Ano Dapat ang Paggawi sang Isa ka Cristiano?​—Ano ang Ginasiling sang Biblia?

Sa bilog nga kalibutan subong, madamo nga tawo ang nagapakilala nga mga Cristiano sila. Pero, may mga ginahimo sila nga makasakit sa iban. Ang iban sa ila kaugalingon lang ang ginapensar, indi honest, kag malain ang batasan. Ang iban naman nagaluib sa ila bana ukon asawa. Bangod sang ila ginahimo, may mga tawo nga nagapalibog: ‘Ano gid bala dapat ang paggawi sang isa ka Cristiano?’

Kon ano dapat ang paggawi sang isa ka Cristiano

Ang bisan sin-o puede gid maghambal nga Cristiano sia. Pero may iban pa sia nga dapat himuon. Siling sang Biblia, ang isa ka Cristiano disipulo ni Jesucristo. (Binuhatan 11:26) Si Jesus mismo nagsiling: “Kon ginatuman ninyo pirme ang akon ginatudlo, mga disipulo ko gid kamo.” (Juan 8:31) Siempre, wala sang tawo nga makatuman sang tanan nga gintudlo ni Jesus. Pero ginatinguhaan gid sang isa ka Cristiano nga sundon ini asta sa iya masarangan. Makita ini sa iya mga desisyon kada adlaw. Ari ang pila ka halimbawa.

Ginapakita sang isa ka Cristiano ang matuod nga gugma

Ang ginsiling ni Jesus: “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo. Paagi sini mahibaluan sang tanan nga mga disipulo ko kamo, kon nagahigugmaanay kamo.”—Juan 13:34, 35.

Ang ginhimo ni Jesus: Ginpakita gid ni Jesus ang matuod nga gugma sa tanan bisan ano man ang kahimtangan sang ila kabuhi ukon ang ila ginhalinan. Gin-ayo niya ang mga nagamasakit, ginpakaon ang mga ginagutom, kag ginhatag pa gani niya ang iya kabuhi para sa iban.—Mateo 14:14-21; 20:28.

Kon paano nagagawi ang mga Cristiano: Ginapakita sang mga Cristiano ang matuod nga gugma paagi sa ila kaalwan. Wala man sila sang pinilian kag ginapatawad nila ang iban. Ginabuligan nila ang mga tawo nga nagakinahanglan, kag handa sila magsakripisyo para sa ila.—1 Juan 3:16.

Honest ang mga Cristiano

Ang ginsiling ni Jesus: “Ako amo ang . . . kamatuoran.”—Juan 14:6.

Ang ginhimo ni Jesus: Honest gid si Jesus sa tanan niya nga ginhambal kag ginhimo. Wala niya gintunto ang iban para himuon nila ang gusto niya ukon ginpapati sila sa mga butang nga indi man matuod. Kabalo gid ang mga tawo nga honest si Jesus, bisan pa ginakontra sia sang iban bangod sini.—Mateo 22:16; 26:63-67.

Kon paano nagagawi ang mga Cristiano: Wala nagabinutig ang mga Cristiano. Nagabayad sila sang buhis, wala sila nagapangawat, kag mapisan sila kag wala nagaligoy sa ila obra. (Roma 13:5-7; Efeso 4:28) Wala nila ginatunto ang iban, wala sila nagapangopya sa eksam, kag wala sila nagabutang sang sala nga mga impormasyon sa ila résumé ukon sa iban pa nga dokumento.—Hebreo 13:18.

Ang mga Cristiano nagapakita sang kaayo

Ang ginsiling ni Jesus: “Kari sa akon, kamo tanan nga ginabudlayan kag ginabug-atan, kag papahuwayon ko kamo. Itakod ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kapahuwayan para sa inyo kaugalingon. Kay ang akon gota mahapos pas-anon kag ang akon lulan mamag-an.”—Mateo 11:28-30.

Ang ginhimo ni Jesus: Mabuot si Jesus kag madali palapitan sang mga tawo. Ginapasugtan niya ang mga bata nga magpalapit sa iya, ginapaumpawan niya ang mga may problema, kag ginarespeto gid niya ang iban.—Marcos 10:13-15; Lucas 9:11.

Kon paano nagagawi ang mga Cristiano: Ang mga Cristiano mainayuhon gid kon nagapakig-istorya sila. Indi sila bastos maghambal kag wala man nila ginapakalain ang iban. (Efeso 4:29, 31, 32) Nagaulikid gid sila sa iban kag nagapangita sila sang kahigayunan nga makabulig.—Galacia 6:10.

Ang mga Cristiano matutom sa ila bana ukon asawa

Ang ginsiling ni Jesus: “Ang gintingob sang Dios, indi pagbulagon sang tawo.”—Marcos 10:9.

Ang ginhimo ni Jesus: Bisan wala sang asawa si Jesus, ginpalig-on niya ang mga bana kag asawa nga mangin mainunungon sa isa kag isa. (Mateo 19:9) Nagpaandam man sia parte sa mga butang nga makaguba sang pag-asawahay.—Mateo 5:28.

Kon paano nagagawi ang mga Cristiano: Ginalikawan gid sang mga Cristiano ang mga butang nga wala nagapakita sang respeto sa ila bana ukon asawa. (Hebreo 13:4) Ginapakitaan gid nila sang gugma kag respeto ang isa kag isa.—Efeso 5:28, 33.