Pauswagon Naton ang Kalidad sang Aton mga Pangamuyo

1. Ano ang gusto ni Jehova nga himuon sang iya mga alagad? (Tan-awa man ang piktyur.)

KON kinahanglan naton ang paumpaw kag giya, sin-o ang puede naton palapitan? Kabalo kita sang sabat. Puede kita makapangamuyo kay Jehova nga Dios. Ang Biblia nagasiling nga “padayon [kita] nga magpangamuyo,” gani gusto ni Jehova nga pirme kita mangamuyo sa iya. (1 Tes. 5:17) Puede kita makapangamuyo sa iya sa bisan ano nga oras para giyahan kita sa tanan nga bahin sang aton kabuhi. (Hulu. 3:5, 6) Bangod maalwan gid si Jehova nga Dios sa iya tion, wala sia nagsiling kon pila ka beses lang kita puede makapangamuyo sa iya.

2. Ano ang binagbinagon naton sa sini nga artikulo?

² Nagapasalamat gid kita kay Jehova bangod puede kita makapangamuyo sa iya. Pero posible nga daw wala kita sang tion para mangamuyo bangod madamo kita sang dapat himuon. Posible narealisar man naton nga dapat naton pauswagon ang kalidad sang aton mga pangamuyo. Kon amo sini ang aton sitwasyon, mapalig-on gid kita kag magiyahan sang Biblia. Sa sini nga artikulo, binagbinagon naton ang halimbawa ni Jesus nga makabulig sa aton kon paano kita makapain sang tion para sa pangamuyo. Binagbinagon man naton kon paano naton mapauswag ang kalidad sang aton mga pangamuyo paagi sa paglakip sa sini sang lima ka importante nga butang.

NAGPAIN SANG TION SI JESUS PARA SA PANGAMUYO

3. Ano ang nabal-an ni Jesus parte sa pangamuyo?

³ Kabalo si Jesus nga ginapabaloran gid ni Jehova ang aton mga pangamuyo. Antes sia nagkadto sa duta, nakita niya kon paano ginsabat sang iya Amay ang mga pangamuyo sang Iya matutom nga mga alagad. Halimbawa, ara si Jesus sa tupad sang iya Amay sang ginsabat sang iya Amay ang sinsero nga mga pangamuyo ni Hana, ni David, ni Elias, kag sang madamo pa. (1 Sam. 1:10, 11, 20; 1 Hari 19:4-6; Sal. 32:5) Gani gintudluan ni Jesus ang iya mga disipulo nga pirme mangamuyo, kag magsalig nga sabton gid ang ila mga pangamuyo.—Mat. 7:7-11.

4. Ano ang matun-an naton sa mga pangamuyo ni Jesus?

⁴ Paagi sa mga pangamuyo ni Jesus kay Jehova, nagpakita sia sang maayo nga halimbawa nga dapat sundon sang iya mga disipulo. Sa tion sang pagministeryo ni Jesus, pirme sia nagapangamuyo. Bangod masako sia kag madamo nga tawo ang nagakadto sa iya, dapat sia magpain sang tion para sa pangamuyo. (Mar. 6:31, 45, 46) Aga pa sia nagabugtaw para may tion sia nga mangamuyo nga sia lang isa. (Mar. 1:35) Isa ka bes, nangamuyo sia sa bilog nga gab-i antes sia naghimo sang importante nga desisyon. (Luc. 6:12, 13) Kag sang gab-i antes napatay si Jesus, sulitsulit sia nga nangamuyo kay gusto niya tumanon ang pinakamabudlay nga bahin sang iya asaynment diri sa duta.—Mat. 26:39, 42, 44.

5. Paano naton mailog si Jesus kon parte sa pangamuyo?

⁵ Ginapakita sang halimbawa ni Jesus nga bisan pa masako kita, dapat may tion gid kita para sa pangamuyo. Pareho kay Jesus, posible nga kinahanglan naton mag-iskedyul sang tion para sa sini. Para mahimo ini, puede kita magbugtaw sing aga pa. Kon gab-i naman kon inugtulog na naton, puede nga indi kita anay magtulog dayon. Kon himuon naton ini, ginapakita naton kay Jehova nga nagapasalamat gid kita sa sining espesyal nga regalo. Nadumduman sang isa ka sister nga si Lynne nga grabe gid ang iya pagpasalamat sang natun-an niya nga puede sia makapangamuyo sa Dios. Nagsiling sia, “Sang natun-an ko nga puede ko maistorya si Jehova sa bisan ano nga oras, napalig-on ako sini nga kabigon sia bilang akon suod nga Abyan kag gusto ko nga pauswagon ang kalidad sang akon mga pangamuyo.” Sigurado nga nabatyagan man ini sang madamo sa aton. Gani binagbinagon naton ang lima ka importante nga butang nga puede naton ilakip sa aton mga pangamuyo.

