Ang Padya ni Job—Isa ka Tuburan sang Paglaum
“Ginpakamaayo ni Jehova ang kaulihian ni Job labi pa sa iya pamuno.” —JOB 42:12.
1. Ano ang ginahimo ni Jehova para sa iya katawhan, bisan kon ang mga pagtilaw nagapaluya sa ila sing daku?
SI Jehova “nangin manugbalos sa mga hanuot nga nagapangita sa iya.” (Hebreo 11:6) Ginapahulag man niya ang iya debotado nga katawhan nga magpanaksi sing maisugon, bisan pa kon ang mga pagtilaw naghimo sa ila nga maluya kaangay sang mga patay. (Job 26:5; Bugna 11:3, 7, 11) Napamatud-an ina nga matuod sa kaso sang nagabatas nga si Job. Walay sapayan nga ginpasipalahan sang tatlo ka butig nga manuglipay, wala sia mapahipos bangod sang kahadlok sa mga tawo. Sa baylo, nagpanaksi sia sing maisugon.
2. Walay sapayan nga nag-antos sila sing mga paghingabot kag kabudlayan, paano nakalampuwas ang mga Saksi ni Jehova sa ila mga pagtilaw?
2 Madamong Saksi ni Jehova karon ang nag-antos sing subong kadaku nga paghingabot kag kabudlayan nga diutayan lang sila mapatay. (2 Corinto 11:23) Apang, kaangay ni Job, ginpakita nila ang gugma sa Dios kag naghimo sing pagkamatarong. (Ezequiel 14:14, 20) Nalampuwasan man nila ang ila mga pagtilaw nga determinado nga pahamut-an si Jehova, napalig-on nga magpanaksi sing maisugon, kag napun-an sing tunay nga paglaum.
Si Job Nagpanaksi sing Maisugon
3. Ano nga sahi sang pagpanaksi ang ginhatag ni Job sa iya katapusan nga pamulongpulong?
3 Sa iya katapusan nga pamulongpulong, si Job naghatag sing mas daku nga panaksi sangsa ginhimo niya sang primero. Napahipos niya sing lubos ang iya butig nga mga manuglipay. Upod ang nagapangutot nga pagyubit, sia nagsiling: “Daw ano nga pagbulig mo sa iya nga wala sing gahom!” (Job 26:2) Ginpakataas ni Job si Jehova, nga sa iya gahom nagabitay sang aton dutan-on nga globo sa wala sa kahawaan kag nagabagtong sang mga tubig sa sulod sang iya madamol nga mga gal-om sa ibabaw sang duta. (Job 26:7-9) Apang, si Job nagsiling nga inang mga kalatingalahan ‘mga higad lamang sang mga dalanon ni Jehova.’—Job 26:14.
4. Ano ang ginsiling ni Job tuhoy sa integridad, kag ngaa makasiling sia sa amo nga paagi?
4 Nakapat-od sang iya pagkawalay kasal-anan, si Job nagsiling: “Tubtob nga mapatay ako indi ko pag-isikway gikan sa akon ang akon pagkatadlong!” (Job 27:5) Kabaliskaran sa butig nga mga panumbungon nga ginbutangbutang batok sa iya, wala sia sing ginhimo nga nagakabagay sa kon ano ang natabo sa iya. Nahibaluan ni Job nga wala ginapamatian ni Jehova ang mga pangamuyo sang mga apostata apang pagapadyaan niya ang mga manughupot sang integridad. Nagapahanumdom ini sa aton nga sa dili madugay pagadulaon sang Armagedon ang mga malauton gikan sa duog sang ila kagamhanan, kag indi sila makapalagyo sa walay pinilian nga kamot sang Dios. Tubtob sa katapusan, ang katawhan sang Dios magalakat sa ila integridad.—Job 27:11-23.
5. Ano ang paghangop ni Job sa matuod nga kaalam?
5 Handurawa ang tatlo ka maalamon sa kalibutan nga nagapamati samtang ginpakita ni Job nga gingamit sang tawo ang iya mga ikasarang sa pagpangita sing bulawan, pilak, kag iban pa nga manggad sa duta kag sa dagat. “Apang,” siling niya, “ang bili sang kaalam labaw pa sa mga mutya.” (Job 28:18) Indi mabakal sang butig nga mga manuglipay ni Job ang matuod nga kaalam. Ang ginahalinan sini amo ang Manunuga sang hangin, ulan, kilat, kag daguob. Sa pagkamatuod, ang matinahuron nga “kahadlok kay Jehova—ina amo ang kaalam, kag ang pagtalikod sa malaut amo ang paghangop.”—Job 28:28.
