Nagapati Bala Kamo sa Creationism?

Wala. Ang mga Saksi ni Jehova nagapati nga gintuga sang Dios ang tanan nga butang. Pero wala kami nagaugyon sa creationism. Ngaa? Bangod ang pila ka pagpati sang mga creationist nagasumpakil sa Biblia. Binagbinaga ang duha ka halimbawa:

1. Kalawigon sang anom ka adlaw nga pagpanuga. Ang pila ka creationist nagasiling nga ang anom ka adlaw sang pagpanuga literal nga mga adlaw nga may 24 ka oras. Pero ang tinaga nga “adlaw” sa Biblia mahimo magpatuhoy sa malawig nga tion.​—Genesis 2:4; Salmo 90:4.

2. Kalawigon sang pagluntad sang duta. Ang pila ka creationist nagatudlo nga ang duta nagaluntad sing pila pa lang ka libo ka tuig. Pero suno sa Biblia, ang duta kag ang uniberso nagluntad na antes sang anom ka adlaw sang pagpanuga. (Genesis 1:1) Bangod sini, ang mga Saksi ni Jehova nagaugyon sa masaligan nga research sang siensia nga nagapakita nga ang duta mahimo nagaluntad sing binilyon na ka tuig.

Bisan nagapati sa pagpanuga ang mga Saksi ni Jehova, indi kami antiscience. Nagapati kami nga ang matuod nga siensia kag ang Biblia nagahisantuanay.