Dugangi ang Imo Paghidait Paagi sa Sibu nga Ihibalo

“Kabay nga ang dibagay nga kaluoy kag paghidait magadugang paagi sa sibu nga ihibalo tuhoy sa Dios kag tuhoy kay Jesus nga aton Ginuo.”—2 PEDRO 1:2.

1, 2. (a) Ngaa ang mahidaiton nga kaangtanan upod sa Dios mapaanggid sa isa ka pag-asawahay? (b) Paano naton mapabakud ang aton paghidait upod sa Dios?

ANG mahidaiton nga kaangtanan nga ginpatok upod kay Jehova nga Dios sa imo bawtismo, sa pila ka bahin, kaangay sang pag-asawahay. Bisan pa nga ang adlaw sang kasal makalilipay, pamuno lamang ini sang hamili nga kaangtanan. Upod ang panikasog, tion, kag eksperiensia, ang kaangtanan sa pag-asawahay magasuod pa gid, mangin dalangpan sa panahon sang kasisit-an. Gani, paagi man sa kakugi kag bulig ni Jehova, madugangan mo ang imo paghidait sa iya.

² Ginpaathag ni apostol Pedro kon paano yadtong “nakatigayon sing pagtuo” makapabakud sang ila paghidait upod sa Dios. Nagsulat sia: “Kabay nga ang dibagay nga kaluoy kag paghidait magadugang paagi sa sibu nga ihibalo tuhoy sa Dios kag tuhoy kay Jesus nga aton Ginuo.”—2 Pedro 1:1, 2.

“Sibu nga Ihibalo Tuhoy sa Dios”

3. Ano ang kahulugan sang pagtigayon sing sibu nga ihibalo tuhoy kay Jehova kag kay Jesus?

³ Ang Griegong tinaga para sa “sibu nga ihibalo” (e·piʹgno·sis) nga gingamit sa sining konteksto nagakahulugan sing mas tudok, mas suod nga ihibalo. Ang berbo sarang mapatuhoy sa ihibalo nga natigayon paagi sa personal nga eksperiensia kag ginbadbad “makilala sing maayo” sa Lucas 1:4. Ang Griegong eskolar nga si Culver­wel nagapaathag nga sa iya ang tinaga nagakahulugan sing pagkamangin “makilala sing labi ang butang nga nahibaluan ko anay; isa ka mas eksakto nga pagtamod sa isa ka butang nga nakita ko anay sa malayo.” Ang pagtigayon sinang “sibu nga ihibalo” nadalahig sang pagkilala kay Jehova kag kay Jesus sing labi pa subong mga persona, nga makilala sing maayo ang ila mga kinaiya.

4. Paano naton madugangan ang aton ihibalo tuhoy sa Dios, kag ngaa nagapauswag ini sang aton paghidait upod sa iya?

⁴ Ang duha ka paagi sa pagtigayon sini nga ihibalo amo ang paagi sa maayong batasan sang personal nga pagtuon kag tayuyon nga pagtambong sa mga pagtinipon sang katawhan sang Dios. Sa sining paagi maton-an mo sing labi kaathag kon paano ang Dios nagagawi kag kon ano ang iya ginahunahuna. Mahuman mo ang labi kaathag nga paglaragway sa hunahuna sang iya personalidad. Apang ang pagkilala sing maayo sa Dios nagakahulugan sang pag-ilog kag pagpabanaag sini nga larawan. Halimbawa, si Jehova naglaragway sang isa ka tawo nga nagapabanaag sang katulad dios nga pagkadimakagud, kag nian nagsiling Sia: “Indi bala amo sina ang paagi sa pagkilala sa akon?” (Jeremias 22:15, 16; Efeso 5:1) Ang pag-ilog sing labi pa sa Dios nagadugang sang imo paghidait sa iya bangod nagauswag ka sa pagsuklob sa bag-ong personalidad, “nga paagi sa sibu nga ihibalo ginhimo nga bag-o suno sa larawan sang Isa nga nagtuga sini.” Mangin labi ka kalahamut-an ikaw sa Dios.—Colosas 3:10.

5. (a) Paano ang sibu nga ihibalo nakabulig sa isa ka Cristianong babayi? (b) Sa anong mga paagi mailog naton sing labi ka suod si Jehova?