6. Ngaa nagpamulong si Job tuhoy sa iya pangabuhi anay?
6 Walay sapayan sang iya mga pag-antos, si Job wala mag-untat sa pag-alagad kay Jehova. Sa baylo nga magtalikod sa Labing Mataas, ining tawo sang integridad naghandum sang iya anay “pagpakig-abyan sa Dios.” (Job 29:4) Si Job wala nagpabugal sang ginhinumdom niya kon paano niya ‘ginluwas ang mga nasit-an, ginpanaptan ang iya kaugalingon sing pagkamatarong, kag tunay nga amay sang mga nawad-an.’ (Job 29:12-16) Sa baylo, ginsugid niya ang mga katunayan sa iya kabuhi subong isa ka matutom nga alagad ni Jehova. Nakahimo ka na bala sing subong kaayo nga rekord? Sa pagkamatuod, ginbuyagyag man ni Job ang kabutigan sang mga sumbong nga ginhimo sang tatlo ka nagapakunokuno nga mga relihioso nga mga manuglimbong.
7. Ano nga sahi sang tawo anay si Job?
7 Si Job ginyaguta sang pamatan-on nga mga lalaki ‘nga ang ila mga ginikanan wala niya ginbutang upod sa mga ido sang iya panong.’ Ginkangil-aran nila sia kag ginduplaan. Walay sapayan sang iya daku nga kasisit-an, si Job wala ginpakitaan sing konsiderasyon. (Job 30:1, 10, 30) Apang, bangod bug-os sia nga debotado kay Jehova, may matinlo sia nga konsiensia kag makasiling: “Timbangon Niya ako sa sibu nga timbangan agod mahibaluan sang Dios ang akon integridad.” (Job 31:6) Si Job indi isa ka makihilahion ukon manugpadihot, kag wala sia mapaslawan sa pagbulig sa mga kubos. Walay sapayan nga manggaranon sia anay, wala gid sia magsalig sa materyal nga manggad. Dugang pa, si Job wala maghimo sing idolatriya paagi sa paghatag sing debosyon sa walay kabuhi nga mga butang kaangay sang bulan. (Job 31:26-28) Nagasalig sa Dios, nagpahamtang sia sing maayo nga halimbawa subong manughupot sang integridad. Walay sapayan sang iya mga pag-antos kag sang presensia sang butig nga mga manuglipay, si Job naghimo sing malantipon nga pagpangapin kag naghatag sing maayo nga pagpanaksi. Natapos ang iya mga pinamulong, nagtulok sia sa Dios subong ang iya Hukom kag Manugbalos.—Job 31:35-40.
Naghambal si Elihu
8. Sin-o si Elihu, kag paano sia nagpakita sing pagtahod kag kaisog?
8 Didto sa malapit amo ang isa ka pamatan-on nga si Elihu, isa ka kaliwat sang anak ni Nahor nga si Buz kag busa isa ka malayo nga himata sang abyan sang Dios nga si Abraham. (Isaias 41:8) Si Elihu nagpakita sing pagtahod sa tigulang nga mga lalaki paagi sa pagpamati sa magtimbang nga bahin sang debate. Apang, naghambal sia sing maisugon tuhoy sa mga butang nga nagsayop sila. Halimbawa, nagdabdab ang iya kaakig sang ‘ginpakamatarong ni Job ang iya kaugalingon sa baylo sangsa Dios.’ Labi pa gid nga nagdabdab ang kaakig ni Elihu batok sa butig nga mga manuglipay. Ang ila mga pinamulong daw nagahimaya sa Dios apang sa pagkamatuod nagpasipala sa iya paagi sa pagdampig kay Satanas sa hulusayon. “Puno sang mga pulong” kag napahulag sang balaan nga espiritu, si Elihu isa ka walay pinasulabi nga saksi ni Jehova.—Job 32:2, 18, 21.
