Nagapamensar ka man bala nga basahon ang Biblia, pero wala mo gindayon bangod nagabatyag ka pareho sang ginsambit sa ibabaw? Para sa madamo, daw kabudlay gid ang pagbasa sing Biblia. Pero paano kon mahibaluan mo nga ang Biblia makabulig sa imo para mangin mas malipayon kag mapuslanon ang imo kabuhi? Kag ano abi kon may pila gali ka paagi para manamian ka sa pagbasa sini? Gusto mo bala mahibaluan kon ano ang mabulig sa imo sang Biblia?

Binagbinaga ang pila ka komento sang mga nakabenepisyo sang ginsugdan nila ang pagbasa sing Biblia.

Si Ezekiel, nga mga beintehon ang edad, nagsiling: “Sang una, daw pareho ako sa nagadrayb sang salakyan nga wala sing kaladtuan. Pero ang pagbasa sing Biblia naghatag sing direksion sa akon kabuhi. Nagaunod ini sing praktikal nga mga laygay nga magamit ko sa matag-adlaw.”

Si Frieda, nga mga beintehon man ang edad, nagpaathag: “Dali ako maakig sang una. Pero bangod sang akon pagbasa sing Biblia, natun-an ko nga kontrolon ang akon kaugalingon. Gani mas mahapos na ako palapitan sang iban, amo nga mas madamo na ako sing abyan subong.”

Si Eunice, nga mga singkwentahon ang edad, nagsiling parte sa Biblia: “Nagabulig ini sa akon nga mangin mas maayo nga tawo, nga bag-uhon ang indi maayo nga mga batasan.”

Pareho sa naeksperiensiahan sini nga mga bumalasa kag sang minilyon pa, ang pagbasa sing Biblia makabulig nga mangin mas malipayon ang imo kabuhi. (Isaias 48:17, 18) Makabulig man ini sa imo nga (1) makahimo sing husto nga mga desisyon, (2) makakita sing matuod nga mga abyan, (3) masarangan ang stress, kag (4) labaw sa tanan, mahibaluan ang kamatuoran parte sa Dios. Ang laygay sang Biblia naghalin sa Dios, gani makapaayo gid ini sa imo kon sundon mo. Ang Dios wala gid nagalaygay sing malain.

Ang importante nga sugdan mo ini. Ano ang praktikal nga mga paagi para mas mahapos ang pagsugod kag mas manamian ka sa pagbasa sing Biblia?

Ano nga mga paagi ang makabulig sa imo para manamian ka kag makabenepisyo sa pagbasa sing Biblia? Talupangda ang lima ka panugda nga nakabulig sa madamo.

Mangita sing nagakaigo nga lugar. Tinguhai nga makakita ka sing lugar nga malinong. Likawi ang mga makaisturbo sa imo para makapokus ka sa imo pagbasa. Ang masanag nga lugar kag preska nga hangin makabulig para makabenepisyo ka sa imo ginabasa.

Dapat husto ang imo panimuot. Ang Biblia halin sa aton Amay sa langit, gani makabenepisyo ka gid kon ang imo panimuot pareho sa bata nga handa magtuon sa iya mahigugmaon nga ginikanan. Kon may negatibo, ukon may mga opinyon ka na nga daan parte sa Biblia, kalimti anay ini para matudluan ka sang Dios.—Salmo 25:4.

Mangamuyo antes magbasa. Ang Biblia nagaunod sing mga panghunahuna sang Dios, gani indi katingalahan nga kinahanglan naton ang iya bulig para maintiendihan ini. Ang Dios nagpromisa nga magahatag sia sang “balaan nga espiritu sa mga nagapangayo sa iya.” (Lucas 11:13) Ang balaan nga espiritu makabulig sa imo nga maintiendihan ang panghunahuna sang Dios. Sa ulihi, pagabuksan sini ang imo hunahuna para maintiendihan “bisan pa ang madalom nga mga butang sang Dios.”—1 Corinto 2:10.

