Naayawan Ka Bala sa Espirituwal nga mga Aman ni Jehova?
“‘Tilawi ako, palihog, sa sini,’ siling ni Jehova sang kasoldadosan, ‘kon indi ko pagbuksan sa inyo ang mga talambuan sang langit kag iula sa inyo ang pagpakamaayo sa bagay nga wala na sing masudlan.’”—MALAQUIAS 3:10.
1. Sa ano nga mga aman naayawan ang kalabanan sang buhi nga mga tinuga?
KON mag-untat ka sa pagginhawa sing hangin, mapatay ka sa sulod sang pila ka minutos. Kon mag-untat ka sa pag-inom sing tubig, mapatay ka sa sulod sang pila ka adlaw. Kon mag-untat ka sa pagkaon sing kalan-on, mapatay ka sa sulod sang pila ka semana. Kon mag-untat ka sa pagkaon sing espirituwal nga mga aman ni Jehova, kon mapatay ka mangin patay ka sing dayon. Si Jehova ang nagaaman sing hangin, tubig, kag kalan-on nga ginakinahanglan sang tanan buhi nga tinuga. Busa, kay Jehova ang salmista nagsiling: “Ginahumlad mo ang imo kamot kag ginabusog ang handum sang tagsa ka butang nga buhi.” (Salmo 145:16) Ang handum sang kalabanan sang buhi nga butang ginabusog sang materyal nga mga aman. Apang indi ini matuod sa mga tawo nga tinuga.
2. Ano ang handum sang tagipusuon sang tawo, kag ano nga aman ang kinahanglanon agod mapaayawan ini?
2 Ginpakita ini ni Jesus sang magsiling sia: “Indi lamang sa tinapay mabuhi ang tawo, kundi sa tagsa ka pulong nga nagaguwa sa baba ni Jehova.” (Mateo 4:4) Ang manubo nga mga tinuga wala nagahunahuna sing dayon, apang ang tawo amo sini, subong ginasiling sang Manugwali 3:11: “Ginbutang man niya ang wala sing katubtuban sa ila tagipusuon.” Ukon suno sa pagbadbad sang Revised Standard Version: “Ginbutang niya ang pagkadayon sa hunahuna sang tawo.” Busa, ang tinagipusuon nga handum sang tawo amo nga mabuhi tubtob sa walay katubtuban, sing dayon. Ang hangin, tubig, kag tinapay lamang indi pa nagakaigo para sa sina. Agod mabuhi sing dayon, kinahanglan ang espirituwal nga mga aman nga napasad sa “tagsa ka pulong nga nagaguwa sa baba ni Jehova.” Sa karon, masapwan sila sa isa ka tolon-an, ang Biblia, kag indi maubos ang suplay—ang tanan nga kinahanglanon, kapin pa sa imo masarangan. Wala gid sing tion nga ining platera wala sing unod.
3. Ano ang ginsambit ni Jesus subong labing importante, kag ano nga tinago ang naton-an ni Pablo?
3 Gintudluan kita ni Jesus nga mangamuyo para sa kinahanglanon nga materyal nga kalan-on: “Hatagi kami karon nga adlaw sang amon kalan-on sa adlaw-adlaw.” Apang pagkatapos sini gin-una niya ang espirituwal nga mga butang sang magsiling sia: “Padayon, nian, nga pangitaa anay ninyo ang ginharian sang Dios kag ang iya pagkamatarong.” (Mateo 6:11, 33) Ang materyal nga kalan-on nagahupot sa aton nga buhi sa adlaw-adlaw; ang padayon nga espirituwal nga pagkaon makahimo sini tubtob nga nagakabuhi kita, kag bisan sing dayon. Gani dili paghimud-usi ang materyal nga mga butang. Si Pablo indi subong sini. Naghambal sia tuhoy sa espirituwal nga mga manggad nga nakabulig sa iya agod mangin kontento walay sapayan sang materyal nga mga kahimtangan, nga nagasiling: “Naton-an ko ang tinago sang pagkabusog kag pagkagutom, sang kabuganaan kag kinawad-on. May kusog ako sa tanan nga butang bangod sa iya nga nagahatag sa akon sing gahom.”—Filipos 4:12, 13.