9. Paano ginpahangop ni Elihu ang pagpasag-uli kay Job?
9 Si Job labi nga nabalaka sa iya kaugalingon nga kadungganan sangsa iya sang Dios. Sa pagkamatuod, nakigbais sia sa Dios. Apang, sang tion nga daw mapatay na si Job, may patimaan sing pagpasag-uli. Sa ano nga paagi? Ti, si Elihu ginpahulag sa pagsiling nga ginkahamut-an ni Jehova si Job paagi sa sining mensahe: “Luwasa sia gikan sa pagpanaug sa buho! Nakakita ako sing gawad! Ang iya unod mangin linghod pa sangsa bata; nagabalik sia sa mga adlaw sang iya pagkapamatan-on.”—Job 33:24, 25.
10. Tubtob sa anong kasangkaron gintilawan si Job, apang ano ang mapat-od naton sa pagtamod sa 1 Corinto 10:13?
10 Gintadlong ni Elihu si Job sa pagsiling nga wala sing kaayuhan ang magkalipay sa Dios paagi sa paghupot sing integridad. Si Elihu nagsiling: “Malayo sa matuod nga Dios nga maghimo sing pagkamalaut, kag sa Labing Gamhanan nga maghimo sing dimakatarunganon! Kay suno sa paagi nga ang tawo nagapanghikot sia magapadya sa iya.” Si Job naghulag sing padasudaso paagi sa pagpadaku sang iya kaugalingon nga pagkamatarong, apang ginhimo niya ini nga wala sing nagakaigo nga ihibalo kag paghangop. Si Elihu nagdugang: “Kabay pa kuntani nga si Job tilawan tubtob sa katapusan bangod nga ang iya pagsabat kaangay sa mga tawo nga malaut.” (Job 34:10, 11, 35, 36) Sing kaanggid, ang aton pagtuo kag integridad mapamatud-an sing bug-os lamang kon ‘matilawan kita tubtob sa katapusan’ sa pila ka paagi. Walay sapayan, indi pagtugutan sang aton mahigugmaon nga Amay nga sulayon kita labaw sa aton masarangan.—1 Corinto 10:13.
11. Kon ginatilawan sing tuman, ano ang dapat naton dumdumon?
11 Sa pagpadayon ni Elihu, ginpakita niya liwat nga ginpadaku sing tuman ni Job ang iya kaugalingon nga pagkamatarong. Ang igtalupangod dapat nga ihugod sa aton Dakung Magbubuhat. (Job 35:2, 6, 10) Ang Dios “wala nagatipig sang kabuhi sang malauton, kundi nagahatag sa napiutan sang ila matarong,” siling ni Elihu. (Job 36:6) Wala sing makatudlo sa Dios sang iya dalanon kag makasiling nga nangin dimatarong sia. Labi sia nga mataas sangsa aton nahibaluan, kag ang iya mga katuigan wala sing katapusan. (Job 36:22-26) Kon ginatilawan sing masakit, dumduma nga ang aton dayon nga Dios matarong kag pagapadyaan niya kita bangod sang aton matutom nga mga hilikuton nga nagadala sing kadayawan sa iya.
12. Ano ang ginpahangop sang nagahinakop nga mga pinamulong ni Elihu tuhoy sa paghukom sang Dios sa mga malauton?
12 Samtang nagahambal si Elihu, isa ka unos ang nag-abot. Samtang nagapadulong ini, nagsugod sa pagkubakuba kag pagkurog ang tagipusuon ni Elihu. Nagpamulong sia tuhoy sa dalagkung mga butang nga ginhimo ni Jehova nga nagasiling: “Pamatii ini, O Job; pahimunong ka kag patugsilingi ang makatilingala nga mga binuhatan sang Dios.” Kaangay ni Job, dapat naton binagbinagon ang dalagkung binuhatan kag makahalawhaw nga dignidad sang Dios. “Tuhoy sa Labing Gamhanan, indi naton sia matungkad,” siling ni Elihu. “Lakas gid sia sa gahom, kag ang katarungan kag bugana nga pagkamatarong indi niya pagpakadiutayon. Busa magakahadlok sa iya ang mga tawo.” (Job 37:1, 14, 23, 24) Ang nagahinakop nga mga pinamulong ni Elihu nagapahanumdom sa aton nga kon laglagon sang Dios ang malauton sa dili madugay, indi niya pagpakadiutayon ang katarungan kag pagkamatarong kag iya pagaluwason yadtong nagakahadlok sa iya subong mahinadlukon niya nga mga sumilimba. Daw ano nga pribilehiyo nga maisip upod sa sinang mga manughupot sing integridad nga nagakilala kay Jehova subong ang Soberano sa Bug-os nga Uniberso! Magbatas kaangay ni Job, kag indi pagtuguti ang Yawa nga magpahilayo sa imo gikan sa imo ginpakamaayo nga duog sa tunga sining malipayon nga mga kadam-an.
