Ano ang Ginasiling sang Biblia Parte sa Makahulubog nga Ilimnon? Sala Bala ang Pag-inom Sini?
Ang sabat sang Biblia
Indi sala ang haganhagan nga pag-inom sing makahulubog nga ilimnon. Suno sa Biblia, ang alak dulot sang Dios nga makapalipay sa kabuhi. (Salmo 104:14, 15; Manugwali 3:13; 9:7) Ginasiling man sang Biblia nga bulong ang alak.—1 Timoteo 5:23.
Nag-inom si Jesus sing alak sang ari sia sa duta. (Mateo 26:29; Lucas 7:34) Sa isa ka bantog nga milagro ni Jesus, ginhimo niya ang tubig nga alak sa isa ka punsion sang kasal.—Juan 2:1-10.
Mga halit nga resulta sang sobra nga pag-inom
Ginasambit sa Biblia ang maayo nga epekto sang alak, pero ginapakamalaut sini ang sobra nga pag-inom kag pagpahubog. Gani, kon mag-inom ang Cristiano sing makahulubog nga ilimnon, dapat haganhagan lang. (1 Timoteo 3:8; Tito 2:2, 3) Ang Biblia nagahatag sing pila ka rason kon ngaa dapat likawan ang sobra nga pag-inom.
Maapektuhan sini ang ikasarang sa paghunahuna sing maayo kag pagdesisyon. (Hulubaton 23:29-35) Ang isa nga hubog indi makatuman sa sini nga sugo sang Biblia: “Ipresentar ninyo ang inyo lawas nga isa ka halad nga buhi, balaan kag kalahamut-an sa Dios. Sa sini nga paagi magahimo kamo sing sagrado nga pag-alagad nga ginagamit ang inyo ikasarang sa pagpangatarungan.”—Roma 12:1.
Madula sini ang pagpugong sa kaugalingon kag ang “huyog sa paghimo sing maayo.”—Oseas 4:11; Efeso 5:18.
Magaresulta ini sa kaimulon kag malala nga mga balatian.—Hulubaton 23:21, 31, 32.
Ang sobra nga pag-inom kag pagpahubog wala nahamut-an sang Dios.—Hulubaton 23:20; Galacia 5:19-21.
Daw ano kadamo ang sobra nga pag-inom?
Sobra na ang nainom sang isa ka tawo kon makahalit na ini sa iya ukon sa iban. Sa Biblia, ang paglaragway sa isa ka hubog indi nga nalipong na sia, kundi nga wala na sia sa iya kaugalingon, nagadulingduling sa paglakat, nagapangbais, ukon nagapinitla. (Job 12:25; Salmo 107:27; Hulubaton 23:29, 30, 33) Bisan pa ang mga wala nagakahubog mahimo gihapon “mabug-atan sang . . . sobra nga pag-inom” kag makaeksperiensia sang malain gid nga mga resulta.—Lucas 21:34, 35.
Paglikaw sa pag-inom
Ginapakita man sang Biblia ang mga kahimtangan nga dapat likawan sang mga Cristiano ang pag-inom sing makahulubog nga ilimnon:
Kon masandad ang iban bangod sini.—Roma 14:21.
Kon ang pag-inom sing makahulubog nga ilimnon ginadumilian sa inyo lugar.—Roma 13:1.
Kon indi makontrol sang isa ang iya kaugalingon. Ang mga nagaantos bangod sa sobra nga pag-inom kag sa iban pa nga klase sang pag-abuso sa makahulubog nga ilimnon dapat handa maghimo sing daku nga pagbag-o.—Mateo 5:29, 30.