Pamilya nga Daw Gindugmok sang Kalisod, Napaumpawan kag Napabakod

Sang ginbata sang akon asawa nga si Kaye ang amon subang nga si Lauren, indi ako kabalo kon paano mangin maayo nga amay. Amo man gihapon sina ang nabatyagan ko sang natawo ang amon ikaduha nga bata nga si Michael. Kay man, ang akon mga ginikanan pirme lang nagaaway, kag sang ulihi nagdiborsio sila. Gani, bisan pa gusto ko mangin maayo nga amay, wala gid ako sing ideya kon paano ina himuon.

Ang malain pa gid kay sang tin-edyer ako, naadik ako sa drugs kag nangin palainom. Sang nangin adulto na ako, wala gihapon sing direksion ang akon kabuhi. Bangod adik ako kag nangin tahor, madamo ako sing sala nga mga desisyon. Indi na ini maagwanta ni Kaye amo nga ginlayasan niya ako kag gindala niya ang amon duha ka bata. Naglalain gid ako sa sini.

Ginpamangkot ko si Kaye kon ano ang dapat ko himuon para magbalik sia. Nagaistoryahanay na sila ni Gloria, nga isa ka Saksi ni Jehova, gani simple lang ang iya sabat: “Tun-i ang Biblia.” Wala ’ko kabalo kon ano ang buot niya silingon, pero gusto ko nga magpauli sia, gani nagpasugot ako nga makigkita kay Gloria kag sa iya bana nga si Bill.

Ang Pag-istoryahanay nga Nagpabag-o sang Akon Kabuhi

Sang nagkadto sa balay sanday Bill kag Gloria, nagdayaw ako sa ila kasuod sa isa kag isa. Nabal-an ko nga ang ila kabataan, nga mga katubotubo ko, nagahimo sang mapuslanon nga mga butang sa ila kabuhi. Napensar ko sa una nga bes nga basi makabulig gid man ang Biblia para mangin malipayon ang akon pamilya.

Sa sina nga pagbisita, gin-istorya ako ni Bill kag ni Gloria parte sa akon mga problema. Ginpakita nila sa akon ang ginasiling sang Biblia sa Galacia 6:7: “Kon ano ang ginasab-ug sang tawo, ini man ang iya anihon.” Sa pensar ko, ‘Kon ginsunod ko ina nga prinsipio sa akon kabuhi asta subong, nalikawan ko kuntani ang madamo nga problema!’

Sa pagligad sang tion, napamatud-an ko nga nagnami ang akon kabuhi bangod ginsunod ko ang mga prinsipio sa Biblia. Gin-untatan namon ni Kaye ang pagpanigarilyo, kag nauntatan ko man ang iban ko pa nga bisyo. Sang 1985, sang natawo ang amon ikatlo nga bata nga si David, nga ginhayuan namon nga Davey, bal-an ko na kon paano ako mangin maayo nga amay.

Updanay Kami sa Pag-alagad kay Jehova

Bilang mga ginikanan, nabatyagan namon ni Kaye nga samtang ginatudluan namon ang amon kabataan nga palanggaon si Jehova, nagasuod man kami sa iya. Madamo gid kami sang natun-an sa mga publikasyon pareho sang Pagpamati sa Dakung Manunudlu! Maayo man nga halimbawa para sa amon kag sa amon kabataan ang mga pamilya sa amon kongregasyon.

Sang ulihi, nagpayunir ang tanan namon nga kabataan. Sang una nga binulan sang 2004, si Lauren ara sa Spanish nga kongregasyon. Si Michael bag-o lang naggua sa Bethel para magpangasawa, kag sia kag ang iya asawa nga si Diana, manugsaylo sa Guam, para magbulig sa pagbantala didto. Si Davey naman, nga 19 anyos, bag-o lang nag-alagad sa Dominican Republic.

Nalipay gid kami ni Kaye sa mga desisyon nga ginhimo sang amon kabataan. Nabatyagan gid namon ang ginasiling sang 3 Juan 4: “Wala na sang makapahalipay sa akon sangsa sini: Ang mabatian ko nga ang akon mga anak nagalakat sa kamatuoran.” Wala gid kami nagdahom nga sa isa lang ka tawag sa cell phone, magabag-o ang amon kabuhi.

