Ang Birhen nga si Maria—Ano ang Ginasiling sang Biblia Parte sa Iya?
Ang sabat sang Biblia
Suno sa Biblia, si Maria nga iloy ni Jesus, may pinasahi nga pribilehiyo sa pagbun-ag sa iya bisan birhen sia. Gintagna sang Biblia ini nga milagro sa libro sang Isaias kag ginrekord ang katumanan sini sa mga Ebanghelyo ni Mateo kag ni Lucas.
Si Isaias nagtagna parte sa Mesias: “Ang bataon nga babayi magabusong kag magabun-ag sang isa ka anak nga lalaki.” (Isaias 7:14) Paagi sa paggiya sang Dios, ang manunulat sang Ebanghelyo nga si Mateo naggamit sang tagna ni Isaias para patuhuyan ang pagbusong ni Maria kay Jesus. Pagkatapos nga ginsulat ni Mateo nga si Maria nagbusong paagi sa milagro, nagdugang sia: “Natabo ini tanan agod matuman ang ginsiling ni Jehova paagi sa iya manalagna: ‘Isa ka birhena ang magabusong kag magabun-ag sang isa ka anak nga lalaki, kag hingalanan nila sia nga Emmanuel,’ nga kon badbaron, ‘Kaupod Namon ang Dios.’”—Mateo 1:22, 23.
Ang manunulat sang Ebanghelyo nga si Lucas nagsulat man parte sa pagbusong ni Maria paagi sa milagro. Nagsiling sia nga ginpadala sang Dios ang anghel nga si Gabriel “sa isa ka birhen nga kalaslon kay Jose halin sa panimalay ni David. Ang ngalan sang birhen amo si Maria.” (Lucas 1:26, 27) Ginkompirmar ni Maria nga birhen sia. Sang nabal-an ni Maria nga mangin iloy sia ni Jesus, ang Mesias, namangkot sia: “Paano ini matabo, kay wala pa gid ako makapakighulid sa isa ka lalaki?”—Lucas 1:34.
Paano nagbusong ang isa ka birhen?
Nagbusong si Maria sa bulig sang balaan nga espiritu, nga amo ang gahom sang Dios nga ginagamit niya sa pagtuman sang iya katuyuan. (Mateo 1:18) Ginsilingan si Maria: “Ang balaan nga espiritu magaabot sa imo, kag ang gahom sang Labing Mataas magalikop sa imo. Bangod sina ang bata nga ibun-ag mo tawgon nga balaan, Anak sang Dios.”b (Lucas 1:35) Paagi sa milagro, ginsaylo sang Dios ang kabuhi sang iya Anak sa tiyan ni Maria, amo nga nagbusong sia.
Ngaa birhen ang gingamit sang Dios sa pagbun-ag kay Jesus?
Gingamit sang Dios ang isa ka birhen para mabun-ag si Jesus bilang tawo nga may perpekto nga lawas agod maluwas niya ang katawhan sa sala kag kamatayon. (Juan 3:16; Hebreo 10:5) Ginsaylo sang Dios ang kabuhi ni Jesus sa tiyan ni Maria. Dayon, ginproteksionan sang balaan nga espiritu ang lapsag para indi niya mapanubli ang pagka-di-perpekto.—Lucas 1:35.
Gani sang ginbun-ag si Jesus, isa sia ka perpekto nga tawo, pareho kay Adan antes ini nakasala. Ang Biblia nagsiling parte kay Jesus: “Wala sia sing nahimo nga sala.” (1 Pedro 2:22) Bangod si Jesus perpekto nga tawo, puede niya gawaron ang mga tawo sa sala kag kamatayon.—1 Corinto 15:21, 22; 1 Timoteo 2:5, 6.
Birhen bala si Maria sa bilog niya nga kabuhi?