⁵ Isa ka Cristianong babayi nga nagahingalan kay Lynn ang nabudlayan sa pagpatawad bangod sang dipaghangpanay upod sa masigka Cristiano. Apang ang mahalungon nga personal nga pagtuon ni Lynn nagtiklod sa iya nga usisaon ang iya panimuot. “Gindumdom ko kon ano nga sahi sang Dios si Jehova, kon paano nga wala sia nagadumot,” siling niya. “Gindumdom ko ang tanan magagmay nga mga butang nga ginahimo naton kay Jehova adlaw-adlaw, apang wala niya ginasukna. Ini nga bagay upod sa akon Cristianong utod nga babayi tuman ka diutay kon ipaanggid. Gani kon makita ko sia ginasiling ko sa akon kaugalingon, ‘Ginahigugma sia ni Jehova subong sang paghigugma niya sa akon.’ Nagbulig ini sa akon nga malubad ang problema.” Nakita mo bala ang mga bahin diin kinahanglan man nimo nga ilugon sing labi pa si Jehova?—Salmo 18:35; 103:8, 9; Lucas 6:36; Binuhatan 10:34, 35; 1 Pedro 1:15, 16.

Sibu nga Ihibalo Tuhoy kay Cristo

6. Paano ginpakita ni Jesucristo nga ang pagbantala nga hilikuton amo ang labing importante sa iya?

⁶ Ang pagtigayon sing sibu nga ihibalo tuhoy kay Jesus nagakinahanglan sing pagtigayon sang “hunahuna ni Cristo” kag pag-ilog sa iya. (1 Corinto 2:16) Si Jesus isa ka mapagsik nga manugbantala sang kamatuoran. (Juan 18:37) Ang iya makusog nga espiritu sa pag-ebanghelyo wala ginhigtan sang mga pagkamaynadampigan sa komunidad. Bisan pa nga ang iban nga mga Judiyo nagadumot sa mga Samaritano, ginpanaksihan niya ang isa ka Samaritano nga babayi sa bubon. Ti, bisan ang pagpakighambal sing malawig sing dayag upod kay bisan sin-o nga babayi ginakurisungan.a Apang wala pagtuguti ni Jesus ang balatyagon sang komunidad sa pagpugong sa iya nga magpanaksi. Ang buluhaton sang Dios makapasulhay. Nagsiling sia: “Ang akon kalan-on amo ang paghimo sang kabubut-on sang nagpadala sa akon kag sa pagtapos sang iya buluhaton.” Ang kalipay nga makita ang sabat sang katawhan, kaangay sang Samaritano nga babayi kag sang madamo sang mga kasimanwa, nagsakdag kay Jesus kaangay sang kalan-on.—Juan 4:4-42; 8:48.

7. (a) Ang ihibalo tuhoy kay Jesus dapat magapahulag sa aton nga himuon ang ano? (b) Ginapaabot bala sang Dios ang iya tanan nga mga alagad nga himuon ang pareho nga kadakuon sang pagbantala? Ipaathag.

⁷ Nagabatyag ka bala kaangay sang iya ni Jesus? Isiling ta, ang pagsugod sing paghambalanay nahanungod sa Biblia upod sa isa ka dumuluong mabudlay para sa madamo kag masami nga ginakurisungan sang iban sa komunidad. Apang, agod matigayon ang kaangay nga panimuot sa kaisipan ni Jesus, indi naton malikawan ini nga kamatuoran: Dapat kita magpanaksi. Siempre pa, indi tanan ang sarang makahimo sing pareho kadaku nga pagbantala. Nanuhaytuhay ini suno sa aton mga ikasarang kag mga sirkunstansia. Gani indi magbatyag nga ang Dios wala gid maayawi sa imo balaan nga pag-alagad. Apang, ang aton ihibalo nahanungod kay Jesus magapapagsik sa aton nga himuon ang aton labing masarangan. Ginadayaw ni Jesus ang bug-os kalag nga pag-alagad.—Mateo 13:18-23; 22:37.

Ang Kinahanglanon nga Dumtan ang Kalautan

8, 9. Ano ang pila ka butang nga ginadumtan sang Dios, kag paano naton mapakita ang kaanggid nga pagdumot?

