LEKSION 55
Buligi ang Inyo Kongregasyon
Sa bilog nga kalibutan, minilyon ka tawo ang malipayon nga nagasimba kay Jehova sa linibo ka kongregasyon. Nagapasalamat gid sila sa ila nabaton nga instruksion kag paggiya, kag gusto gid nila makabulig sa kongregasyon sa madamo nga paagi. Amo man bala sina ang nabatyagan mo sa inyo kongregasyon?
1. Ano ang pila ka paagi nga magamit mo ang imo tion kag kusog para buligan ang kongregasyon?
Tanan kita makabulig sa kongregasyon. Halimbawa, may ara bala sa inyo kongregasyon nga tigulang na ukon maluya sa pisikal? Mabuligan mo bala sila para makatambong sa mga miting? Ukon mabuligan mo bala sila sa iban pa nga paagi, pareho sang pagbakal sang ila mga kinahanglanon ukon pagtinlo sang ila balay? (Basaha ang Santiago 1:27.) Puede man kita makabulig sa pagtinlo kag pagmentinar sang aton Kingdom Hall. Wala kita ginapilit nga himuon ini tanan. Ang aton pagpalangga sa Dios kag sa mga kauturan amo ang nagapahulag sa aton nga ‘ihalad sing kinabubut-on ang aton kaugalingon.’—Salmo 110:3.
Ang bawtismado nga mga Saksi makabulig sa kongregasyon sa iban pa nga paagi. Ang kalipikado nga mga brother puede mangin ministeryal nga alagad ukon mangin gulang. Ang mga brother kag sister puede magpayunir para mas daku ang ila mabulig sa pagbantala. Ang pila ka Saksi makabulig sa pagpatindog sang mga tilipunan sa pagsimba ukon pagsaylo sa bululigan nga kongregasyon.
2. Paano naton magamit ang aton materyal nga mga butang para buligan ang kongregasyon?
‘Mapadunggan naton si Jehova paagi sa aton hamili nga mga butang.’ (Hulubaton 3:9) Nalipay kita nga gamiton ang aton kuarta kag iban pa nga butang para buligan ang aton kongregasyon kag ang pagbantala sa bilog nga kalibutan. (Basaha ang 2 Corinto 9:7.) Ang aton mga donasyon makabulig man sa tion sang kalamidad. Madamo ang regular nga ‘nagapain’ sang ila kuarta para may ihatag sila nga donasyon. (Basaha ang 1 Corinto 16:2.) Makahatag kita sang aton donasyon paagi sa paghulog sa aton mga donation box sa aton tilipunan sang pagsimba ukon sa online sa donate.jw.org. Mapakita naton ang aton pagpalangga kay Jehova kon ginagamit naton sing maayo ang aton materyal nga mga butang.
USISAA PA GID
Usisaon naton ang pila ka paagi nga makabulig ka sa kongregasyon.
3. Magamit naton ang aton materyal nga mga butang
Palangga ni Jehova kag ni Jesus ang nagahatag sing malipayon. Halimbawa, gindayaw ni Jesus ang imol nga balo nga babayi bangod sang iya pagtinguha nga makaamot. Basaha ang Lucas 21:1-4, dayon binagbinaga ini nga mga pamangkot:
Kinahanglan bala daku ang aton donasyon para mapalipay si Jehova?
Ano ang ginabatyag ni Jehova kag ni Jesus kon malipayon kita nga nagahatag?
Tan-awa ang VIDEO para mabal-an mo kon paano ginagamit ang aton mga donasyon. Dayon binagbinaga ang masunod nga pamangkot.
Paano ginagamit ang mga donasyon para makabulig sa mga kongregasyon sa bilog nga kalibutan?
4. Makaboluntaryo kita sa pagbulig
Sa panahon sang Biblia, ang mga sumilimba ni Jehova mapisan sa pagmentinar sang ila tilipunan sa pagsimba. Pero indi lang ini paagi sa pag-amot sang kuarta. Basaha ang 2 Cronica 34:9-11, dayon binagbinaga ini nga pamangkot:
Ano ang ginhimo sang kada Israelinhon para maatipan ang balay ni Jehova, ukon ang tilipunan sa pagsimba?
Tan-awa ang VIDEO para mabal-an mo kon paano ginasunod sang mga Saksi ni Jehova ang halimbawa sang una. Dayon binagbinaga ang masunod nga mga pamangkot.
Ngaa importante nga matinlo ang aton Kingdom Hall kag namentinar sing maayo?
Ano ang pila ka paagi nga makabulig ka?
5. Ang mga brother puede magtinguha sing dugang nga responsibilidad
Ang Biblia nagapalig-on sa Cristiano nga mga lalaki nga magtinguha sa pagbulig sa kongregasyon. Tan-awa ang VIDEO para makita mo ang isa ka halimbawa. Dayon binagbinaga ang masunod nga pamangkot.
Sa video, ano ang ginhimo ni Ryan para makabulig pa gid sia sa kongregasyon?
Mabasa sa Biblia ang mga kinahanglanon para ang isa ka brother mangin ministeryal nga alagad kag gulang. Basaha ang 1 Timoteo 3:1-13, dayon binagbinaga ini nga mga pamangkot:
Ano ang dapat himuon sang mga brother nga nagatinguha nga mangin ministeryal nga alagad kag gulang?
Ano ang dapat himuon sang ila pamilya?—Tan-awa ang bersikulo 4 kag 11.
Kon ginatinguhaan sang mga brother ini nga mga kinahanglanon, paano makabenepisyo ang tanan sa kongregasyon?
KON PAMANGKUTON KA: “Paano ginasuportahan sang mga Saksi ni Jehova ang ila hilikuton?”
Ano ang isabat mo?
SUMARYO
Nalipay gid si Jehova kon gamiton naton ang aton tion, kusog, kag materyal nga mga butang para buligan ang kongregasyon.
Rebyu
Paano naton gamiton ang aton tion kag kusog para buligan ang kongregasyon?
Paano naton gamiton ang aton materyal nga mga butang para buligan ang kongregasyon?
Sa ano nga mga paagi nga gusto mo makabulig sa kongregasyon?
DUGANG NGA IMPORMASYON
Hibalua kon ngaa wala na ginapatuman sang Dios sa iya mga sumilimba ang paghatag sang ikanapulo.
“Ano ang Ginasiling sang Biblia Parte sa Paghatag sing Ikanapulo?” (Artikulo sa website)
Sa Biblia, may mga responsibilidad nga ginahatag sa bawtismado nga mga lalaki. Pero ano ang himuon sang isa ka bawtismado nga babayi kon sia ang magatungod sini nga mga responsibilidad?
“Ang Awtoridad sang mga Gulang sa Kongregasyon” (Ang Lalantawan, Pebrero 2021)
Kilalaha ang maisog nga mga Saksi nga nagtinguha gid nga madul-ong ang mga publikasyon sa ila pareho nga mga sumilimba.
Pagdul-ong sang mga Literatura nga Base sa Biblia sa Congo (4:25)
Hibalua kon ngaa lain gid ang paagi sa pagsuporta sa amon hilikuton sangsa ginahimo sang iban nga relihion.
“Paano Ginasuportahan sang mga Saksi ni Jehova ang Ila Hilikuton?” (Artikulo sa website)