LIMA KA IMPORTANTE NGA BUTANG NGA PUEDE ILAKIP SA ATON MGA PANGAMUYO

6. Suno sa Bugna 4:10, 11, takus si Jehova nga magbaton sang ano?

⁶ Dayawa si Jehova. Nakita ni apostol Juan sa isa ka dalayawon nga palanan-awon ang 24 ka gulang sa langit nga nagasimba kay Jehova. Gindayaw nila ang Dios kag nagsiling sila nga takus sia nga magbaton “sang himaya kag dungog kag gahom.” (Basaha ang Bugna 4:10, 11.) Madamo man sang rason ang matutom nga mga anghel para dayawon kag padunggan si Jehova. Kaupod nila sia sa langit, gani kilala gid nila sia. Nakita nila sa iya mga ginahimo ang iya mga kinaiya, kag ginadayaw nila sia.—Job 38:4-7.

7. Ngaa dapat naton dayawon si Jehova?

⁷ Dapat man naton dayawon si Jehova sa aton mga pangamuyo. Mahimo naton ini paagi sa pagsiling sa iya kon ngaa palangga naton sia kag kon ano ang nanamian naton sa iya. Sa kada tion nga nagabasa ka kag nagatuon sang Biblia, panikasugi nga makita ang mga kinaiya ni Jehova nga nanamian mo gid. (Job 37:23; Roma 11:33) Dayon isugid kay Jehova kon ngaa nanamian ka gid sa sini nga mga kinaiya. Dayawon man naton si Jehova bangod ginabuligan niya kita kag ang tanan naton nga kauturan. Wala niya kita ginapabay-an kag pirme niya kita ginaamligan.—1 Sam. 1:27; 2:1, 2.

8. Ano ang pila sa madamo nga rason kon ngaa dapat naton pasalamatan si Jehova? (1 Tesalonica 5:18)

⁸ Pasalamati si Jehova. Madamo kita sang rason para pasalamatan si Jehova sa aton mga pangamuyo. (Basaha ang 1 Tesalonica 5:18.) Dapat naton sia pasalamatan sa tanan nga maayo nga butang nga ara sa aton bangod sia ang nagahatag sang tanan nga maayo nga regalo. (Sant. 1:17) Halimbawa, puede naton sia pasalamatan sa aton matahom nga planeta nga duta kag sa iya dalayawon nga mga tinuga. Puede man naton sia pasalamatan bangod ginhatagan niya kita sang kabuhi, pamilya, mga abyan, kag paglaum. Kag gusto naton pasalamatan si Jehova bangod ginpaposible niya nga mangin abyan naton sia.

9. Ngaa posible nga kinahanglan naton hunahunaon sing maayo ang mga rason kon ngaa dapat naton pasalamatan si Jehova?

⁹ Posible nga kinahanglan naton hunahunaon sing maayo ang mga rason kon ngaa dapat naton pasalamatan si Jehova. Ngaa? Bangod madamo nga tawo subong ang wala na nagapasalamat. Sa masami, wala nila ginahunahuna kon paano nila mapakita nga nagapasalamat sila sa mga butang nga ara sa ila. Sa baylo, ginahunahuna nila kon paano nila mapanag-iyahan ang mga butang nga gusto nila. Kon maimpluwensiahan kita sini nga pamatasan sang mga tawo, posible nga puro lang pangayo ang aton ipangamuyo. Para indi naton sila mailog, dapat naton padayon nga pasalamatan si Jehova sa tanan niya nga ginahimo para sa aton.—Luc. 6:45.

10. Bangod pirme nagapasalamat ang isa ka sister, paano ini nakabulig sa iya nga magbatas? (Tan-awa man ang piktyur.)

¹⁰ Kon pirme kita nagapasalamat, makabulig ini sa aton nga mabatas ang mga kabudlayan. Binagbinaga ang eksperiensia sang isa ka sister nga si Kyung-sook nga mabasa sa Enero 15, 2015, nga Ang Lalantawan. May malala sia nga kanser sa baga. Nagsiling sia: “Naluyahan gid ako sa akon problema sa panglawas. Daw nadula sa akon ang tanan, kag nahadlok gid ako.” Ano ang nakabulig sa iya nga magbatas? Nagsiling sia nga kada gab-i antes sia magtulog, nagasaka sia sa rooftop sang iya balay kag nagapangamuyo sia sing matunog parte sa lima ka butang nga ginapasalamatan niya sina nga adlaw. Kon ginahimo niya ini, nagahaganhagan ang iya pamatyag kag nagapalig-on ini sa iya nga isugid kay Jehova kon daw ano niya sia ka palangga. Naeksperiensiahan niya kon paano ginabuligan ni Jehova ang iya matutom nga mga alagad kon may mabudlay sila nga mga problema, kag narealisar niya nga mas madamo kita sang mga pagpakamaayo sangsa mga pagtilaw. Pareho kay Kyung-sook, madamo man kita sang rason para pasalamatan si Jehova bisan pa may problema kita. Kon pirme naton sia pasalamatan sa aton mga pangamuyo, makabulig ini sa aton nga makabatas kag mangin kalmado.

