San-o ang Katapusan sang Kalibutan?

Ang sabat sang Biblia

Para mabal-an kon san-o ang katapusan sang kalibutan, dapat anay naton maintiendihan kon paano ginagamit sang Biblia ang tinaga nga “kalibutan.” Ang Griego nga tinaga nga koʹsmos, nga masami gina-translate nga “kalibutan,” pirme nagapatuhoy sa kalibutan sang katawhan, ilabi na sa mga tawo nga wala nagatuman sa Dios kag wala nagahimo sang iya kabubut-on. (Juan 15:18, 19; 2 Pedro 2:5) Kon kaisa, ang koʹsmos nagapatuhoy sa katilingban sang mga tawo.​—1 Corinto 7:​31; 1 Juan 2:​15, 16.a

Ano ang “katapusan sang kalibutan”?

Ang prase nga “katapusan sang kalibutan,” nga makita sa madamo nga translation sang Biblia, mahimo man ma-translate nga “hingapusan sang sistema sang mga butang,” ukon “katapusan sang panuigon.” (Mateo 24:3; Maayong Balita nga Biblia) Nagapatuhoy ini, indi sa pagkaguba sang kalibutan ukon kalaglagan sang tanan nga katawhan, kundi sa katapusan sang katilingban sang mga tawo.​—1 Juan 2:​17.

Ang Biblia nagatudlo nga “ang mga malauton laglagon” para mangin malipayon ang maayo nga mga tawo sa duta. (Salmo 37:​9-​11) Ang kalaglagan matabo sa “dakung kapipit-an,” nga magatapos sa inaway sang Armageddon.​—Mateo 24:21, 22; Bugna 16:14, 16.

San-o ang katapusan sang kalibutan?

Si Jesus nagsiling: “Tuhoy sina nga adlaw kag oras, wala gid sing nakahibalo bisan pa ang mga anghel sa langit ukon ang Anak, kundi ang Amay lamang.” (Mateo 24:36, 42) Nagsiling pa sia nga ang tion sang katapusan magaabot “sa oras nga wala ninyo ginapaabot.”​—Mateo 24:44.

Bisan pa wala naton mabal-an ang eksakto nga adlaw kag oras, naghatag si Jesus sing maathag nga “tanda,” ukon mga hitabo, nga magatanda sang tion nga magapadulong sa katapusan sang kalibutan. (Mateo 24:​3, 7-​14) Ginapatuhuyan ini sang Biblia subong “tion sang katapusan,” “katapusan nga panahon,” kag “katapusan nga mga adlaw.”​—Daniel 12:4; Biblia sang Katilingban sang mga Kristiano; 2 Timoteo 3:​1-5.

May mabilin bala sa tapos sang katapusan sang kalibutan?

Huo. Ara gihapon ang duta, kay ang Biblia nagasiling nga “indi ini matay-ug sa nahamtangan sini tubtob sa wala sing katubtuban.” (Salmo 104:5) Kag ang duta mapuno sang mga tawo, subong sang ginapromisa sang Biblia: “Ang mga matarong magapanubli sang duta,kag magapuyo sila sa sini sa wala sing katubtuban.” (Salmo 37:29) Himuon sang Dios ang iya orihinal nga katuyuan:

• Paraiso.​—Isaias 35:1; Lucas 23:43.

• Seguridad kag kabuganaan.​—Miqueas 4:4.

• Makalilipay nga trabaho para sa tanan.​—Isaias 65:21-​23.

• Wala na sing balatian kag pagtigulang.​—Job 33:25; Isaias 33:24.