Kada bulan, may isa sa kongregasyon nga malakat sing mga duha ka oras pakadto sa mayor nga dalan, dayon masakay sia pakadto sa isa ka banwa para mag-download sing mga video didto. Ang isa ka 70 anyos nga lalaki kag ang duha niya ka anak nga lalaki wala pa gid makatambong sa mga miting sang mga Saksi ni Jehova. Natingala gid sia nga bisan uma ang ila lugar, may ipagua nga mga video sa miting. Nagsiling ang tigulang, ‘Amo gid ini ang paagi nga makatuon parte sa Dios.’”

Ang isa ka sulat sang pagpasalamat halin sa Russia nagasiling: “Isa ka tuig na kami nga nagatan-aw sang JW Broadcasting kag nalipay gid kami sa sini nga kahigayunan. Pagkatapos sang pinakauna nga broadcast, nabatyagan gid namon nga nahiusa kami sa aton kauturan sa bilog nga kalibutan. Kanami gid! Pamatyag namon isa gid kita ka daku nga pamilya! Nalipay kami nga makita ang Nagadumala nga Hubon. Ginatinguhaan gid nila nga maamanan kita sing pagkaon sa nagakaigo nga tion, kag matigayon ini sang tanan. Ginapaabot gid namon ang kada broadcast. Kag mas ginapabugal namon nga kami mga Saksi ni Jehova. Salamat, palangga nga mga utod! Ginapasalamatan gid namon si Jehova kag ang Cristo sa tanan nga makatilingala nila nga binuhatan. Nagapabakod kag nagapaumpaw ini sa amon!”

Ang tigulang na nga mag-asawa sa Germany nga sanday Horst kag Helga, nagsulat: “Tumalagsahon gid ang JW Broadcasting. Napabakod gid kami, ilabi na sang mga eksperiensia sang kauturan nga may sablag sa lawas. Napalig-on kami sini nga himuon ang amon bug-os masarangan bisan pa sang amon problema sa panglawas. Sang natan-aw namon ang parte sa isa ka lupog nga gulang, natun-an namon nga ang kada isa may mahatag gid kay Jehova. Kada makita namon ining huwaran nga kauturan, nagapasalamat gid kami kay Jehova kag nagahingyo kami sa iya nga pakamaayuhon sila sing bugana.”

Si Kodi nga taga-England nagsiling: “Salamat gid sa inyo tion kag panikasog sa paghimo sang jw.org, JW Broadcasting, kag mga video ni Caleb kag ni Sophia. Salamat man kay mas mahapos na namon mahangpan ang Biblia. Otso anyos ako sang nabawtismuhan. Kag kon magdaku na ako, gusto ko magboluntaryo sa pagpanukod sang mga Kingdom Hall! Gusto ko man magboluntaryo sa Bethel. Siam na ako ka tuig subong, gani lapit na lang.”

Sa England, ang otso anyos nga si Arabella nagsulat: “Salamat gid sa mga video kag mga halampangan sa jw.org. Nabuligan ako sini nga mas makilala si Jehova. Ang mga halampangan sa sini nga website nagbulig sa akon nga mag-enjoy samtang nagatuon parte kay Jehova. Kasagad sa inyo maghimo sing mga kanta nga hapos madumduman. Ang mga video ni Caleb kag ni Sophia nakabulig man sa akon. Salamat gid sa inyo pagpangabudlay.”