Ang Kalamidad Nagaabot sa mga Indi Naayawan
4. Ano nga mga aman ang kulang pa para sa nahaunang tawhanon nga paris, kag ano pa ang luyag nila?
4 Apang, madamo ang wala naayawan sa mga aman ni Jehova. Ang aton nahauna nga mga ginikanan wala maayawi. Nagpuyo sila anay sa isa ka paraiso nga hardin—ang matahom nga danyag nagpahamuot sa ila mga mata, ang mahumot nga mga bulak nagpahamot sang hangin nga ila ginginhawa, ang manamit nga mga kalan-on nagpukaw sang ila mga dila, ang ambahanon sang mga pispis naglanton sa ila mga dulunggan. Dugang pa, may makawiwili sila anay nga buluhaton sa pag-atipan sining hardin, dugang pa ang pagpakamaayo nga tugbon ang duta sing himpit nga mga anak. Apang makagod sila. Ang ginhatag sa ila sang Dios nangin kulang pa. Naghandum sila sing dugang pa. Luyag nila nga sila ang mamat-od para sa ila kaugalingon kon ano ang husto kag kon ano ang sayop. Gani amo ang ila ginhimo, kag ang nahauna gid nga desisyon nga ginhimo nila makahalalit, nga nagresulta sa pagkadula sang tanan, para sa ila kaugalingon kag para sa ila mga anak.—Genesis 3:1-7, 16-19.
5. Ano ang ginpakamaayo ni Jehova sa mga Israelinhon, kag ano ang ila reaksion?
5 Gin-ilog sang mga Israelinhon ang ila malain nga halimbawa. Ginluwas sila sang Dios gikan sa pagkaulipon sa Egipto, ginhimo sila nga isa ka pungsod, ginhatagan sila sing himpit nga Kasuguan, gintuytuyan sila sa ila mga paglakbay sa kahanayakan, gin-amanan sila sing mga panapton nga wala gid magdaan, kag milagruso nga ginpakaon sila sing mana nga nagakahulog gikan sa langit kag sing tubig nga nagbulwak gikan sa isa ka daku nga bato. Apang wala sila maayawi sa mga aman ni Jehova. (1 Corinto 10:1-5) Samtang nagapanlakatan sila sa kahanayakan, nagreklamo sila sa liwat kag liwat.—Exodo 13:21, 22; Numeros 11:1-6; Deuteronomio 29:5.
6. Ano nga dalanon ang nagdala sing kalaglagan sa mga Israelinhon subong isa ka pungsod?
6 Nagkumodkumod gihapon sila sa tapos sila makasulod sa Ginsaad nga Duta—isa ka matambok, bugana sa tubig nga duta nga “ginailigan sing gatas kag dugos.” Wala gihapon sing utang nga kabalaslan, wala gihapon maayawi sa mga aman ni Jehova, ginbiyaan nila ang pagsimba sa iya, nagliso sa idolatroso nga pagsimba sa sekso, naghalad sang ila kabataan kay Molec, kag nagdala sila sing kalaglagan sa ila kaugalingon subong isa ka pungsod. Sa tapos mapasag-uli gikan sa pagkabihag sa Babilonia, ginsunod nila ang pinalatonlaton nga tradisyon nga naghimo sa Pulong sang Dios nga wala sing pulos. Nagdangat sila sang ulihi sa pagpatay sa ila ginsaad nga Mesias, si Cristo Jesus.—Deuteronomio 6:3; 8:7-9; Hukom 10:6; 1 Hari 14:22-24; 2 Hari 21:1-16; Isaias 24:1-6; Mateo 15:3-9; 27:17-26.
7. Paano ang mga klero sang Cristiandad karon nagpadayon sa dalanon nga pareho sa ginhimo sang dimatutom nga mga saserdote sang panahon ni Malaquias?
7 Tubtob sa karon nga adlaw ang katawhan sa kabilugan nagapadayon sa pagpasulabi sa mga kredo sang dimatuod nga relihion. Ginatamay sang mga klero ang ngalan ni Jehova, wala gani ginagamit ini. Ginapakahuy-an nila sia paagi sa indi makasulatanhon nga mga panudlo subong sang Trinidad, pagkadimamalatyon sang kalag, kag dayon nga pagpaantos sa kalayuhon nga impierno. Ang ila mga doktrina wala lamang ginpatiku sang mga kabutigan nga ginkuha gikan sa dumaan nga Babilonia kag Egipto kundi, sa madamo man nga kaso, gindagtaan ini sang pagpanghiwala sa gawad ni Cristo kag sang pagbaton sa ebolusyon. Ginkawatan nila si Jehova sing kadayawan nga takus sa iya, subong sang ginhimo sang mga saserdote sang adlaw ni Malaquias.—Malaquias 1:6-8; 3:7-9.
