Paglakat Upod ang Bug-os nga Tagipusuon

“Tudlui ako, O Jehova . . . Bug-usa ang akon tagipusuon sa pagkahadlok sa imo ngalan.”—SALMO 86:11.

1. Paano ginapadyaan ni Jehova ang iya mga maunungon?

‘O JEHOVA, ikaw ang Dios, ikaw lamang.’ (Salmo 86:8, 10) Gindayaw ni David ang Dios gikan sa isa ka tagipusuon nga puno sing apresasyon. Bisan pa antes nangin hari si David sang bug-os nga Israel, ginluwas sia ni Jehova gikan kay Saul kag gikan sa mga Filistinhon. Gani, nakaamba sia: “Si Jehova akon igang kag akon kuta kag akon Mananabang. Sa maunungon magapanghikot ka sing maunungon.” (2 Samuel 22:2, 26) Gintipigan ni Jehova ang iya matutom nga alagad sa madamong pagtilaw. Si David makasalig kag makakompiansa sa iya maunungon nga Dios, apang kinahanglan niya ang dalayon nga panuytoy. Si David nagpakiluoy karon sa Dios: “Tudlui ako, O Jehova, sang imo dalanon.”—Salmo 86:11.

2. Paano nag-aman si Jehova agod tudluan niya kita?

² Luyag gid likawan ni David ang kalibutanon nga mga ideya ukon mga pilosopiya. Luyag niya “tudluan ni Jehova,” subong sang ginpabutyag sang ulihi sang manalagna sang Dios. (Isaias 54:13) Si David makapamalandong sa siam lamang ka tulun-an sang Biblia nga matigayon sang panahon niya. Apang, yadto nga instruksion gikan kay Jehova hamili sa iya! Subong mga tinudluan, makabenepisyo kita karon sing daku sa 66 tanan ka tulun-an sa Biblia, subong man sa bugana nga literatura sang Ginharian nga ginaaman paagi sa “matutom kag mainandamon nga ulipon.” (Mateo 24:45) Kaangay ni David manawag kita kay Jehova, nga ang iya espiritu magabulig sa aton sa pag-usisa sang “mga butang nga gin-aman sang Dios sa nagahigugma sa iya, . . . bisan ang mga kadadalman sang Dios.”—1 Corinto 2:9, 10.

3. Sa anong mga paagi kita makabenepisyo sa panudlo sang Biblia?

³ Ang Biblia may sabat sa tanan nga pamangkot kag problema nga magautwas sa aton kabuhi. “Ang bisan ano nga nasulat sadto anay ginsulat sa pagtudlo sa aton, agod nga paagi sa pagkalig-on kag pagpabakod sang mga Kasulatan may paglaum kita.” (Roma 15:4) Ang pagkawili sa instruksion gikan kay Jehova magapabakod sa aton sa pagbatas sang mga kabudlayan, nagalugpay sa aton sa tion sang kapung-aw, kag nagahupot sang paglaum sa Ginharian nga mainit sa aton tagipusuon. Kabay nga malipay kita sa pagbasa sa Pulong sang Dios kag sa pagpamalandong sa sini “adlaw kag gab-i,” kay ang pasad-sa-Biblia nga kaalam mangin “kahoy sang kabuhi sa mga nagakapyot sa iya, kag malipayon ang tagsatagsa nga nagahawid sa iya.”—Salmo 1:1-3; Hulubaton 3:13-18; tan-awa man ang Juan 17:3.

4. Nahanungod sa aton paggawi, anong halimbawa ang ginpahamtang ni Jesus para sa aton?

⁴ Ang Anak sang Dios, si Jesus, nga gintawag man nga “Anak ni David,” pirme nagpangayo sing instruksion kay Jehova. (Mateo 9:27)a Nagsiling sia: “Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay. Kay ang bisan ano nga ginahimo Niya, ini ginahimo man sang Anak sa amo nga bagay.” “Ako wala nagahimo sing bisan ano sa akon kaugalingon nga pagbulut-an; kundi suno sa gintudlo sa akon sang Amay ginapamulong ko ining mga butang.” (Juan 5:19; 8:28) Si Jesus nagbilin sing isa ka huwaran agod ‘pagsundon [naton] ang iya mga tikang.’ (1 Pedro 2:21) Hunahunaa lamang! Kon magtuon kita subong sang ginhimo ni Jesus, sa bisan anong kahimtangan magapanghikot kita subong sang kon paano kita ginapahikot ni Jehova. Ang dalanon ni Jehova amo pirme ang maayo nga dalanon.

