“Wala Ko Na Ginakahuya ang Akon Kaugalingon”

ANG AKON NAGLIGAD

Natawo ako sa Ciudad Obregón sa naaminhan sang Mexico, kag ikalima sa siam ka kabataan. Nag-istar kami sa gua nayon sang siudad, diin may gamay nga uma si Tatay. Kanami sadto nga lugar, kag ang amon pamilya nahiusa kag malipayon. Masubo nga sang lima pa lang ako ka tuig, napierde ang amon uma bangod sa bagyo kag nagsaylo kami sa lain nga banwa.

Nagdaku ang ginakita nga kuarta ni Tatay, pero nangin alcoholic man sia. Daku gid ang halit sini sa ila pag-asawahay ni Nanay kag sa amon nga mga kabataan. Kami sang akon duha ka magulang nga lalaki nagsugod man panigarilyo, nga ginakawat namon kay Tatay. Sang anom pa lang ako ka tuig, nahubog ako sa una nga tion. Wala madugay, nagbulagay ang akon mga ginikanan kag naglala na gid ang akon mga bisyo.

Gindala kami ni Nanay sang nagpuyopuyo sia upod sa lain nga lalaki. Wala si Nanay ginasuportahan sini nga lalaki, kag indi makaigo sa amon ang ginakita ni Nanay. Gani kami nga mag-utod nagpangita sang bisan ano nga maobra namon, pero pigado gid kami kaayo. Nagpanglimpyo ako sang sapatos, nagbaligya sing tinapay, newspaper, bubble gum, kag iban pa. Ginalibot ko man ang bilog nga siudad sa pagpangita sing pagkaon sa basurahan sang mga manggaranon.

Sang dies anyos ako, ginhagad ako sang isa ka tawo nga mamasura sa ginatambakan sang basura sang bilog nga siudad. Nagsugot ako, gani nag-untat ako eskwela, kag naghalin sa balay. Wala gani kalab-ot isa ka dolyar ang ginabayad niya sa akon kada adlaw, kag ginapakaon niya ako sang pagkaon nga naghalin sa basurahan. Nag-istar man ako sa hayubhayob nga ginhimo ko halin sa basura. Ang akon mga kaupdanan nagapamuyayaw kag mga imoral. Kalabanan sa ila mga adik man kag palainom. Amo to ang pinakamabudlay nga inagihan ko, kag nagahibi ako kada gab-i, kag nagakurog sa kahadlok. Bangod pigado ako kag wala sing tinapusan, nahuya gid ako. Nag-istar ako sa talambakan sang basura sing halos tatlo ka tuig, asta nga nakasaylo ako sa lain nga siudad sang Mexico. Nakaobra ako sa uma, nagapang-harvest sang bulak kag cotton, nagapanapas sang tubo, kag nagapangali sang patatas.

Pagligad sang apat ka tuig, nagbalik ako sa Ciudad Obregón. Ang isa ko ka tiya, nga isa ka siruhana, nagpaistar sa akon sa iya balay. Pero pirme kalain sang akon mga damgo amo nga na-depress ako kag nagpamensar nga maghikog. Isa ka gab-i nagpangamuyo ako sa Dios: “Ginuo, kon matuod ka gid, gusto ko nga makilala ka, kag maalagad ako sa imo asta san-o. Kon may matuod gid man nga relihion, gusto ko mabal-an kon ano ini.”

KON PAANO GINBAG-O SANG BIBLIA ANG AKON KABUHI

Interesado gid ako nga makatuon parte sa Dios. Bisan sang gamay pa ako, nagasimba ako sa sarisari nga relihion, pero nadulaan ako sing salig sa ila tanan. Wala sa ila sing nagsugid parte sa Biblia ukon nagbulig sa akon nga makilala ang Dios. Mas importante pa para sa ila ang kuarta, kag ang iban sa ila mga imoral.

Sang 19 anyos ako, ginsilingan ako sang akon bayaw nga lalaki nga ginpakita sa iya sang mga Saksi ni Jehova ang ginasiling sang Biblia parte sa paggamit sang mga imahen. Ginbasa niya sa akon ang Exodo 20:4, 5. Nagasiling ini nga indi kita dapat maghimo sing tinigib nga mga imahen. Ang bersikulo 5 mabasa: “Indi kamo magyaub sa ila ukon mag-alagad sa ila, bangod ako si Jehova nga inyo Dios isa ka Dios nga nagapatuman nga ako lang ang dapat simbahon.” Dason ginpamangkot ako sang akon bayaw, “Kon ang Dios nagagamit sing mga imahen sa paghimo sing mga milagro ukon kon gusto niya nga gamiton naton ini sa pagsimba, ngaa abi ’dilian niya ini?” Ginpamensaran ko ang iya ginsiling. Sa tapos sini, madamo kami sing topiko sa Biblia nga gin-istoryahan. Nanamian gid ako sa amon pag-istoryahanay amo nga daw kadasig lang sang oras.

Sang ulihi, ginpaupod niya ako sa pagtilipon sang mga Saksi ni Jehova. Nagdayaw gid ako sa akon nakita kag nabatian didto. Bisan ang mga bata nagapakigbahin sa programa, kag nagahambal sa stage! Sa pensar ko, ‘Kanami gid sang ginatudlo diri!’ Bisan pa malaba ang akon buhok kag mahigko ang akon hitsura, maayo gid ang pag-abiabi sa akon sang mga Saksi. Gin-agda pa gani ako sang isa ka pamilya nga magkaon upod sa ila pagkatapos sang miting!

Sa akon pagtuon upod sa mga Saksi ni Jehova, natun-an ko nga si Jehova nga Dios isa ka mahigugmaon nga Amay nga nagaulikid sa aton bisan ano man ang aton kahimtangan sa pinansial, tindog sa komunidad, rasa, ukon edukasyon. Matuod gid nga wala sia sing ginapasulabi. (Binuhatan 10:34, 35) Sa katapusan nakilala ko na gid man ang Dios, kag wala na ako nasubuan.

MGA BENEPISYO

Nagbag-o gid ang akon kabuhi! Gin-untatan ko ang pagpanigarilyo, pagpahubog, kag pagpamuyayaw. Ang kaugot nga nabatyagan ko halin sang bata ako amat-amat man nga nadula, kag wala na ako nagadamgo sing malain. Nadula man ang akon pagbatyag nga wala sing pulos bangod sa akon indi maayo nga mga inagihan kag bangod wala ako sing tinapusan.

Subong, may maayo ako nga asawa nga nagahigugma kay Jehova kag nagasuporta gid sa akon. Nagaalagad ako bilang nagalakbay nga manugtatap sang mga Saksi ni Jehova, nga nagabisita sa mga kongregasyon para palig-unon kag tudluan ang mga kauturan nga pareho ko nga mga sumilimba. Ginapasalamatan ko gid ang Biblia nga nagpabag-o sang akon kabuhi kag ang pinakamaayo nga edukasyon nga ginahatag sang Dios sa aton, kay bangod sini wala ko na ginakahuya ang akon kaugalingon.