Wala ginatudlo sang Biblia nga si Maria birhen sa bilog niya nga kabuhi. Sa baylo, ginapakita sini nga may iban pa nga kabataan si Maria.—Mateo 12:46; Marcos 6:3; Lucas 2:7; Juan 7:5.
Ginatudlo sang Biblia nga si Jesus may mga utod pa
Ang pagbun-ag bala kay Jesus sang isa ka birhen amo ang ginatawag nga “Imakulada nga Pagpanamkon” ukon “Immaculate Conception”?
Indi. Suno sa New Catholic Encyclopedia, ang doktrina sang Imakulada nga Pagpanamkon “nagapati nga ang Birhen nga si Maria wala NAKAPANUBLI SING SALA halin sang pagkabun-ag niya, buot silingon, sugod sang ginpanamkon sia. Ang tanan nga tawo nakapanubli sing sala . . . Pero si Maria, sa pinasahi nga GRASYA sang Dios, gin-amligan para indi makapanubli sang sala.”c
Pero wala gid ginatudlo sang Biblia nga si Maria wala nakapanubli sing sala. (Salmo 51:5; Roma 5:12) Ang matuod, ginpakita ni Maria nga makasasala sia kay naghalad sia sing pagtumbas para sa iya sala nga ginapatuman sa mga iloy sang Kasuguan nga ginhatag kay Moises. (Levitico 12:2-8; Lucas 2:21-24) Ang New Catholic Encyclopedia nagsiling: “Wala direkta nga ginatudlo sang Kasulatan ang parte sa Imakulada nga Pagpanamkon . . . Panudlo ini nga ginhimo lang sang Simbahan.”
Ano dapat ang pagtan-aw naton kay Maria?
Si Maria maayo gid nga halimbawa bangod sa iya pagtuo, pagkamatinumanon, pagkamapainubuson, kag sa iya daku nga gugma sa Dios. Isa sia sa mga matutom nga maayo gid nga sundon naton.—Hebreo 6:12.
Pero bisan pa sang iya pinasahi nga papel bilang iloy ni Jesus, wala ginatudlo sang Biblia nga dapat naton simbahon si Maria ukon mangamuyo kita sa iya. Wala ni Jesus ginhatagan si Maria sing pinasahi nga pagpadungog, kag wala man niya ginsugo ang iya mga sumulunod nga himuon ini. Magluwas sa mga Ebanghelyo kag sa isa ka bersikulo sa libro sang Binuhatan, wala na si Maria ginsambit sa 22 pa ka libro sang Bag-ong Katipan.—Binuhatan 1:14.
Wala ginapakita sang Kasulatan nga si Maria ginhatagan sing pinasahi nga atension ukon ginsimba sang mga Cristiano sang unang siglo. Sa baylo, ginatudlo sang Biblia nga ang Dios gid lang ang dapat simbahon sang mga Cristiano.—Mateo 4:10.
a Ang Hebreo nga tinaga nga ʽal·mahʹ, nga gin-translate nga “bataon nga babayi” sa tagna ni Isaias, puede magpatuhoy sa birhen ukon sa indi na birhen nga babayi. Pero, sa bulig sang Dios, gingamit ni Mateo ang mas espesipiko nga Griego nga tinaga nga par·theʹnos, buot silingon “birhen.”
b Ang iban indi gusto sang termino nga “Anak sang Dios,” kay siling nila, daw naghulid ang Dios sa isa ka babayi. Pero ini nga ideya wala ginatudlo sang Kasulatan. Sa baylo, ginatawag sang Biblia si Jesus nga “Anak sang Dios” kag “ang panganay sa tanan nga tinuga” kay sia ang una kag sia lang gid ang direkta nga gintuga sang Dios. (Colosas 1:13-15) Gintawag man sang Biblia ang una nga tawo nga si Adan nga “anak sang Dios.” (Lucas 3:38) Ngaa? Kay si Adan gintuga man sang Dios.
c Second Edition, Volume 7, pahina 331.