Isa ka Masakit Gid nga Trahedya

Sang Abril 24, 2004, nagpanyapon kami ni Kaye sa gua upod ang duha pa ka mag-asawa. Bangod sobra 100 ka kilometro ang kalayuon sang restawran, nagbiyahe kami nga anom sa akon salakyan. Pagkatapos namon panyapon, nagsaylo kami sa isa ka café para mag-dessert kag ginpapanaug ko sila kag nangita ako sing parkingan. Nag-ring ang akon cell phone. Amigo ko ang nagtawag, kag mabatyagan ko sa iya tingog nga nagalalain sia.

“May malain nga natabo,” siling niya. “Naaksidente si Davey.”

“Grabe gid?” pamangkot ko, bisan pa nahadlok ako sa iya isiling.

Daw indi sia makasabat. Pero bisan nagalalain sia, ginsugiran niya ako nga napatay si Davey.

Sa tapos sang tawag, nangamuyo ako sing kabakod kay Jehova. Dayon nagsulod ako sa café kag ginsilingan sila nga indi maayo ang akon pamatyag kag gusto ko na magpauli. Indi ko gusto nga sugiran si Kaye sang natabo kay Davey asta nga kamihanon na lang.

Nagalalain gid ako sa samtang nagadrayb pauli sa sulod sang isa ka oras kag tunga. Nabatian ko nga eksayted gid si Kaye sa pagsugid sa mga upod namon nga manug-abot si Davey para magbisita sa amon. Samtang nagabiyahe, bisan wala pa makabalo si Kaye nga napatay ang amon bata, nagasulod na sa akon cell phone ang mga text sang mga kilala namon nga nagasiling nga nagabuylog sila sa amon kasubo.

Sa tapos namon madul-ong ang amon mga upod, nagpauli kami. Gintulok ako ni Kaye kag nabal-an niya nga may malain gid nga natabo. “Ano ang natabo?” pamangkot niya. Kabalo ako nga ang masunod ko nga ihambal magadugmok sang tagipusuon ni Kaye, pareho gid sang nabatyagan ko sang gintawgan ako duha ka oras pa lang ang nagligad.

Pag-atubang sa Pagkapatay sang Amon Bata

May naatubang na kami ni Kaye nga mga kabudlayan antes sini, kag kabalo kami nga ginapaumpawan ni Jehova ang iya katawhan. (Isaias 41:10, 13) Pero grabe gid kalain sini. Sa pensar ko, ‘Ngaa natabo ini kay Davey kay kapisan man sa iya sa pag-alagad kay Jehova? Ngaa wala sia ginproteksionan ni Jehova?’

Nagalalain man ang iban namon nga mga bata. Si Lauren daw ikaduha nga iloy ni Davey, gani grabe gid ang iya kasubo bangod sa pagkapatay ni Davey. Amo man ini ang ginbatyag ni Michael. Bisan pa mga lima ka tuig na nga wala sa balay si Michael, nanamian gid sia nga nangin hamtong na ang iya manghod.

Halin sa umpisa, daku gid nga bulig sa amon ang kongregasyon. Halimbawa, samtang daw indi pa mabaton ni Kaye nga napatay na ang amon bata, madamo nga mga kauturan sa kongregasyon ang nagakadto sa balay para paumpawan kami kag buligan. (Hulubaton 17:17) Indi ko gid malipatan ang ila gugma sa amon!

Para madali kami maumpawan sa amon pagpangalisod, padayon namon nga ginahimo ang pagpangamuyo, pagtuon sa Biblia, kag pagtambong sa Cristianong mga miting. Wala sini gindula ang kasakit nga amon nabatyagan. Pero kabalo kami nga importante gid nga padayon nga himuon ang mga butang nga makapabakod sang amon relasyon sa Dios.—Filipos 3:16.

