Sin-o Ukon Ano ang Pulong sang Dios?
Ang sabat sang Biblia
Ang ekspresyon nga “pulong sang Dios” pirme nagapatuhoy sa isa ka mensahe ukon mga mensahe sang Dios. (Lucas 11:28) Sa pila ka bersikulo sa Biblia, “Ang Pulong sang Dios” ukon “ang Pulong” ginagamit bilang personal nga titulo.—Bugna 19:13; Juan 1:14.
Mensahe sang Dios. Ang mga propeta pirme nagasiling nga ang mga mensahe nga ila ginapahayag pulong sang Dios. Halimbawa, ginsugdan ni Jeremias ang iya pagpahayag sang mga tagna paagi sa mga tinaga nga “nagsiling si Jehova sa akon.” (Jeremias 1:4, 11, 13; 2:1) Antes ginsilingan ni Samuel si Saul nga ginpili sia sang Dios bilang hari, si Samuel nagsiling: “Madulog anay kita diri kag isugid ko sa imo ang ginsiling sang Dios.”—1 Samuel 9:27.
Personal nga titulo. “Ang Pulong” mabasa man sa Biblia nga titulo ni Jesucristo, sang didto sia sa langit bilang espiritu kag sang ari sia sa duta bilang tawo. Binagbinaga ang masunod nga mga pagpaathag:
Ang Pulong nagkabuhi na antes gintuga ang tanan nga butang. “Sa ginsuguran yara ang Pulong . . . Kaupod na sia sang Dios sa ginsuguran.” (Juan 1:1, 2) Si Jesus “ang panganay sa tanan nga tinuga . . . nauna sia sa tanan iban pa nga butang.”—Colosas 1:13-15, 17.
Ang Pulong nagpanaug diri sa duta bilang tawo. “Ang Pulong nangin unod kag nagpuyo kaupod naton.” (Juan 1:14) “Ginbiyaan [ni Cristo Jesus] ang tanan kag nangin kaangay sang ulipon. Nangin tawo sia.”—Filipos 2:5-7.
Ang Pulong Anak sang Dios. Sa tapos masiling nga “ang Pulong nangin unod,” nga mabasa sa ibabaw, si apostol Juan nagpadayon: “Nakita naton ang iya himaya, ang himaya nga ginahatag sang isa ka amay sa iya bugtong nga anak.” (Juan 1:14) Si Juan nagsulat man: “Si Jesus amo ang Anak sang Dios.”—1 Juan 4:15.
Ang Pulong may mga kinaiya nga pareho sa mga kinaiya sang Dios. “Ang Pulong isa ka dios,” ukon “balaan.” (Juan 1:1) Si Jesus “ang banaag sang himaya sang Dios kag ang sibu nga larawan sang iya mismo kinaugali.”—Hebreo 1:2, 3.
Ang Pulong nagagahom bilang hari. Ang Biblia nagasiling nga sa ulo sang Pulong sang Dios “may madamo nga korona.” (Bugna 19:12, 13) Ang Pulong gintawag man nga “Hari sang mga hari kag Ginuo sang mga ginuo.” (Bugna 19:16) Si Jesus gintawag nga “Hari sang mga nagagahom subong mga hari kag Ginuo sang mga nagagahom subong mga ginuo.”—1 Timoteo 6:14, 15.
Ang Pulong amo ang humalambal sang Dios. Ang titulo nga “ang Pulong” nagapakita nga ang nagadala sini nga ngalan amo ang ginagamit sang Dios nga magpaalinton sang iya mga impormasyon kag instruksion. Nagsiling si Jesus nga amo gid ini ang ginhimo niya: “Ang Amay nga nagpadala sa akon nga nagsugo sa akon kon ano ang akon isiling kag itudlo. . . . Gani ano man ang akon ginahambal, ginahambal ko ini suno sa ginsiling sa akon sang Amay.”—Juan 12:49, 50.