Gusto Ko ang Kabuhi nga Nagaalagad sing Bug-os kay Jehova

Halin sang bata pa ako, nanamian gid ako sang kamatuoran. Gusto ko nga idedikar ang akon kabuhi kay Jehova kag magpabawtismo. Sang 13 anyos ako, nalipay gid ako nga malab-ot ina nga goal. Sang 14 ang akon edad, ginpamangkot ako ni Brother Helge Lincka kon napamensaran ko na bala nga magpayunir. Nadumduman ko gid ini nga tion. Bisan pa nagaalagad nga mga temporary pioneer (nga ginatawag subong nga auxiliary pioneer) si Nanay kag si Tatay, wala gid ako sang ideya kon ano ang buot silingon nga mangin regular pioneer. Ang pamangkot ni Brother Linck nagpukaw gid sa akon tagipusuon nga maghandum nga dugangan ang akon pag-alagad kay Jehova.

Paghanda sa Paghingabot

Sang 1974, ang kinagamo sa pulitika sa Ethiopia nagresulta sa pagpang-aresto, pagpamatay kag kabudlayan. Sina nga tion, indi kami makapamalaybalay kag makatipon lang kami sa gamay nga grupo. Ginhanda kami sang amon ginikanan sa dugang pa nga paghingabot. Ang mga prinsipio sa Biblia nakabulig sa amon nga maintiendihan ang kahulugan sang neutral nga tindog bilang mga Cristiano. Natun-an namon nga buligan kami ni Jehova nga mabal-an kon ano ang dapat ihambal kon interogahon kami kag kon san-o kami dapat maghipos.—Mateo 10:19; 27:12, 14.

AFP PHOTO

Sang naggradweyt ako, nag-obra ako sa Ethiopian Airlines. Isa ka aga sang nagkadto ako sa ulubrahan, gin-congratulate ako sang akon mga upod sa obra kay ginpili ako nga pangunahan ang parade para sa pagselebrar sang anibersaryo sang gobierno. Ginhambalan ko dayon ang akon supervisor nga bangod neutral ako, indi ako makaentra sa selebrasyon.

Pagkasunod nga adlaw, nagaobra ako sa airport sang nakita ko sa malayo ang mga lalaki nga may ginauribay nga mga armas kag nagapakadto sa ticket counter. Abi ko may arestuhon sila nga tawo nga gusto magpalagyo sa pungsod. Pero, gintudlo nila ako! Natingala ako kon ngaa ako ang ila ginapangita. Gulpi lang nagbag-o ang abi ko normal lang nga adlaw sa akon obra.

Nakabaton sang Bulig sa Prisuhan

Gindala ako sang mga soldado sa isa ka opisina kag gin-interogar ako sang pila ka oras. “Sin-o ang nagasuhol sa mga Saksi ni Jehova?” gusto gid nila ini mabal-an. “Nagaobra ka bala para sa Eritrean Liberation Front? Nagaobra ka bala ukon ang imo tatay para sa gobierno sang United States?” Bisan pa nga ini nga sitwasyon makapa-stress gid, nangin kalmado ako, salamat sa bulig ni Jehova.—Filipos 4:6, 7.

Pagkatapos ako gin-interogar, gindala ako sang mga soldado sa isa ka balay nga ginhimo nga prisuhan kag ginbutang ako sa isa ka kuarto nga ang kalaparon 28 metros kuadrado. Puno ini sang 15 ka bataon nga babayi nga ginpriso bangod sa ila ginhimo ukon mga ginapatihan sa pulitika.

Sina nga gab-i, nagahigda ako sa salog kag ginasuksok ko pa ang akon uniporme sa airline. Indi ako mahim-os kay nabal-an ko nga nabalaka sa akon ang akon mga ginikanan kag mga utod. Kabalo sila nga gin-aresto ako, pero wala sila kabalo kon diin ako gindala. Ginpangabay ko si Jehova nga buligan ang akon pamilya nga mabal-an kon diin ako ginpriso.

Pagkaaga pagbugtaw ko, nakilala ko ang isa ka bataon nga guardia. Gintulok niya ako nga daw indi makapati kag nagsiling, “Aster, ngaa ari ka diri?” Ginpangabay ko sia nga kadtuan ang balay sang akon mga ginikanan kag sugiran sila kon diin ako. Pagkahapon, nakabaton ako sang pagkaon kag mga bayo halin sa akon mga ginikanan. Ginsugiran sila sang guardia kon diin ako. Ginsabat ni Jehova ang akon pangamuyo! Ginpasalig ako sini nga eksperiensia nga wala ako nagaisahanon.

