Nahiusa sa Idalom sang Hayahay sang Gugma
“Labaw sa tanan nga butang, maghupot sing mainit nga gugma sa isa kag isa.”—1 PEDRO 4:8.
1. Ano nga sahi sang gugma ang makita naton sa tunga sang katawhan sang Dios karon, kag ano ang ginawali sang hinaplas nga mga Cristiano kutob sang 1922?
MAKITA bala naton ina nga sahi sang gugma sa tunga sang katawhan sang Dios karon? Sa pagkamatuod makita naton! Isa ini ka gugma nga nasentro sa pagkilala kag sa pagsakdag sa pagkasoberano ni Jehova, subong nga ginsakdag ini ni David. Labi na kutob sang tuig 1922, ang hinaplas nga mga utod ni Jesucristo, “ang Anak ni David,” nagwali sa bug-os nga duta nga ang Ginharian malapit na kag nga ang mga sumalakdag sang mapiguson nga paggahom ni Satanas pagalaglagon sang hinaplas nga Hukom sang Dios, nga si Jesucristo.—Mateo 21:15, 42-44; Bugna 19:11, 19-21.
2. Ngaa sarang matawag si David nga ‘isa ka tawo nga kalahamut-an sa tagipusuon ni Jehova?
2 Si David ‘isa ka tawo nga kalahamut-an sa tagipusuon ni Jehova.’ Dayag ina sa iya gugma kay Jehova kag sa Iya pagkamatarong—mga kinaiya ni David nga ginkilala sang talawan nga Hari Saul—huo sa iya mga kinaiya nga indi mahinadlukon, bug-os-tagipusuon nga gugma kay Jehova, lider, kag mapainubuson nga pagpasakop sa teokratikong kahimusan. —1 Samuel 13:14; 16:7, 11-13; 17:33-36; 24:9, 10, 17.
3. Ano ang panimuot ni Jonatan kay David, kag ngaa?
3 Sang malutos ni David si Goliat, negreport sia kay Saul. Amo sadto nga ang isa pa nga nagahiugma sa pagkamatarong nakilal-an. Sia amo si Jonatan, ang kamagulangan nga anak nga lalaki ni Hari Saul. “Sang nakatapos sia [David] sa pagpakighambal kay Saul, ang kalag ni Jonatan natingob sa kalag ni David, kag ginhigugma sia ni Jonatan subong sang iya kaugalingon nga kalag.” (1 Samuel 18:1) Sa baylo sang undanon nga kaisog kag pagkahanas sa labyog, ang nagadabdab nga kakugi ni David sa pagtinlo sang ngalan sang Dios gikan sa kahuy-anan, ang iya pagkadimaiyaiyahon, kag ang iya bug-os nga pagsalig kay Jehova ang nagganyat kay Jonatan nga dayawon sia sing tinagipusuon.—Ipaanggid ang Salmo 8:1, 9; 9:1, 2.
4. Ano ang ginhimo ni Jonatan sa pagkilala nga si David amo ang isa nga hinaplas nga mangin hari?
4 Bisan pa si Jonatan magulang kay David sing mga 30 ka tuig, nahiusa sia sa sining pamatan-on nga mangangaway sa isa ka dayon nga wagkos sang pag-abyanay. “Kag naghimo sing katipan si Jonatan kag si David, bangod nga ginhigugma niya sia subong sang iya kaugalingon nga kalag. Dugang pa, gin-uba ni Jonatan ang iya kunop kag ginhatag ini kay David, kag ang iya man mga panapton, kag bisan ang iya espada kag ang iya pana kag ang iya wagkos.” (1 Samuel 18:3, 4) Daw ano ka talalupangdon nga pagpasundayag sing pagkilala sa bahin ni Jonatan! Si Jonatan ang normal nga mangin manunubli ni Saul. Apang nagpabutyag sia sing mainit, may prinsipio nga gugma kay David kag nagpasakop sa iya subong ang isa nga mangin hinaplas nga hari, ang isa nga determinado gid sa pagsakdag sang ngalan kag pagkasoberano ni Jehova.—2 Samuel 7:18-24; 1 Cronica 29:10-13.