11. Sang nagbalik na si Jesus sa langit, ngaa kinahanglan sang iya mga disipulo ang kaisog?

¹¹ Pangabaya si Jehova nga hatagan ka sang kaisog sa pagbantala. Antes nagbalik si Jesus sa langit, ginpahanumdom niya sa iya mga disipulo ang ila asaynment nga magpanaksi parte sa iya “sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:8; Luc. 24:46-48) Wala madugay pagkatapos sini, gindakop sang mga lider sang mga Judiyo ang mga apostoles nga sanday Pedro kag Juan kag gindala sila sa Sanhedrin. Ginsugo nila ining matutom nga mga lalaki nga mag-untat sa pagbantala kag ginpahog sila. (Binu. 4:18, 21) Ano ang reaksion nanday Pedro kag Juan sa sini?

12. Suno sa Binuhatan 4:29, 31, ano ang ginhimo sang mga disipulo?

¹² Sang ginpahog sang mga lider sang relihion sang mga Judiyo sanday Pedro kag Juan, nagsabat sila: “Kon sa banta ninyo ginakabig nga matarong sang Dios nga magpamati sa inyo sa baylo nga magpamati sa Dios, yara ina sa inyo. Apang para sa amon, indi kami mag-untat sa paghambal tuhoy sa mga butang nga amon nakita kag nabatian.” (Binu. 4:19, 20) Sang ginbuy-an sanday Pedro kag Juan, nangamuyo ang mga disipulo kay Jehova parte sa paghimo sang iya kabubut-on. Amo ini ang ila pangamuyo: “Tuguti ang imo mga ulipon nga padayon nga ibantala ang imo pulong nga may daku nga kaisog.” Ginsabat ni Jehova ang ila sinsero nga pangamuyo.—Basaha ang Binuhatan 4:29, 31.

13. Ano ang matun-an naton sa halimbawa ni Jin-hyuk?

¹³ Mailog naton ang mga disipulo kon padayon kita nga magbantala bisan pa suguon kita sang gobierno nga mag-untat. Binagbinaga ang halimbawa sang isa ka brother nga si Jin-hyuk. Napriso sia bangod nangindi sia nga magsoldado. Gin-asayn sia nga asikasuhon ang pila ka priso nga ara sa bartolina. Puede niya sila istoryahon parte sa mga butang nga kinahanglan nila, pero indi niya sila puede istoryahon parte sa Biblia. Nangamuyo sia nga hatagan sia sang kaisog kag buligan sia nga mangin maalamon para makabantala sia kon may kahigayunan. (Binu. 5:29) Nagsiling sia: “Ginsabat ni Jehova ang akon mga pangamuyo paagi sa paghatag sa akon sang kaisog kag kaalam, gani nakaumpisa ako sang madamo nga Bible study. Sa puertahan sang mga selda kami naga-study kag lima lang ini ka minuto. Dayon kon gab-i, nagahimo ako sang mga sulat nga ihatag ko sa mga priso pagkasunod nga adlaw.” Makasalig man kita nga buligan kita ni Jehova sa aton pagbantala. Pareho kay Jin-hyuk, puede kita makapangamuyo nga hatagan kita sang kaisog kag kaalam.

14. Ano ang makabulig sa aton kon may mga problema kita? (Salmo 37:3, 5)

¹⁴ Pangabaya si Jehova nga buligan ka nga mabatas ang imo mga problema. Madamo sa aton ang nagaantos bangod sang balatian ukon depresyon, pagkapatay sang pinalangga, problema sa pamilya, paghingabot, kag iban pa nga problema. Mas nagbudlay pa gid batason ang madamo sa sini nga mga problema bangod sang pandemic kag mga inaway. Gani isugid kay Jehova kon ano gid ang imo ginabatyag. Isugid sa iya ang imo sitwasyon nga daw pareho lang nga ginasugid mo ini sa imo suod nga abyan. Makasalig ka nga ‘buligan ka ni Jehova.’—Basaha ang Salmo 37:3, 5.