Ginsabat ni Jehova si Job
13, 14. (a) Tuhoy sa ano ginpamangkot ni Jehova si Job? (b) Ano nga mga punto ang matun-an gikan sa iban pa nga mga pamangkot sang Dios kay Job?
13 Daku gid ang kakibot ni Job sang nakighambal sa iya si Jehova gikan sa buhawi! Yadto nga buhawi isa ka buhat sang Dios, indi kaangay sang mabaskog nga hangin nga gingamit ni Satanas sa paghapay sa balay kag nagpatay sa mga anak ni Job. Wala makatingog si Job sang magpamangkot ang Dios: “Diin ka bala sang ginpasad ko ang mga sadsaran sang duta? . . . Sin-o bala ang nagpasad sang iya bato nga pamag-ang, sang nag-ambahan sing tingob ang kabituunan sang kaagahon, kag naghinugyaw sa kalipay ang tanan nga anak sang Dios?” (Job 38:4, 6, 7) Isa-isa nga ginpamangkot ni Jehova si Job tuhoy sa dagat, sa mga panganod nga panapton sini, sa pamanagbanag, sa mga gawang sang kamatayon, sa kapawa kag kadudulman, kag sang mga konstelasyon. Wala sing may nahambal si Job sang ginpamangkot sia: “Nahibaluan mo bala ang mga pagsulundan sang langit?”—Job 38:33.
14 Ginpakita sang iban pa nga mga pamangkot nga antes gintuga ang tawo kag ginhatagan sing gahom sa ibabaw sang kaisdaan, kapispisan, kasapatan, kag nagasaug nga mga butang, gin-amanan sila sang Dios—nga wala sing bulig ukon laygay sang bisan sin-o nga tawo. Ang dugang nga mga pamangkot ni Jehova nagsambit sa mga tinuga kaangay sang baka nga talunon, ang tulabong, kag kabayo. Ginpamangkot si Job: “Tungod bala sa imo sugo nga ang agila nagapaibabaw kag nagahimo sang iya mga pugad sa mataas?” (Job 39:27) Indi sa pagkamatuod! Handurawa ang reaksion ni Job sang ginpamangkot sia sang Dios: “Magapakigsuay bala sa Labing Gamhanan ang manugbasol?” Indi makapakibot nga si Job nagsiling: “Yari karon ako talamayon. Ano bala ang akon isabat sa imo? Ginatabon ko ang akon kamot sa akon baba.” (Job 40:2, 4) Sanglit si Jehova pirme nga husto, kon masulay man kita sa pagreklamo batok sa iya, dapat naton ‘tabunan sang aton kamot ang aton baba.’ Ang mga pagpamangkot sang Dios nagpadaku man sang iya pagkasuperyor, dignidad, kag kusog, subong sang makita sa pagpanuga.
Ang Behemot kag ang Leviatan
15. Ang Behemot ginakabig sa kabilugan subong ano nga sahi sang sapat, kag ano ang pila ka mga kinaiya sini?
15 Masunod ginhinambitan ni Jehova ang Behemot, ginapatuhuyan sa kabilugan subong ang hippopotamus. (Job 40:15-24) Talalupangdon sa iya tuman nga kadakuon, kabug-aton, matig-a nga panit, ining herbivorous nga sapat ‘nagahalab sing berde nga hilamon.’ Ang iya kabakod kag kusog yara sa iya mga balikawang kag mga kaunuran sang iya tiyan. Ang mga tul-an sang iya mga tiil subong kabakod sang “tubo nga saway.” Ang Behemot wala nahadlok sa baha kundi nagalangoy sugata sa sulog sang tubig.
16. (a) Ang paglaragway sa Leviatan nagakaigo sa ano nga sapat, kag ano ang pila ka katunayan tuhoy sini? (b) Ang kusog sang Behemot kag Leviatan mahimo nagapahangop sing ano tuhoy sa pagtuman sa mga asaynment sa pag-alagad kay Jehova?