Sa sini nga tion, nagsaylo si Michael kag si Diana malapit sa amon, kag nagbalik si Lauren sa amon English nga kongregasyon. Bangod updanay kami sa masunod nga pila ka tuig, nakabulig ini sa amon nga maghaganhagan ang amon kalisod. Sang napamana ni Lauren si Justin, nangin daku man sia nga bulig sa amon.

Isa ka Mabudlay nga Desisyon

Wala madugay sa tapos napatay si Davey, may ginhimo pa kami para maghaganhagan ang kasakit nga amon nabatyagan. Indi ini mahapos, pero sang ginhimo namon, daku gid ini nga pagpakamaayo. Iistorya ini sa inyo ni Kaye.

“Sang ginsugiran ako sang akon bana nga napatay si Davey, daw gintakluban ako sang langit, kag madugay gid ako naulian. Grabe gid ang akon kalisod amo nga nabudlayan ako maghimo sang bisan ano nga hilikuton. Pirme lang ako nagahibi. Sa tuod lang, may mga bes pa nga naakig ako kay Jehova kag sa kay bisan sin-o nga buhi. Pamatyag ko indi na gid insakto ang akon pagtan-aw sa mga nagakatabo.

“Gusto ko magkadto sa Dominican Republic kag magtener sa lugar nga gin-istaran kag gin-alagaran ni Davey mga pila ka bulan antes sia napatay. Pero, kaluya pa sa akon, kag pamatyag ko indi ko masarangan ini nga biyahe.

“Ginbuligan ako sang akon amiga. Ginsugiran niya ako nga ang mga abyan ni Davey sa Dominican Republic nagapangalisod man kag gusto gid nila makilala ang pamilya ni Davey. Bangod sini, nangisog ako nga magbiyahe.

“Ang pagbiyahe nga ginhimo sang amon pamilya amo gid ang kinahanglan namon. Nabal-an namon nga nakapokus gid si Davey sa pag-alagad kay Jehova. Ang nagaisahanon nga elder sa kongregasyon nga gin-alagaran ni Davey nagsiling nga masaligan gid niya si Davey sa bisan ano nga ginpahimo sa iya.

“Samtang nagalakat kami sa kalye sa lugar nga gin-istaran ni Davey, ginapalapitan kami sang mga tawo kag ginaistoryahan nila kami sang maayo nga mga butang nga ginhimo ni Davey para sa ila. Bal-an ko nga mabuot gid man si Davey, pero bangod sini nga eksperiensia mas nabal-an ko pa gid kon daw ano ang pagtinguha sang akon bata nga ilugon si Jesus.

“Nakilala man namon ang isa sa mga Bible study ni Davey. Isa sia ka lalaki nga nagaistar sa gamay kaayo nga balay kag bedridden bangod sa balatian. Grabe gid ka pigado ang sitwasyon sini nga tawo, pero siling sang mga kauturan sa kongregasyon, ginarespeto gid sia ni Davey. Proud gid ako kay Davey bangod sina!

“Amo ini ang pinakamabudlay nga pagbiyahe nga nahimo ko. Pero, naghaganhagan gid ang amon kalisod kay nakaupod namon ang mga nakakilala kay Davey kag napaumpawan man namon sila. Nabuhinan gid sini ang ginabatyag namon nga kasakit.”

Napalig-on sang Halimbawa ni Davey

Ang Enero 8, 2005 nga isyu sang Magmata! may artikulo parte sa pag-alagad kag pagkapatay ni Davey sa Dominican Republic. Sadto nga tion, wala gid namon napensar nga daku gali ang mangin epekto sini sa mga bumalasa. Halimbawa, sang Mayo 2019, ginkontak kami sang isa ka brother nga si Nick kag amo sini ang ginsugid niya sa amon:

“Sang hingapusan sang 2004, nagaeskwela ako sa kolehiyo kag wala gid ako sing goal sa pag-alagad kay Jehova. Indi ako malipayon. Nangamuyo ako kay Jehova, nga nagapangabay sa iya nga buligan ako nga magamit ko ang akon pagkapamatan-on sa mas maayo nga paagi. Wala madugay, nabasa ko ang eksperiensia ni Davey sa Magmata! Amo gid ini ang sabat sa akon pangamuyo!

