May Mahimo Bala ang mga Organisasyon sang Tawo Para Mangin Malinong ang Bilog nga Kalibutan?

Madamo gid sang nagakatabo nga mga inaway kag kinagamo sa bilog nga kalibutan. Gani, ang United Nations kag ang iban nga mga organisasyon nagapadala sang ila mga representante sa mga lugar nga may kinagamo para tinguhaan nga mangin malinong ina nga lugar. Ginahimo nila ini kay gusto nila nga dulaon ang kinagamo sa sina nga mga lugar. Ang UN Secretary-General nga si António Guterres nagsiling: “Ang ginapadala namon nga mga representante, amo ang pinakaimportante nga bahin sang amon pagpanikasog para mangin mas malinong ang bilog nga kalibutan.”

Sa sulod sang madamo nga tinuig, nangin maayo ang resulta sang pila sa sini nga mga pagpanikasog. Halimbawa, naproteksionan nila ang mga sibilyan, nabuligan nga makabalik ang mga refugee sa ila pungsod, nakahatag sang kinahanglanon nga pagkaon kag mga suplay, kag nakay-o ang mga bilding kag mga dalan. Pero bangod sang pila ka kabudlayan, indi gid nila mahimo ang tanan nila nga gusto matabo nga ginapaabot man sang mga tawo nga himuon nila. May ara gid bala sang permanente nga mga solusyon para mangin malinong ang bilog nga kalibutan? May sabat bala ang Biblia sa sini?

Kon ngaa mabudlay matigayon ang kalinong sa kalibutan kag ang solusyon sang Biblia

Problema: kulang sa kooperasyon. Mabudlay ini kay wala pirme nagakooperar ang militar sang mga pungsod kag ang sarisari nga mga organisasyon. Kon kaisa, nabudlayan sila magkooperar kay indi sila mag-intiendihanay kag lainlain ang ila gusto matabo.

Ang solusyon sang Biblia: “Ang Dios sang langit magatukod sing isa ka ginharian . . . kag laglagon ining tanan nga ginharian [gobierno sang tawo], kag ini lamang ang magapabilin sing dayon.”—Daniel 2:44.

Problema: indi bastante nga kinahanglanon kag ikasarang. Limitado ang mahimo sang mga organisasyon sang tawo kay indi bastante ang ila mga tinawo, pondo, ukon iban pa nga mga kinahanglanon. Dugang pa, kinahanglan sang ila mga personnel nga manghikot sa mga lugar nga delikado kag mas nagabudlay ang sitwasyon.

Ang solusyon sang Biblia: ‘Ang Dios sang aton Ginuong Jesucristo . . . nagpapungko kay Jesus sa iya tuo sa langitnon nga mga lugar, nga labaw gid sa tanan nga panguluhan, awtoridad, gahom.’—Efeso 1:17, 20, 21.

Ang labing gamhanan nga Dios nga si Jehova,a naghatag kay Jesus, ang gintangdo nga Hari sang Ginharian sang Dios, sang tanan niya nga kinahanglanon para maggahom. (Daniel 7:13, 14b) Ginhatagan sang Dios si Jesus sang daku nga gahom, ihibalo, kaalam, kag paghangop nga labaw pa sa bisan ano nga gobierno sang tawo ukon organisasyon. (Isaias 11:2) Si Jesus may ara man sang gamhanan nga mga anghel nga handa magsunod sa iya. (Bugna 19:14) Wala gid sang sitwasyon nga mabudlay para sa iya.

Problema: mga pagdumili sang gobierno. Kon kaisa, ang mga personnel sini nga mga organisasyon indi makahimo sang dapat nila himuon bangod wala sila sang maathag nga mga instruksion parte sa kon ano ang puede kag indi nila puede himuon, ukon bangod sang mga pagdumili sang gobierno. Bilang resulta, indi nila maproteksionan ang iban ukon mahimo ang ila gusto himuon.

Ang solusyon sang Biblia: “Ginhatag [kay Jesus] ang bug-os nga awtoridad sa langit kag sa duta.”—Mateo 28:18.

Ginhatagan sang Dios si Jesus sang maathag nga instruksion kag sang bug-os nga awtoridad para himuon ang bilog nga duta nga malinong. (Juan 5:22) Matarong gid ang paghukom ni Jesus kag indi sia mangin korap. (Isaias 11:3-5) Insakto gid nga gintawag sang Biblia si Jesus nga “Prinsipe sang Paghidait,” nga ang Ginharian natukod sa “katarungan kag pagkamatarong.”—Isaias 9:6, 7.

Mangin malinong gid ang duta paagi sa Ginharian sang Dios

Posible nga mapahaganhagan ukon mapauntat man sang mga organisasyon sang tawo ang kinagamo sa isa ka lugar. Pero indi gid nila madula ang ginahalinan sang kapintas, nga amo ang dumot nga ara sa tagipusuon sang kalabanan nga tawo.

“Ang pinakadaku nga problema amo nga indi masarangan sang mga organisasyon nga mangin malinong ang kalibutan bisan ano pa ang ila pagtinguha nga himuon ini.”—Dennis Jett, U.S. ambassador sang una.

Paagi sa Ginharian sang Dios, may ara gid sang matuod nga kalinong kay buligan sini ang mga tawo nga dulaon ang dumot sa ila tagipusuon. Halimbawa, sang ari si Jesus sa duta, gintudluan niya ang iya mga sumulunod paagi sa iya ginsiling kag ginhimo kon paano makighidait kag paano ipakita ang gugma sa iban:

Ginsiling man ni Jesus nga ang mga sakop sang Ginharian sang Dios makilala sa ila gugma sa iban. Maathag man nga ginsiling sang Biblia nga ang mga tawo nga nagadumot sa iban, indi pagpasugtan nga mabuhi kon maggahom na ang Ginharian sang Dios:

Si Jehova nga Dios, ang nagtuga sang tawo, amo lang gid ang nakahibalo sang pinakamaayo nga paagi kon paano mangin malinong ang bilog nga duta. Himuon sang iya Ginharian ang indi masarangan himuon sang mga organisasyon sang tawo.