Magsalig Kay Jehova!

“Salig kay Jehova sa bug-os mo nga tagipusuon.”​—⁠HULUBATON 3:⁠5.

1. Paano nagtudok ang Hulubaton 3:5 sa isa ka pamatan-on, kag ano ang malawig nga resulta?

ANG isa ka madugay na nga misyonero nagsulat: “ ‘SALIG SA GINUO SA BUG-OS MO NGA TAGIPUSUON KAG DILI MAGSANDIG SA IMO KAUGALINGON NGA PAGHANGOP.’ Yadtong mga tinaga gikan sa Biblia, nga nakuwadro kag nagakabit sa dingding sang isa ka balay nga akon ginduaw, nagganyat sang akon igtalupangod. Sa sadtong bug-os nga adlaw ginpamalandungan ko ini. Ako bala, pamangkot ko sa akon kaugalingon, makasalig sa Dios sa bug-os ko nga tagipusuon?” Beinte-uno anyos pa lamang sadto ang edad sini nga tawo. Sa edad nga 90 anyos kag nagaalagad gihapon sing matutom subong gulang sa Perth, Australia, sarang niya mabalikid ang isa ka kabuhi nga puno sang bunga sang tinagipusuon nga pagsalig kay Jehova, lakip ang 26 ka mabudlay nga tinuig sang pagpayunir sa bag-ong misyonero nga mga latagon sa Ceylon (karon Sri Lanka), Burma (karon Myanmar), Malaya, Thailand, India, kag Pakistan.⁠a

2. Anong pagsalig ang dapat mapalig-on sang Hulubaton 3:5 sa aton?

² “Salig kay Jehova sa bug-os mo nga tagipusuon”​—⁠ining mga tinaga sa Hulubaton 3:​5, subong sang pagbadbad sang New World Translation, dapat magapahulag sa aton tanan nga padayon nga ihugod ang aton kabuhi sing bug-os tagipusuon kay Jehova, nagasalig nga mapabakod niya ang aton pagtuo, bisan tubtob sa punto nga malandas ang katulad-bukid nga mga problema. (Mateo 17:20) Usisaon naton karon ang Hulubaton 3:5 sa konteksto sini.

Amaynon nga Panudlo

3. (a) Anong pagpalig-on ang masapwan sa naunang siam ka kapitulo sang Hulubaton? (b) Ngaa dapat naton hatagan sing suod nga igtalupangod ang Hulubaton 3:​1, 2?

³ Ang nagabukas nga siam ka kapitulo sang tulun-an sang Hulubaton sa Biblia puno sing amaynon nga panudlo, maalamon nga laygay gikan kay Jehova para sa tanan nga nagapaabot nga matigayon ang pagkaanak sa mga langit ukon “ang mahimayaon nga kahilwayan sang mga anak sang Dios,” sa paraiso nga duta. (Roma 8:​18-21, 23) Yari ang maalamon nga laygay nga mahimo magamit sang mga ginikanan sa pagpadaku sa mga anak nga lalaki kag mga anak nga babayi. Talalupangdon amo ang laygay sang Hulubaton kapitulo 3, nga nagaumpisa paagi sa paandam: “Anak ko, dili pagkalimti ang akon kasuguan, kundi magbantay ang imo tagipusuon sang akon mga sugo.” Samtang ang katapusan nga mga adlaw sang malauton nga kalibutan ni Satanas nagapadulong sa katapusan sini, kabay nga talupangdon naton sing labi pa ang mga pahanumdom ni Jehova. Ang dalanon mahimo nga daw malawig, apang ang saad sa tanan nga nagabatas amo nga “ang kalawigon sang mga adlaw kag katuigan sang kabuhi kag ang paghidait idugang sa imo”​—⁠ang kabuhi nga dayon sa bag-ong sistema ni Jehova.​—⁠Hulubaton 3:​1, 2.

4, 5. (a) Anong makalilipay nga kaangtanan ang ginalaragway sa Juan 5:​19, 20? (b) Paano naaplikar tubtob sa aton adlaw ang laygay sa Deuteronomio 11:​18-21?