8. (a) Ano nga pangagda ang ginsikway sang mga saserdote sang adlaw ni Malaquias kag sang relihioso nga mga lider karon? (b) Sin-o ang nagbaton sa pangagda, kag ano ang resulta?
8 Ang mga Israelinhon sadto ginpalig-on nga tinluan ang ila kaugalingon kag magbalik kay Jehova. “Balik kamo sa akon, kag magabalik ako sa inyo,” siling ni Jehova. Gin-agda pa niya sila: “‘Tilawi ako karon, palihog, sa sini,’ siling ni Jehova sang kasoldadosan, ‘kon indi ko pagbuksan sa inyo ang mga talambuan sang langit kag iula sa inyo ang pagpakamaayo sa bagay nga wala na sing masudlan.’” (Malaquias 3:7, 10) Isa ka nagkalabilin lamang sang Judiyong pungsod ang nagbalik; sa karon, ang matutom nga nagkalabilin sang espirituwal nga Israel nagguwa gikan sa dimatuod nga mga relihion sining kalibutan. Sila, upod sa nagadamo nga dakung kadam-an sang iban nga mga tulad-karnero nga mga sumilimba, nagadayaw kay Jehova subong mga Saksi niya. (Juan 10:16) Gintuman ni Jehova ang iya saad sa ila kag ‘ginbuksan ang mga talambuan sang langit kag gin-ula sa ila ang mga pagpakamaayo sa bagay nga wala na sing masudlan’—isa gid ka sinalusalo sang espirituwal nga kalan-on!—Isaias 25:6.
Bugana nga Espirituwal nga Kalan-on
9. Anong espirituwal nga mga aman ang matigayon karon, sa anong paagi, kag ano ang mga resulta?
9 Ang “matutom kag mainandamon nga ulipon” nga gintagna ni Jesus para sa aton adlaw masako nga nagaaman sing espirituwal nga kalan-on sing bugana. (Mateo 24:45) Sang nagligad nga tuig lamang, sa 208 ka kadutaan kag mga isla sang kadagatan, kag sa mga 200 ka pamulong, kapin sa tatlo ka milyon ka Saksi ni Jehova ang nagtanyag sining espirituwal nga mga aman paagi sa mga pagduaw sa balay kag balay kag pagpanagtag sing ginatos ka milyon ka libro, mga magasin kag mga Biblia. Madamo ang nagkaon sining espirituwal nga kalan-on kag nabusog: Kapin sa 225,000 ka bag-uhan ang nabawtismuhan sa isa ka tuig!
10. Anong mga aman ang matigayon sa pagpamati sa laygay ni Pablo nga magtipon sing tingob?
10 Ang espirituwal nga mga aman ni Jehova ginhimo man nga matigayon paagi sa distrito nga mga kombension, mga sirkito nga asambleya, kag sa lima ka semanal nga miting nga ginahiwat sing tayuyon sa mga 52,000 ka kongregasyon sang mga Saksi ni Jehova—ang tanan sa pagtuman sa laygay ni Pablo sa Hebreo 10:25 nga ‘indi pagbiyaan ang aton pagtilipon sing tingob.’
11. Ano ang nagailustrar sang halandumon nga paagi sa paghanda sing espirituwal nga kalan-on?
11 Kon ang babayi mag-imbita sing mga bisita sa isa ka pagkaon, wala sia nagalaga sing karne kag ihaplak ini sa plato. Nagagamit sia sing mga panimpla kag mga sarsa agod magdugang sing malalimon nga mga sabor kag sing pila ka dekorasyon agod mangin makagalanyat ini sa mata. Ang dagway lamang kag ang kahumot sini tuman na sa pagpalaway sa baba kag sa pagpagutom sa tiyan. Amo sina ang paagi sa paghanda sang espirituwal nga mga aman ni Jehova—indi sa indi makagalanyat, daw insiklopedia nga estilo, kundi sa isa ka malalimon nga paagi nga magapahalipay sa hunahuna kag magatandog sa tagipusuon. Ang tagsa ka indibiduwal nga Cristiano dapat magsunod sa sina nga halimbawa. “Wala bala ang dulunggan nagatilaw sang mga pulong subong nga ang ngalagngag nagadimdim sang iya kalan-on?”—Job 12:11.
