PAMANGKOT SANG MGA PAMATAN-ON
Ano ang Himuon Ko Kon Nasakit sang Akon Abyan ang Akon Buot?
Ang dapat mo mahibaluan
Ang tanan nga klase sang relasyon may problema. Indi perpekto ang imo abyan kag bisan pa best friend mo sia, posible makahimo sia ukon makahambal sang mga butang nga makasakit sa imo. Siempre ikaw indi man perpekto, gani kon kaisa masakit mo man ang buot sang iban.—Santiago 3:2.
Bangod sa Internet, kadasig masakitan ang mga tawo. Halimbawa, ang tin-edyer nga David nagsiling: “Kon naka-online ka kag nakita mo ang mga piktyur sang imo abyan nga ara sa isa ka party, basi mamensar ka kon ngaa wala ka gin-imbitar. Dayon mahimo masubuan ka kag masakitan.”
Masolusyunan mo ang problema.
Ang puede mo himuon
Usisaa ang imo kaugalingon. Ang Biblia nagasiling: “Indi ka mangakig dayon, kay ang nagapangakig dayon tanda sang isa ka buangbuang.”—Manugwali 7:9, footnote.
“Marealisar mo kon kaisa nga ang butang nga ginainitan sang imo ulo daw indi man gali salapakon.”—Alyssa.
Pamensari ini: Sobra ka bala ka-sensitive? Masarangan mo bala nga palampason ang mga sala sang iban?—Manugwali 7:21, 22.
Pamensara ang maayo nga mga resulta sang pagpatawad. Ang Biblia nagsiling: “Katahom . . . nga palampason ang sala.”—Hulubaton 19:11.
“Bisan pa may rason ka nga maakig, maayo gid nga magpatawad sing kinabubut-on. Likawi man nga ungkaton ang sala sang imo abyan kag pabatyagon sia nga dapat sia mangayo sing pasensia liwat sa mga sala nga ginpatawad mo na. Kon napatawad mo na sia, kalimti na ang iya sala.”—Mallory.
Pamensari ini: Grabe gid bala ang sala sang imo abyan? Mapatawad mo bala sia para indi na maglain ang imo buot?—Colosas 3:13.
Kon pirme mo ginapadaku ang gamay nga mga problema, pareho lang nga sulitsulit mo nga ginabuksan ang puertahan kag ginapasulod ang mabaskog nga hangin sa balay
Pamensara ang iban. Ang Biblia nagsiling: ‘Pangitaa ninyo indi lamang ang inyo personal nga kaayuhan, kundi ang iya man sang iban.’—Filipos 2:4.
“Kon may gugma kag respeto kamo nga mag-abyan, may rason ka gid nga solusyonan dayon ang mga problema kay bahin ka sini nga pag-abyanay. Daku na ang imo ginsakripisyo sa sini, gani indi ka gusto nga maguba ini.”—Nicole.
Pamensara ini: May rason man bala ang imo abyan?—Filipos 2:3.
Ang punto: Kon kabalo ka magsolusyon subong sang imo nasakit nga balatyagon, makabulig ini sa imo kon adulto ka na. Gani maayo gid nga tinguhaan mo subong nga masolusyunan ang imo nasakit nga balatyagon.