Pamangkot sang mga Pamatan-on
Perfectionist Bala Ako?
Kon
gusto mo nga A+ gid ang grade mo sa tanan nga test
indi mo gusto ang bag-o nga mga challenge kay nahadlok ka nga mapaslawan
kada may magsaway sa imo pamatyag mo ginapakalain ka
. . . , puede masiling nga perfectionist ka. Pero ngaa dapat mo mabal-an?
Ano ang malain kon perfectionist ka?
Wala sing malain kon ginatinguhaan mo nga himuon ang imo best. Pero, “ang pagtinguha nga himuon ang imo best lain sangsa pagtinguha nga himuon ang mga butang bisan indi mo ini masarangan,” siling sang libro nga Perfectionism—What’s Bad About Being Too Good? Nagsiling pa gid ini: “Mabudlayan ka lang kon tinguhaan mo nga mangin perfect, kay sa tuod lang, wala sing isa sa aton ang perfect.”
Ang Biblia nagasiling man nga, “Wala sing matarong nga tawo sa duta nga nagahimo pirme sing maayo.” (Manugwali 7:20) Bangod indi ka perfect, kon kis-a ang imo ginahimo indi gid amo sina kanami.
Indi mo bala ina mabaton? Kon huo ang imo sabat, binagbinaga ang apat ka indi maayo nga epekto kon perfectionist ka.
Sa imo pagtan-aw sa imo kaugalingon. Tama kataas sang standard sang mga perfectionist para sa ila kaugalingon, gani pirme lang sila nagakapaslawan. “Ang matuod, indi puede nga maayo kita sa tanan nga butang, kag kon pirme naton ginapakanubo ang aton kaugalingon kay indi naton ma-perfect ang tanan, madulaan kita sing kompiansa. Kag mahimo kita ma-depress.”—Alicia.
Sa imo pagbaton sang laygay. Kon may maglaygay sa ila, pamatyag sang mga perfectionist ginaguba ang ila reputasyon. “Nagalalain gid ako kon koreksionan ako,” siling sang pamatan-on nga si Jeremy. Nagsiling pa sia, “Kon perfectionist ka wala mo ginakilala ang imo mga limitasyon kag wala mo man ginabaton ang bulig.”
Sa imo pagtan-aw sa iban. Pirme makita sang mga perfectionist ang sala sang iban, kag indi ini katingalahan. “Kon perfectionist ka, gusto mo perfect man ang iban,” siling sang 18 anyos nga si Anna. “Kon indi mahimo sang mga tawo ang ginapaabot mo nga himuon nila, nagalalain ka gid.”
Sa pagtan-aw sang iban sa imo. Kon tama kataas ang imo ginapaabot sa iban, indi ka matingala kon amat-amat ka nila nga ginalikawan! “Kakapoy maglagas sa indi rasonable nga standard sang isa ka perfectionist,” siling ni Beth. “Indi mo gid gusto mag-upod sa sina nga tawo!”
Ano ang maayo nga himuon?
Ang Biblia nagasiling: “Ipakita sa tanan nga tawo ang inyo pagkamakatarunganon.” (Filipos 4:5) Ang mga tawo nga makatarunganon wala nagapaabot sing sobra sangsa ila masarangan ukon sa masarangan sang iban.
“Grabe na ang pressure sa palibot mo. Ti, ngaa dugangan mo pa ini paagi sa pagka-perfectionist? Sobra na ina!”—Nyla.
Ang Biblia nagasiling: “[Maglakat] sing maugdang upod sa imo Dios!” (Miqueas 6:8) Ang maugdang nga mga tawo kabalo sang ila limitasyon. Wala nila ginahimo ang indi nila masarangan, kag bisan masarangan man nila, wala nila ginaubos ang ila tion sa sini.
“Para mabatyagan ko nga responsable ako, ang masarangan ko lang ang ginabaton ko nga obra.”—Hailey.
Ang Biblia nagasiling: “Himua ang tanan nga luyag mo himuon sa bug-os mo nga ikasarang.” (Manugwali 9:10) Gani ang bulong sa pagka-perfectionist indi ang katamad, kundi ang kapisan nga ginaupdan sang mga kinaiya nga ginsambit bag-o lang, ang pagkamakatarunganon kag kaugdang.
“Ginahimo ko gid ang tanan nga masarangan ko sa akon obra. Bal-an ko nga indi ko gid ini ma-perfect, pero nalipay ako nga ginhimo ko ang akon best.”—Joshua.