Nalipay Ako kay Ginpili Ko Ini nga Kabuhi

Nagdaku ako sa isa ka uma sa Australia. Natun-an sang akon mga lolo kag lola kag sang akon mga ginikanan ang kamatuoran sang mga 1950. Nagsugod ako sa pagbantala sang 6 anyos ako kag nabawtismuhan sa edad nga 13. Pirme man ako naga-auxiliary pioneer kon sira-klase. Palangga ko gid si Jehova kag gusto ko sia alagaron sa bilog ko nga kabuhi.

Sang 15 ang akon edad, natalupangdan sang akon mga coach sa eskwelahan nga sagad ako sa sports. May isa gani ka professional rugby league team nga nag-offer sa akon sang sports scholarship. Gusto ko man tani mangin sikat nga rugby player, pero nadedikar ko na ang akon kaugalingon kay Jehova. Ginhambalan ako ni Tatay nga pamensaran ko anay sing maayo ang akon dedikasyon antes ako magdesisyon kon bala batunon ko ang offer. Ginpati ko ang ginsiling ni Tatay kag narealisar ko nga indi ko puede alagaron si Jehova kag dayon mangin sikat sa sports, gani wala ko ginbaton ang offer. Pila ka bulan sang ulihi, ang Australian Institute of Sport sa Canberra nag-offer man sa akon sang scholarship para mangin marathon runner kag irepresentar ang Australia sa Commonwealth Games ukon sa Olympic Games. Pero bangod palangga ko ang Dios kag gusto ko gid tumanon ang akon dedikasyon sa iya, wala ko ginbaton ini nga offer.

Dugay ko na nga ginapamensaran ang pagpayunir. Gani sang naka-graduate na ’ko, nagpayunir ako. Pero namigado ang amon pamilya gani nag-untat ako sa pagpayunir. Nagsugod ako sa pag-obra sing full-time bilang drayber sang mga makinarya sa pagpanguma. Bisan manugbeinte pa lang ang akon edad, nagapangabuhi na ako sing isahanon. Nagaalagad pa man ’ko kay Jehova, pero daw nangin rutina na lang ini. Naluyahan gid ako kag naapektuhan man ang akon relasyon kay Jehova. Ang akon mga abyan mga palahubog kag imoral kag daw gusto ko man sundon ang ila mga ginahimo. Napabay-an ko na ang akon relasyon kay Jehova para lang unahon ang pagpangalipay.

Gusto ko bag-uhon ang akon kabuhi gani nagsaylo ako sa banwa nga malayo sa mga kaupdanan ko sang una. Gintinguhaan ko mangin suod liwat kay Jehova kag magbalik sa pagpayunir. Wala madugay, nakilala ko si Leann McSharry, isa ka simple kag mahuluy-on nga babayi. Isa sia ka payunir. Kag nangin suod kami nga mag-abyan. Gin-istoryahan namon ang parte sa amon mga goal, lakip na ang pag-alagad bilang misyonero. Ginkasal kami sang 1993 kag gusto gid namon nga duha nga magpagiya kay Jehova sa amon kabuhi.

Paglab-ot sang Amon mga Goal

Sina nga tuig, nagpayunir man ako upod kay Leann. Gusto gid namon nga pasimplehon ang amon kabuhi kag likawan ang pagpangutang. Amo nga nagbakal kami sang daan nga caravan ukon trailer nga ginaangot sa salakyan kag diri kami nag-istar. Sa sulod sang anom ka tuig, nagsaylosaylo kami sa mga lugar diin diutay ang mga manugbantala. Sarisari ang amon ginsudlan nga obra para masuportahan ang amon kinahanglanon. Nagabantala kami upod sa gagmay nga mga kongregasyon sa malapad, patag, kag mamala nga mga lugar sa Queensland. Pirme kami nagapaligad sang gab-i sa naligwin nga mga lugar kag nagahiwat sang mga miting sa wayang ukon sa community hall sa sina nga lugar. Nalipay gid kami sa amon ginahimo. Pero, nagapamensar kami gihapon, ‘Ano pa gid ayhan ang amon mahimo para kay Jehova?’ Wala madugay, nabal-an namon ang sabat.