Wala ako ginpasugtan nga makabaton sang Biblia ukon sang bisan ano nga publikasyon, kag indi man puede makabisita ang akon pamilya kag mga abyan. Pero, ginpalig-on ako ni Jehova paagi sa akon mga upod sa prisuhan. Gina-preachingan ko sila kada adlaw, kag nagdayaw sila sa kamatuoran parte sa Ginharian sang Dios. Pirme nila ako ginasilingan: “Nagapakig-away kami para sa gobierno sang tawo, pero ikaw ’ya nagapakig-away para sa gobierno sang Dios. Indi gid magkompromiso, bisan pa pahugon ka nila nga patyon!”

Kon kaisa, ginainterogar kag ginasakit sang mga guardia ang mga priso. Isa ka gab-i, sang mga alas 11 na, gindala nila ako para interogahon. Sang nakalab-ot kami sa kuarto nga ginagamit sa pag-interogar, madamo sila sang akusasyon sa akon. Nagsiling sila nga wala ko ginasuportahan ang gobierno. Kag sang nangindi ako nga maghambal sang isa ka slogan sa pulitika, ginsakit ako sang duha ka lalaki nga guardia. Pila ka beses ako nga gin-interogar sang mga guardia pareho sini. Sa kada tion nga ginahimo nila ini, ginapautwas ko gid ang akon ginabatyag sa pangamuyo kay Jehova, kag nabatyagan ko nga ginabuligan niya ako.

Pagligad sang tatlo ka bulan, may isa ka guardia nga nagsiling nga hilway na ako. Bisan pa nga nakibot ako kag excited, nasubuan man ako kay na-enjoy ko gid ang pagsugid sang paglaum parte sa Ginharian sa bataon nga mga babayi sa prisuhan.

Pila ka bulan sa tapos ako makagua, sang wala ako sa balay, may mga soldado nga nag-abot para arestuhon ang tanan nga tin-edyer sa amon pamilya. Gin-aresto nila ang duha ko ka utod nga babayi kag ang isa ko ka utod nga lalaki. Sina nga tion, nagdesisyon ako nga mas maayo nga maghalin ako sa amon pungsod. Bisan pa nasubuan ako nga biyaan ang akon pamilya, ginpalig-on ako ni Nanay nga mangin mabakod kag magsalig kay Jehova. Wala madugay, nagsakay ako sa isa ka flight pakadto sa United States. Sina man nga gab-i, nagkadto ang mga soldado sa amon balay para arestuhon ako kuntani sa ikaduha nga bes. Sang wala nila ako maabtan sa balay, nagdalidali sila pakadto sa airport. Pero sang nakalab-ot sila sa airport, nakalupad na ang eroplano nga ginsakayan ko.

Nag-abot ako sa Maryland kag gin-abiabi ako nanday Haywood kag Joan Ward, ang mga misyonero nga nag-Bible study sa akon mga ginikanan. Lima ka bulan sang ulihi, nalab-ot ko ang akon goal nga mangin payunir. Ang bata sang mag-asawa nga Ward, nga si Cyndi, amo ang akon nangin partner sa pagpayunir kag madamo gid kami sang masadya nga eksperiensia sa ministeryo.

Masako Gid sa Pag-alagad sa Dios sa Bethel

Sang summer sang 1979, nagbisita ako sa Bethel sa New York kag nakilala ko si Wesley Parker. Nanamian gid ako sang iya mga kinaiya kag sang iya espirituwal nga mga goal. Sang 1981, nagpakasal kami, kag nagsaylo ako sa Wallkill, New York, para mag-alagad upod kay Wesley sa Bethel. Gin-asayn ako sa Housekeeping kag Dry Cleaning department kag sang ulihi sa MEPS team sa Computer Department. Ang pag-alagad sa Bethel naghatag sa akon sang kahigayunan nga mangin masako sa pag-alagad kay Jehova. Samtang ginahimo ko ina, mas nakilala ko ang mga kauturan nga nangin abyan ko asta subong.

Pero didto sa Ethiopia, ang akon pamilya nagabatas sang grabe nga paghingabot kag nabalaka gid ako. Ang akon tatlo ka utod nga gin-aresto, ara gihapon sa prisuhan.b Kada adlaw, kinahanglan sang akon nanay nga maghanda kag magdul-ong sang pagkaon kay wala sila ginapakaon sa prisuhan.