5. Ano ang ginkilala ni Jonatan kon tuhoy sa teokratiko nga pagpakig-away?
5 Si Jonatan mismo isa man ka mangangaway tungod sa pagkamatarong. Nagsiling sia nga “wala sing makasablag kay Jehova sa pagluwas paagi sa madamo ukon paagi sa diutay.” Ngaa? Bangod ginkilala ni Jonatan nga kinahanglanon pirme ang pagtinguha sa pagtuytoy sang Dios agod mangin madinalag-on sa teokratiko nga pagpakig-away. Sang makahimo si Jonatan sing dihungod nga sala nga bangod sini ginpamatbatan sia ni Saul sing kamatayon, mapainubuson nga ginbaton niya yadto nga paghukom. Sing makalilipay, ginluwas sia sang katawhan.—1 Samuel 14:6, 9, 10, 24, 27, 43-45.
Pagpabutyag sing Matutom nga Gugma
6. Paano ang matutom nga gugma ni Jonatan nagluwas kay David?
6 Ginkahisaan ni Saul ang kadungganan ni David subong isa ka mangangaway kag naghimulat sa pagpatay sa iya, apang ginluwas sia sang matutom nga gugma ni Jonatan! Ang kasaysayan mabasa: “Tuhoy kay Jonatan, nga anak ni Saul, nahamuot sia sing labi kay David. Gani si Jonatan nagsugid kay David, nga nagasiling: ‘Si Saul nga akon amay nagahimulat sa pagpatay sa imo. Busa karon mag-andam ka sa kaagahon, kag pabilin ka sa duog nga tago kay magpanago.’” Sadto nga okasyon, gin-uluuluhan ni Jonatan si Saul, amo kon ngaa naluwas si David. Apang ang dugang pa nga mga kadalag-an ni David sa ‘pagpakig-away batok sa mga Filistinhon kag pagpamatay sa ila sa daku nga kamatay’ nagpukaw liwat sang kaugot ni Saul. Sa liwat nangin determinado sia nga patyon si David, gani nalagyo si David. —1 Samuel 19:2-10.
7. Sang makita ni Jonatan ang laaslaas nga si David, ano ang ginsiling nila sa isa kag isa sa pagpalig-on liwat sang katipan?
7 Sang ulihi, nakigkita liwat ang laaslaas nga si David kay Jonatan, nga nagsiling: “Ang bisan ano nga isiling sang imo kalag himuon ko tungod sa imo.” Ginpalig-on nila liwat ang katipan sa atubangan ni Jehova, kag nanaad si David nga indi gid niya pag-utdon ang mahigugmaon nga kaluoy gikan sa panimalay ni Jonatan—isa ka saad nga gintuman niya sing matutom. “Gani si Jonatan nagpasumpa liwat kay David tungod sang gugma niya sa iya; kay ginhigugma niya sia subong sang paghigugma niya sang iya kaugalingon nga kalag.”—1 Samuel 20:4-17; 2 Samuel 21:7.
8. Ngaa nagkitaay sing tago si Jonatan kag si David sa isa ka latagon, kag ano ang natabo sadto nga okasyon?
8 Si Hari Saul nangin matig-a sa iya pamatod nga patyon si David. Ti, ginbangkaw pa gani ni Saul ang iya mismo anak nga si Jonatan sang gin-apinan niya si David! Gani tago nga nakigkita si Jonatan kay David sa isa ka latagon. “Tuhoy kay David, . . . naghapa sia sa duta kag nagduko sing makatlo; kag naghalukay sila kag naghibiay, tubtob nga si David naglabaw. Kag si Jonatan nagsiling kay David: ‘Lahat ka sa paghidait, sa bagay nga kita nga duha nagsumpaanay sa ngalan ni Jehova, nga nagasiling, “Kabay nga si Jehova mangin sa tunga nakon kag nimo, kag sa tunga sang akon mga kaliwatan kag sang imo nga kaliwatan tubtob sa tion nga wala sing latid.”’” Gani nagbulagay sila, kag si David nangin laaslaas sa kahanayakan sang Zif.—1 Samuel 20:41, 42.
9, 10. (a) Paano ginpalig-on ni Jonatan si David sing dugang pa sa mahimo amo ang katapusan nga pagkitaay nila? (b) Sang ginpatay sang mga Filistinhon si Jonatan kag sa Saul, ano nga panalabiton ang ginkomposo ni David, kag paano niya ginhinakpan ini?