5. Ano ang “kamatuoran”?

⁵ Si David masunod nga nagasiling: “Magalakat ako sa imo kamatuoran.” (Salmo 86:11) Isa ka libo ka tuig sang ulihi, si Pilato, nga nagapakighambal sa Anak ni David, nga si Jesus, namangkot: “Ano ang kamatuoran?” Apang bag-o lang ginsabat ni Jesus ina nga pamangkot, nagasiling kay Pilato: “Ang akon Ginharian indi bahin sining kalibutan,” nga nagadugang: “Ginasiling mo nga ako hari. Tungod sini natawo ako, kag tungod sini nagkari ako sa kalibutan, agod nga magasaksi ako sa kamatuoran.” (Juan 18:33-38) Busa ginapahibalo diri ni Jesus nga ang kamatuoran nasentro sa Mesianikong Ginharian. Sa pagkamatuod, ang bug-os nga tema sang Biblia amo ang pagpakabalaan sa ngalan ni Jehova paagi sina nga Ginharian.—Ezequiel 38:23; Mateo 6:9, 10; Bugna 11:15.

6. Sa paglakat sa kamatuoran, sa ano kita dapat mag-andam?

⁶ Ano ang kahulugan sang paglakat sa kamatuoran? Nagakahulugan ini sing paghimo sang paglaum sa Ginharian nga pangunang butang sa aton kabuhi. Dapat kita magkabuhi suno sa kamatuoran sang Ginharian. Bug-os tagipusuon nga ginauna naton ang mga intereses sang Ginharian, makugi suno sa aton mga kahigayunan sa pagpanaksi sa kamatuoran sang Ginharian, nagasunod sang halimbawa ni Jesus. (Mateo 6:33; Juan 18:37) Indi mahimo nga indi bug-os ang paglakat naton sa kamatuoran, nagahatag lamang sing pakulahaw nga pag-alagad kag dayon pahamut-an ang aton kaugalingon paagi sa pagliko sa iban nga dalan agod magpatuyang sa sobra nga paglingawlingaw ukon magsulod sa nagaubos sing tion nga karera ukon ‘magpaulipon . . . sa Manggad.’ (Mateo 6:24) Mahimo kita magtalang sa isa sang mga banas, nga indi na gid makatultol sang dalan pabalik sa ‘makitid nga dalan nga nagapadulong sa kabuhi.’ Indi kita maghalin sa sina nga dalan! (Mateo 7:13, 14) Ang aton Dakung Instruktor, si Jehova, paagi sa iya Pulong kag organisasyon, nagaiwag sang dalan, nga nagasiling: “‘Ini amo ang dalan. Lakat kamo sa sini,’ kon magliso kamo sa tuo nga kamot ukon magliso kamo sa wala.”—Isaias 30:21.

Nagakaigo nga Kahadlok

7. Paano naton ‘mabug-os’ ang aton tagipusuon?

⁷ Ang pangamuyo ni David nagapadayon sa bersikulo 11: “Bug-usa ang akon tagipusuon sa pagkahadlok sa imo ngalan.” Kaangay ni David, luyag naton nga ang aton tagipusuon di-nabahinbahin, bug-os, sa paghimo sang kabubut-on sang Dios. Nahisanto ini sa laygay ni Moises: “Kag karon, O Israel, ano bala ang ginakinahanglan sa imo ni Jehova nga imo Dios kundi ang pagkahadlok kay Jehova nga imo Dios, ang paglakat sa tanan niyang dalanon kag ang paghigugma sa iya kag ang pag-alagad kay Jehova nga imo Dios sa bug-os mong tagipusuon kag sa bug-os mong kalag; ang pagbantay sang mga sugo ni Jehova kag sang iya mga palatukuran nga ginsugo ko sining adlaw sa imo, para sa imo kaayuhan?” (Deuteronomio 10:12, 13) Para gid sa aton kaayuhan nga ginabubo naton ang tagipusuon kag kalag sa pag-alagad kay Jehova. Busa ginapakita naton ang nagakaigo nga kahadlok sa iya dungganon nga ngalan. Ang ngalan ni Jehova literal nga nagakahulugan sing “Ginapahanabo Niya,” labi na may kaangtanan sa pagtapos sang iya daku nga mga katuyuan. Nagakahulugan man ini sing supremo nga awtoridad sa ibabaw sang bug-os nga uniberso. Nagaalagad nga may kahayanghag sa pagkahalangdon sang Dios, wala kita nagalikaw bangod sang kahadlok sa mamalatyon nga tawo. Ang aton tagipusuon indi mabahinbahin. Sa baylo, mahadlok kita sa paghimo sing bisan ano nga wala nagapahamuot kay Jehova, ang Supremo nga Hukom kag Soberanong Ginuo, nga nagauyat sang aton mismo kabuhi.—Isaias 12:2; 33:22.