Sa sining mabudlay gid nga tion, si Jehova ang akon dalangpan kag ginpaumpawan gid ako kag ginsuportahan sang pamilya Bethel. (Marcos 10:29, 30) Isa ka adlaw, ginsilingan ako ni Brother John Booth: “Nalipay gid kami nga kaupod ka namon diri nga nagaalagad sa Bethel. Nangin posible ini kay ginpakamaayo ka ni Jehova.”c Ginpasalig gid ako sini nga mga tinaga nga ginpakamaayo ni Jehova ang akon desisyon nga maghalin sa Ethiopia kag sia na ang magaatipan sa akon pamilya.

Pag-alagad kay Jehova Bilang Pamilya

Sang Enero 1989, nabal-an namon nga nagabusong ako. Sa umpisa, nakibot gid kami! Pero pagligad sang pila ka adlaw, ang amon kabalaka nabuslan sang kalipay. Nagapamensar kami gihapon kon mangin ano kami nga klase sang ginikanan, kon diin kami maistar, kag kon ano ang amon palangabuhian kon maggua kami sa Bethel.

Sang Abril 15, 1989, ginkarga namon ang tanan namon nga gamit sa amon kotse kag nagbiyahe pakadto sa Oregon. Didto namon plano nga magpadayon sa amon bug-os tion nga pag-alagad bilang mga payunir. Pero wala madugay sang nakaabot kami, ginsilingan kami sang iban namon nga mga abyan nga may maayo man nga intension nga indi rasonable nga magpayunir kami. Matuod man nga diutay lang ang amon kuarta kag manugbata pa ako. Ano ang himuon namon? Sa sina nga tion, ginbisitahan kami sang amon manugtatap sang sirkito nga si Brother Guy Pierce, kag sang iya asawa nga si Penny.d Ginpalig-on nila kami nga lab-uton lang ang amon goal. Gani nagpayunir kami kag nagsalig kay Jehova nga buligan kami. (Malaquias 3:10) Padayon kami sa pagpayunir sang natawo ang amon subang nga lalaki nga si Lemuel kag sang natawo ang ikaduha namon nga bata nga lalaki nga si Jadon.

Ang pagpayunir samtang gagmay pa ang amon mga bata, isa gid ka eksperiensia nga indi namon malipatan. Ang pagpayunir nakahatag gid sa amon sang madamo nga kahigayunan nga mapaathag ang Biblia sa amon mga kaingod kag sa amon kabataan. (Deuteronomio 11:19) Pero, sang natawo ang amon ikatlo nga bata nga lalaki nga si Japheth, kinahanglan nga mag-untat anay kami sa pagpayunir.—Miqueas 6:8.

Gintudluan Namon ang Amon mga Bata nga Alagaron si Jehova

Narealisar namon nga ang pinakaimportante nga responsibilidad namon nga ginikanan amo ang pagtudlo sa amon mga bata nga lalaki sang parte kay Jehova kag pagbulig sa ila nga magsuod pa gid sa Iya. Para mahimo ini, gintinguhaan gid namon nga mangin excited sila sa amon family worship. Sang gagmay pa sila, ginabasa namon ang publikasyon nga Pagpamati sa Dakung Manunudlu kag Ang Akon Libro sang mga Sugilanon sa Biblia. Ginadrama pa gani namon ang pila ka istorya sa libro. Ako lang ang babayi sa amon pamilya, gani sang gindrama namon ang istorya parte kay Jezebel, ako ang nangin Jezebel. Nasadyahan gid ang mga bata nga ginatiklod nila ako para mahulog sa pulungkuan kag sila kuno ang mga ido! Dugang pa sa amon family worship, isaisa nga gina-Bible study ni Wesley ang amon mga bata.

Palangga gid namon ang amon mga bata, kag ginapangamuyo namon nga mangin suod gid kami nga pamilya. Samtang nagadaku sila, gintudluan namon sila sang mga ulubrahon sa balay. Gapanghugas sila sang pinggan, gapaninlo sang ila kuarto, kag gapanglaba sang ila mga bayo. Natun-an man nila magluto.

Nakatuon sang mga leksion ang amon mga kabataan kag pati man kami. May mga tion nga grabe gid ang amon reaksion kag nakahambal kami sang sakit sa amon mga bata ukon sa isa kag isa. Sa sina nga mga tion, nagapaubos kami kag nagapangayo sang kapatawaran.

