Ano ang Ginasiling sang Biblia Parte sa mga Agi kag mga Tomboy?
Ang sabat sang Biblia
Sang gintuga sang Dios ang mga tawo, gintuyo niya nga ang mag-sex lang amo ang mga mag-asawa nga lalaki kag babayi. (Genesis 1:27, 28; Levitico 18:22; Hulubaton 5:18, 19) Ginapakamalaut sang Biblia ang pag-sex sang mga indi mag-asawa, homoseksuwal man sila ukon indi. (1 Corinto 6:18) Nalakip sa sini ang paghulid, paghimas sang kinatawo sang isa, kag oral ukon anal sex.
Bisan pa ginapakamalaut sang Biblia ang homoseksuwal nga mga buhat, wala sini ginasakdag ang pagdumot sa mga homoseksuwal ukon homophobia. Sa baylo, ginasugo ang mga Cristiano nga ‘tahuron ang tanan nga tawo.’—1 Pedro 2:17, Ang Pulong sang Dios.
Mahimo bala ang isa matawo nga homoseksuwal?
Ang Biblia wala sing direkta nga ginasiling parte sa ginhalinan sang homoseksuwalidad, pero ginapakita sini nga tanan kita natawo nga may tendensia nga magsupak sa mga sugo sang Dios. (Roma 7:21-25) Wala ginapaathag sang Biblia ang kabangdanan sang homoseksuwal nga mga handum, pero ginadumilian sini ang ginabuhat sang mga agi kag mga tomboy.
Kon paano mapahamut-an ang Dios sa pihak sang homoseksuwal nga mga handum.
Ang Biblia nagasiling: “Dapat ninyo patyon ang tawuhanon nga mga handom nga nagapanghikot sa inyo.” (Colosas 3:5, Maayong Balita nga Biblia) Para mapatay ang malain nga mga handum, nga nagaresulta sa malain nga mga buhat, dapat kontrolon mo ang imo panghunahuna. Kon maayo nga mga butang ang pirme mo ginahunahuna, mas mahapos mo mapakigbatuan ang malain nga mga handum. (Filipos 4:8; Santiago 1:14, 15) Bisan pa mabudlay gid ini sa umpisa, amat-amat nga mangin mahapos sa imo ang pagpakigbato sa sini. Nagpromisa ang Dios nga buligan ka niya nga ‘magbag-o sa puersa nga nagapanghikot sa imo hunahuna.’—Efeso 4:22-24.
Amo man sini ang ginapakigbatuan sang minilyon nga nagatinguha nga magtuman sa mga talaksan sang Biblia, homoseksuwal man ukon indi. Halimbawa, may mga di-minyo nga diutay na lang ang kahigayunan nga makapamana ukon makapangasawa, kag ang iban may tiayon nga indi na makasarang mag-sex. Ginakontrol nila ang ila seksuwal nga handum bisan ano pa nga mga pagsulay ang ila maatubang. Malipayon sila gihapon, kag mahimo man ini sang mga homoseksuwal kon gusto gid nila nga pahamut-an ang Dios.—Deuteronomio 30:19.