9 Sing mahigugmaon, padayon nga ginpalig-on ni Jonatan si David. Suno sa kasaysayan: “Si Jonatan nga anak ni Saul nagtindog karon kag nagkadto kay David sa Hores, agod pabakuron ang iya kamot sa Dios. Kag nagsiling sia sa iya: ‘Dili mahadlok; kay ang kamot ni Saul nga akon amay indi makatultol sa imo, kag ikaw magahari sa ibabaw sang Israel, kag ako mangin ikaduha sa imo; kag nasayran man ini ni Saul nga akon amay.’ Nian sila nga duha nagpakigkatipan sa atubangan ni Jehova.”—1 Samuel 23:15-18.
10 Mahimo gid nga amo yadto ang katapusan nga pagkitaay ni David kag sang iya matutom nga abyan nga si Jonatan. Sang ulihi, sang mapatay si Jonatan kag si Saul sa pagpakig-away batok sa mga Filistinhon, si David nagkomposo sing panalabiton, “Ang Pana.” Sa sini nagpabutyag sia sing pagtahod kay Saul subong hinaplas ni Jehova apang gintapos niya ang iya ambahanon paagi sa mga pulong: “Si Jonatan ginpatay sa imo kataasan! Nagakalisod ako tungod sa imo, utod ko nga Jonatan, manayanaya ka gid sa akon. Labaw ka makatilingala ang imo gugma sa akon sang sa gugma sang mga babayi. Daw ano nga pagkapukan sang mga gamhanan kag ang mga hinganiban sa inaway mawala!” (2 Samuel 1:18, 21, 25-27) Nian si David ginhaplas sa ikaduha nga tion, subong hari sang Juda.
Modernong-Adlaw nga mga Kaanggid
11, 12. (a) Ano nga sahi sang gugma ang ginpakita ni David kag ni Jonatan? (b) Ano ang ginlandong sang mainit nga gugma sa ulot ni David kag ni Jonatan?
11 Sanglit ang “bug-os nga Kasulatan inspirado sang Dios kag mapuslanon sa pagpanudlo,” ano ang maton-an naton gikan sa kasaysayan nahanungod kay David kag kay Jonatan? (2 Timoteo 3:16) Matalupangdan naton nga may yara gugma nga “labaw sing makatilingala . . . sang sa gugma sang mga babayi.” Matuod, “ang gugma sang mga babayi” mahimo nga manayanaya kag makalilipay kon ang kasuguan ni Jehova tuhoy sa pag-asawahay padunggan. (Mateo 19:6, 9; Hebreo 13:4) Apang si David kag si Jonatan nagpakita sing mas maayo nga bahin sang gugma, nahisuno sa sugo nga: “Pamatii, O Israel: si Jehova nga aton Dios, isa ka Jehova lamang. Kag dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga kusog.”—Deuteronomio 6:4, 5.
12 Si David kag Jonatan nahiusa sa pagpabutyag sina nga gugma sa ila pagpakig-away nga tinluan ang ngalan ni Jehova gikan sa tanan nga kahuy-anan nga gintumpi sa sini sang Iya mga kaaway. Sa paghimo sini, ginpalambo man nila ang ‘mainit nga gugma sa isa kag isa.’ (1 Pedro 4:8) Ang ila pag-abyanay sa sining bahin naglabaw pa sa ginsugo sa Levitico 19:18 nga: “Dapat mo higugmaon ang imo isigkatawo subong sang imo kaugalingon.” Sa pagkamatuod, ginlandong sini ang sahi sang gugma nga ginpakita sa “bag-ong sugo [ni Jesus] nga maghigugmaanay kamo; subong nga ako naghigugma sa inyo, nga kamo man maghigugmaanay.” Ang gugma ni Jesus nagsakripisyo sang kaugalingon indi lamang sa iya bug-os nga pagpasakop sa kabubut-on ni Jehova kundi sa iya man pagkahanda sa “paghatag sang iya kalag tungod sa iya mga abyan.”—Juan 13:34; 15:13.
Isa ka Nahiusa nga “Panong”
13. Ano nga grupo sang mga manugwali sang Ginharian ang nag-abot sa danyag labi na kutob sang 1935, kag ano nga paghiusa ang ginaagom sang hinaplas nga mga Cristiano upod sa ila?