8, 9. (a) Ano ang kahulugan sang mangin “indi bahin sang kalibutan”? (b) Anong mga tikang ang dapat naton himuon bangod “talan-awon” kita?

⁸ Bisan sa atubang sang pasipala kag paghingabot, sundon naton ang walay kahadlok nga halimbawa ni Jesus subong indi bahin sang malauton nga kalibutan sa palibot naton. (Juan 15:17-21) Wala ini nagakahulugan nga ang mga disipulo ni Jesus dapat magkabuhi subong mga ermitanyo ukon nabukot sa isa ka monasteryo. Nagsiling si Jesus sa pangamuyo sa iya Amay: “Ako wala nagapangamuyo, nga kuhaon mo sila sa kalibutan, kundi nga tipigan mo sila gikan sa malauton. Sila indi bahin sang kalibutan, subong nga ako indi bahin sang kalibutan. Pakabalaana sila sa kamatuoran; ang imo pulong kamatuoran. Subong nga ginpadala mo ako sa kalibutan, amo man ginpadala ko sila sa kalibutan.” (Juan 17:15-18) Kaangay ni Jesus, ginpadala kita sa pagbantala sang kamatuoran sang Ginharian. Si Jesus madali palapitan. Ang katawhan narepreskuhan sang iya pagpanudlo. (Ipaanggid ang Mateo 7:28, 29; 11:28, 29; Juan 7:46.) Amo man dapat sa aton.

⁹ Ang aton pagkamainabyanon, maayo nga pamustura kag dagway, malulo kag matinlo nga paghambalanay, dapat maghimo sa aton kag sa aton mensahe nga kalahamut-an sa matarong nga mga tawo. Dapat naton likawan ang mapinatumbayaon, dimaugdang nga pamayo, mga kaupdanan nga nagadul-ong sa kalibutanon nga mga pagkanaulamid, kag ang lugak, walay prinsipio nga pagkabuhi nga makita naton sa kalibutan sa aton palibot. Subong “talan-awon sang kalibutan, sang mga anghel, kag sang mga tawo,” nagapangabudlay kita 24 oras kada adlaw sa pag-alagad kag sa pagkabuhi subong huwaran nga mga Cristiano. (1 Corinto 4:9; Efeso 5:1-4; Filipos 4:8, 9; Colosas 4:5, 6) Ang aton tagipusuon dapat nabug-os sa sining katuyuan.

10. Paano ginadumdom ni Jehova yadtong nagabug-os sang ila tagipusuon sa balaan nga pag-alagad?

¹⁰ Kita nga nagabug-os sang aton tagipusuon sa pagkahadlok sa ngalan ni Jehova, nga nagapamalandong sa iya daku nga mga katuyuan kag nagapuno sang aton kabuhi sing balaan nga pag-alagad, pagadumdumon ni Jehova. “Ang mga mata ni Jehova nagapanuluktulok sa bug-os nga duta sa pagpakita nga sia mabakod tungod sa ila nga may tagipusuon nga himpit ayon sa iya.” (2 Cronica 16:9) Nagapatuhoy sing matagnaon sa aton adlaw, ang Malaquias 3:16 mabasa: “Ang mga nagakahadlok kay Jehova nagsinilingay, ang tagsa sa iya kaupod, kag si Jehova nagdungog kag nagpamati. Kag ang tulun-an sang handumanan ginsulat sa atubangan niya para sa mga nagakahadlok kay Jehova kag nagpainuino sa iya ngalan.” Kabay nga ang aton tagipusuon mabug-os sa sinang nagakaigo nga kahadlok kay Jehova!

