Ngaa Wala Ninyo Ginatawag nga Simbahan ang Inyo Tilipunan?

Sa Biblia, ang Griego nga termino nga gina-translate kon kaisa nga “simbahan” nagapatuhoy sa isa ka grupo sang mga sumilimba, indi sa tinukod nga ila ginatipunan.

Halimbawa: Sang nagsulat si apostol Pablo sa mga Cristiano sa Roma, nagpadala sia sing panamyaw sa mag-asawa nga sanday Aquila kag Priscila, kag nagdugang sia: “Nagapangamusta man ako sa simbahan nga nagatipon sa ila balay.” (Roma 16:5, Biblia sang Katilingban sang mga Kristiano) Wala ginatamyaw ni Pablo ang isa ka tinukod. Sa baylo, ginatamyaw niya ang mga tawo​—ang kongregasyon nga nagatipon sa sina nga balay.a

Gani wala namon ginatawag nga simbahan ang amon tilipunan kundi ginatawag namon ini nga “Kingdom Hall.”

Ngaa “Kingdom Hall of Jehovah’s Witnesses”?

Ini nga termino nagakaigo bangod sa pila ka rason:

• Ini nga tinukod isa ka hall, ukon tilipunan.

• Nagatipon kami para magsimba kay Jehova nga amo ang Dios sang Biblia, kag magpanaksi, ukon magpamatuod parte sa iya.​—Salmo 83:18; Isaias 43:12.

• Nagatipon man kami para magtuon parte sa Ginharian sang Dios, nga pirme ginahambal ni Jesus.​—Mateo 6:9, 10; 24:14; Lucas 4:43.

Ginaagda ka nga magkadto sa Kingdom Hall malapit sa inyo para makita mo kon paano ginahiwat sang mga Saksi ni Jehova ang ila mga miting.