16 Ginpamangkot man sang Dios si Job: “Makuha mo bala ang Leviatan sa taga, ukon mapasalop mo bala ang iya dila sa pisi?” Ang paglaragway sa Leviatan nagakaigo sa buaya. (Job 41:1-34) Indi ini magahimo sing katipan sing paghidait sa kay bisan sin-o, kag wala sing maalamon nga tawo ang mangahas sa pagtublag sa sini nga reptilya. Ang mga baslay indi makapapalagyo sa iya, kag “nagakadlaw sia sa hagunos sang sumbiling.” Ginapabukal sang akig nga Leviatan ang kadadalman kaangay sang kolon. Ang katunayan nga ang Leviatan kag ang Behemot labi nga makusog sangsa kay Job nakabulig sa iya nga magpaubos. Dapat man naton batunon sing mapainubuson nga indi kita makusog sa aton kaugalingon. Nagakinahanglan kita sing hatag-Dios nga kaalam kag gahom agod malikawan ang mga bangkil ni Satanas, ang Man-ug, kag matuman ang aton mga asaynment sa pag-alagad kay Jehova.—Filipos 4:13; Bugna 12:9.
17. (a) Paano nga ‘nakita ni Job ang Dios’? (b) Ano ang ginpamatud-an sang mga pamangkot nga wala masabat ni Job, kag ano ang mabulig sini sa aton?
17 Napaubos sing lubos, gin-ako ni Job ang sayop niya nga pagtamod kag ginbaton nga naghambal sia nga wala sing ihibalo. Apang, nagtuo sia nga “makita [niya] ang Dios.” (Job 19:25-27) Paano ina matabo, sanglit wala sang tawo ang makakita kay Jehova kag mabuhi? (Exodo 33:20) Sa pagkamatuod, nakita ni Job ang pagpadayag sang gahom sang Dios, nabatian ang pulong sang Dios, kag nabuksan ang iya mata sang paghangop agod makita ang kamatuoran tuhoy kay Jehova. Busa ‘ginbawi ni Job ang iya ginpanghambal kag naghinulsol sa yab-ok kag abo.’ (Job 42:1-6) Ang madamo nga pamangkot nga wala niya masabat nagpamatuod sa pagkasupremo sang Dios kag nagpakita sa pagkadiutay sang tawo, bisan nga ang isa nga debotado kay Jehova kaangay ni Job. Nagabulig ini sa aton nga makita nga ang aton mga luyag indi dapat pagkabigon nga labaw sangsa pagpakabalaan sa ngalan ni Jehova kag sa pagbindikar sang iya pagkasoberano. (Mateo 6:9, 10) Ang kabalak-an naton sing una amo dapat ang paghupot sing integridad kay Jehova kag pagpadungog sa iya ngalan.
18. Ano ang kinahanglan nga himuon sang butig nga mga manuglipay ni Job?
18 Apang, kamusta ang nagapakamatarong sa kaugalingon nga sayop nga mga manuglipay? Mahimo patyon sing nagakaigo ni Jehova sanday Elifaz, Bildad, kag Zofar bangod sang indi paghambal sing matuod tuhoy sa iya, kaangay sang ginhimo ni Job. “Kuha kamo nga sa inyo sing pito ka tinday nga baka nga lalaki kag pito ka karnero nga lalaki, kag kadto sa akon alagad nga si Job,” siling sang Dios, “kag magdulot nga sa inyo sing halad-nga-sinunog; kag ang akon alagad nga si Job magapangamuyo tungod sa inyo.” Agod matuman ini kinahanglan nila nga tatlo ang magpaubos. Dapat sila pangamuyuan sang manughupot sang integridad nga si Job, kag nangin kalahamut-an ang iya pangamuyo kay Jehova. (Job 42:7-9) Apang kamusta ang asawa ni Job, nga nagsugo sa iya nga sumpaon ang Dios kag magpakamatay? Ginapakita nga nakapakig-uli sia kay Job bangod sa kaluoy sang Dios.
Ang Ginsaad nga mga Padya Nagahatag sa Aton sing Paglaum
19. Tuhoy kay Job, paano ginpakita ni Jehova ang iya pagkasuperyor labaw sa Yawa?
19 Sa tapos nga nag-untat si Job sa pagkabalaka tuhoy sa iya mga pag-antos kag nakabalik sa pag-alagad sa Dios, ginbag-o ni Jehova ang mga butang para sa iya. Sa tapos makapangamuyo si Job tungod sa tatlo, ‘ginbayluhan sang Dios ang iya kabihagan’ kag ginhatagan sia sing ‘pilo sang kadamuon sang iya sang una.’ Ginpakita ni Jehova ang Iya pagkasuperyor sa Yawa paagi sa pagpadulog sa nagahatag-balatian nga kamot ni Satanas kag sa milagruso nga pagpaayo kay Job. Gintabog man sang Dios ang hubon sang mga demonyo kag ginbantayan sila paagi sa pag-amlig liwat kay Job paagi sa dulugan sang Iya mga anghel.—Job 42:10; Salmo 34:7.