⁴ Ang makalilipay nga kaangtanan sa ulot sang amay kag anak mahimo mangin pinakahamili. Ginhimos sang aton Manunuga, nga si Jehova nga Dios ini nga mangin amo sina. Si Cristo Jesus nagsiling tuhoy sa iya mismo suod nga kaangtanan kay Jehova: “Ang Anak indi makahimo sing bisan ano sa iya kaugalingon, kundi lamang ang nakita niya nga ginahimo sang Amay. Kay ang bisan ano nga ginahimo niya, ini ginahimo man sang Anak sa amo nga bagay. Kay ang Amay nagahigugma sa Anak kag nagapakita sa iya sang tanan nga iya ginahimo.” (Juan 5:​19, 20) Gintuyo ni Jehova nga ang kaanggid nga pagkasuod dapat magluntad sa ulot niya kag sa tanan sang iya panimalay sa duta, subong man sa ulot sang tawhanon nga mga amay kag sang ila mga anak.

⁵ Ang masinaligon nga kaangtanan sa pamilya ginpalig-on sa dumaan nga Israel. Didto si Jehova naglaygay sa mga amay: “Tipigan ninyo ining akon mga pulong sa inyo tagipusuon kag sa inyo kalag kag ibugkos ninyo sila nga tanda sa inyo kamot, kag mangin filacteria sila sa ulot sang inyo mga mata. Itudlo man ninyo sila sa inyo mga anak, nga nagahambal nahanungod sa ila sa nagalingkod ka sa imo balay kag sa nagalakat ka sa dalanon kag sa nagahigda ka kag sa nagabangon ka. Kag isulat mo sila sa mga bakalan sang ganhaan sang imo balay kag sa imo mga gawang, agod nga magdamo ang imo mga adlaw kag ang mga adlaw sang imo mga anak sa duta nga ginsumpa ni Jehova sa inyo mga ginikanan nga ihatag sa ila, subong sang mga adlaw sang mga langit sa ibabaw sang duta.” (Deuteronomio 11:​18-21) Ang inspirado nga Pulong sang aton Dakung Instruktor, nga si Jehova nga Dios, makabulig gid sa pag-angot sa iya sing suod sa mga ginikanan kag sa ila mga kabataan, subong man sa tanan pa nga iban nga nagaalagad sa Cristianong kongregasyon.​—⁠Isaias 30:​20, 21.

6. Paano kita makasapo sing kahamuot sa Dios kag sa tawo?

⁶ Ang maalamon nga amaynon nga laygay para sa katawhan sang Dios, tigulang kag bata, nagapadayon sa bersikulo 3 kag 4 sang Hulubaton kapitulo 3: “Indi magbiya ang mahigugmaon nga kalulo kag ang kamatuoran sa imo. Ihigot sila palibot sa imo liog. Isulat sila sa tapitapi sang imo tagipusuon, kag gani makakita ka sing kahamuot kag maayo nga paghangop sa itololok sang Dios kag tawo.” Si Jehova nga Dios nagalabaw gid sa pagpakita sing mahigugmaon nga kalulo kag kamatuoran. Subong sang ginasiling sang Salmo 25:​10, “ang tanan nga banas ni Jehova amo ang mahigugmaon nga kalulo kag kamatuoran.” Bilang pag-ilog kay Jehova, dapat naton pakabahandion ining mga kinaiya kag ang maamligon nga gahom sini, nagahamili sini subong sang paghamili naton sa bilidhon nga kulintas kag nagasulat sini sing dimapanas sa aton tagipusuon. Nian, sing hanuot, makapangamuyo kita: “O Jehova, . . . magtipig sa akon sing dalayon ang imo mahigugmaon nga kalulo kag ang imo kamatuoran.”​—⁠Salmo 40:⁠11.

Malig-on nga Pagsalig

7. Sa anong mga paagi ginpakita ni Jehova ang iya pagkamasaligan?

⁷ Ang pagsalig ginapaathag sang Webster’s Ninth New Collegiate Dictionary subong “pat-od nga pagsalig sa kinaiya, ikasarang, kusog, ukon kamatuoran sang isa ka tawo ukon isa ka butang.” Ang kinaiya ni Jehova malig-on nga napasad sa iya mahigugmaon nga kalulo. Kag makasalig kita sing bug-os sa iya ikasarang sa paghimo sang kon ano ang iya ginsaad, kay ang iya mismo ngalan, nga Jehova, nagapakilala sa iya subong ang dakung Manugtuyo. (Exodo 3:14; 6:​2-8) Subong Manunuga, sia ang Tuburan sang kusog kag dinamiko nga enerhiya. (Isaias 40:​26, 29) Sia ang kabug-usan sang kamatuoran, kay “indi mahimo nga ang Dios magbutig.” (Hebreo 6:18) Gani, ginapalig-on kita nga magsalig sing bug-os kay Jehova, nga aton Dios, ang daku nga Tuburan sang tanan nga kamatuoran, nga may labing gamhanan nga gahom sa pag-amlig sa mga masinaligon sa iya kag sa pagtuman sing mahimayaon sang tanan niya nga dalagkung mga katuyuan.​—⁠Salmo 91:​1, 2; Isaias 55:​8-11.

