Sang Nabanhaw si Jesus, ang Iya Bala Lawas Unod Ukon Espiritu?

Ang sabat sang Biblia

Ang Biblia nagsiling nga si Jesus “ginpatay . . . sa unod apang ginbuhi [ginbanhaw] sa espiritu.”​—1 Pedro 3:​18; Binuhatan 13:34; 1 Corinto 15:45; 2 Corinto 5:​16.

Ang ginsiling mismo ni Jesus nagapakita nga indi sia pagbanhawon sa iya lawas nga may unod kag dugo. Nagsiling sia nga ‘ihatag niya ang iya unod agod mabuhi ang kalibutan,’ bilang gawad para sa mga tawo. (Juan 6:​51; Mateo 20:28) Kon sang ginbanhaw sia ginbawi niya ang iya unod, pareho lang nga gindula niya ang epekto sang iya halad nga gawad. Pero wala ini natabo kay siling sang Biblia, ginhalad niya ang iya unod kag dugo “sing makaisa gid lang.”—Hebreo 9:​11, 12.

Kon si Jesus ginbanhaw nga may espiritu nga lawas, ngaa nakita sia sang iya mga disipulo?

• Ang mga espiritu nga tinuga puede magpakita bilang tawo. Halimbawa, ang mga anghel nga naghimo sini sadto nagkaon pa gani kag nag-inom upod sa mga tawo. (Genesis 18:​1-8; 19:​1-3) Pero, mga espiritu nga tinuga sila gihapon kag puede nila mabiyaan ang pisikal nga lawas.​—Hukom 13:15-​21.

• Sang nabanhaw si Jesus, temporaryo man sia nga nagpakita bilang tawo, pareho sa ginhimo sang mga anghel sadto. Pero bangod espiritu sia nga tinuga, puede sia makapakita kag madula dayon. (Lucas 24:31; Juan 20:19, 26) Indi palareho ang hitsura sang lawas ni Jesus sa tagsa ka tion nga nagpakita sia. Amo nga makilala lamang sia, bisan sang iya malapit nga mga abyan, paagi sa iya ginsiling kag ginhimo.​—Lucas 24:30, 31, 35; Juan 20:14-​16; 21:​6, 7.

• Sang nagpakita si Jesus kay apostol Tomas, naggamit sia sing lawas nga may mga agi sang pilas. Ginhimo niya ini para magbakod ang pagtuo ni Tomas, kay si Tomas nagaduhaduha nga si Jesus ginbanhaw.​—Juan 20:24-​29.