⁸ Ang sibu nga ihibalo nagabulig man sa aton nga apresyahon kon ano ang mga butang nga ginadumtan ni Jesus kag ni Jehova. (Hebreo 1:9; Isaias 61:8) “May anum ka butang nga ginadumtan si Jehova; huo, pito nga kangil-aran sa iya kalag: ang mga mata nga palabilabihon, ang dila nga butigon, kag ang mga kamut nga nagapaagay sing dugo nga wala sing sala, ang tagipusuon nga nagapahito sing mga tinutuyo nga malaut, ang mga tiil nga madasig magdalagan sa panistis, ang dimatuod nga saksi nga nagamitlang sang mga butig, kag sia nga nagasab-ug sing kasuayon sa tunga sang mga kauturan.” (Hulubaton 6:16-19) Ini nga mga panimuot kag mga dagway sang pagginawi “kangil-aran sa iya kalag.” Ang Hebreong tinaga nga ginbadbad diri nga “kangil-aran” naghalin sa tinaga nga nagakahulugan “pagkangil-ad, pagkasuka,” “ang pagsikway, kon tuhoy sa malaw-ay sa tanan nga igbalatyag; pagkangil-ad, pagdumot nga may kaakig.” Gani agod makighidait sa Dios, dapat naton ipalambo ang kaanggid nga pagsikway.

⁹ Halimbawa, likawi ang “mga mata nga palabilabihon” kag ang bisan ano nga pagpakita sing bugal. Pagkatapos sang bawtismo ang iban nagbatyag nga wala na sila nagakinahanglan sang tayuyon nga pagbulig sadtong nagtudlo sa ila. Apang ang bag-ong mga Cristiano dapat mapainubuson nga magabaton sing bulig samtang nangin napasad sila sing maayo sa kamatuoran. (Galacia 6:6) Likawi man ang pagkutsokutso, nga madali makatuga sing “kasuayon sa tunga sang mga kauturan.” Paagi sa paglapta sang malaw-ay nga batibati, dimakatarunganon nga kritisismo, ukon kabutigan, mahimo nga wala kita “nagapaagay sang walay sala nga dugo,” apang pat-od nga mapierde naton ang maayo reputasyon sang iban. Indi kita mahimo nga makighidait sa Dios kon indi kita makighidait sa aton mga kauturan. (Hulubaton 17:9; Mateo 5:23, 24) Ang Dios nagasiling man sa iya Pulong nga “ginadumtan niya ang pagbulagay.” (Malaquias 2:14, 16) Kon minyo, ikaw bala, busa, nagapangabudlay agod huptan ang inyo pag-asawahay nga mabakud? Ang pag-ikrat kag dinagakaigo nga kahilwayan sa tiayon sang iban makangilil-ad bala sa imo? Ikaw bala, kaangay ni Jehova, nagadumot sa seksuwal nga imoralidad? (Deuteronomio 23:17, 18) Ang pagdumot sa sina nga mga buhat indi mahapos, kay ini mahimo nga magaganyat sa aton makasasala nga unod, kag kalahamut-an ini sa kalibutan.

10. Paano naton mapalambo ang pagdumot sa kalautan?

¹⁰ Subong bulig sa pagpalambo sang pagdumot sa kalautan, likawi ang malingaw sang mga sine, mga programa sa TV, ukon literatura nahanungod sa espiritismo, imoralidad, ukon kasingki. (Deuteronomio 18:10-12; Salmo 11:5) Paagi sa paghimo sa sala nga daw ‘indi gid man malain’ ukon kaladlawan, ina nga kalingawan nagapakunol sa mga panikasog nga palambuon ang diosnon nga pagdumot sa sini. Sa pihak nga bahin, ang hanuot nga pangamuyo makabulig, kay si Jesus nagsiling: “Pangamuyo sing padayon, agod nga indi kamo masulay. Ang espiritu, sa pagkamatuod, handa, apang ang unod maluya.” (Mateo 26:41) Nahanungod sa pag-atubang sang makusog undanon nga kailigbon, ang isa ka Cristiano nagsiling: “Nagapangamuyo ako. Kon kaisa nagabatyag ako nga indi takus sa pagpalapit kay Jehova, apang paagi sa pagpilit sa akon kaugalingon nga himuon ini, paagi sa pag-apelar sa iya, natigayon ko ang kusog nga kinahanglan ko.” Mahangpan mo sing maayo kon ngaa ginakangil-aran ni Jehova ang sala kon repasuhon mo sa imo hunahuna ang iya masakit nga mga resulta.—2 Pedro 2:12, 13.