8, 9. Ngaa ang pagsalig makasulubo nga kulang sa kalibutan, kag paano ang katawhan ni Jehova nagahatag sing kabaliskaran?

⁸ Sa malain nga kalibutan sa aton palibot, ang pagsalig makapasubo nga kulang. Sa baylo, makita naton ang kakagod kag kagarukan bisan diin. Ang panghapin sang Mayo 1993 nga guwa sang magasin nga World Press Review may nagabadlak nga mensahe: “PAGDUGANG SANG KAGARUKAN​—⁠Mahigko nga Kuwarta sa Bag-ong Kalibutan nga Kahimusan. Ang kagarukan nagalapnag halin sa Brazil pakadto sa Alemanya, halin sa Estados Unidos pakadto sa Argentina, halin sa Espanya pakadto sa Peru, halin sa Italya pakadto sa Mexico, halin sa Batikano pakadto sa Rusya.” Bangod napasad sa dumot, kakagod, kag dipagsalig, ang ginatawag nga bag-ong kalibutan nga kahimusan sang tawo wala sing naani kundi nagadugang nga kailo para sa katawhan.

⁹ Kabaliskaran sa politikal nga mga pungsod, ang mga Saksi ni Jehova malipayon nga mangin “ang pungsod nga ang iya Dios amo si Jehova.” Sila lamang ang matinuuron nga makasiling, “Sa Dios kami nagasalig.” Ang kada isa sa ila makasinggit sing makalilipay: “Sa Dios ginadayaw ko ang iya pulong. . . . Sa Dios nagasalig ako. Indi ako mahadlok.”​—⁠Salmo 33:12; 56:​4, 11.

10. Ano ang nagpabakod sa madamong pamatan-on nga mga Cristiano nga huptan ang integridad?

¹⁰ Sa isa ka pungsod sa Asia diin linibo ka pamatan-on nga mga Saksi ang nag-antos sing grabe nga pagbakol kag pagkabilanggo, ang pagsalig kay Jehova nagbulig sa dakung kadam-an sa pagbatas. Isa ka gab-i sa bilangguan, ang lamharon nga Saksi nga ginsakit sing grabe nagbatyag nga indi na sia makaagwanta pa. Apang isa pa ka pamatan-on ang likom nga nagpalapit sa iya sa dulom. Sia naghutik: “Indi mag-ampo; nagkompromiso ako kag sugod sadto wala na ako sing kalinong sa hunahuna.” Ginpasag-uli sang nauna nga pamatan-on ang iya pamat-od nga magtindog nga malig-on. Makasalig kita sing bug-os kay Jehova nga buligan niya kita nga malandas ang bisan ano kag ang tanan nga panikasog ni Satanas agod paluyahon ang aton integridad.​—⁠Jeremias 7:​3-7; 17:​1-8; 38:​6-13, 15-17.

11. Paano kita ginapahulag nga magsalig kay Jehova?

¹¹ Ang unang sugo mabasa sing bahin: “Higugmaa si Jehova nga imo Dios sa bug-os mong tagipusuon.” (Marcos 12:30) Samtang ginapamalandungan naton ang Pulong sang Dios, ang makalilipay nga mga kamatuoran nga natun-an naton nagatudok sa aton tagipusuon amo nga ginapahulag kita nga ihinguyang ang bug-os naton nga masarangan sa pag-alagad sa aton dakung Dios, ang Soberanong Ginuo nga si Jehova. Upod sa tagipusuon nga puno sing apresasyon sa iya​—⁠tungod sa tanan nga gintudlo niya sa aton, ginhimo para sa aton, kag pagahimuon pa para sa aton⁠—​nga ginapapagsik kita nga magsalig sing bug-os sa pagluwas niya.​—⁠Isaias 12:⁠2.