Ang Mahigugmaon nga Kalulo ni Jehova

11. Paano ipabutyag ang mahigugmaon nga kalulo ni Jehova sa mga maunungon?

¹¹ Daw ano gid ka hanuot ang pangamuyo ni David! Sia nagapadayon: “Dayawon ko ikaw, O Jehova nga Dios nakon, sa bug-os ko nga tagipusuon, kag himayaon ko ang imo ngalan tubtob sa walay katubtuban, kay daku ang imo mahigugmaon nga kalulo sa akon, kag ginluwas mo ang akon kalag sa Sheol, ang iya pinakamadalom nga bahin.” (Salmo 86:12, 13) Sa ikaduha nga tion sa sining salmo, ginadayaw ni David si Jehova tungod sang Iya mahigugmaon nga kalulo—sang Iya maunungon nga gugma. Daku gid ini nga gugma nga makaluwas ini sa daw imposible nga mga kahimtangan. Sang ginalagas sia ni Saul sa kamingawan, si David nagbatyag nga daw nagakamang sa isa ka hilit agod mapatay. Kaangay ini sang pagtan-aw sa pinakamadalom nga Sheol—ang kadadalman sang lulubngan. Apang ginluwas sia ni Jehova! Sa kaanggid nga paagi, si Jehova masunson nga nagdala sing paumpaw sa iya modernong-adlaw nga mga alagad sa makatilingala nga mga paagi, kag ginsakdag man niya ang mga manughupot-integridad nga nagbatas sing matutom bisan tubtob sa kamatayon. Ang tanan nga mga maunungon pagapadyaan, bisan sing pagkabanhaw kon kinahanglanon.—Ipaanggid ang Job 1:6-12; 2:1-6, 9, 10; 27:5; 42:10; Hulubaton 27:11; Mateo 24:9, 13; Bugna 2:10.b

12. Paano ang mga klero nangin bugalon kag mapintas, kag ano ang mangin padya nila?

¹² Nahanungod sa mga manughingabot si David nagtu-aw: “O Dios, ang mga bugalon nagatindog batok sa akon; kag isa ka hubon sang malugos nga mga tawo nagtinguha sang akon kalag, kag wala magbutang sa imo sa atubangan nila.” (Salmo 86:14) Sa karon, ang mga manughingabot nagalakip sa mga klero sang Cristiandad. Nagapakunokuno sila nga nagasimba sa Dios apang ginaislan nila ang iya balaan nga ngalan sing titulo nga “Ginuo” kag ginapresentar sia subong isa ka makatalanhaga nga Trinidad nga wala gid ginasambit sa Biblia. Daw ano ka bugalon! Dugang sa sini, ginatinguhaan nila nga buyukon ang politikal nga mga kagamhanan nga dumilian kag bilangguon ang mga Saksi ni Jehova, subong sang ginahimo gihapon sa madamudamo pa nga pungsod sa palibot sang duta. Ining napanaptan nga mga manugpasipala sang ngalan sang Dios magaani sang ila padya, upod sang tanan nga kaangay sang makihilawason nga babayi nga bahin sang Babilonia nga Daku.—Bugna 17:1, 2, 15-18; 19:1-3.