11. Ano nga mga butang ang mahimo nga magatublag sa aton kon kaisa?

¹¹ Walay sapayan sang pagpakighidait sa Dios, kon kaisa ginagamo ikaw sang matag-adlaw nga mga pag-ipit kag mga pagsulay kag bisan sang imo kaugalingon nga mga kaluyahon. Dumduma, ginhimo mo ang iya kaugalingon nga pinasahi nga puntariya ni Satanas. Nagapakig-away sia batok sa mga nagatuman sang mga mando sang Dios kag sa mga Saksi ni Jehova! (Bugna 12:17) Paano, nian, mahuptan ang imo nasulod nga paghidait?

Paglandas sa Nagatublag sing Paghidait nga mga Kalamidad

12. (a) Ano ang back­ground sang Salmo 34? (b) Paano ginalaragway sang Kasulatan ang balatyagon ni David sa sini nga eksperiensia?

¹² “Madamo ang mga kalamidad sang mga matarong,” sulat ni David sa Salmo 34:19. Suno sa superskripsion sini nga salmo, ginsulat ini ni David pagkatapos sang malapit nga pagpakig-away sa kamatayon. Nagapalagyo kay Hari Saul, si David nagdangop kay Aquis, ang Filistinhon nga hari sang Gat. Nakilala sang mga alagad sina nga hari si David kag, nagadumdom sang iya nagligad nga hinimoan militar para sa Israel, nagyamo kay Aquis. Sang mabatian ni David ang paghambalanay, “ginhuptan [niya] sa iya tagipusuon ini nga mga pulong, kag nahadlok sing tama kay Aquis nga hari sang Gat.” (1 Samuel 21:10-12) Matuod, amo ini ang tumandok nga lugar ni Goliat, kag ginpatay ni David ang ila baganihan—ginauyatan niya ang espada sang higante! Gamiton bala nila karon ining daku nga espada sa pagpugot sang iya ulo? Ano ang mahimo nga himuon ni David?—1 Samuel 17:4; 21:9.

13. Ano ang ginhimo ni David sa panahon sining kalamidad, kag paano naton mailog ang iya halimbawa?

¹³ Si David nakiluoy sa Dios upod ang makusog nga pagpangabay sing bulig. “Ini nga makaluluoy nga tawo nagtuaw, kag ginpamatian sia ni Jehova. Kag ginluwas Niya sia sa tanan niya nga kagamo,” siling ni David. Nagsiling man sia: “Sa tanan ko nga kalisdanan ginluwas niya ako.” (Salmo 34:4, 6, 15, 17) Natun-an mo man bala ang makiluoy kay Jehova, nagabubo sang imo tagipusuon sa mga panahon sang paghimud-os? (Efeso 6:18; Salmo 62:8) Bisan pa nga ang imo kalisdanan indi subong ka dramatiko sa iya ni David, sa gihapon masapwan mo nga ang Dios magahatag sa imo sing bulig sa husto nga tion. (Hebreo 4:16) Apang labi pa sa pagpangamuyo ang ginhimo ni David.

14. Paano gingamit ni David ang “ikasarang sa paghunahuna,” kag ano ang gin-aman sang Dios agod buligan kita nga himuon ang amo man?

