Pagbulig sa mga Biktima sang Kalamidad sang 2021—Wala Gid Ginapabay-an ang Aton mga Kauturan

Sa tion sang 2021 nga tuig sang pag-alagad,a padayon nga nag-antos ang kalibutan bangod sa COVID-19. Subong sang ginpaathag sa artikulo nga “Pagbulig sa mga Kauturan sa Bilog nga Kalibutan nga Naapektuhan sang Pandemic,” naggasto kita sing minilyon ka dolyarb sa pagbulig sa mga naapektuhan sang pandemic kag nagporma sang sobra sa 950 ka Disaster Relief Committee.

Dugang pa sa grabe nga epekto sang pandemic, padayon man ang mga kalamidad kag iban pa nga mga halit nga kahimuan sang tawo. Daku gid ang epekto sini sa aton mga kauturan sa bilog nga kalibutan. Para buligan ang mga nabiktima sa sobra 200 ka kalamidad, gin-aprobahan sang Coordinators’ Committee sang Nagadumala nga Hubon ang paggasto sang $8 ka milyon ka dolyar. Gindugang ini sa badyet nga gin-aman para buligan ang mga naapektuhan sang COVID-19. Binagbinaga kon paano ginagamit ang imo mga donasyon para buligan ang mga biktima sang duha ka kalamidad sining karon lang.

Paglupok sang Mount Nyiragongo

Sang Mayo 22, 2021, naglupok ang Mount Nyiragongo, isa ka bulkan sa Democratic Republic of the Congo. Ginguba sang nagailig nga lava ang mga balay, mga eskwelahan, kag ang pulunduhan sang tubig nga ginagamit sang mga pumuluyo. Pero indi lang lava ang katalagman. Sa sulod sang pila ka adlaw pagkatapos sang paglupok, nagtupa sa siudad sang Goma ang makahililo nga abo halin sa bulkan kag madamo nga pagtay-ug ang nabatyagan. Halos katunga sang pumuluyo sang siudad ang kinahanglan magbakwit. Ginatos ka libo ang nagbakwit, kag ang iban nagtabok pa sa border pakadto sa Rwanda.

Nalakip sa mga nagbakwit ang mga 5,000 ka Saksi ni Jehova. Naguba ang balay sang iban bangod sa paglupok kag ang balay sang iban ginkawatan sang naghalin sila. Ang mga relief committee sa Rwanda kag sa Democratic Republic of the Congo nagbuligay. Parte sa isa ka relief committee, ang branch sa Congo (Kinshasa) nagreport: “Bisan pa grabe gid kabudlay ang sitwasyon sa siudad kag antes pa nagmando ang awtoridad nga magbakwit ang tanan, nagpanagtag na ang committee sang pagkaon, tubig, tululugan, kag mga bayo.” Sa isa ka banwa nga ginpaamulyahan sang sobra 2,000 naton ka kauturan, ang relief committee nagpatindog sang mga tent, nagpanghatag sang mga mask, kag nagpaathag kon paano mabuhinan ang risgo nga malatnan sang COVID-19 kag kolera.

Sa sulod sang tatlo ka bulan pagkatapos sang paglupok sang bulkan, ang aton mga kauturan nakapanagtag sang sobra anom ka tonelada nga bugas, anom ka tonelada sang harina sang mais, tatlo ka tonelada nga mantika, kag tatlo ka tonelada nga tubig. Para makakinot, ang branch nagpangumpra sing tingob sang pagkaon sa lokal nga mga negosyante sa baylo nga mag-order sang mas mahal nga pagkaon halin sa iban nga pungsod.

“Nasubuan gid kami,” siling sang isa ka sister. Naguba ang ila bag-o nga balay bangod sa paglupok sang bulkan. Pero nakabaton sang materyal nga bulig ang iya pamilya kag ginpalig-on man sila nga magpadayon nga matutom. Nagsiling sia: “Sa bulig ni Jehova, wala man kami nawad-an sang amon kinahanglanon. Nabatyagan gid namon nga ginadala ni Jehova ang amon kabug-atan amo nga mamag-an ini para sa amon.”

Grabe nga Kapigaduhon sa Venezuela

Tinuig na nga ginaantos sang Venezuela ang grabe nga kapigaduhon. Ginabatas sang aton mga kauturan ang tuman kabudlay nga sitwasyon, kakulang sa pagkaon, kag pagtaas sang krimen. Pero wala gid sila ginpabay-an sang organisasyon ni Jehova.

Sang nagligad nga tuig sang pag-alagad, sobra sa $1.5 ka milyon ang gingasto sa pagbakal kag pagpadala sang pagkaon kag habon sa mga pamilya nga nagakinahanglan. Ang branch sa Venezuela nagreport: “Mabudlay gid magpadala sang 130 ka tonelada sang pagkaon sa bilog nga pungsod kada bulan kag siguraduhon nga mabaton ini sang mga kauturan nga nagakinahanglan.” Para siguraduhon nga mapuslan ang pagkaon, ang ginapadala sang mga kauturan amo ang mga pagkaon nga nagadugay. Ang branch nagsiling pa: “Ginatingob namon ang pagpangumpra. Ginapili namon ang pagkaon nga bugana kag mas barato. Dayon ginapadala namon ini sa pinakapraktikal kag pinakabarato nga paagi.”

Si Leonel, isa ka miembro sang Disaster Relief Committee sa Venezuela. Nanamian gid sia sang iya asaynment. “Pinasahi gid ang pagbulig sa mga biktima sang kalamidad,” siling niya. “Napalig-on gid ako sini nga asaynment kay bag-o lang napatay ang akon asawa bangod sa COVID-19. Masako ako kag nabatyagan ko nga may mahimo ako para sa mga kauturan nga nagakinahanglan. Nakita ko gid kon paano ginatuman ni Jehova ang iya promisa nga indi niya pagpabay-an ang iya katawhan.”

Ang isa ka brother nga nakabaton sang bulig miembro man sang relief committe sang una. “Subong, ako naman ang nagakinahanglan sang bulig,” siling niya. “Indi lang materyal nga bulig ang amon nabaton. Kami sang akon asawa ginbuligan man sang mga brother nga mangin kalmado. Gin-atipan nila kami, ginpaumpawan, kag ginpalig-on.”

Ang iban nga mga kalamidad gulpi lang nagakatabo nga halos wala gid sang patimaan. Pero ang organisasyon ni Jehova masami nga madasig sa pagtipon kag sa pagdeliber sang mga suplay sa nagakinahanglan nga mga kauturan. Nangin posible ini bangod sa imo donasyon sa worldwide work. Ang pila ka paagi sa pag-donate makita sa donate.jw.org. Salamat gid sa imo kaalwan.