Mga Pamangkot Gikan sa mga Bumalasa

◼ Ginahangop ko nga sugod sang mahulog ang tawo sa sala ang Dios nagpakig-angot sa mga tawo paagi lamang sa iya Anak. Gani paano nga nakig-angot sing direkta si Jehova kay Satanas, subong ginapakita sang tolon-an ni Job?

Ang Dios nakig-angot sa mga tawo paagi sa iya Anak antes kag sa tapos makasala si Adan kag makapatubas sing dihimpit nga kaliwatan.—Roma 5:12.

Ang Colosas 1:16, 17, nagasiling tuhoy sa panganay nga Anak sang Dios: “Paagi sa iya gintuga ang tanan nga iban pa nga butang sa langit kag sa duta, ang makita kag ang dimakita . . . Ang tanan nga iban pa nga butang gintuga paagi sa iya kag tungod sa iya. Subong man, nauna sia sa tanan nga iban pa nga butang kag paagi sa iya ang tanan nga iban pa nga butang nagluntad.” Kaanggid man nga punto ang ginasambit sang Juan 1:1-3, apang natun-an man naton nga ining Anak amo ang Pulong, ukon Logos. Bisan sang ang tanan nga tawo himpit pa, sa wala pa makasala si Adan kag si Eva, ang Dios nakig-angot sa ila kag nakigkomunikar sa ila paagi sa Iya humalambal, ang Pulong. Gani indi kita dapat maghunahuna nga ang pagpakig-angot sang Dios sa katawhan paagi sa iya Anak resulta sang pagkahulog sang tawo sa sala kag pagkadihimpit.

Ang Biblia wala nagahatag sa aton sing daku nga detalye kon paano nagapakig-angot si Jehova nga Dios sa espiritu nga mga tinuga. Ang Job kapitulo 1 kag 2 nagasaysay nga si Satanas nagpakita isa ka bes sa “atubangan ni Jehova” sa pagtinipon sang mga anghel sa langit. “Nian nagsiling si Jehova kay Satanas: ‘Diin ka bala maghalin?’” (Job 1:6, 7) Sa sini nga kaso, wala ginalaragway sang tolon-an ni Job si Satanas nga nagapakigkomunikar kay Jehova paagi sa isa ka manugpatunga. Sa liwat, nakita ni manalagna Micaya si Jehova sa palanan-awon nga nagalingkod sa Iya trono. Ang manalagna nakakita sing anghel nga nagapakigkomunikar kay Jehova, kag wala sing manugpatunga nga ginsambit. (1 Hari 22:19-23) Wala makita ang Logos sa sining duha ka kaso. Wala ginsambit sing espisipiko kon bala nadalahig sia ukon wala.

Bisan pa ang paagi sang pagpakigkomunikar ni Jehova nga Dios kay Adan wala magbalhin sang makasala ang una nga tawo, ang kahimtangan ni Adan tuhay na. Sa wala pa sia makasala, si Adan isa ka tawhanon nga “anak sang Dios.” (Lucas 3:38) Pagkatapos sadto indi na sia anak. Ang mga kaliwat ni Adan nangin dihimpit man, nga namantsahan sing sala. Sa amo, wala sa posisyon si Jehova nga tamdon bisan ang matutom kag maunungon nga mga lalaki kag mga babayi subong iya “mga anak,” ukon tawhanon nga mga anak. Apang, nagtuyo sia sing pagbalhin. Nagkari si Jesus kag naghatag sing halad nga gawad, nga nagapasad sing sadsaran para kay Jehova agod patawaron ang mga sala sang mga nagatuo sa sadto nga halad. Si apostol Pablo nagpaathag sa mga Cristiano: “Sang mga kaaway pa kita, ginpasag-uli kita sa Dios paagi sa kamatayon sang iya Anak.”—Roma 5:10; Efeso 1:7.

Huo, nga wala ginahimo ang iya kaugalingon nga dimatarong ukon dimatinlo, sa tapos sadto mapatawad ni Jehova ang sala sang mga tawo sang pagtuo kag tamdon sila subong matinlo, wala sing sala nga tawhanon nga mga anak, nga nagahulat agod adoptaron subong espirituwal nga mga anak. (Roma 3:25, 26; 8:15-17) Apang, bisan sa sini, gingamit sang Dios ang iya Anak, subong ginpakita sang kasaysayan sang magpasagahay si Jesus sing balaan nga espiritu sang Pentecostes.—Binuhatan 2:33.

Gani ang pagpakig-angot sang Dios sa mga tawo paagi sa Pulong indi bangod nagpakasala ang tawo, ukon tamdon ini nga nagasumpakil sa aton mabasa sa tolon-an ni Job.