“Nag-untat ako sa pag-eskwela kag nagpayunir. Ginhimo ko man nga goal nga magtuon sang Spanish kag magsaylo sa iban nga pungsod. Sang ulihi, nag-alagad ako sa Nicaragua kag nakaeskwela kami sang akon asawa sa School for Kingdom Evangelizers. Kon may magpamangkot sa akon kon ngaa nagpayunir ako, ginasugid ko sa ila ang eksperiensia ni Davey.”

Nasorpresa man kami sang nakilala namon ang isa ka sister nga si Abi, nga gin-asayn sa amon hotel sang mga delegado kami sa 2019 nga Internasyonal nga Kombension sa Buenos Aires, Argentina. Nanamian gid kami sa iya kay mabuot sia kag mapinalanggaon. Para sa amon ni Kaye, daw pareho gid kay Davey ang iya pamatasan.

Sang nakabalik na kami sa amon kuarto sa hotel, ginpadala namon kay Abi ang link sang artikulo sa Magmata! parte kay Davey. Wala madugay, nag-reply sia. Gusto gid niya kami maistorya, gani nakigkita kami sa iya sa lobby. Didto, nagahibi nga ginsugiran kami ni Abi nga bangod sa eksperiensia ni Davey nagpayunir sia sang Septiembre 2011 kag nag-alagad sa malayo nga teritoryo. Sia nagsiling, “Kon may mga kabudlayan ako sa akon asaynment, ginabasa ko liwat ang artikulo.” May dala pa gani sia nga kopya sini!

Ginapakita sini nga mga eksperiensia nga bahin kita sang isa ka bug-os kalibutan nga pamilya. Wala gid sang makatupong sa paghiusa sang katawhan ni Jehova!

Napaumpawan gid kami ni Kaye bangod sa maayo nga epekto sang eksperiensia ni Davey sa madamo nga tawo. Kag amo gid sina ang epekto sa mga kauturan sang tanan nga pinalangga naton nga mga pamatan-on nga ginahatag ang ila pinakamaayo sa pag-alagad kay Jehova. Basi wala lang nila matalupangdan, pero kon makita sang iban ang ila kapisan kag halimbawa, mapalig-on man ang iban nga himuon ang ila masarangan sa pag-alagad kay Jehova.

“Para sa Iya Buhi Sila Tanan”

Sa Lucas 20:37, ginhambal ni Jesus ang ginsiling ni Jehova sang gintawag Niya ang iya kaugalingon nga “Dios ni Abraham kag Dios ni Isaac kag Dios ni Jacob.” Wala nagsiling si Jehova nga sia ila Dios samtang buhi lang sila, kundi Dios gihapon nila sia! Ngaa? Ginasugiran kita ni Jesus sa bersikulo 38: “Para sa iya buhi sila tanan.”

Huo, para kay Jehova, buhi tanan ang iya matutom nga mga alagad. Ginapakita sini nga determinado gid sia nga banhawon sila! (Job 14:15; Juan 5:28, 29) Kumbinsido gid ako nga amo sina ang ginabatyag ni Jehova kay Davey, kag sa tanan Niya nga mga alagad nga napatay.

Gusto ko gid nga makita liwat si Davey, pero ang mas gusto ko pa gid, amo nga magkit-anay sila liwat ni Nanay niya. Grabe gid kasakit para kay Kaye ang natabo. Espesyal gid para sa akon ang ginsiling sa Lucas 7:15: “Ang patay nagbangon kag naghambal, kag gintugyan sia ni Jesus sa iya iloy.”

Sang Septiembre 2005, nag-upod ako kay Kaye sa pagpayunir. Isa gid ka daku nga pribilehiyo nga mag-alagad bilang payunir upod sa akon asawa, sa amon mga bata, kag sa akon mga umagad. Bilang isa ka nahiusa nga pamilya, ginasuportahan namon ang kada isa kag nagapokus kami sa aton matahom nga palaabuton sa bag-o nga kalibutan, sa diin makaupod namon liwat ang amon pinalangga nga si Davey.