12. Ano ang aton mga halimbawa sang makagalana nga paghanda sa espirituwal nga kalan-on?
12 Ang nahauna nga leksion sang Theocratic Ministry School Guidebook nagapadaku sang paggamit sing makalilipay nga mga pulong. Si Solomon naggamit indi lamang sing husto nga mga pulong kundi sing makalilipay man nga mga pulong. (Manugwali 12:10) Gintagna sang Salmo 45:2 ang Mesias, si Jesucristo: “Ang bugay ginaula sa imo mga bibig.” Natuman ini. Ang mga tagpalamati niya ‘natingala sa mga pulong sang bugay nga nagguwa sa iya baba.’ Nagsunodsunod sila sa iya agod mamati sa iya, nagkadto sing aga pa sa templo agod mamati sa iya, nagpamati sa iya nga may kalipay, natingala sa iya paagi sang pagpanudlo. Ang mga opisyal nga ginpadala agod dakpon sia nagsiling: “Wala pa gid sing tawo nga nagpamulong subong sining tawo.” (Lucas 4:22; 19:48; 21:38; Marcos 12:37; Mateo 7:28; Juan 7:46) Gin-aman ang Guidebook agod buligan kita sa paghambal sing makalilipay nga mga pulong sang kamatuoran. Ginagamit mo bala ini sing bug-os?
13. Daw ano kabaskog ang pagpadaku sang Efeso 5:15-17 nahanungod sa ‘paghimulos sa tion,’ kag ngaa ginpadaku ini?
13 Ang Efeso 5:15-17 nagalaygay sa aton: “Magbantay sing estrikto nga ang inyo paglakat indi subong sang dimaalamon, kundi subong sang maalamon nga mga tawo, nga nagahimulos sang tion para sa inyo kaugalingon, bangod ang mga adlaw malaut. Bangod sini indi na kamo mangin dimakatarunganon, kundi padayon nga hangpa kon ano ang kabubut-on ni Jehova.” Ang Griegong tinaga diri nga ginbadbad “tion” wala nagakahulugan sing tion sa kabilugan lamang nga kahulugan kundi nagakahulugan sing gintangdo nga tion, isa ka nagakaigo nga tion para sa isa ka ispisipiko nga katuyuan. Ang Griegong berbo nga ginbadbad “nagahimulos” yara sa porma nga intensive, kag “sa sining konteksto mahimo nga nagakahulugan sing ‘nagahimulos sing mabaskog’; kon sayoron, nagaagaw sang tagsa ka kahigayunan nga nagaabot.”a Nagaagaw ka bala sing tion gikan sa imo iskedyul sa paghimo sang imo kaugalingon nga maalam paagi sa pagpakig-ambit sa espirituwal nga mga aman ni Jehova? Dapat mo gid himuon ini. Dapat naton tanan himuon ini. Ngaa? “Bangod ang mga adlaw malaut.”
Gikan sa Espirituwal nga Desyerto Padulong sa Espirituwal nga Paraiso
14. Ano nga bersikulo sa Biblia ang isa ka halimbawa sang ano nga bahin sang aton Ingles nga New World Translation Reference Bible?
14 Ang isa ka talalupangdon nga espirituwal nga aman amo ang aton New World Translation of the Holy Scriptures—With References, nga ginbalhag sang 1984. Madamo ini sing bahin nga magamit sa ‘paghimulos sang tion’ agod mapauswag ang aton ihibalo.b Ang isa ka halimbawa sini amo ang cross-references sini. Binagbinaga ang Salmo 1:3, nga nagalaragway sang kahimtangan sang tawo nga nagapamalandong sa kasuguan sang Dios sa adlaw kag gab-i. Ina nga bersikulo nagasiling: “Mangin kaangay gid sia sang kahoy nga natanom sa ubay sang mga kasulgan sang mga sapa, nga nagapamunga sa iya panag-on kag ang iya dahon man indi malaya, kag ang bisan ano nga ginahimo niya magamadinalag-on.” May kapin pa nga mga butang nga makuha sa sining bersikulo nga mahimo indi makuha sang bumalasa nga nagabasa sing madasig kag nagapadayon.