Pirme namon ginaimbitar sa amon balay ang mga kauturan sa amon kongregasyon para mapakita ang pagkamaabiabihon. Ginaimbitar man namon ang nagabisita nga mga Bethelite, mga misyonero, mga nagalakbay nga manugtatap, kag ang mga nagaalagad diin daku ang kinahanglanon. (Roma 12:13) Kon may mga bisita kami, wala namon ginapahampang sa lain nga kuarto ang amon mga bata. Nagaupod sila sa amon kag nagapamati sa mga istorya kag mga eksperiensia. Sa masami, mas madamo pa nga detalye sang pag-istoryahanay ang madumduman nila sangsa amon ni Wesley.

Nagapangabudlay gid kami ni Wesley para mangin malipayon ang amon kabuhi sa pag-alagad kay Jehova. Halimbawa, abanse kami nga nagaplano kag nagatipon sang kuarta kag bakasyon para makabiyahe kami sa iban nga mga pungsod. Sa kada biyahe namon, nagabisita kami sa branch office, naga-attend sa mga miting, kag nagaupod sa ministeryo. Ginhigugma gid namon ang organisasyon ni Jehova sa bilog nga kalibutan kag mas nagsuod pa gid kami bilang pamilya.

Mapisan Pirme sa Amon Pag-alagad

Natalupangdan namon nga madamo nga tawo ang nagahambal sang Spanish sa amon lugar, pero indi sila pirme ma-preachingan. Gani sang gagmay pa ang amon kabataan, ginpamangkot namon si Brother Pierce kon ano ang masiling niya sa plano namon nga magsaylo sa kongregasyon nga nagahambal sang Spanish. Nagsiling sia nga nagayuhum, “Kon isa ikaw ka mangingisda, kadto ka kon diin ang isda.” Bangod sina nga pagpalig-on, nagsaylo kami sa kongregasyon nga nagahambal sang Spanish sa Woodburn, Oregon. Nalipay gid kami nga makasugod sang pila ka nagauswag nga mga Bible study, nabuligan ang pila nga makapabawtismo, kag makita ang isa ka gamay nga group sang Spanish nga mangin isa ka kongregasyon.

May tion nga nadulaan si Wesley sang obra kag kinahanglan namon magsaylo sa California para sa iya bag-o nga obra. Duha ka tuig sang ulihi, nagdesisyon kami ni Lemuel, kag Jadon nga magpayunir. Sang 2007, nalipay gid ako nga makaeskwela sa Pioneer Service School upod sa ila. Wala madugay pagkatapos sang amon klase, natalupangdan namon nga madamo sang nagahambal sang Arabic sa amon teritoryo. Gani sa tapos sang 13 ka tuig nga pagpakig-upod sa kongregasyon nga nagahambal sang Spanish, nagdesisyon ang amon pamilya nga magsaylo sa kongregasyon nga nagahambal sang Arabic. Nalipay gid kami nga isugid ang kamatuoran sa madamo nga immigrant nga nagahambal sang Arabic pati man sa iban nga pungsod kon may espesyal nga preaching campaign. Padayon kami nga nagaalagad bilang mga payunir sa Arabic nga kongregasyon sa San Diego, California.

Maayo gid nga bana kag ulo sang pamilya si Wesley. Ginarespeto gid niya ang organisasyon ni Jehova. Wala gid sia sang ginsiling nga negatibo parte sa Bethel ukon sa mga kahimusan sa kongregasyon. Pirme positibo ang iya ginasiling parte sa organisasyon. Nagapangamuyo kami sing magkaupod kag ginalakip man niya ako sa iya mga pangamuyo. Kon makaatubang kami sang mabudlay nga mga sitwasyon, napaumpawan ako kag nagakalma bangod sang iya mga pangamuyo.

Kon pensaron ko ang amon kabuhi, madumduman ko ang amon kalipay sa pag-alagad sing bug-os tion, pagsagod sang pamilya, kag pag-alagad sa mga kongregasyon diin daku ang kinahanglanon. Nakita namon nga ginapakamaayo ni Jehova ang mga nagauna sa iya, kag wala gid kami ginakulang sang bisan ano. (Salmo 37:25) Kumbinsido gid ako nga ang pagkabuhi nga nagaalagad sing bug-os kay Jehova amo ang pinakamaayo nga desisyon nga nahimo ko.—Salmo 84:10.