Isa ka adlaw, samtang nagabantay si Moises sang iya mga karnero, may nakita sia nga katingalahan. Ang isa ka kahoykahoy nagadabdab pero ‘wala nagakaupos.’ (Bersikulo 2) Sa iya katingala, nagpalapit sia agod mangusisa. Paagi sa isa ka anghel, nakighambal si Jehova kay Moises sa tunga sang kalayo: “Dili ka magpalapit diri; huksa ang imo mga sapin sa imo mga tiil, kay ang duug nga tindugan mo dutang balaan.” (Bersikulo 5) Hunahunaa, bangod ang nagadabdab nga kahoykahoy nagarepresentar sa presensia sang Dios, ang duta mismo nangin balaan man!

Ang kaluoy sang Dios nagahatag sa aton sing paglaum. Paagi sa iya bulig, kita nga di-himpit nga mga tawo mahimo mangin balaan kag kalahamut-an sa iya. (1 Pedro 1:15, 16) Ang isa ka Cristianong babayi nga may depresyon kag ginluyahan sing buot napalig-on gid sa naeksperiensiahan ni Moises sa may kahoykahoy. Nagsiling sia: “Kon mahimo ni Jehova nga balaan bisan ang higko, buot silingon may paglaum pa ako. Ini nga panghunahuna nakabulig gid sa akon.”