Isaias 41:10—“Indi Kamo Magkahadlok—Ako Magaupod sa Inyo”

“Indi ka mahadlok, kay kaupod mo ako. Indi ka magkabalaka, kay ako imo Dios. Pabaskugon ko ikaw, huo, buligan ko ikaw, uyatan ko ikaw sang akon tuo nga kamot sang pagkamatarong.”—Isaias 41:10, Bag-ong Kalibutan nga Badbad.

“Indi kamo magkahadlok—ako magaupod sa inyo. Ako ang inyo Dios—wala kamo sing dapat kahadlukan. Kag buligan ko kamo; apinan kag luwason ko kamo.”—Isaias 41:10, Maayong Balita nga Biblia.

Kahulugan sang Isaias 41:10

Ginapasalig ni Jehovaa nga Dios ang mga matutom nga nagasimba sa iya nga buligan niya sila, bisan ano pa ang ila mga problema.

“Kaupod mo ako.” Ginasugid ni Jehova ang rason kon ngaa indi dapat mahadlok ang mga nagasimba sa iya. Ina bangod kaupod sia nila. Kabalo sia kon ano ang nagakatabo sa ila kag ginapamatian niya ang ila mga pangamuyo, nga daw pareho lang nga ara sia sa tupad nila.—Salmo 34:15; 1 Pedro 3:12.

“Ako imo Dios.” Ginapakalma ni Jehova ang mga nagasimba sa iya paagi sa pagpahanumdom sa ila nga bisan ano ang nagakatabo sa ila, sia gihapon ang ila Dios kag ginabaton niya sila bilang iya mga sumilimba. Gani makasalig sila nga bisan ano ang matabo, wala sang makapugong sa iya para buligan sila.—Salmo 118:6; Roma 8:32; Hebreo 13:6.

“Pabaskugon ko ikaw, huo, buligan ko ikaw, uyatan ko ikaw sang akon tuo nga kamot sang pagkamatarong.” Sa sini nga bahin sang teksto, tatlo ka beses nga nagpasalig si Jehova nga suportahan niya sila. Ginlaragway niya kon ano ang iya himuon kon nagakinahanglan sing bulig ang iya katawhan. Kon may matumba, puede mauntay sang Dios ang iya tuo nga kamot para pabangunon sia.—Isaias 41:13.

Ang panguna nga paagi nga ginagamit sang Dios para pabakuron kag buligan ang mga nagasimba sa iya amo ang iya Pulong, ang Biblia. (Josue 1:8; Hebreo 4:12) Halimbawa, ang Pulong sang Dios nagahatag sang praktikal nga kaalam sa mga may kabudlayan, pareho sang kapigaduhon, balatian, ukon kamatayon sang pinalangga. (Hulubaton 2:6, 7) Puede man gamiton sang Dios ang iya balaan nga espiritu, ukon aktibo nga puersa, para buligan ang mga nagasimba sa iya nga makapamensar sing maayo kag indi sila matam-an sang ila mga problema.—Isaias 40:29; Lucas 11:13.

Kaingod nga mga Teksto sang Isaias 41:10

Ini nga mga tinaga nagpaumpaw sa matutom nga mga Judiyo nga ginbihag sang ulihi sa Babilonia. Gintagna ni Jehova nga antes matapos ang pagkabihag sang mga Judiyo, may magalapta nga mga balita nga may kaaway nga magadaug sa palibot nga mga pungsod kag magabutang sa Babilonia sa katalagman. (Isaias 41:2-4; 44:1-4) Bisan pa mahadlukan ang Babilonia kag ang palibot nga mga pungsod sa sini nga balita, ang mga Judiyo indi dapat magkabalaka kay proteksionan sila ni Jehova. Tatlo ka beses nga ginpasalig niya sila nga ‘indi kamo mahadlok.’—Isaias 41:5, 6, 10, 13, 14.

Bisan pa nga ginhambal ini ni Jehova nga Dios para sa matutom nga mga Judiyo nga bihag sa Babilonia sadto, ginpasulat niya ang Isaias 41:10 para mapaumpawan ang tanan nga nagasimba sa iya. (Isaias 40:8; Roma 15:4) Ginabuligan niya sila subong pareho sa pagbulig niya sa iya mga alagad sadto.