15. Anong mga pamangkot ang ginapautwas nahanungod sa kahoy sa Salmo 1:3, kag anong kasanagan ang ginahatag sang Isaias 44:4?
15 Talupangda palihog: Natanom ang kahoy. Sin-o ang nagtanom sini? Yari ini sa ubay sang kasulgan sang mga sapa, indi isa lamang. Nagatubo bala ang isa ka kahoy sa mga pangpang sang pila ka sapa? Wala. Gani usisaa ini. Ano ining kahoy? Ang cross-references nagabukas sa mga mata sang aton hunahuna. Amo ini ang Isaias 44:4, 61:3, kag Jeremias 17:8. Ang Isaias 44:4 nagasiling nga ang iya katawhan mangin kaangay sang mga kahoy “sa luyo sang mga kanal sang tubig.” Madamo nga kanal sang tubig? Ti, huo! Ang mga ilig amo ang mga kanal sang irigasyon nga nagabunyag sa mga kahoy sa isa ka talamnan!
16. Anong dugang pa nga kaathagan ang ginahatag sang Isaias 61:3 kag sang Jeremias 17:8?
16 Ang Isaias 61:3 nagatawag sa pila sining mga kahoy nga “dalagku nga mga kahoy sang pagkamatarong, ang tinanom ni Jehova, agod nga himayaon sia.” Si Jehova amo ang nagatanom kag nagabunyag sini, kag sia ang ginahimaya sang mga bunga sining mga kahoy! Ginpaangay sang Jeremias 17:8 ang tawo nga nagapamalandong sa kasuguan sang Dios sa adlaw kag gab-i sa isa ka “kahoy nga natanom sa luyo sang mga tubig, nga nagapakalapkap sang iya mga gamot sa ubay sang suba; kag indi makakita kon mag-abot ang kainit, apang ang iya mga dahon mangin bugana. Kag indi ini maghimud-os sa tuig sang tingadlaw, ukon mag-untat sa pagpamunga.” Ang mga dahon sini wala nagakalaya; ang tanan nga ginahimo sini nagamadinalag-on!
17. Ano nga laragway ang nagalutaw karon tuhoy sa Salmo 1:3, kag ano ang aton papel sa sini?
17 Karon nagatin-aw ang aton mga mata! Ang Salmo 1:3 nagahimo sing matahom nga laragway. Ang mga nagapamalandong sa kasuguan ni Jehova sa adlaw kag gab-i kaangay sang mga kahoy nga natanom sa luyo sang wala nagauntat nga mga tuburan sang tubig. Indi na sila bahin sang bisan anong kalibutanon nga mga organisasyon nga mamala sa espirituwal kundi karon kaupod na sang organisasyon sang Dios nga may bugana nga abiyo sang makapabugnaw nga mga tubig sang kamatuoran. Sa pagkamatuod, yara sila sa espirituwal nga paraiso, nabugnawan sa espiritu, kag nagapatubas sing espirituwal nga mga bunga sa kadayawan ni Jehova. Kag hunahunaa lamang! Ginagamit sang Dios ang iya mga Saksi sa pagtuytoy sa mga tawo gikan sa mamala, nagabagtik, nga kalibutanon nga mga organisasyon padulong sa sining makapabugnaw, bugana sa tubig nga espirituwal nga paraiso.
