Roma 5:8—“Sang mga Makasasala Pa Kita si Cristo Napatay Tungod sa Aton”

“Ginpakita sang Dios ang iya gugma sa aton paagi sa pagtugot nga mapatay ang Cristo para sa aton samtang makasasala pa kita.”—Roma 5:8, Bag-ong Kalibutan nga Badbad.

“Ang Dios nagapakilala sang iya kaugalingon nga gugma sa aton nga sang mga makasasala pa kita si Cristo napatay tungod sa aton.”—Roma 5:8, Ang Biblia sang Philippine Bible Society.

Kahulugan sang Roma 5:8

Ginpakita ni Jehovaa nga Dios ang iya daku nga gugma sang nagpasugot sia nga mapatay ang iya Anak nga si Jesucristo, para sa makasasala nga mga tawo. (Juan 3:16) Bangod makasasala ang mga tawo, ang ila mga ginahimo kag ginahunahuna indi pirme suno sa matarong nga mga kasuguan sang Dios. (Colosas 1:21, 22) Pero, bangod sa ginhimo sang Dios posible na liwat mangin maayo ang aton relasyon sa iya. Ginhimo niya ini “paagi sa kamatayon sang iya Anak.” (Roma 5:10) Gani, posible na kita mangin malapit sa Dios subong kag may paglaum kita nga mabuhi sing wala katapusan.—Roma 5:11; 1 Juan 4:9, 10.

Kaingod nga mga Teksto sang Roma 5:8

Ginsulat ini ni apostol Pablo sa mga Cristiano sadto nga nagaistar sa Roma. Sa kapitulo 5 sang iya sulat para sa mga taga-Roma, ginpaathag ni Pablo kon ngaa ang mga Cristiano dapat magkalipay sa ila paglaum kag magsalig nga matabo gid ini. (Roma 5:1, 2) Ina nga paglaum “wala nagaresulta sa kapaslawan,” bangod ini nga paglaum nabase sa gugma sang Dios paagi kay Jesus. (Roma 5:5, 6) Gintuman gid sing bug-os ni Jesus ang Dios, isa ka butang nga wala ginhimo ni Adan. (Roma 5:19) Bangod wala gintuman ni Adan ang Dios, napanubli sang iya kaanakan ang sala kag kamatayon. (Roma 5:12) Indi gid pareho si Jesus kay Adan, kay gintuman gid ni Jesus sing bug-os ang Dios kag ginhatag ang iya kabuhi para sa mga tawo. Bangod sini, may paglaum na ang mga tawo nga mabuhi sing wala katapusan.—Roma 5:21.