Ngaa Wala Nagapuasa ang mga Disipulo ni Jesus?

Pila ka tion sa tapos nagtambong si Jesus sa Paskua sang 30 C.E., napriso si Juan nga Manugbawtismo. Luyag ni Juan nga ang iya mga disipulo mangin sumulunod ni Jesus, pero indi tanan naghimo sini pagligad sang mga binulan nga nabilanggo si Juan.

Subong nga nagapalapit na ang Paskua sang 31 C.E., ang pila ka disipulo ni Juan nagkadto kay Jesus kag namangkot: “Ngaa kami kag ang mga Fariseo nagapuasa apang ang imo mga disipulo wala?” (Mateo 9:14) Nagapuasa ang mga Fariseo kay relihioso nila ini nga ritwal. Sang ulihi, naggamit pa gani si Jesus sang ilustrasyon parte sa isa ka nagapakamatarong sa kaugalingon nga Fariseo nga nangamuyo: “O Dios ko, nagapasalamat ako sa imo nga indi ako kaangay sang iban nga tawo . . . Makaduha ako nagapuasa kada semana.” (Lucas 18:11, 12) Mahimo nga kinabatasan man nga nagapuasa ang mga disipulo ni Juan. Ukon basi nagapuasa sila kay nasubuan sila sa pagkabilanggo niya. Nagpalibog man ang iban kon ngaa wala nagapuasa ang mga disipulo ni Jesus, nga mahimo nasubuan man sa natabo kay Juan.

Nagsabat si Jesus paagi sa isa ka halimbawa: “Magalalaw bala ang mga abyan sang nobyo samtang kaupod pa nila sia? Apang magaabot ang adlaw nga ang nobyo kuhaon sa ila, kag magapuasa sila.”—Mateo 9:15.

Si Juan mismo ang naghambal nga si Jesus amo ang nobyo. (Juan 3:28, 29) Gani sang ara si Jesus, wala nagapuasa ang iya mga disipulo. Sang ulihi sang napatay si Jesus, nagpangasubo ang iya mga disipulo kag wala sila sing gana magkaon. Pero nagbag-o gid ini sang nabanhaw sia! Wala na sila sing basihan nga magpuasa.

Masunod, naghatag si Jesus sang duha ka ilustrasyon: “Wala sing tawo nga nagatukap sing bag-o nga tela sa daan nga bayo, kay ang bag-o nga tela magakulo kag ang gisi sa bayo magadaku pa gid. Wala man sing tawo nga nagabutang sing bag-o nga alak sa daan nga panit nga mga suludlan, kay mabusdik ini kag mauyang ang alak. Sa baylo, ang bag-o nga alak ginabutang sa bag-o nga panit nga mga suludlan.” (Mateo 9:16, 17) Ano ang buot silingon ni Jesus?

Ginabuligan ni Jesus ang mga disipulo ni Juan nga Manugbawtismo nga mahangpan nga indi dapat magpaabot ang bisan sin-o nga ang mga sumulunod ni Jesus magsunod sa madugay na nga mga ritwal sang Judaismo, pareho sang pagpuasa. Wala sia magkari para tukapan kag padugayon ang daan nga sahi sang pagsimba, isa ka sistema sang pagsimba nga dali na lang sikwayon. Ang pagsimba nga ginapalig-on ni Jesus wala nagasunod sa Judaismo sadto lakip ang mga tradisyon sang tawo. Wala niya ginatinguhaan nga tukapan ang daan nga bayo sing bag-o nga tela ukon ibutang sa daan nga panit nga suludlan ang bag-o nga alak.