Paano Ako Mangin Isa sa mga Saksi ni Jehova?

Ginhambal ni Jesus ang mga tikang nga dapat himuon para mangin isa sa mga Saksi ni Jehova kag mabasa ini sa Mateo 28:19, 20. Ginapakita sini nga mga bersikulo ang dapat himuon sang isa para mangin disipulo sang Cristo, kag upod sa sini ang paghambal ukon pagpanaksi parte kay Jehova.

Step 1: Tun-i ang ginatudlo sang Biblia. Ginsugo ni Jesus ang iya mga sumulunod nga tudluan ang mga tawo agod mangin disipulo. (Mateo 28:19, 20) Ang tinaga nga gin-translate “disipulo” literal nga nagakahulugan, “isa nga nagatuon.” Ara sa Biblia, ilabi na sa mga panudlo ni Jesucristo, ang mga impormasyon nga kinahanglan mo para mangin malipayon ang imo kabuhi. (2 Timoteo 3:​16, 17) Gusto gid namon nga buligan ka nga matun-an ang ginatudlo sang Biblia paagi sa amon programa nga libre nga pagtuon sa Biblia.—Mateo 10:​7, 8; 1 Tesalonica 2:​13.

Step 2: Himua ang imo natun-an. Nagsiling si Jesus nga ang nagatuon dapat man ‘magtuman sang tanan nga ginsugo niya.’ (Mateo 28:20) Buot silingon, dapat nga nagatuon ka sa Biblia indi lang para madugangan ang imo nabal-an, kundi mahimo nga may kinahanglan ka bag-uhon sa imo panghunahuna kag batasan. (Binuhatan 10:42; Efeso 4:​22-​29; Hebreo 10:24, 25) Ang mga nagatuman sa mga sugo ni Jesus napahulag nga maghimo sing personal nga desisyon nga sundon sia kag idedikar ang ila kabuhi kay Jehova nga Dios.​—Mateo 16:24.

Step 3: Magpabawtismo. (Mateo 28:19) Sa Biblia, ang bawtismo ginkomparar sa paglubong. (Ikomparar ang Roma 6:​2-4.) Nagasimbulo ini sang pagkapatay sa imo daan nga paagi sa pagkabuhi kag pagsugod sang bag-o nga kabuhi. Kon amo, ang imo bawtismo pagpahibalo sa publiko nga nahimo mo na ang una nga duha ka tikang nga ginhambal ni Jesus kag nagapangabay ka sa Dios nga hatagan ka sing matinlo nga konsiensia.​—Hebreo 9:​14; 1 Pedro 3:​21.

Paano ko mabal-an kon bala handa na ako nga magpabawtismo?

Makig-istorya sa mga gulang sang kongregasyon. Istoryahon ka nila para siguraduhon kon bala naintiendihan mo gid ang imo himuon, ginatuman mo na ang imo mga natun-an, kag personal mo na nga nadedikar ang imo kaugalingon sa Dios.​—Binuhatan 20:28; 1 Pedro 5:​1-3.

Dapat man bala ini himuon sang mga bata nga may Saksi nga mga ginikanan?

Huo. Ginapadaku namon ang amon kabataan sa “disiplina kag laygay ni Jehova,” suno sa ginasugo sang Biblia. (Efeso 6:4) Pero, samtang nagadaku sila, sila ang personal nga magadesisyon nga ila tun-an, batunon, kag himuon ang ginatudlo sang Biblia antes sila mangin kalipikado para sa bawtismo. (Roma 12:2) Kay man, ang kada isa amo dapat ang magadesisyon parte sa iya pagsimba.​—Roma 14:12; Galacia 6:5.