Ang Kuarta Bala ang Gamot sang Tanan nga Kalainan?

Ang sabat sang Biblia

Indi. Ang Biblia wala nagasiling nga ang kuarta malain, ukon amo ini ang kabangdanan sang tanan nga malain nga butang. Ang kinaandan nga ekspresyon nga ang “kuarta ang gamot sang tanan nga kalainan” indi kompleto kag indi insakto suno sa mabasa sa Biblia. Ang mabasa sa Biblia amo nga “ang gugma sa cuarta amo ang gamut sang tanan nga kalainan.”a—1 Timoteo 6:10, Ang Biblia sang Philippine Bible Society, kami ang nagpadukot sang letra.

Ano ang ginasiling sang Biblia parte sa kuarta?

Ang Biblia nagasiling nga kon gamiton sing maalamon ang kuarta, makabulig ini, kag ‘makaamlig’ pa gani ini sa aton. (Manugwali 7:12) Isa pa, ginakomendahan sang Biblia ang mga maalwan sa iban, nga mahimo nalakip sa sini ang paghatag sing kuarta.—Hulubaton 11:25.

Pero, nagpaandam man ang Biblia nga indi dapat mangin pinakaimportante sa aton kabuhi ang kuarta. Ini nagasiling: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo.” (Hebreo 13:5) Ginapakita sini nga dapat nagakaigo ang paggamit naton sang kuarta, kag indi magtinguha sing manggad. Kundi, mangin kontento kita sa kon ano lang ang kinahanglanon gid naton, pareho sang pagkaon, panapton, kag puluy-an.—1 Timoteo 6:8.

**Ngaa nagpaandam ang Biblia parte sa gugma sa kuarta?**

Ang makagod nga mga tawo indi makabaton sing kabuhi nga wala sing katapusan. (Efeso 5:5) Kay ang kakagod, isa ka sahi sang pagsimba sa diosdios, ukon butig nga pagsimba. (Colosas 3:5) Isa pa, ginabalewala sang mga makagod ang maayo nga mga prinsipio para lang makuha ang ila ginahandum. Ang mga “nagadali sa pagmanggaranon indi magpabilin nga wala sing sala,” siling sang Hulubaton 28:20. Mahimo pa gani sila matentar sa paghimo sing krimen, pareho sang pag-blackmail, pagpangilkil, pagpanunto, pag-kidnap, ukon pagpatay.

Bisan pa indi sa tanan nga tion nga ang gugma sa kuarta makapalain sing batasan, may malain gid ini nga mga resulta. Ang Biblia nagasiling nga “ang mga determinado nga mangin manggaranon nagakahulog sa pagsulay kag sa siod kag sa madamo nga binuang kag makahalalit nga handum.”—1 Timoteo 6:9.

Paano kita makabenepisyo sa laygay sang Biblia parte sa kuarta?

Kon indi naton pag-ibaylo sa kuarta ang moral kag espirituwal nga mga talaksan, matigayon naton ang pagrespeto sa kaugalingon, amo man ang pabor kag bulig sang Dios. Para sa mga nagatinguha nga mapalipay ang Dios, sia nagpromisa: “Indi ko gid kamo pagbayaan, kag indi ko gid kamo pagpabay-an.” (Hebreo 13:5, 6) Nagapasalig man sia sa aton nga “ang tawo nga matutom makabaton sing madamo nga pagpakamaayo.”—Hulubaton 28:20.

Mga bersikulo sa Biblia parte sa kuarta

Manugwali 7:12: ‘Pangamlig ang kuarta.’

Buot silingon: Kon gamiton sing maalamon ang kuarta, makabulig ini sa aton kay mahimo ini makahatag sing kasiguruhan.

Lucas 12:15: “Bisan pa ang tawo madamo sing pagkabutang, indi ini makahatag sa iya sang kabuhi.”

Buot silingon: Ang kuarta indi ang pinakaimportante sa kabuhi, kag indi ini makaluwas sa aton.

1 Timoteo 6:10: “Ang gugma sa kuarta amo ang gamot sang tanan nga sahi sang makahalalit nga butang, kag paagi sa paghingamo sa sini nga gugma ang iban nagtalang sa pagtuo kag nagbuno sang ila kaugalingon sang madamo nga kasakit.”

Buot silingon: Indi man malain ang kuarta. Pero ang mga tawo nga nagahigugma sang kuarta—buot silingon amo ini ang pinakaimportante sa ila kabuhi—may anihon gid nga mga problema, pareho sang pagkaguba sang pamilya kag pagbalatian bangod sa sobra nga pag-obra.

Hebreo 13:5: “Dapat nga ang inyo pagkabuhi hilway sa gugma sa kuarta, kag mangin kontento kamo sa mga butang nga yara sa inyo.”

Buot silingon: Imbes nga tinguhaan gid nga magmanggaranon, maalamon kita kon mangin kontento kita sa aton mga kinahanglanon.

Mateo 19:24: “Mas mahapos pa para sa kamelyo nga maglusot sa buho sang dagom sangsa manggaranon nga tawo nga magsulod sa Ginharian sang Dios.”

Buot silingon: Gin-agda ni Jesus ang manggaranon nga pamatan-on nga magsunod sa iya. Pero nangindi sia kay mas importante sa iya ang iya mga pagkabutang. Gani naghatag si Jesus sing paandam. Kon ginauna sang isa ang manggad sangsa Dios, mahimo madula niya ang kahigayunan nga mabuhi sing wala katapusan.

a Ini nga bersikulo gin-translate man nga: “Ang gugma sa kuarta amo ang gamot sang tanan nga sahi sang makahalalit nga butang.”