13. Anong mga kinaiya ang ginapakita ni Jehova sa pagpakilala sang iya pagkaayo?

¹³ Sa makalilipay nga kabaliskaran ang pangamuyo ni David nagapadayon: “Apang ikaw, O Jehova, amo ang Dios nga maluluy-on kag mainayuhon, makuli sa pagpangakig kag bugana sa mahigugmaon nga kalulo kag sa kamatuoran.” (Salmo 86:15) Superlatibo, matuod, ina nga mga kinaiya sang aton Dios. Ining mga pinamulong nagadala sa aton pabalik sa Bukid sang Sinai sang nangabay si Moises nga makita ang himaya ni Jehova. Si Jehova nagsabat: “Paagihon ko ang bug-os nakon nga pagkaayo sa atubangan mo, kag ibantala ko sa atubangan mo ang ngalan ni Jehova.” Apang ginpaandaman niya si Moises: “Indi ka makakita sang akon nawong, kay wala sing tawo nga makakita sa akon kag mabuhi.” Pagkatapos sina, si Jehova nagpanaug sa panganod, nga nagasiling: “Jehova, Jehova, Dios nga maluluy-on kag mainayuhon, makuli sa pagpangakig kag bugana sa mahigugmaon nga kalulo kag sa kamatuoran.” (Exodo 33:18-20; 34:5, 6) Ginbalikwat ni David ining mga pinamulong sa iya pangamuyo. Ina nga mga kinaiya ni Jehova mas daku pa ang kahulugan sa aton sang sa pisikal nga dagway! Gikan sa aton mismo inagihan, wala bala naton ginaapresyar ang pagkaayo ni Jehova subong sang ginhalimbawa sa sining maayo nga mga kinaiya?

“Tanda nga sa Kaayuhan”

14, 15. Paano si Jehova nagapakita sa iya mga alagad sing “tanda nga sa pagkaayo”?

¹⁴ Si David nangabay liwat sang pagpakamaayo ni Jehova, nga nagasiling: “Liso ka sa akon kag kahamut-i ako. Ihatag ang imo kusog sa imo alagad, kag luwasa ang lalaking anak sang imo ulipon nga babayi. Pakitai ako sing tanda nga sa kaayuhan, agod nga sila nga nagadumot sa akon makakita sini kag mahuy-an. Bangod nga ikaw, O Jehova, nagtabang sa akon kag naglipay sa akon.” (Salmo 86:16, 17) Ginakilala ni David nga subong ‘lalaking anak sang ulipon nga babayi ni Jehova,’ sia man iya ni Jehova. Amo man sa aton tanan sa karon nga nagdedikar sang aton kabuhi kay Jehova kag nagpaulipon sa pag-alagad sa iya. Kinahanglan naton ang nagaluwas nga kusog ni Jehova paagi sa iya balaan nga espiritu. Gani, ginapangabay naton sa aton Dios nga pakitaan niya kita “sing tanda nga sa kaayuhan.” Ang pagkaayo ni Jehova nagalakip sang maayong mga kinaiya nga bag-o lang naton ginhambalan. Sa sining sadsaran, anong tanda, ukon pamatuod, ang mapaabot naton nga ihatag ni Jehova sa aton?

¹⁵ Si Jehova amo ang Manughatag sang “tagsa ka maayong hatag kag tagsa ka dulot” kag maalwan, subong sang ginapasalig ni Jesus sa aton, sa paghatag sing “balaan nga espiritu sa mga nagapangayo sa iya.” (Santiago 1:17; Lucas 11:13) Balaan nga espiritu—daw ano ka hamili nga dulot halin kay Jehova! Paagi sa balaan nga espiritu, si Jehova nagaaman sing kalipay sang tagipusuon, bisan sa tion sang paghingabot. Busa, ang mga apostoles ni Jesus, sang ginatilawan sa ila kabuhi, malipayon nga nakasiling nga ang Dios nagahatag sing balaan nga espiritu sa mga nagatuman sa iya subong gumalahom. (Binuhatan 5:27-32) Ang kalipay sang balaan nga espiritu padayon nga ginpakita sa ila subong “tanda nga sa kaayuhan.”—Roma 14:17, 18.

16, 17. (a) Anong tanda nga sa pagkaayo ang ginhatag ni Jehova kay Pablo kag kay Bernabe? (b) Anong tanda ang ginhatag sa ginhingabot nga mga taga-Tesalonica?

¹⁶ Samtang nagalakbay subong misyonero sa Asia Minor, si Pablo kag si Bernabe nakasugata sing mga kabudlayan, bisan sing mabudlay nga paghingabot. Sang nagbantala sila sa Antioquia sa Pisidia, wala pagbatuna sang mga Judiyo ang ila mensahe. Gani, nagliso sila sa katawhan sang mga pungsod. Ano ang resulta? “Sang pagkabati sang mga pungsod sini, nagkasadya sila kag ginhimaya ang pulong ni Jehova, kag ang kapid-an nga gintangduan sa kabuhing walay katapusan nagtuo.” Apang nanggamo ang mga Judiyo, amo kon ngaa ang mga misyonero ginsubol paguwa sa pungsod. Nadulaan bala sila kag ang bag-ong tumuluo sing paglaum tuhoy sini? Wala gid! Sa baylo, “ang mga disipulo ginpun-an sang kalipay kag sang balaan nga espiritu.” (Binuhatan 13:48, 52) Ginhatagan sila ni Jehova sing tanda nga sa iya kaayuhan.

