Ang Panihapon sang Ginuo

Sang temprano pa sini nga gab-i, gintudluan ni Jesus ang iya mga apostoles sing leksion sa pagpaubos paagi sa paghinaw sa ila mga tiil. Mahimo nga pagkatapos sang panihapon sa Paskua, ginkutlo niya ang tagna ni David: “Ang akon suod nga abyan, ang isa nga akon ginasaligan, nga nagakaon sang akon tinapay nagsumpong sa akon.” Dayon ginpaathag niya: “Ang isa sa inyo magaluib sa akon.”—Salmo 41:9; Juan 13:18, 21.

Nagtinulukay ang mga apostoles, kag namangkot: “Ginuo, ako bala?” Bisan si Judas Iscariote namangkot man. Ginsilingan ni Pedro si Juan, nga tupad ni Jesus sa lamesa, nga mamangkot kon sin-o ini. Gani nagpalapit sia kay Jesus kag namangkot: “Ginuo, sin-o sia?”—Mateo 26:22; Juan 13:25.

Nagsabat si Jesus: “Sia amo ang hatagan ko sang tinapay nga akon isawsaw.” Pagkatapos ginsawsaw ni Jesus ang tinapay, ginhatag niya ini kay Judas kag nagsiling: “Ang Anak sang tawo mapatay, suno sa ginsulat tuhoy sa iya, apang makaluluoy ang tawo nga magaluib sa Anak sang tawo! Maayo pa kuntani sa sina nga tawo nga wala sia mabun-ag.” (Juan 13:26; Mateo 26:24) Nagsulod dayon si Satanas kay Judas. Ining malain na nga tawo nagtugyan sang iya kaugalingon sa paghimo sang kabubut-on sang Yawa kag nangin “anak sang kalaglagan.”—Juan 6:64, 70; 12:4; 17:12.

Ginsugo ni Jesus si Judas: “Himua gilayon ang imo himuon.” Bangod si Judas ang nagakapot sang kahon sang kuarta, naghunahuna ang iban nga apostoles nga ginsugo sia “nga magbakal sang ila mga kinahanglanon para sa kapiestahan, ukon maghatag sing bulig sa mga imol.” (Juan 13:27-30) Sa baylo, naglakat si Judas para itugyan si Jesus.

Sa sini man nga gab-i sang panihapon sa Paskua, ginsugdan ni Jesus ang bag-o nga panihapon. Nagkuha sia sang tinapay, nagpasalamat, kag gintipiktipik ini, kag ginhatag ini sa iya mga apostoles para kaunon. Nagsiling sia: “Ini nagakahulugan sang akon lawas, nga ginahatag para sa inyo. Padayon ninyo nga himua ini sa pagdumdom sa akon.” (Lucas 22:19) Ginpasa ang tinapay, kag nagkaon sa sini ang mga apostoles.

Dayon nagkuha si Jesus sang kopa sang alak, nagpangamuyo nga nagapasalamat sa sini, kag ginpasa ini sa ila. Nag-inom ang kada isa sa kopa, nga parte sa sini nagsiling si Jesus: “Ini nga kopa nagakahulugan sang bag-o nga katipan pasad sa akon dugo, nga ibubo tungod sa inyo.”—Lucas 22:20.

Gani ginsugdan ni Jesus ang memoryal sang iya kamatayon nga dapat saulugon sang iya mga sumulunod kada tuig kon Nisan 14. Ipahanumdom sini ang ginhimo ni Jesus kag sang iya Amay para maluwas sa sala kag kamatayon ang mga tawo nga nagatuo. Ginapadaku sini ang matuod nga kaluwasan sang nagatuo nga katawhan nga labaw pa sa ginhimo sang Paskua sa mga Judiyo.

Ginsiling ni Jesus nga ang iya dugo “ibubo tungod sa madamo para sa kapatawaran sang mga sala.” Lakip sa madamo nga makatigayon sini nga kapatawaran amo ang iya matutom nga mga apostoles kag ang iban pa nga pareho sa ila. Mangin kaupod niya sila sa Ginharian sang iya Amay.—Mateo 26:28, 29.