Gin-agda kami sang branch nga mangin mga misyonero sa lain nga pungsod. Pero nagbatyag kami nga indi namon ini masarangan ukon indi kami kalipikado kay wala pa kami nakaeskwela sa Gilead. Nanamian gid kami magbantala pero bangod diutay lang ang amon mga Bible study sa amon malayo nga mga asaynment, pamatyag namon indi kami maayo nga mga manunudlo.

Ginsugid namon ang amon nabatyagan kay Max Lloyd, nga isa ka miembro sang Branch Committee.a Ginpasalig niya kami nga bisan pa pamatyag namon indi namon ini masarangan, pero kon handa kami nga magpagamit kay Jehova, buligan niya kami nga mahimo ang asaynment nga ginhatag niya sa amon. Ginpalig-on niya kami pareho sang isa ka tatay, gani ginbaton namon sing malipayon ang amon asaynment nga magkadto sa Sri Lanka.

Isa ka Mabudlay nga Asaynment

Sang 1999, nag-abot kami sa Colombo, ang kapital sang Sri Lanka. Lain gid ini sa amon matawhay nga kabuhi sa Australia! Nakaatubang kami sang kinagamo, kapigaduhon, kagutok bangod sa kadamo sang tawo, mga nagapakilimos, kag mabudlay nga lenguahe. Pero ang nanamian gid namon sa Sri Lanka amo ang aton mapinalanggaon nga mga kauturan kag ang mapainubuson nga mga tawo nga wala pa nakakilala kay Jehova.

Naasayn kami sa Kandy nga isa ka patag nga siudad sa ibabaw sang bukid nga napalibutan sang plantasyon sang tsa kag mga kagulangan. Kilala gid ini nga siudad bangod sa madamo nga templo sang mga Buddhist. Diutay lang nga tawo sa sini nga lugar ang nakakilala sa ila mahigugmaon nga Manunuga. Ang mga kauturan sa amon kongregasyon nagagamit sang Sinhala kag Tamil nga mga lenguahe, kag amo man ini ang ginagamit sa mga miting. Mabudlay gid magtuon sang Sinhala nga lenguahe, pero naapresyar gid sang mga kauturan kag mga Bible study ang amon mga panikasog bisan pa kon kaisa naham-ot sila sa amon mga sala kon maghambal kami!

Ang pagtuon sang lenguahe indi amo ang pinakamabudlay sa amon nga asaynment. Diri lang kami nakaeksperiensia sang mapintas nga pagpamatok sa kamatuoran. Isa ka bes, ginpalibutan kami sang akig nga grupo sang mga lalaki. Ginsunog sang iban sa ila ang amon literatura, samtang ang iban naman nagasipa kag nagakastigo sa amon nga duha sang upod ko nga brother. Samtang ginahimo nila ini sa amon, nagapangamuyo kami kay Jehova nga buligan niya kami nga mangin kalmado kag dumdumon kami kon mapatay gid man kami. Mayo lang gid kay naghalin sila. Grabe ang amon kakulba sang naghalin kami sa sina nga baryo, pero nagapasalamat gid kami kay Jehova nga ginproteksionan niya kami.

Sang ulihi, nangin komportable na kami sa Sri Lanka. Bisan pa may inaway didto, nalipay gid kami nga makita kon paano ginabuyok ni Jehova ang sinsero nga mga tawo sa iya nahiusa nga pamilya. Madamo gid kami sang manami nga eksperiensia sa sining matahom nga isla. Pero pagligad lang sang duha ka tuig, nagpadala sa pressure ang mga awtoridad kag nagpati sila sa mga lider sang relihion, gani kinahanglan maghalin sang mga misyonero sa pungsod.

Sa masunod nga mga semana, indi gid kami mahim-os kag nagakabalaka kami. Ginapamensar namon kon ano na ang matabo sa amon. Gin-asayn kami sang Nagadumala nga Hubon sa Papua New Guinea. Sang Septiembre 2001, nag-abot kami sa Port Moresby, ang kapital sini nga pungsod.

Pinasahi nga mga Eksperiensia sa Papua New Guinea

Bisan malapit sa Australia ang Papua New Guinea, lain gid ang kultura kag ang pagkabuhi diri. Gani, kinahanglan naman namon liwat mag-adjust. Nagtuon kami sang Tok Pisin nga lenguahe nga amo ang ginahambal sang kalabanan nga mga tawo sa pungsod. Kay man, may sobra 800 ka lenguahe sa sini nga pungsod.