18. Ano ang reaksion sang iban kon makita nila ang iban nga maayo sa pagpanaksi, kag ngaa mapigaw sila?
18 Agod mahimo ining hilikuton sing epektibo, dapat naton disiplinahon ang aton hunahuna kag tagipusuon agod magamit ang tanan nga espirituwal nga mga aman ni Jehova. Ang iban nakabati sa iban nga nagapaathag sang mga teksto sa Biblia kag dayon nagasiling: “Kuntani nahibaluan ko ang Biblia kaangay niya!” Apang kon disiplinahon lamang sina nga mga tawo ang ila kaugalingon sa pagtuon sa Biblia, magauswag man ang ila ihibalo sa Biblia. Ang iban nakabati sa iban nga nagapanaksi sa mga ganhaan kag dayon nagasiling: “Kuntani makapanaksi ako sa mga ganhaan kaangay niya!” Apang kon disiplinahon lamang nila ang ila kaugalingon sa pagpakigbahin sing tayuyon sa pag-alagad sa latagon, nga ginagamit ang libro nga Reasoning From the Scriptures, sila man mangin kapin ka lantip nga mga Saksi. Ang iban nakabati sa iban nga nagahatag sing mga lektura sa Biblia kag dayon nagasiling: “Kuntani makahatag ako sing mga pamulongpulong kaangay niya.” Apang, sa liwat, kon disiplinahon lamang nila sini ang ila kaugalingon sa paghanda sing maayo sang ila mga asaynment sa pagpamulongpulong, ginatigayon ang mga leksion sang Theocratic Ministry School Guidebook, sila man magauswag sa ikasarang sa pagpamulongpulong.
19. Ano ang yabi sa pagpalambo sang aton mga ikasarang para sa pagpanaksi?
19 Ang paghandum maayo, apang ang paghandum nga wala sing pagpangabudlay indi makatapos sang hilikuton. Ang pagpangabudlay amo ang nagahimo sa handum nga magmatuod. Disiplinaha ang imo kaugalingon nga himuslan ang tion, kag himua ang hilikuton nga magahimo sang handum nga magmatuod. Kon wala mo ginagamit ang isa ka maskulo, magakunol ini. Kon wala mo ginagamit ang kalantip, madula ini. Kon wala mo ginagamit ang imo hunahuna, ang ikasarang sa paghunahuna madula. Kon wala mo ginagamit ang ihibalo, malimtan mo ini. Sa tagsa ka kaso, ang talaksan amo, “Gamita ini ukon madula ini.” Ang ‘mga ikasarang sa paghantop ginahanas paagi sa paggamit’ sini. Nian ang “ikasarang sa pagpainoino magabantay sa imo, ang paghantop magaamlig sa imo.”—Hebreo 5:14; Hulubaton 2:11.
20. Paagi sa paghimulos sang espirituwal nga mga aman ni Jehova, ano ang aton likawan, kag ano ang aton matigayon?
20 Gani gamita ang espirituwal nga mga aman ni Jehova. Magkalipay upod sa iya naayawan nga katawhan. Likawi ang tiggulutom nga gintagna ni Amos: “‘Yari karon! Nagaabot ang mga adlaw,’ siling sang Soberanong Ginuong Jehova, ‘kag magapadala ako sing tiggulutom sa duta, indi tiggulutom sa kalan-on, ukon kauhaw sa tubig, kundi sang pagpamati sa mga pulong ni Jehova.’” (Amos 8:11) Mag-ambit upod sa mga nagakaon kag magkalipay, indi upod sa mga nagasikway sa kalan-on kag nagaantos sing kahuluy-an: “Amo ini ang ginasiling sang Soberanong Ginuong Jehova: ‘Yari karon! Ang akon mga alagad magakaon, apang kamo gutumon. Yari karon! Ang akon mga alagad magainom, apang kamo uhawon. Yari karon! Ang akon mga alagad magakalipay, apang pakahuy-an kamo.’”—Isaias 65:13.
[Mga footnote]
a Tan-awa ang The New International Dictionary of New Testament Theology, Tomo 1, pahina 268, ni Colin Brown.
b Mahimo nga wala pa kamo sini sa inyo pamulong apang wala sing duhaduha nga mangin interesado kamo sa halimbawa nga paggamit sa sini sa ibabaw.
Madumduman Mo Bala?
◻ Paano ginpakita sang pungsod sang Israel ang iya pagkadinaayawan sa mga aman ni Jehova?
◻ Paano natuman ang Malaquias 3:10 sa mga Saksi ni Jehova?
◻ Ano ang kahulugan sa likod sang Salmo 1:3?
◻ Ngaa kinahanglanon nga gamiton ang mga butang nga naton-an paagi sa espirituwal nga mga aman ni Jehova?
[Laragway sa pahina 15]
Ang mga nagapamalandong sa kasuguan ni Jehova kaangay sang mga kahoy nga gintanom sa ubay sang wala nagakahubas nga tuburan sang tubig