¹⁷ Sang ulihi, ang bag-ong kongregasyon sa Tesalonica ginhingabot. Nagdul-ong ini kay apostol Pablo nga magsulat sing sulat nga nagalugpay, nagadayaw sang ila pagbatas sa idalom sang kapipit-an. ‘Ginbaton nila ang pulong sa dakung kapipit-an nga may kalipay sa balaan nga espiritu.’ (1 Tesalonica 1:6) Ang “kalipay sa balaan nga espiritu” padayon nga nagpabakod sa ila subong makita nga tanda halin sa Dios nga maluluy-on kag mainayuhon, makuli sa pagpangakig, kag bugana sa mahigugmaon nga kalulo kag kamatuoran.

18. Paano ginpakita sang aton mga kauturan sa Nasidlangan nga Europa ang apresasyon sa pagkaayo ni Jehova?

¹⁸ Sining karon lang, ginpakita ni Jehova ang iya pagkaayo sa aton matutom nga mga kauturan sa Nasidlangan nga Europa, nagpakahuya sa mga naugot sa ila—ang ila anay mga manughingabot. Bisan pa nga napaumpawan na gikan sa dekada sang pagpamigos, ining mahal nga mga kauturan kinahanglan gihapon magbatas, kay madamo ang nagaatubang sing sobra nga kapurauton sa pangabuhi. Apang, ang ila “kalipay sa balaan nga espiritu” nagalugpay sa ila. Ano pa nga mas daku nga kalipay ang matigayon nila sang sa paggamit sang ila bag-ong kahilwayan sa pagpasangkad sang panaksi? Madamo nga tawo ang nagapamati sa ila, subong sang ginapakita sang mga report sa mga kombension kag mga bawtismo.—Ipaanggid ang Binuhatan 9:31.

19. Paano naton mahimo nga aton ang mga pinamulong sang Salmo 86:​11?

¹⁹ Ang tanan nga ginhambalan diri kag sa nauna nga artikulo nagapalanog sang hanuot nga pangamuyo ni David kay Jehova: “Tudlui ako, O Jehova, . . . Bug-usa ang akon tagipusuon sa pagkahadlok sa imo ngalan.” (Salmo 86:11) Himuon naton inang mga tinaga sang aton 1993 nga tuigan nga teksto nga aton gid kaugalingon samtang nagapangabudlay kita sing bug-os tagipusuon sa pagsakdag sa mga intereses sang Ginharian kag sa pag-apresyar sa wala nagakaubos nga pagkaayo sang aton isa ka Dios, ang Soberanong Ginuong Jehova.

[Mga footnote]

Paano Mo Sabton?

◻Ano ang ginapakita naton paagi sa pagsiling, “Tudlui ako, O Jehova!”

◻ Ano ang kahulugan sang pagbug-os sang aton tagipusuon sa pagkahadlok sa ngalan ni Jehova?

◻ Paano ipakita ni Jehova ang iya mahigugmaon nga kalulo sa tanan nga maunungon?

◻ Paano ginapakita ni Jehova sa aton ang “tanda nga sa pagkaayo”?

[Kahon sa pahina 16]

Ang tuigan nga teksto para sa 1993: “Tudlui ako, O Jehova . . . Bug-usa ang akon tagipusuon sa pagkahadlok sa imo ngalan.”—Salmo 86:11.

[Laragway sa pahina 15]

Si Jehova amo ang igang kag kuta sang mga nagalakat sing abante sa kamatuoran

[Laragway sa pahina 18]

Sa “Mga Manugdala sing Kapawa” nga Internasyonal nga Kombension sang mga Saksi ni Jehova sa St. Petersburg, Rusya, sang Hunyo, 46,214 ang nagtambong kag 3,256 ang nabawtismuhan. Makalilipay gid nga natigayon nila ang pagkaayo ni Jehova, upod ang “kasadya sa balaan nga espiritu”!