¹⁴ “Nagbaylo sia [David] sang iya pagginawi sa atubangan nila kag nagpakabuang. . . . Nian si Aquis nagsiling sa iya mga alagad: ‘Yari karon ginatan-aw ninyo nga ang tawo buang. Ngaa bala nga gindala ninyo sia sa akon?’” (1 Samuel 21:13-15) Nahunahuna ni David ang isa ka estratehiya nga sa sini makapalagyo sia. Ginpakamaayo ni Jehova ang iya mga panikasog, Sing kaanggid, kon kita ginaatubang sang mabudlay nga mga palaligban, ginapaabot ni Jehova nga gamiton naton ang aton ikasarang sa paghunahuna kag indi lamang maghulat sa iya nga lubaron ini tungod sa aton. Ginhatag niya sa aton ang iya inspirado nga Pulong, nga “magahatag sa mga indi eksperiensiado sing kaalam, . . . ihibalo kag ikasarang sa paghunahuna.” (Hulubaton 1:4; 2 Timoteo 3:16, 17) Gin-aman man sang Dios ang mga gulang sa kongregasyon, nga makabulig sa aton sa paghibalo kon paano huptan ang mga talaksan sang Dios. (1 Tesalonica 4:1, 2) Sing masami, ini sila makabulig sa imo sa pagpanalawsaw sa mga publikasyon sang Watch Tower Society sang bulig sa paghimo sing husto nga desisyon ukon sa paglubad sa isa ka palaligban.

15. Ngaa ang Salmo 34:18 makapaumpaw?

¹⁵ Bisan kon ang aton tagipusuon nagasakit sa aton bangod sang aton kaugalingon nga mga kaluyahon ukon mga kapaslawan, kon kita may husto nga panimuot, sarang naton mahuptan ang aton paghidait sa Dios. Si David nagsulat sa Salmo 34:18: “Si Jehova malapit sa mga buong sing tagipusuon; kag nagaluwas sang mga mahinulsulon sa espiritu.” Kon kita nagapangabay sing kapatawaran kag nagahimo sing nagakaigo nga mga tikang sa pagtadlong sang mga bagay (labi na sa kaso sang grabe nga paglapas), si Jehova magapabilin nga suod sa aton, nagasakdag sang aton emosyon.—Hulubaton 28:13; Isaias 55:7; 2 Corinto 7:9-11.

Ang Personal nga Ihibalo Nagahatag sing Paghidait

16. (a) Ano ang isa pa ka paagi diin matigayon naton ang sibu nga ihibalo tuhoy sa Dios? (b) Ipaathag ang ginsiling ni David: “Tilawi kag tan-awa ang kaayo ni Jehova.”

¹⁶ Ang isa pa ka paagi diin matigayon naton ang sibu nga ihibalo tuhoy sa Dios, luwas sa pagkuha sang espirituwal nga impormasyon, amo ang paagi sa aton personal nga pag-eksperiensia sang iya mahigugmaon nga bulig. (Salmo 41:10, 11) Ang pagkanaluwas gikan sa kalisdanan wala pirme nagakahulugan sang gilayon ukon bug-os nga katapusan sang palaligban; ayhan padayon nga batason mo ini. (1 Corinto 10:13) Bisan pa nga ang kabuhi ni David naamligan sa Gat, nagpabilin sia nga takas sa madamong tinuig, nagaatubang sing lainlain nga katalagman. Sa tanan sini nabatyagan ni David ang pag-ulikid kag pagsakdag ni Jehova. Gintinguhaan kag nasapwan niya ang paghidait upod sa Dios, kag natun-an niya nga ang nagahimo sina “indi makulangan sang bisan ano nga maayo.” Nakahibalo paagi sa personal nga eksperiensia kon paano sia ginsakdag ni Jehova sa panahon sang kasisit-an, si David nakasiling: “O tilawi kag tan-awa nga maayo si Jehova; malipayon ang tawo nga nagadangop sa iya.”—Salmo 34:8-10, 14, 15.

17. Sa panahon sang kalamidad, ano ang epekto sang pagdangop kay Jehova para sa isa ka pamilya?

¹⁷ Ang pagdangop kay Jehova sa panahon sang kabudlayan magahimo man sa imo nga ‘matilawan kag matan-aw nga si Jehova maayo.’ Bangod sang aksidente, ang isa ka Cristiano sa tungang nakatundan sang Estados Unidos nadulaan sang maayo sing sueldo nga trabaho nga nahuptan niya anay sang sulod sang 14 ka tuig. Bangod wala sila sing kita, sia kag ang iya pamilya nakiluoy sa Dios. Apang, sa amo man nga tion, gin-utod nila ang mga gasto, nanaghaw sa malapit nga uma, kag namunit sing isda. Paagi sa bulig sang iban sa kongregasyon kag paagi sa paghimo sang part-time nga obra nga matigayon, ining pamilya nga may apat ka katapo nakalampuwas. Isa ka tuig pagkatapos sang aksidente, ang iloy nagsiling: “Sarang naton mabuang ang aton kaugalingon sa paghunahuna nga nagasalig kita kay Jehova, samtang nagasalig gid kita sa aton kaugalingon nga mga ikasarang, sa aton tiayon, ukon sa aton trabaho. Apang, natun-an gid namon ang magsalig sa Iya lamang. Ining iban nga butang sarang makuha, apang wala gid kami pagpabay-i ni Jehova—wala bisan sing makadali. Bisan pa nga hustohusto lamang ang natigayon namon, ang amon kaangtanan kay Jehova subong isa ka pamilya mas malapit.”