Pagkatapos sang tatlo ka tuig nga pagmisyonero sa banwa sang Popondetta, gin-asayn kami nga mag-alagad sa sirkito. Wala gid namon ginpaabot nga gamiton gali kami ni Jehova sa sini nga asaynment. Halin sang una, naapresyar ko gid ang paggiya, kahamtong, kag ang paagi sang pagtudlo sang mga nagalakbay nga manugtatap, pero nagbatyag ako nga daw indi ko masarangan ini nga asaynment. Halin sang gamay pa ako, gusto ko gid nga mangin misyonero pero wala gid nagsulod sa pensar ko nga mangin isa ka nagalakbay nga manugtatap. Indi gihapon ako makapati nga ginhatagan ako ni Jehova sining espesyal nga asaynment.

Sa kalabanan nga banwa nga amon mabisitahan, may ara sang kuryente, tubig, kag may katre gid ang kuarto nga amon mateneran. Pero, wala gid sang amo sini kon ara kami sa mga uma. Nagatulog kami sa gagmay nga mga payag, nagadabok kami sa gua para makaluto, kag nagapaligo kami sa mga sapa ukon suba. Pero kon may ara sang mga buaya, nagasag-ob lang kami kag didto nagapaligo sa payag.

Kinahanglan gid namon sang kusog para masarangan namon ini nga asaynment. Pero nagasalig kami nga kon ‘gamiton namon ang amon bug-os nga kusog,’ buligan gid kami ni Jehova nga mangin madinalag-on. (Hukom 6:14) Madamo nga mga kongregasyon kag grupo nga amon ginabisitahan ang mabudlay kadtuan. Kay man, kinahanglan namon mag-agi sa masiot nga kagulangan, katunggan, kag mataas nga kabukiran nga indi maayo ang dalan. Nagabiyahe kami sakay sa salakyan, baruto, eroplano, kag kon kaisa kinahanglan namon maglakat para makadtuan ang mga kauturan.b

Para bisitahan ang isa ka kongregasyon malapit sa border sang Indonesia, nagabiyahe kami sing sobra 350 ka kilometro sa indi sementado nga dalan. Sa sina nga ruta, sobra 200 ka beses kami nga nagatabok sa mga sapa kag suba kag diutay lang gid ang may taytay. Sa sulod sang madamo nga tinuig, inoras kami nga nagakutkot kag nagatulod sang amon salakyan nga naguot sa madalom nga lunang para lang makadtuan ang amon pinalangga nga mga kauturan nga malipayon nga nagahulat sa amon nga may napreparar na nga pagkaon.

Kon magkadto kami sa mga baryo nga ara sa mataas nga kabukiran, nagasakay kami sa gamay nga eroplano. Sa masami madamol ang panganod gani kinahanglan sang piloto nga mangita sang paagi para makita niya ang airstrip. Dayon, kinahanglan niya anay maglabay sa runway para tan-awon kon may ara sang mga bata ukon sapat. Kag kon masigurado niya nga puede na maka-landing, nagahanda kami sa paghugpa sa malutak kag indi sementado nga runway nga ara sa ibabaw sang bukid nga sobra 2,100 ka metro ang kataason. Kon kaisa, para makapauli kami kinahanglan namon mag-take off sa runway nga lip-ot lang katama kag ara sa pil-as.c

Kon kaisa, nagasaka kami sa mataas nga mga bukid ukon nagaagi sa katunggan nga grabe kainit kag kapaang. Ang amon backpack puno pa sang mga publikasyon kag sang importante nga mga kinahanglanon. Bangod kaupod namon ang matutom nga mga kauturan, masadya kag makapalig-on gid ang amon pag-istoryahanay samtang nagalakat kami.

