PAMANGKOT SANG MGA PAMATAN-ON
Ngaa Kinahanglan Ko Mag-ehersisyo?
Ngaa dapat ako mag-ehersisyo?
Sa pila ka lugar, ang mga pamatan-on indi aktibo sa pisikal, kag makahalit gid ini sa ila panglawas. Amo kon ngaa ang Biblia nagsiling nga ang “paghanas sa pisikal may . . . kapuslanan.” (1 Timoteo 4:8) Binagbinaga ang masunod:
Ang ehersisyo makabulig sa imo nga mangin positibo. Kon aktibo ka sa pisikal, nagapagua ang imo utok sing kemikal nga ginatawag endorphin, nga nagaparelaks kag nagapasadya sa imo. Ang ehersisyo ginatawag sang iban nga natural nga bulong sa depresyon.
“Kon makadalagan ako aga pa, madamo ako sing mahimo sa bilog nga adlaw kag mas malipayon ako. Kanami gid sang akon pamatyag kon makadalagan ako.”—Regina.
Ang ehersisyo makabulig sa imo lawas. Ang balanse nga ehersisyo makabulig sa imo nga mangin mabakod, mapagros, kag may kompiansa sa kaugalingon.
“Kanami gid sang pamatyag ko kon maka-pulo ako ka chin-up (ukon, pull up), pero sang nagligad nga tuig indi ko gani masarangan ang isa! Ang importante, kabalo ’ko nga para ini sa akon ikaayong lawas.”—Olivia.
Ang ehersisyo makapalawig sang imo kabuhi. Ang ehersisyo maayo sa imo tagipusuon kag baga. Makabulig man ini para malikawan ang balatian sa tagipusuon—ang panguna nga kabangdanan sang kamatayon sang mga lalaki man ukon babayi.
“Kon rutina na naton ang pag-ehersisyo, ginapakita naton sa aton Manunuga nga ginaapresyar gid naton ang lawas nga ginhatag niya.”—Jessica.
Ang punto: Ang pag-ehersisyo makahatag sing daku nga benepisyo sa imo panglawas, indi lang subong, pati na sa ulihi. “Indi ka gid magsiling, ‘tani wala na lang ’ko nag-hiking ukon nagdalagan,’” siling sang pamatan-on nga si Tonya. “Kon mag-ehersisyo ako kag indi na mangita sing balibad, wala ko gid ini ginahinulsulan.”
Ang salakyan nga ginapabay-an maguba gid sa ulihi; amo man sini ang matabo sa imo lawas kon indi ka mag-ehersisyo
Ngaa indi ako maka-ehersisyo?
Ari ang pila ka rason:
Indi pa kinahanglan. “Sa banta ko, nagabatyag ang mga pamatan-on nga mabakod gid sila. Daw indi mo maimadyin nga magamasakit ka. Para sa imo, mga tigulang lang ang nagamasakit.”—Sophia.
Wala sing oras. “Masako gid ako katama, kag ginahatagan ko gid sing oras ang pagkaon kag pagtulog, pero daw kabudlay gid hatagan sing panahon ang ehersisyo.”—Clarissa.
Indi miembro sang gym. “Ka mahal mag-ehersisyo, mabayad ka gid kon gusto mo mag-gym!”—Gina.
Pamensari ini:
Ano gid ang imo rason nga indi ka makaehersisyo? Kon tinguhaan mo gid nga malampasan ina, maayo gid ang resulta.
Paano ako makaehersisyo nga makapaayo sa akon panglawas?
Ari ang pila ka paagi:
Indi pag-isalig sa iban ang imo panglawas.—Galacia 6:5.
Likawi ang pagpamalibad. (Manugwali 11:4) Halimbawa, indi mo kinahanglan nga magkadto sa gym para makaehersisyo ka. Mangita sing ehersisyo nga nanamian mo kag himua ini sing regular.
Para may ideya ka, mamangkot sa iban kon ano ang ila ehersisyo.—Hulubaton 20:18.
Maghimo sing iskedyul. Maghimo sing goal kag isulat kon nasunod mo ini para maganahan ka pa gid mag-ehersisyo.—Hulubaton 21:5.
Mangita sing upod sa pag-ehersisyo. Makabulig sia para manamian ka kag masunod mo ang imo iskedyul sa pag-ehersisyo.—Manugwali 4:9, 10.
Paabuta nga indi mo ini mahimo kon kaisa, pero indi mag-untat kag padayuna ang pag-ehersisyo.—Hulubaton 24:10.
Mangin balanse
Ang Biblia nagsiling nga ang mga lalaki kag babayi dapat “makahibalo magpugong sang kaugalingon.” (1 Timoteo 3:2, 11) Gani mangin balanse sa imo pag-ehersisyo. Sa masami, indi maayo ang resulta sang sobra nga pag-ehersisyo. “Wala ako nanamian sang lalaki nga daku sing maskulo pero wala unod ang ulo,” siling sang pamatan-on nga si Julia.
Indi pagsunda ang ginasiling sang iban nga, “Kon daw mapatay ka na, sigeha pa.” Kon sundon mo ini, mahimo mahalitan ang imo lawas kag indi ka na makapokus sa “mas importante nga mga butang” sa kabuhi.—Filipos 1:10.
Isa pa, mahimo man ini magpaluya sang imo buot. Ang pamatan-on nga babayi nga si Vera nagsiling: “Madamo nga babayi ang nagakolekta sang piktyur sang mga tawo nga gusto nila ilugon, kag ginatan-aw nila ini kon daw naluyahan sila. Pero ang matuod, ginakumparar nila ang ila kaugalingon sa sini nga mga tawo kag nagaluya ang ila buot. Mas maayo nga mangin goal mo ang mapagros nga panglawas, indi lang maayo nga hitsura.”