20. Sa anong mga paagi ginpadyaan kag ginpakamaayo ni Jehova si Job?
20 Ang mga utod nga lalaki, babayi, kag mga abyan anay ni Job nag-inabot agod sa pagsalo sa pagkaon upod sa iya, nagsimpatisar sa iya, kag naglipay sa iya bangod sa kalamidad nga gintugutan ni Jehova nga maagihan niya. Ang tagsa sa ila naghatag kay Job sing kuwarta kag isa ka bulawan nga singsing. Ginpakamaayo ni Jehova ang kaulihian ni Job sing kapin pa sang iya pamuno, amo kon ngaa nakatigayon sia sing 14,000 ka karnero, 6,000 ka kamelyo, 1,000 ka pares nga baka, kag 1,000 ka asno nga babayi. Nakatigayon man si Job sing pito ka anak nga lalaki kag tatlo ka anak nga babayi, pareho nga kadamuon sangsa primero. Ang iya mga anak nga babayi—sanday Jemima, Kesia, kag si Keren-hapuc—amo ang pinakamatahom nga babayi sa bug-os nga duta, kag ginhatagan sila ni Job sing palanublion sa tunga sang ila mga utod nga lalaki. (Job 42:11-15) Dugang pa, nagkabuhi si Job sing 140 pa ka tinuig kag nakita ang apat ka henerasyon sang iya kaanakan. Ang kasaysayan nagahinakop: “Gani si Job napatay, nga tigulang kag puno sing mga adlaw.” (Job 42:16, 17) Ang paglawig sang iya kabuhi isa ka milagruso nga buhat ni Jehova nga Dios.
21. Paano kita mabuligan sang Makasulatanhon nga rekord tuhoy kay Job, kag ano ang determinado naton nga himuon?
21 Ang Makasulatanhon nga rekord tuhoy kay Job labi nga nagapakita sa aton sa mga pahito ni Satanas kag nagabulig sa aton sa paghangop kon paano ang unibersal nga pagkasoberano naangot sa tawhanon nga integridad. Kaangay ni Job, ang tanan nga nagahigugma sa Dios pagatilawan. Apang sarang kita makabatas kaangay ni Job. Nalampuwasan niya ang iya mga pagtilaw upod ang pagtuo kag paglaum, kag madamo ang iya mga padya. Subong mga alagad ni Jehova sa karon, may matuod kita nga pagtuo kag paglaum. Kag daw ano kadaku nga paglaum ang ginaaman sang Dakung Manugbalos para sa tagsa sa aton! Ang paghupot sa hunahuna sa langitnon nga padya makabulig sa mga hinaplas sa pag-alagad sa Dios sing matutom sa nabilin sang ila dutan-on nga kabuhi. Madamo sing may dutan-on nga paglaum ang indi na mapatay, apang yadtong mapatay pagapadyaan sing pagkabanhaw sa Paraiso nga duta, kaupod ni Job mismo. Upod sinang matuod nga mga paglaum sa tagipusuon kag hunahuna, kabay nga pamatud-an sang tanan nga nagahigugma sa Dios nga butigon si Satanas paagi sa pagtindog nga malig-on sa kiliran ni Jehova subong mga manughupot sing integridad kag malig-on nga mga manugsakdag sang iya pagkasoberano sa bug-os nga uniberso.
Paano Mo Sabton?
◻ Ano ang pila ka punto nga ginsiling ni Job sa iya ulihi nga pagsabat sa iya butig nga mga manuglipay?
◻ Paano si Elihu nangin isa ka walay pinasulabi nga saksi ni Jehova
◻ Ano ang pila ka pamangkot sang Dios kay Job, kag ano ang epekto sini?
◻ Paano ka nakapanginpulos gikan sa Makasulatanhon nga rekord tuhoy kay Job?
[Mga piktyur sa pahina 18]
Ang mga pinamulong ni Jehova tuhoy sa Behemot kag Leviatan nakabulig kay Job nga magpaubos