15. Paano makabulig ang pangamuyo para ‘mabatas naton ang mga kabudlayan’? Maghatag sing halimbawa.

¹⁵ Kon padayon kita nga mangamuyo, buligan kita sini nga ‘mabatas ang mga kabudlayan.’ (Roma 12:12) Kabalo si Jehova kon ano ang ginabatas sang iya mga alagad, kag “ginapamatian niya ang ila pagpangayo sing bulig.” (Sal. 145:18, 19) Naeksperiensiahan ini sang isa ka 29 anyos nga payunir nga si Kristie. Wala niya ginpaabot nga magbalatian sia sing grabe. Bangod sini, na-depress gid sia. Sang ulihi, nagbalatian sing grabe ang iya iloy nga posible ikamatay niya. Si Kristie nagsiling: “Hanuot ako nga nangamuyo kay Jehova nga hatagan niya ako sang kusog nga kinahanglan ko kada adlaw. Naghimo ako sang regular nga iskedyul sa pag-alagad pareho sang pag-attend sa mga miting kag personal nga pagtuon, kag ginpanikasugan ko gid nga sundon ang akon iskedyul.” Nagsiling pa sia: “Nakabulig sa akon ang pagpangamuyo para mabatas ko ang mabudlay nga mga problema. Kabalo ako nga ara gid pirme si Jehova para buligan ako. Bangod sini, nagahaganhagan ang akon pamatyag. Bisan pa madugay ko nga ginbatas ang akon balatian, ginsabat ni Jehova ang akon mga pangamuyo kay ginbuligan niya ako nga mangin malinong ang akon hunahuna kag mangin kalmado.” Kabay pa nga indi gid naton pagkalimtan nga “nakahibalo si Jehova kon paano luwason sa pagtilaw ang mga tawo nga may diosnon nga debosyon.”—2 Ped. 2:9.

16. Ngaa kinahanglan naton ang bulig ni Jehova para madaug naton ang pagsulay?

¹⁶ Pangabaya si Jehova nga buligan ka nga madaug ang pagsulay. Bangod indi kita perpekto, dapat naton padayon nga pakigbatuan ang pagsulay nga maghimo sang malain. Ginahimo ni Satanas ang tanan para mabudlayan pa gid kita nga pakigbatuan ini. Ang isa ka paagi nga ginagamit niya para higkuan ang aton panghunahuna amo ang indi maayo nga mga kalingawan. Kon mahigkuan ang aton panghunahuna, mangin mahigko kita sa panulok ni Jehova kag posible makahimo kita sang serioso nga sala.—Mar. 7:21-23; Sant. 1:14, 15.

17. Pagkatapos naton pangamuyo, ano ang dapat naton himuon para malikawan naton ang pagsulay? (Tan-awa man ang piktyur.)

¹⁷ Kinahanglan naton ang bulig ni Jehova para madaug naton ang pagsulay nga maghimo sang malain. Sang gintudluan ni Jesus ang iya mga disipulo kon paano mangamuyo, ginlakip niya ini nga pangabay: “Buligi kami agod indi kami madaug sang pagsulay, kag luwasa kami sa isa nga malauton.” (Mat. 6:13) Gusto ni Jehova nga buligan kita, pero dapat naton pangabayon ang iya bulig. Pagkatapos naton pangamuyo, dapat man naton likawan ang mga butang nga makasulay sa aton. Himuon naton ang aton bug-os nga masarangan para malikawan naton ang pagbasa, pagpamati, kag pagtan-aw sang sala nga mga ideya nga ginatudlo sang kalibutan ni Satanas. (Sal. 97:10) Para maayo nga mga impormasyon ang makaimpluwensia sa aton panghunahuna, dapat naton basahon kag tun-an ang Biblia. Makaamlig man sa aton panghunahuna ang pag-attend sa mga miting kag ang pagbantala. Kag nagapromisa si Jehova nga indi sia magtugot nga sulayon kita labaw sa aton masarangan.—1 Cor. 10:12, 13.

18. Kon parte sa pangamuyo, ano ang dapat himuon sang kada isa sa aton?

¹⁸ Dapat gid mangamuyo ang kada isa sa aton nga buligan kita ni Jehova nga magpabilin nga matutom sa iya sa sining mabudlay nga katapusan nga mga adlaw. Magpain sang tion kada adlaw nga gamiton mo sa pagpangamuyo sing hanuot. Gusto ni Jehova nga ‘ipautwas naton sa iya ang aton ginabatyag.’ (Sal. 62:8) Dayawa si Jehova kag pasalamati sia sa tanan niya nga ginahimo para sa imo. Pangabaya sia nga buligan ka nga mangin maisog sa pagbantala. Pangabaya sia nga buligan ka nga mabatas ang mga problema kag madaug ang mga pagsulay. Regular nga mangamuyo kay Jehova, kag indi gid pagtuguti nga may makapugong sa imo nga himuon ini. Pero, paano ginasabat ni Jehova ang aton mga pangamuyo? Binagbinagon naton sa masunod nga artikulo ining importante nga pamangkot.