Ginpaathag sang Judiyo nga Babayi Kon Ngaa Ginbag-o Niya ang Iya Pagpati

Ano ang imo background?

Natawo ako sang 1979 sa Estados Unidos. Sang tres anyos pa lang ako, nagbulagay ang akon mga ginikanan. Ginpadaku ako ni Nanay suno sa mga tradisyon sang Judiyo kag ginpaeskwela sa yeshiva, ukon sa eskwelahan sang mga Judiyo. Sang siete anyos ako, nag-istar kami sa Israel sing isa ka tuig, kag nag-eskwela ako sa kibbutz, ang komunidad sa kaumhan sang Israel. Dayon nagsaylo kami ni Nanay sa Mexico.

Bisan wala sing sinagoga didto, ginasunod ko gihapon ang mga kustombre sang mga Judiyo. Nagasindi ako sing kandila kon Sabbath, nagabasa sang Torah, kag kon mangamuyo, nagagamit ako sing siddur, ukon libro sang mga pangamuyo. Pirme ko ginasilingan ang akon mga klasmeyt nga ang relihion ko amo gid ang orihinal. Pero wala gid ako makabasa sang Bag-ong Testamento, nga nasentro sa ministeryo kag mga panudlo ni Jesucristo. Ginpaandaman pa gani ako ni Nanay kay basi patalangon ako sang mga panudlo sini.

Ti, ngaa ginbasa mo ang Bag-ong Testamento?

Sang 17 anyos na ako, nagbalik ako sa Estados Unidos agod tapuson ang akon pag-eskwela. May kilala ako didto nga siling niya Cristiano sia. Ginsilingan niya ako nga kon wala ako nagatuo kay Jesus, may kulang sa akon kabuhi.

“Ang mga tawo nga nagatuo kay Jesus nagtalang,” sabat ko.

“Nabasa mo na bala ang Bag-ong Testamento?” pamangkot niya.

“Wala,” sabat ko.

“Ti,” siling niya, “indi bala ignorante ka kon nagahatag ka sing opinyon parte sa isa ka butang nga wala ka sing hinalung-ong?”

Naigo gid ako sang iya ginsiling, kay para sa akon kabuangan ang paghatag sing opinyon sa isa ka butang nga wala ka sing hinalung-ong. Gani, gindala ko pauli ang iya Biblia kag ginbasa ko ang Bag-ong Testamento.

Ano ang epekto sa imo sang nabasahan mo?

Nakibot gid ako sang nahibaluan ko nga ang nagsulat sang Bag-ong Testamento mga Judiyo gali. Kag sa padayon ko nga pagbasa, mas nakilala ko si Jesus bilang isa ka maayo kag mapainubuson nga Judiyo nga mabinuligon gid sa mga tawo, kag wala niya sila ginahingalitan. Naghulam pa gani ako sa librarya sing mga libro parte sa iya. Pero wala gid ako makumbinsi nga sia ang Mesias. Ginakilala pa sia gani sang iban bilang Dios, kag indi gid ini rasonable para sa akon. Kay man, kay sin-o abi nangamuyo si Jesus, sa iya man kaugalingon? Isa pa, napatay si Jesus. Pero, ang Biblia nagasiling parte sa Dios: “Wala ka sing kamatayon.”a

Paano nasabat ini nga mga pamangkot?

Ang kamatuoran wala nagasumpakilay, kag determinado gid ako nga mahibaluan ini. Gani sinsero ako nga nagpangamuyo sa Dios nga nagahibi. Subong pa lang ako nagpangamuyo nga wala naggamit sang akon siddur. Bag-o lang gid ako makatapos pangamuyo sang may nanuktok sa puertahan. Duha gali ka Saksi ni Jehova. Ginhatagan nila ako sang ila mga balasahon nga bulig sa pagtuon sa Biblia. Bangod sini nga mga publikasyon kag sang mga pag-istoryahanay namon sang mga Saksi, nakumbinsi ako nga ang ila ginapatihan base gid sa Biblia. Halimbawa, ginakilala nila nga si Jesus indi bahin sang Trinidad, kundi “anak sang Dios”b kag “ang nahauna sa mga tinuga sang Dios.”c

Sang ulihi, nagbalik ako sa Mexico, diin padayon ko nga gintun-an upod sa mga Saksi ang mga tagna parte sa Mesias. Nakibot gid ako nga kadamo gid sini nga mga tagna! Pero, indi gihapon ako kumbinsido. Nagpalibog ako: ‘Kay Jesus lang gid bala nagapatuhoy ini nga mga tagna?’ kag ‘Ano abi kon nagapakunokuno lang sia?’

Ti, ano gid ang nagkumbinsi sa imo?

Ginpakita sa akon sang mga Saksi ang mga tagna nga indi gid mahimo sang isa ka impostor. Halimbawa, kapin sa 700 ka tuig nga abanse, nagsiling si manalagna Miqueas nga ang Mesias matawo sa Betlehem sa Judea.d Sin-o ang makamaniobra kon diin sia matawo? Nagsulat si Isaias nga ang Mesias patyon bilang talamayon nga kriminal, pero ilubong sia upod sa mga manggaranon.e Tanan ini natuman kay Jesus.

Ang katapusan nga ebidensia may kaangtanan sa katigulangan ni Jesus. Nagsiling ang Biblia nga ang Mesias kaliwat ni Hari David.f Ginatago sang mga Judiyo sadto ang mga rekord sang ila kaliwatan. Gani, kon si Jesus indi kaliwat ni David, ginbuyagyag kuntani ini sang mga kaaway ni Jesus! Pero indi nila ini mahimo, kay indi gid mapanghiwala ang kaangtanan ni Jesus kay David. Gintawag pa gani sia sang mga tawo nga “Anak ni David.”g

Sang 70 C.E., pagligad sang 37 ka tuig sa tapos mapatay si Jesus, ginlaglag sang Romano nga mga soldado ang Jerusalem, kag ang mga rekord sang mga kaliwatan nadula ukon naguba. Gani para mabal-an ang kaliwatan sang Mesias, dapat nag-abot ini antes sang 70 C.E.

Ano ang epekto sini sa imo?

Gintagna sa Deuteronomio 18:18, 19 nga ang Dios magapadala sa Israel sing manalagna nga pareho kay Moises. Nagsiling ang Dios, “ang bisan sin-o nga indi magpamati sa akon mga polong nga igapamolong niya sa akon ngalan, akon ini kinahanglanon sa iya.” Bangod sang maid-id nga pagtuon ko sang bug-os nga Biblia, nakumbinsi ako nga si Jesus nga taga-Nazaret amo ang manalagna.