Ang Shell sang Diabolical Ironclad Beetle

Ang diabolical ironclad beetle (Phloeodes diabolicus) makita sa western North America. Base sa mga researcher, masarangan sini nga beetle ang mga 39,000 ka pilo nga kabug-aton sangsa iya lawas kag mabuhi gihapon ini bisan malapakan sang salakyan. Paano masarangan sini nga beetle ang grabe nga pressure?

Ang ibabaw kag idalom nga bahin sang shell sang beetle nagatabuay sa giha sa magtimbang nga bahin sang lawas sini. Ang isa ka bahin sang giha mabakod amo nga wala ini nagatiko ukon nagakabali bisan pa may pressure. Gani maproteksionan sini ang mga organ sang beetle. Ang isa naman ka bahin mas mahumok, gani madali ini mag-deform. Flexible naman ang ikatlo nga bahin sang shell sang beetle, gani makaigo kag makasulod ang beetle sa panit sang kahoy ukon makapanago sa magagmay nga buho sang mga bato.

Dugang pa, ang tinabuan sa tunga sang shell sang beetle may mga blade nga naga-lock pareho sang jigsaw puzzle kag nagabulig ini para ma-distribute ang pressure sa bilog nga shell. Ang mga blade may ara sang mga layer nga nagatapikanay bangod sang mga protein. Kon nagakaipit ang beetle, ang mga protein nagakagisi pero nagaayo man ini gani ma-absorb sini ang pressure nga wala nagakabungkag.

Piktyur sang diabolical ironclad beetle. Makita sa sulod sang shell ang mga giha nga nagakonek sang ibabaw kag idalom nga bahin sang shell kag ang naga-lock nga mga blade sa tinabuan sa tunga sang shell. — Ang mga blade naga-lock pareho sang jigsaw puzzle

Ginatudlo sang pula nga arrow ang mga giha nga nagakonek sang ibabaw kag idalom nga bahin sang shell sang beetle. Ginapakita sang gray nga arrow ang mga blade nga naga-lock sa tinabuan sa tunga sang shell

Ang mga researcher nagsiling nga makabulig ang shell sini nga beetle para makadesinyo sang mas safe kag mas mabakod nga mga bilding, salakyan, kag mga taytay.

Ano sa banta mo? Ang shell bala sang diabolical ironclad beetle resulta sang ebolusyon? Ukon gindesinyo ini?