Ano ang Ginasiling sang Biblia Parte sa Pagpatughong sang Dugo?

Ang sabat sang Biblia

Ang Biblia nagasugo nga indi kita magkaon sang dugo. Gani, wala kami nagabaton sang puro nga dugo ukon sang panguna nga mga elemento sini, bisan paagi man sa pagkaon ukon pagtughong. Binagbinaga ang masunod nga mga bersikulo:

• Genesis 9:4. Gintugutan sang Dios si Noe kag ang iya pamilya nga kaunon ang karne pagkatapos sang Anaw pero ginsugo sila nga indi pagkaunon ang dugo. Ginsugo sang Dios si Noe: “Ang unud nga may kabuhi, nga amo ang iya dugo, dili ninyo pagkaonon.” Ini nga sugo dapat tumanon sang tanan nga tawo sugod sadto bangod ang tanan naghalin sa kaliwatan ni Noe.

• Levitico 17:14. “Dili kamo magkaon sang dugo sang bisan ano nga bagay sang unud, kay ang kabuhi sang tanan nga unud amo ang iya dugo; ang bisan sin-o nga nagakaon sini utdon.” Para sa Dios, ang kalag ukon ang kabuhi, ara sa dugo kag sia ang nagapanag-iya sini. Bisan pa ini nga sugo ginhatag lamang sa pungsod sang Israel, ginapakita sini nga serioso gid ang sugo sang Dios nga indi magkaon sang dugo.

• Binuhatan 15:20. “Maglikaw . . . sa dugo.” Ginhatag sang Dios sa mga Cristiano ang sugo nga ginhatag man niya kay Noe. Ginapakita sang kasaysayan nga ang mga Cristiano sadto wala nagakaon sang dugo, ukon nagagamit sini sa pagpabulong.

Ngaa ginasugo kita sang Dios nga maglikaw sa dugo?

May maayo nga mga rason kon ngaa indi kita dapat magpatughong sang dugo. Pero labaw sa tanan, nagsugo ang Dios nga maglikaw kita sa dugo bangod sagrado para sa iya ang ginarepresentar sini.—Levitico 17:11; Colosas 1:20.