13 Ang hinaplas nga mga Cristiano sang “diutay nga panong” amo ang may daku nga bahin sa pagpakig-away batok sa modernong-adlaw nga Goliat. Apang, kutob sang 1935, ginbuylugan sila sang mga manugwali sang Ginharian sang isa pa kag daku pa nga “toril.” Ining “iban nga mga karnero” naghiusa sa nagkalabilin nga hinaplas nga ”mga karnero” subong “isa ka panong” sa idalom sang “isa ka manugbantay,” “ang Anak ni David,” sa isa ka superlatibo nga wagkos sang mahigugmaon nga paghiusa—kaangay sang nagluntad sa ulot ni Jonatan kag ni David.—Lucas 12:32; Juan 10:16; Ezekiel 37:24.
14. Ano ang nag-anggid sa mga paghimulat ni Saul nga patyon si David, kag sang mahigugmaon nga pag-apin ni Jonatan kay David?
14 Sang nagasugod pa lang sa pagdamo ining Jonatan nga grupo sa dakung kadam-an, ang Inaway Kalibutanon II nagdabdab, gani ang hinaplas kag ang ila mga kaupod mabaskog nga gintilawan. Mga tinuig yadto sang mapintas nga paghingabot, sa masami sa pagsutsot sang klero. Nag-anggid ini sa mga pagtinguha ni Saul nga patyon ang hinaplas nga si David kag, sang ulihi, kay Jonatan sang mahigugmaon nga ginapinan niya si David. Daw ano kainit nga gugma ang ginpakita sang David kag Jonatan nga klase sa isa kag isa sadto nga panahon! Ang ilustrasyon ni Jesus sa Mateo 25:35-40 pirme may literal nga katumanan.a
15. (a) Ano nga dalanon ang ginpili sang mga Saksi nga tuhay sa ginpili sang modernong Saul nga klase? (b) Ano sa aton adlaw ang mahimo nga nagaanggid sa “malain nga espiritu gikan kay Jehova” nga nagtublag kay Hari Saul?
15 Daw ano ka tuhay ang paghupot sing integridad sang mga Saksi ni Jehova sa dalanon nga ginpili sang modernong Saul nga klase! Ang mga Saksi, nga “indi bahin sang kalibutan,” nagtuman sa sugo ni Jesus nga “maghigugma-anay” sa tugob-globo nga kasangkaron. (Juan 15:17-19) Sa pihak nga bahin, sa duha ka inaway kalibutanon ang klero sang Cristiandad sa duha ka bahin nangamuyo sa ila “dios” para sa kadalag-an, samtang minilyon ka soldado ang ginapatay sang mga soldado nga pareho nila sing relihion sa iban nga mga pungsod. Ang “malain nga espiritu gikan kay Jehova” nga nagtublag kay Saul mahimo nga nagaanggid sa resulta sang pagbubo sang mga anghel sing mga kalalat-an sang Bugna kapitulo 8. Maathag nga ang klero sang Cristiandad wala sing balaan nga espiritu ni Jehova.—1 Samuel 16:14; 18:10-12; 19:10; 20:32-34.
16. (a) Paano gingamit sang klero ang duha ka inaway kalibutanon sa pagpigos sa katawhan ni Jehova? (b) Sining karon nga mga tinuig, ngaa sarang masiling nga ang modernong-adlaw nga Saul nagpadayon sa paghingabot sa katawhan sang Dios?
16 Sang 1918 gingamit sang klero ang kabudlayan sang inaway sa paghaylo sa politikal nga mga kagamhanan sa Estados Unidos sa paghikot batok sa nagadumala nga mga opisyal sang Watch Tower Society kag sang ulihi ginpabilanggo sila. (Ining mga estudyante sang Biblia napamatud-an sang ulihi nga wala sing sala.) Sa tion sang ikaduha nga inaway kalibutanon, ang mga Saksi ni Jehova gindumilian sa duog sang Axis nga mga kagamhanan kag sa kalabanan nga pungsod sang British Commonwealth, sa masami subong resulta sang relihioso nga pag-ipit. Halimbawa, talupangda sa ibabaw ang kopya sang sulat nga ginhimo sang Arsobispo sang Sydney (sang ulihi nangin kardinal) antes gindumilian ang mga Saksi ni Jehova sa Australia. Sang ang pagdumili ginsuay sa Mataas nga Hukmanan sang Australia, ang huwes sang kasaba, nga si G. Justice Starke, naglaragway sini subong “arbitraryo, indi makatarunganon kag mapiguson.” Ang pagdumili gindula sang Hunyo 14, 1943, kag ang pangulohan ginpabayad sa halit. Sining karon lang nga mga tinuig, ang relihioso nga pag-ipit sa pila ka pangulohan sa Aprika kag sa Asia nagresulta sa mapintas nga pagpigos sa mga Saksi ni Jehova. Sa amo ang modernong-adlaw nga Saul—ang klero sang Cristiandad—nagpadayon sa paghingabot sa katawhan sang Dios.