Hangpa ang imo ginabasa. Kon magbasa ka, indi lang kay para matapos mo ini. Pamensari sing maayo ang imo ginabasa. Pamangkuta ang imo kaugalingon pareho sang: ‘Ano nga mga kinaiya ang makita ko parte sa karakter nga ginabasa ko? Paano ko ini maaplikar sa akon kabuhi?’

Maghimo sing espesipiko nga mga tulumuron. Para makabenepisyo ka sa imo pagbasa sing Biblia, himua nga tulumuron nga may matun-an ka nga makabulig sa imo kabuhi. Puede mo mangin tulumuron ang pareho sini: ‘Gusto ko matun-an pa gid ang parte sa Dios.’ ‘Gusto ko mangin mas maayo nga tawo, mas maayo nga bana ukon asawa.’ Dayon magpili sing mga bahin sang Biblia nga makabulig sa imo nga malab-ot ini.a

Ining lima ka panugda makabulig sa imo nga masugdan ang pagbasa sing Biblia. Pero paano ka pa gid manamian sa imo pagbasa? May mga panugda ang masunod nga artikulo.

Ano ang pagbasa sing Biblia para sa imo? Makatalaka ukon makapaumpaw? Nagadepende ini sa imo paagi sang pagbasa. Tan-awon naton kon ano ang mahimo mo para mangin mas interesado ka kag manamian sa sini.

Magpili sing masaligan nga badbad nga nagagamit sing moderno nga lenguahe. Kon ang ginabasa mo madamo sing tinaga nga mabudlay intiendihon ukon wala na ginagamit subong, mahimo nga indi ka gid manamian sa pagbasa sini. Gani mangita sing Biblia nga mahapos intiendihon, nga makatandog sang imo tagipusuon. Pero, dapat mahalungon man ini nga ginbadbad kag sibu.a

Maggamit sing moderno nga teknolohiya. Ang Biblia matigayon na subong indi lamang sa naimprinta nga kopya kundi pati na sa elektroniko nga kopya. Ang pila ka Biblia mahimo basahon online ukon ma-download sa mga kompyuter, tablet, ukon cell phone para sa personal nga pagbasa. May mga bersion nga nagalakip sing dugang nga bulig para madali mo makita ang iban nga bersikulo sa Biblia nga may pareho nga topiko ukon mapaanggid mo ini sa iban pa nga badbad. Kon mas nanamian ka mamati sangsa magbasa, ang Biblia matigayon man sa audio nga pormat. Madamo ang nanamian mamati sini samtang nagasakay sa pangpubliko nga transportasyon, nagapanglaba, ukon nagahimo sing iban pa nga hilikuton nga puede sila makapamati. Puede mo testingan kon diin sa sini ang mas nanamian mo.

Maggamit sing mga bulig sa pagtuon sa Biblia. Makabenepisyo ka pa gid sa imo pagbasa kon maggamit ka sing mga bulig sa pagtuon sa Biblia. May mga mapa sang mga lugar sa Biblia nga makabulig sa imo nga mas mahangpan ang imo ginabasa kag mahibaluan kon diin ini natabo. May mga artikulo pareho sang makita sa sini nga magasin ukon sa “Panudlo sang Biblia” nga seksion sang website nga jw.org, nga makabulig sa imo nga mahangpan ang kahulugan sang madamo nga rekord sa Biblia.

Lainlaina ang imo mga paagi. Kon daw nabudlayan ka sa pagbasa sing Biblia halin sa umpisa asta sa katapusan, puede mo ini sugdan sa mga topiko nga nanamian mo. Kon gusto mo mahibaluan ang parte sa kilala nga mga tawo sa Biblia, puede ka magbasa base sa kada karakter. Ang halimbawa sini makita sa kahon nga, “Hangpa ang Biblia Paagi sa Pagkilala sang mga Karakter sa Sini.” Ukon basi gusto mo basahon ang Biblia base sa kada topiko ukon base sa pagpasunod sang mga hitabo. Puede mo testingan ang isa sa sini.

