Pagbisita sa Kazakhstan

ANG mga Kazakh sang una pirme nagasaylosaylo. Asta subong, ang iban nga Kazakh nga nagabantay sang mga sapat nagasaylo sang ila mga sapat sa lainlain nga palahalban depende sa panahon. Kon tig-ilinit, nagataklad sila sa mas mataas kag matugnaw nga mga lugar para magpahalab. Pero samtang nagahilapit ang tigtulugnaw, nagadulhog naman sila upod sa ila mga sapat pakadto sa mas mainit nga mga lugar.

Ang iban nga Kazakh nagaistar sa dalagku nga mga siudad. Pero makita gihapon sa ila mga tradisyon, pagkaon, kag mga gamit ang nagasaylosaylo nga kabuhi sang ila mga katigulangan sang una. Ang mga Kazakh madamo gid sing napanubli nga mga binalaybay, ambahanon, kag musika nga ginatokar sa ila mga instrumento.

Ang yurt—ang tradisyonal nga balay nga masaylosaylo—amo ang nangin simbulo sang pagkabuhi nga malapit sa kinaugali. Mas gusto gihapon sang mga manugbantay sang karnero nga mag-istar sa yurt, kag pirme ini ginagamit sang mga tagasiudad sa espesyal nga mga okasyon. Ginahimo man nga dalayunan sang mga turista ang mga yurt. Makita sa sulod sang yurt ang sarisari nga ikasarang sang mga babayi nga Kazakh sa pagburda, paghabol, kag paghimo sing karpet.

Palangga gid sang mga pamilya nga nagaistar sa uma ang ila mga kabayo. May indi magkubos 21 ka tinaga sa Kazakh para sa kabayo, nga ang kada isa may lainlain nga kahulugan, kag sobra sa 30 ka tinaga kag ekspresyon nga nagalaragway sa kolor sang kabayo. Ang manami nga kabayo mahal katama kag ginaregalo. Sa mga uma, ang mga bata nga lalaki makahibalo na magsakay sa kabayo.

Ang kinaandan nga pagkaon sang mga Kazakh nagalakip sing karne kag sa masami indi makahang. Ang pila sa paborito nila nga ilimnon amo ang koumiss, nga halin sa gatas sang kabayo kag ginasiling nga maayo sa panglawas, kag ang mananam kag medyo maaslom nga shubat, nga halin sa gatas sang kamelyo.

Ginaabiabi gid sang sanga talatapan sang mga Saksi ni Jehova sa Almaty ang mga bisita kag bukas ini para sa tour.