17. (a) Paano gin-atubang sang mga Saksi ni Jehova ang padayon nga mga pag-ipit sang politika kag relihion? (b) Ano ang ginapakita sang paghiusa sang mga Saksi sa bug-os nga kalibutan?
17 Sang katuigan 1980, paano gin-atubang sang mga Saksi ni Jehova ang nagapadayon nga mga pag-ipit sang politika kag relihion? Ti, subong sa pag-atubang ni David kay Goliat, kag ni David kag ni Jonatan kay Hari Saul! Wala sila sing kahadlok kag determinado sa paghupot sang ila integridad tuhoy sa hulusayon sang pagkasoberano, kay nahibaluan nila nga ang Ginharian sang Dios magamadinalag-on. (Daniel 2:44) Sa atubangan sang paghingabot, nagahiusa sila, nagapalig-onay sa isa ka internasyonal nga wagkos sang gugma subong sang wala pa gid makita sang kalibutan. Subong mga wala sing nadampigan sa tion sang inaway, wala sila nagapatulo sing dugo sang ila mga masigkatumuluo sa iban nga mga pungsod. (Miqueas 4:3, 5) Sa amo ginapakita nila nga sila ang grupo nga ginpatuhuyan ni Jesus sang magsiling sia: “Paagi sa sini ang tanan makahibalo nga kamo mga disipulo ko, kon maghigugmaanay kamo.” (Juan 13:35) Subong tugob-globo nga pag-ululutod, ang mga Saksi ni Jehova ‘nagpanapot sang ila kaugalingon sing gugma, ang himpit nga wagkos sang paghiusa,’ isa ka wagkos nga wala nagasapak sang tanan nga sablag sang rasa, tribo, kag pungsod.—Colosas 3:14.
Pagpakita sing “Mainit nga Gugma”
18. (a) Ano ang kaanggid sa karon sang gugma ni Jonatan kay David, kag paano ini ginapamatud-an? (b) Ano ang nagresulta
18 Dumduma nga “ang kalag ni Jonatan natingob sa kalag ni David, kag ginhigugma sia ni Jonatan subong sang iya kaugalingon nga kalag.” Daw ano ka talalupangdon nga kaanggid ang yari sa sining “katapusan nga mga adlaw”! (2 Timoteo 3:1, 14) Sa bug-os nga walay pulos nga kagamo sining masingki nga dag-on, may isa ka grupo, ang mga Saksi ni Jehova, nga nagahupot sing mahigugmaon nga paghiusa sa bug-os nga globo. Subong mga Cristiano nga walay nadampigan, ginapadunggan nila ang ila Manunuga subong Soberanong Ginuo sang tanan nga katawhan. (Salmo 100:3) O, ang modernong-adlaw nga Refaim—ang politikal nga mga himata ni “Goliat”—mahimo nga magapadayon sa paghangkat sa espirituwal nga Israel. (2 Samuel 21:21, 22) Kag ang modernong-adlaw nga Saul—ang klero sang Cristiandad—mahimo magapadayon sa paggamo sa David kag Jonatan nga klase. (1 Samuel 20:32, 33) Apang “iya ni Jehova ang inaway.” Subong Soberanong Ginuo, matigayon niya ang katapusan nga kadalag-an para sa iya matutom nga mga alagad. Bangod nakita ang wala nagakompromiso nga tindog sang David nga klase, minilyon—sa tanan nga kadutaan—sa Jonatan nga grupo, lakip ang mga manughingabot anay, ang nagbuylog sa ila sa idalom sang ‘hayahay sang gugma’ ni Cristo.*—1 Samuel 17:47; Ambahanon ni Solomon 2:4.
19, 20. (a) Ano ang pila sang dalagku nga mga punto sang hilikuton sang mga Saksi subong ginpakita sang tsart sa pahina 4-7? (b) Ano ang kadasigon sang pag-uswag sang mga Saksi sa tion sang dekada sang 1979-88 (c) Ngaa sarang masiling nga ang mga Saksi isa ka katawhan nga nahiusa gid sa bug-os nga kalibutan, kag ano busa nga pamangkot ang nagautwas?
