Ngaa Ginapilasan Ko ang Akon Kaugalingon?

Ano ang pagpilas sa kaugalingon?

Lainlain ang paagi sa paghalit sa kaugalingon. Nalakip sa sini ang pagpaso, paghanog, pagkastigo, ukon pagpilas. Ang pagpilas amo ang hungod nga paghalit sa kaugalingon paagi sa isa ka matalom nga butang. Ini nga artikulo nagabinagbinag sang pagpilas, pero ang mga prinsipio diri naaplikar sa tanan nga sahi sang paghalit sa kaugalingon.

Testingi kon masabat mo: Husto ukon Sala.

1. Mga babayi lang ang nagapilas sang ila kaugalingon.

2. Ang pagpilas nagasupak sa sugo sang Biblia sa Levitico 19:28, nga nagasiling: “Dili ninyo pagpilasan ang inyo unud.”

Ngaa ginahimo ini sang iban?

Testingi kon masabat mo: Diin sa banta mo ang husto?

Ginapilas nila ang ila kaugalingon . . .

1. bangod gusto nila malipatan ang kasakit sa ila balatyagon.

2. bangod gusto nila manginmatay.

Talupangda ano ang ginasiling sang pila ka pamatan-on parte sa pagpilas sa ila kaugalingon.

Celia: “Nagapamag-an ini sang akon pamatyag.”

Tamara: “Daw paagi ini para mapalagyuhan ko ang problema. Ang pisikal nga kasakit mas maayo sangsa kasakit sa balatyagon.”

Carrie: “Indi ko gusto masubuan. Masakit kon pilasan ko ang akon kaugalingon, gani malipatan ko ang akon kasubo.”

Jerrine: “Kon pilasan ko ang akon kaugalingon, daw wala ako sing labot sa nagakatabo sa palibot, kag indi ko na kinahanglan atubangon ang akon mga problema.”

Kon ginahimo mo ini, paano mo ini mauntat?

Ang pagpangamuyo kay Jehova nga Dios importante gid. Ang Biblia nagasiling: ‘Itugyan ninyo sa iya ang tanan ninyo nga kabalaka, bangod nagaulikid sia sa inyo.’​—1 Pedro 5:7.

Suhestyon: Umpisahi sa malip-ot nga pangamuyo, paagi sa pagsiling kay Jehova, “Kinahanglan ko ang bulig.” Sa ulihi, mahimo mo na mahambal kag masugid sa “Dios nga may bug-os nga paglugpay” ang imo nabatyagan.​—2 Corinto 1:​3, 4.

Ang pangamuyo indi lamang paagi para magmag-an ang imo pamatyag. Matuod ini nlga komunikasyon sa imo Amay sa langit, nga nagapromisa: “Buligan ko ikaw, alay-ayon ko ikaw sang too nga kamut sang akon pagkamatarung.”​—Isaias 41:10.

Madamo sang may amo sini nga problema ang nalugpayan paagi sa pag-istorya sa iya ginikanan ukon sa ginasaligan nga adulto. Binagbinaga ang ginsiling sang tatlo ka pamatan-on nga naghimo sini.