Madumduman Mo Bala?

Nabasa mo bala ang ulihi nga mga guwa sang Ang Lalantawan? Ti, tan-awa kon masabat mo ang masunod nga mga pamangkot:

◻ Bangod ang malinapason nga mga anghel ginbutang sa Tartaro, ano ang buot silingon sini para sa ila? (2 Pedro 2:⁠4)

Wala na sila sing lugar sa balaan nga organisasyon ni Jehova kag gin-utod na karon gikan sa balaan nga pagsulu. Apang, nagapanghikot gihapon sila sa idalom sang panuytoy ni Satanas kag padayon nga may suod nga kaangtanan sa mga tawo, nagapanikasog nga makontrol ang mga lalaki, mga babayi, kag bisan ang mga kabataan. (Bugna 12:​12, 17)​—⁠4/15, pahina 14.

◻ Ano ang kinahanglan sa “pagdumot sang malain” sa mata ni Jehova? (Salmo 97:⁠10)

Ang nagadumot sang malain indi magapangita sing mga paagi nga magpatuyang sa sini. Sa pihak nga bahin, ang mga tawo nga wala nagadumot sini mahimo nga mag-untat sa sini sing pisikal samtang nagahandum sa mental nga makahimo sila sing malain nga mga butang.​—⁠4/15, pahina 21.

◻ Sa ilustrasyon ni Jesus nahanungod sa mga talanton, anong solemne nga leksion ang ginahatag para sa tanan nga nagaangkon nga mga sumulunod ni Cristo? (Mateo 25:​14-30)

Dapat sila magpangabudlay agod pamuaron ang pagkabutang sang ila langitnon nga Amay paagi sa pagpakigbahin sing bug-os sa pagbantala nga hilikuton. Sa sina lamang nga makasalig sila sang komendasyon ni Jesus kag pagapadyaan. Busa ginalikawan nila ang madap-ong sa kadadalman sa guwa kag sa ulihi nga kalaglagan.​—⁠5/1, pahina 9.

◻ Ano ang buot silingon ni Jesus sang ginsugo niya ang iya mga disipulo nga mangamuyo: “Indi kami pagdalha sa pagsulay”? (Mateo 6:⁠13)

Ining mga pulong indi dapat hangpon nga nagakahulugan nga ginasulay kita ni Jehova sa paghimo sing sala. Sa baylo, kita, sa katunayan, makapangabay kay Jehova nga indi kita magpadala kon ginasulay ukon ginaipit nga lapason sia. Mapangabay naton sa aton Amay nga tuytuyan niya ang aton mga tikang agod indi kita masulay nga tuman gid ka grabe para sa aton nga antuson. (1 Corinto 10:13)​—⁠5/15, pahina 19.

◻ Nagakaigo bala para sa isa ka Cristiano nga magpaindyeksion sing bahin sang dugo, subong sang im­mune globulin ukon albumin?

Nagahulag sa kasuguan sang Dios, ang mga Cristiano wala nagabaton sing mga pagtayhon sang dalagku nga elemento sang dugo​—⁠plasma, red cells, white cells, ukon plate­lets. Apang, ang iban nga mga Saksi ni Jehova nagabatyag nga sarang sila makapaindyeksion sang isa sa diutay nga bahin nga protina sang plasma. Sing makawiwili, ang iban sining mga protina kinaugali nga nagaagi halin sa ugat sang nagamabdos nga babayi pakadto sa lain nga sistema sang dugo sa iya kiring.​—⁠6/1, pahina 30, 31.

◻ Ano nga katuyuan ang ginhatag sang paghinaw ni Jesus sang mga till sang mga disipulo sa katapusan nga Paskwa?

Gintudluan ni Jesus ang iya mga disipulo sing leksion sang pagkamapinabuson. Wala sing isa nga dapat magtinguha sang una nga lugar, nagahunahuna nga sia importante. Sa baylo, dapat sundon sang tanan ang halimbawa ni Jesus kag mangin handa sa pag-alagad sa isa kag isa nga wala sing dinampigan, bisan pa kon daw ano ka dimaayo ukon kanubo ang hilikuton. (Juan 13:​12-17)​—⁠6/15, pahina 9.

◻ Sa anong kahulugan nga ‘gin-usisa sing maayo’ sang mga Judiyo sa Berea ang mga Kasulatan? (Binuhatan 17:⁠11)

Indi nga ginpangduhaduhaan sang mga taga-Berea si Pablo kag ang mensahe nga gindala niya sa ila, kundi nagpanalawsaw sila agod pamatud-an nga si Jesus amo ang Mesias. Nga madamo sa ila ang nangin tumuluo nagapakita nga ang ila motibo tunay. (Binuhatan 17:12)​—⁠6/15, pahina 18.

◻ Ano ang “libro sang mga Inaway ni Jehova”? (Numeros 21:⁠14)

Amo ini ang masaligan nga maragtas sang mga inaway sang Dios tungod sa iya katawhan. Ayhan nag-umpisa ini sa pagdaug ni Abraham sa armado nga mga sumalakay sang Ginsaad nga Duta subong sang narekord sa Genesis kapitulo 14. Ang daku nga katapusan sang libro amo ang “inaway sang dakung adlaw sang Dios nga Labing Gamhanan” sa Har–Magedon. (Bugna 16:​14, 16)​—⁠7/1, pahina 20, 22.

◻ Paano kita ginabuligan sang Pulong sang Dios, ang Biblia, sa pagbatas sang kasakit?

Ginasugid sa aton sang Biblia kon ngaa gintugutan ni Jehova ang kasakit, kag nagapasalig man ini sa aton nga ang kasakit madula sa indi madugay. (Roma 5:12; Bugna 21:​1-5)​—⁠7/15, pahina 4, 5.

◻ Paano karon ang katawhan sang Dios “nagatulok sang himaya ni Jehova”? (2 Corinto 3:⁠18)

Ang himaya sang Dios nagaiwag paagi sa “mahimayaon nga maayong balita nahanungod kay Cristo, nga amo ang larawan sang Dios.” Ginapakita sang mga Saksi ni Jehova ini nga himaya paagi sa pagpamulong sang himaya ni Jehova kag sang himaya sang iya Ginharian paagi sa iya Anak. (2 Corinto 4:​4-6)​—⁠7/15, pahina 15, 16.

◻ San-o ang isa dapat bawtismuhan?

Ang bawtismo isa ka tikang nga ginahimo kon ang isa nakahimo sing bug-os, matutom kag wala sing kondisyon nga dedikasyon kay Jehova paagi kay Jesucristo sa paghimo sang kabubut-on sang Dios.​—⁠8/1, pahina 14.