Ang Biblia indi ordinaryo nga libro. Nagaunod ini sing mga laygay sang aton Manunuga. (2 Timoteo 3:16) Ang mensahe sini makaimpluwensia sa aton sing daku. Ang matuod, ang Biblia nagasiling: “Ang pulong sang Dios buhi kag gamhanan.” (Hebreo 4:12) May gahom ini sa pagbulig sa aton sa duha ka paagi. Una, mapauswag sini ang aton kabuhi subong, kag ikaduha, makilala naton ang Dios kag mahibaluan ang iya mga promisa.—1 Timoteo 4:8; Santiago 4:8.

Mapauswag sini ang imo kabuhi subong. Ang Biblia makabulig sa imo sa personal nga mga butang. Nagahatag ini sing laygay parte sa masunod.

• Kaangtanan sa iban. —Efeso 4:31, 32; 5:22, 25, 28, 33.

• Emosyonal kag pisikal nga kaayuhan. —Salmo 37:8; Hulubaton 17:22.

• Moral.—1 Corinto 6:9, 10.

• Pangabuhi.—Hulubaton 10:4; 28:19; Efeso 4:28.a

Ang bataon pa nga mag-asawa sa Asia nag-apresyar gid sa laygay sang Biblia. Pareho sa madamo nga bag-o lang nga mag-asawa, nabudlayan man sila sa pag-adjust sa lainlain nila nga mga personalidad kag sa ila komunikasyon. Pero gin-aplikar nila ang ila nabasa sa Biblia. Ano ang resulta? Ang bana nga si Vicent nagsiling: “Ang nabasa ko sa Biblia nakabulig sa akon nga solbaron ang mga problema sa amon pag-asawahay sa mahigugmaon nga paagi. Bangod ginasunod namon ang laygay sang Biblia, nangin malipayon ang amon pag-asawahay.” Nagaugyon man ang iya asawa nga si Annalou: “Ang nabasa namon nga mga halimbawa sa Biblia nakabulig sa amon. Malipayon na ako subong kag kontento sa amon pag-asawahay kag sa amon mga tulumuron sa kabuhi.”

Makilala mo ang Dios. Magluwas sa ginsiling ni Vicent parte sa pag-asawahay, nagsiling man sia: “Bangod sang pagbasa ko sa Biblia, nangin mas suod pa gid ako subong kay Jehova.” Ang eksperiensia ni Vicent nagapadaku sang importante nga punto—nga ang Biblia makabulig sa imo nga makilala ang Dios. Bilang resulta, indi ka lang makabenepisyo sa iya laygay kundi makilala mo man sia bilang isa ka abyan. Kag matun-an mo nga may ginasugid sia nga mga detalye parte sa mas maayo nga palaabuton, ang tion nga mabaton mo ang “matuod nga kabuhi”—ang kabuhi nga wala sing katapusan. (1 Timoteo 6:19) Wala na sing iban pa nga libro nga makahatag sini.

Kon nasugdan mo na ang pagbasa sing Biblia kag gusto mo padayunon ini, mabaton mo man ina nga mga benepisyo—magauswag ang imo kabuhi subong kag makilala mo ang Dios. Pero samtang ginabasa mo ang Biblia, mahimo nga may mga pamangkot ka. Kon matabo ini, dumduma ang maayo nga halimbawa sang Etiopianhon nga opisyal nga nagkabuhi sang nagligad nga 2,000 ka tuig. Madamo sia sing pamangkot parte sa Biblia. Sang ginpamangkot sia kon naintiendihan niya ang iya ginabasa, nagsabat sia: “Paano ko ini mahangpan kon wala sing magpaathag sa akon?”b Handa niya nga ginbaton ang bulig sang isa nga kalipikado sa pagtudlo sang Biblia, si Felipe, ang isa sa mga nauna nga disipulo ni Jesus. (Binuhatan 8:30, 31, 34) Sing kaanggid, kon gusto mo pa gid tun-an ang Biblia, ginaagda ka namon nga ipadala ang imo pangabay online sa www.pr2711.com ukon magsulat sa pinakamalapit nga adres nga nalista sa sini nga magasin. Mahimo mo man kontakon ang mga Saksi ni Jehova nga malapit sa inyo ukon magkadto sa Kingdom Hall sa inyo lugar. Gani, sugdi ang pagbasa sing Biblia subong kag tuguti ini nga maggiya sa imo sa mas maayo nga kabuhi.