Pareho gid ang amon nabatyagan sa ginsiling ni apostol Pablo sa 1 Tesalonica 2:8: “Bangod palangga namon kamo, determinado kami nga ipaambit sa inyo . . . ang amon man kaugalingon.” Nabal-an namon nga amo man sina ang handa himuon sang mga kauturan para sa amon, handa pa sila gani nga mapatay para proteksionan kami sa mga kriminal nga may mga armas. Isa ka bes, ginhanaan si Leann sang isa ka lalaki sang binangon. Wala ko sia nabuligan kay ato ’ko sa pihak nga baryo. Maayo lang kay may brother nga nagtambag. Ginpunggan sang iban nga tawo ang lalaki kag nakapalagyo ang brother nga may gamay lang nga pilas. Ginsuportahan gid kami ni Jehova adlaw-adlaw sa sining magamo nga pungsod para maamanan sa espirituwal ang mga kauturan.

Bangod diutay lang ang ospital sa Papua New Guinea, mabudlay gid magpabulong didto. Sang 2010, diutayan na lang mapatay si Leann bangod sang bacterial infection, gani nagpauli kami dayon sa Australia para magpabulong. Paagi sa bulig ni Jehova, nangin kalmado lang kami. Wala madugay, nakakita gid man sang antibiotic ang mga doktor para sa iya. Ang isa ka doktor nagsiling: “Bangod nagaalagad kamo sa Dios, ginbuligan gid niya kamo.” Pila ka bulan sang ulihi, nagbalik kami sa amon asaynment.

Masako Gihapon sa Australia

Sa masunod nga mga tinuig, kinahanglan namon magbalik sa Australia para sa dugang nga pagpabulong kay Leann. Sang 2012, ginsilingan kami sang branch nga magtener kami diri para maatipan ang amon panglawas. Tinuig kami nga wala nakapauli diri, amo nga kinahanglan namon mag-adjust sa pisikal kag ilabi na sa mental kag emosyonal. Nasubuan kami nga biyaan ang amon asaynment kag ang amon mga kauturan nga ginpalangga na gid namon. Nagbatyag kami nga daw wala namon nahatag ang amon pinakamaayo kag indi na kami magamit ni Jehova. Bangod dugay kami nga wala nakapauli sa Australia, nabudlayan kami nga mangin komportable diri. Sa sina nga tion, kinahanglan gid namon ang bulig sang amon mga kauturan.

Sang nag-ayo na si Leann, nag-alagad kami sa Wollongong, sa south sang Sydney, New South Wales. Sobra isa ka tuig ang nagligad, nakabaton kami sang imbitasyon nga mag-eskwela sa Bible School for Christian Couples (ginatawag subong nga School for Kingdom Evangelizers). Dayon gin-asayn kami sang branch sa Australasia nga mag-alagad sa sirkito. Pila ka tuig namon nga ginbisitahan ang mga kongregasyon kag mga group sa masako nga mga siudad, malayo nga mga banwa sa desyerto, kag sa mga baryo sa higad sang baybay. Ang amon asaynment subong amo ang mga lugar sa desyerto sa northwest sang Australia kag ang bilog nga Timor-Leste.

Kaupod ko pirme ang akon asawa sa pag-alagad kay Jehova. Mapinalanggaon gid sia kag ginasuportahan niya ako pirme. Isa gid sia ka espesyal nga regalo halin kay Jehova. Wala gid si Leann nagapangindi sa bisan ano nga asaynment bisan pa mabudlay ini. Kon may nagapamangkot sa iya kon paano niya nasarangan ang mga kabudlayan, nagasiling sia: “Ginasugid ko kay Jehova ang tanan.” Dayon, ginabasa niya ang Pulong sang Dios, kag ginatugutan niya si Jehova nga giyahan sia sa iya ginahunahuna, ginabatyag, ukon ginahimo.

Wala gid ako naghinulsol nga ginpili ko nga alagaron si Jehova sa akon kabuhi imbes nga mangin sikat sa sports sa sini nga kalibutan. Nakita ko gid nga puede kita hanason ni Jehova sa bisan ano man nga hilikuton nga gusto niya nga himuon naton basta handa lang kita nga batunon ang bisan ano nga asaynment. Kon may ara ako sang problema ukon may kinahanglan desisyunan, natun-an ko nga kinahanglan ko gid anay mangamuyo kag mangayo sang kaalam kag balaan nga espiritu kada adlaw. Ginpakamaayo gid kami ni Jehova kag ginhatagan sang malipayon nga kabuhi. Isa gid sia ka mapinalanggaon nga Amay kag gusto namon makita kon ano pa ang iya ipahimo sa amon bilang mga “suludlan nga daga.”—2 Corinto 4:7.