Ang Ngipon sang Kalokalo

Ang mga limpet ukon kalokalo isa ka sahi sang pakinhason nga daw korte embudo ang balayan kag may mabakod gid nga mga ngipon. Ginahuman ang ila mga ngipon sang manipis pero nadasok sing maayo nga mga nahot sang matig-a nga mineral nga ginatawag goethite nga naangot sa mas mahumok nga protina.

Binagbinaga ini: Ang radula sang kalokalo daw dila. Puno ini sang nagaraya kag nagakurba nga mga ngipon, nga wala pa isa ka milimetro ang kalabaon sang kada isa, kag ginagamit ini sang kalokalo nga daw bal-ag. Dapat mabakod gid kag matig-a ang kada ngipon sang kalokalo para makagos sini ang mga lumot sa kabatuhan nga amo ang pagkaon sang mga kalokalo.

Naggamit ang mga researcher sang pinakamoderno nga microscope para hibaluon kon daw ano kabakod ini nga mga ngipon antes mautod kon butungon. Nadiskobrehan nila nga ang ngipon sang kalokalo mas mabakod pa sa tanan nga materyal nga natestingan nila. Mas mabakod pa ini sangsa lawa sang damang. Ang lider sang mga researcher nagsiling: “Dapat ilugon naton ang desinyo sang ngipon sang kalokalo sa aton mga imbension.”

Nagapati ang mga researcher nga kon ilugon ang materyal sang ngipon sang kalokalo, magamit ini sa paghimo sang mga salakyan, barko, kag eroplano. Magamit man ini para sa paghimo sang mga pustiso.

Ano sa banta mo? Ang mabakod nga ngipon sang kalokalo resulta bala sang ebolusyon? Ukon gindesinyo ini?