18. Ano ang magahimo sa imo nga mabatas bisan ang dalayon nga mga palaligban?

¹⁸ Huo, ang kabudlayan sa pinansial mahimo magpadayon. Ukon ayhan ang isa masit-an sang malala nga balatian sa lawas; dipaghangpanay upod sa isa; emosyonal nga palaligban, subong sang kapung-aw; ukon madamo pa iban nga palaligban. Apang, paagi sa tunay nga pagkilala sa Dios, matigayon mo ang pagtuo sa iya pagsakdag. (Isaias 43:10) Ining dimabungkag nga pagsalig magabulig sa imo nga magbatas kag matigayon “ang paghidait sang Dios nga nagalabaw sa tanan nga panghunahuna.”—Filipos 4:7.

19. Paano naton nahibaluan nga si Jehova nagasapak sang aton mga pag-antos?

¹⁹ Kon nagaagom sing mabudlay nga eksperiensia, indi pagkalimti nga nahibaluan ni Jehova nga ikaw nagaantos. Sa salmo nga ginkomposo man sang madumduman niya ang iya eksperiensia sa Gat, si David nakiluoy kay Jehova: “Isulud sa imo suludlan ang akon mga luha. Wala bala sila sa imo tolon-an?” (Salmo 56:8) Ginpamatian gid sang Dios ang pangabay ni David. Daw ano ka makapaumpaw mahibaluan nga tipunon sang Dios ina nga mga luha nga ginatuga sang kapiot kag paghimud-os kag isulud ini, kon hambalon pa, sa iya suludlan, subong nga ang isa makabubo sa sina nga suludlan sing malahalon nga alak ukon tubig nga ilimnon! Ina nga mga luha pirme pagadumdumon, huo, nasulat sa tolon-an sang Dios. Daw ano ka mapinalanggaon ang pag-ulikid ni Jehova!

20. Paano naton madugangan ang aton paghidait sa Dios?

²⁰ Gani ang imo bawtismo pamuno lamang sang mahidaiton nga kaangtanan upod sa Dios. Paagi sa suod nga pagkilala sa personal nga mga kinaiya sang Dios kag ni Jesus, kag personal nga pag-eksperiensia sa pagsakdag ni Jehova sa panahon sang mga pagtilaw, madugangan mo ang imo paghidait sa Dios. Indi lamang nga ang imo kaangtanan kay Jehova mangin duog sang kalig-onan karon kundi matigayon mo man ang hamili nga paglaum nga mabuhi sing dayon sa Paraiso, diin masapwan mo ang “kalipay sa kabuganaan sang paghidait.”—Salmo 37:11, 29.

[Footnote]

Madumduman Mo Bala?

◻ Sa anong mga paagi matigayon naton ang sibu nga ihibalo tuhoy sa Dios kag kay Jesus?

◻ Ang pag-ilog sa Dios kag kay Jesus magatiklod sa aton nga himuon ang ano?

◻ Paano naton mailog ang pagdumot sang Dios sa kalautan?

◻ Paano naton mahuptan ang paghidait walay sapayan sang mga kabudlayan?

[Laragway sa pahina 17]

Wala pagtuguti ni Jesus ang pagkamaynadampigan sa komunidad nga mag-upang sa iya pagpanaksi. Ginailog mo bala ang iya kakugi sa pagbantala?

[Mga Laragway sa pahina 18]

Sang gin-atubang sang mabug-at nga palaligban, si David nakiluoy kay Jehova . . .

. . . kag nagpakunokuno nga buangit agod planuhon ang pagpalagyo. Ginpamatian ni Jehova ang mga pangamuyo ni David