19 Sarang mo marepaso ang nagasangkad nga hilikuton sining minilyon ka Saksi paagi sa pagtan-aw sang tsart sa pahina 4-7 sining magasin. Sa tion sang dekada sang 1979-88, ang kadamuon sang mga manugbantala sang maayong balita sang natukod na nga Ginharian sang Dios nag-uswag halin sa 2,186,075 tubtob sa 3,592,654, 64.3-porsiento nga pag-uswag. Sa bug-os nga kalibutan, isa ini sila ka katawhan nga nahiusa gid sa pag-ambit sa isa ka pagtuluohan, isa ka pag-alagad sa Dios, kag isa ka dalayon nga pagsunod sa mga prinsipio sang Biblia sa moralidad. Ang mga pulong ni Jesus naaplikar karon sa sining suod nga internasyonal nga grupo: “Kon magbantay kamo sang akon mga sugo, magpabilin kamo sa akon gugma, subong nga ako nagbantay sang mga sugo sang akon Amay kag nagpabilin sa iya gugma.”—Juan 15:10; ipaanggid ang 1 Corinto 1:10.
20 Bisan pa nagabantala sila sa kapin sa 200 ka nanuhaytuhay nga hambal, ining mga Saksi ni Jehova nagahambal sing “putli nga hambal” sang kamatuoran samtang nagaalagad sila sa Dios “sa isa ka paghilisugot.” Sa sini, ginailog nila ang mahigugmaon nga huwaran ni David kag ni Jonatan. (Sofonias 3:9; 1 Samuel 20:17; Hulubaton 18:24) Kon wala ka pa nahiusa sa katawhan sang Dios, indi mo bala luyag nga mangin bahin sang modernong-adlaw nga Jonatan nga klase? Mahimo mo ina nga imo tulumuron, kag ang mga Saksi ni Jehova magapakita sing mainit nga gugma sa pagbulig sa imo nga malab-ot ina.
Mga Pamangkot Para sa Repaso
▫ Paano si Jonatan nagpabutyag sing matutom nga gugma kay David?
▫ Ano nga sahi sang gugma ang ginlandong sang gugma sa ulot ni David kag ni Jonatan?
▫ Paano ang klero sang Cristiandad naghikot kaangay ni Hari Saul sang ginhingabot niya si David?
▫ Ano sa karon ang kaanggid sa gugma ni Jonatan kay David?
▫ Ano ang ginapakita sang paghiusa sang mga Saksi sa bug-os nga kalibutan?
[Footnote]
a Ang isa ka maayong halimbawa sini ginsaysay sa 1972 Yearbook of Jehovah’s Witnesses, gikan sa pahina 216, parapo 3, tubtob sa pahina 217, parapo 3.
Tan-awa ang 1988 Yearbook of Jehovah’s Witnesses, pahina 150-4.
sa bug-os nga kalibutan gikan sa wala nagakompromiso nga tindog sang David nga klase?
[Kahon sa pahina 27]
St. Mary’s Cathedral
Sydney
August 20, 1940.
The Rt. Hon. W. M. Hughes, M.H.R.,K.C.,
Attorney General,
CANBERRA.
(BADBAD SANG SULAT)
Dear Mr. Hughes:
Ginapasalamatan ko ang imo sulat sang ika-9 tuhoy s mga katunayan nga ginhatag sa imo ni G. Jennings, M.P.
Nahangpan ko nga kinahanglan ang daku gid nga paghalong sa subong sina ka delikado nga butang nga ginpamatud-an.
Apang, kon nagaduhaduha ka bangod lamang ining mga tawo nagapangangkon nga nagapalapnag sing mga doktrina sang Cristianismo, ginapanugda ko sing matinahuron nga ang imo paghukom ipasad, indi sa ila pangangkon, kundi sa mga katunayan. Para sa mga katunayan, ginasumiter ko ang ila gid mga publikasyon kag mga pulong kag nga buhat, nga ginapamatud-an ang Polisiya sang New South Wales. Mabudlay gid hunahunaon ang bisan ano nga batok sa Cristianismo.
Ang Komisyoner sang Polisiya sa N.S.W. nagalaum nga ang awtoridad sang Commonwealth magadeklarar sa katilingban nga ginaduhaduhaan subong isa ka dilegal nga hubon agod nga ang Polisiya makahikot sa sini.
With every good wish, I remain,
Urias faithfully,
ARCHBISHOP OF SYDNEY