Ambahanon ni Solomon
Ginpangita ko sia, apang wala ko sia makita.+
2 Magabangon ako kag magalibot sa siudad;
Sa mga dalan kag sa mga plasa,
Pangitaon ko ang akon hinigugma.*
Ginpangita ko sia, apang wala ko sia makita.
3 Nakita ako sang mga bantay nga nagalibot sa siudad.+
Kag ginpamangkot ko sila, ‘Nakita bala ninyo ang akon hinigugma?’*
4 Wala lang dugay nga nakalumbos ako sa ila
Nakita ko ang akon hinigugma.*
Gin-uyatan ko sia, kag wala na pagbuy-i
Tubtob nadala ko sia sa sulod sang balay sang akon iloy,+
Sa kuarto sang nagbata sa akon.
5 Ginapasumpa ko kamo, O mga anak nga babayi sang Jerusalem,
Paagi sa mga gasela ukon sa mga usa nga babayi sa latagon:
Indi ninyo pagpukawa ang akon gugma sa wala pa ang husto nga tion.”+
6 “Ano ining nagataklad halin sa kahanayakan nga daw kaangay sang mga haligi nga aso,
Nga napahamutan sang mira kag olibano,
Kag sang tanan nga mahamot nga pulbos sang negosyante?”+
7 “Tan-awa! Ang salaliayan ni Solomon.
Ginalibutan ini sang 60 ka makusog nga lalaki,
Mga makusog nga lalaki sang Israel,+
8 Tanan sila may espada,
Tanan sila sampaton sa inaway,
Ang kada isa nagataklus sang espada
Agod magbantay sa mga ginakahadlukan sa kagab-ihon.”
9 “Ina ang harianon nga salaliayan* ni Hari Solomon
Nga ginhimo niya para sa iya kaugalingon halin sa mga kahoy sang Lebanon.+
10 Ang mga haligi sini human sa pilak,
Ang mga salandigan sini human sa bulawan.
Ang pulungkuan sini human sa purpura* nga de-lana;
Ang sulod sini mahigugmaon nga ginpatahom
Sang mga anak nga babayi sang Jerusalem.”