Kinahanglan Gid Bala nga May Relihion Kita?

Ang sabat sang Biblia

Huo, kay gusto sang Dios nga ang mga tawo magtipon para magsimba sa iya. Ang Biblia nagasiling: “Hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon.”​—Hebreo 10:24, 25.

Ginapakita sa ginsiling ni Jesus nga ang iya mga disipulo magaporma sing grupo. Nagsiling sia: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:35) Para mapakita ini nga gugma, ang una nga paagi amo ang pagtipon sang mga disipulo sang Cristo upod sa pareho nila nga mga tumuluo. Organisahon sila sa mga kongregasyon kag magatipon sila sing regular para magsimba. (1 Corinto 16:19) Sa kabilugan, mag-ulutod ang pagkabig nila sa isa kag isa bisan diin man sila nga bahin sang kalibutan.​—1 Pedro 2:​17.

Indi lang pag-entra sa relihion ang kinahanglan

Ginapakita sang Biblia nga dapat magtipon ang mga tawo para magsimba sa Dios. Pero wala ginatudlo sang Biblia nga malipay na ang Dios kon ang isa ka tawo miembro na sang isa ka relihion. Para malipay ang Dios, dapat makita sa pagkabuhi sang isa ka tawo ang impluwensia sang iya relihion. Halimbawa, ang Biblia nagasiling: “Ang relihion nga matinlo kag wala sing dagta sa pagtamod sang aton Dios kag Amay amo ini: Ang pag-atipan sa mga ilo kag sa mga balo nga babayi sa ila kapipit-an, kag ang paglikaw sa mahigko nga dalanon sining kalibutan.”​—Santiago 1:​27, footnote.