12. Sa sulod sang mga tinuig, paano ginpakita sang madamong mga Cristiano ang pagsalig kay Jehova?

¹² Ini nga pagsalig sarang mapalambo sa sulod sang mga tinuig. Ang isa ka mapainubuson nga Saksi ni Jehova nga nag-alagad sing matutom sa kapin sa 50 ka tuig sa ulong-talatapan sang Watch Tower Society sa Brook­lyn, nga nagsugod sang iya pag-alagad sang Abril 1927, nagsulat: “Sang katapusan sadto nga bulan nakabaton ako sing allowance nga $5.00 nga nasulod sa isa ka sobre nga may matahom nga kard nga nasulatan sing teksto sa Biblia sa Hulubaton 3:​5, 6 . . . May rason gid sa pagsalig kay Jehova, kay sa ulong-talatapan naapresyar ko sa gilayon nga si Jehova may ‘matutom kag mainandamon nga ulipon’ nga nagaatipan sing matutom sang tanan nga mga interes sang Ginharian diri sa duta.​—⁠Mateo 24:​45-47.”⁠b Ang tagipusuon sini nga Cristiano nahamtang, indi sa gugma sa kuwarta, kundi sa pagtigayon sing “mga bahandi sa mga langit nga indi mahubsan.” Sa karon man, ang libo-libo nga nagaalagad sa mga puluy-an Bethel sang Watch Tower Society sa palibot sang duta nagahimo sini sa idalom sang isa ka sahi sang legal nga panaad sang kaimulon. Nagasalig sila kay Jehova sa pag-aman sang ila adlaw-adlaw nga mga kinahanglanon.​—⁠Lucas 12:​29-31, 33, 34.

Magsandig kay Jehova

13, 14. (a) Sa diin lamang masapwan ang hamtong nga laygay? (b) Ano ang dapat likawan agod makalampuwas sa paghingabot?

¹³ Ang aton langitnon nga Amay nagalaygay sa aton: “Dili magsandig sa imo kaugalingon nga paghangop.” (Hulubaton 3:⁠5) Ang kalibutanon nga mga manuglaygay kag mga sikologo indi gid makalaum nga malab-ot ang kaalam kag paghangop nga ginapakita ni Jehova. “Ang iya paghangop wala sing katubtuban.” (Salmo 147:⁠5) Sa baylo nga magsandig sa kaalam sang kilala nga mga tawo sang kalibutan ukon sa aton mismo wala sing kasayuran nga mga emosyon, magsalig kita kay Jehova, sa iya Pulong, kag sa mga gulang sa Cristianong kongregasyon para sa hamtong nga laygay.​—⁠Salmo 55:22; 1 Corinto 2:⁠5.

¹⁴ Wala kita sing madangatan sa tawhanon nga kaalam ukon mataas nga posisyon sa madasig nagahinampot nga adlaw sang daku nga pagtilaw. (Isaias 29:14; 1 Corinto 2:14) Sa Japan sadtong Inaway Kalibutanon II, ang isa ka sangkol apang bugalon nga manugbantay sang katawhan sang Dios nagpili nga magsandig sa iya kaugalingon nga paghangop. Sa idalom sang pag-ipit nangin apostata sia, kag ang kalabanan sa panong nag-untat man sa pag-alagad sa idalom sang paghingabot. Ang isa ka matutom nga utod nga Haponesa, nga maisugon nga nakalampuwas sa grabe nga pagtratar sa mahigko nga mga selda sang bilangguan, nagkomento: “Yadtong nagpabilin nga matutom wala sing pinasahi nga mga ikasarang kag mga ditalalupangdon. Pat-od gid nga kita tanan dapat pirme magsalig kay Jehova sa bug-os naton nga tagipusuon.”⁠c

15. Anong diosnon nga kinaiya ang kinahanglanon agod mapahamut-an naton si Jehova?

¹⁵ Ang pagsalig kay Jehova, sa baylo sang aton kaugalingon nga paghangop, nagakinahanglan sing pagkamapainubuson. Daw ano gid ka importante ini nga kinaiya para sa tanan nga maluyag magpahamuot kay Jehova! Ti, bisan ang aton Dios, walay sapayan nga Soberanong Ginuo sa bug-os nga uniberso, nagapakita sing pagpaubos sa iya pagpakig-angot sa iya intelihente nga tinuga. Makapasalamat kita sa sina. “Sia nagapaubos sang iya kaugalingon sa pagtulok sa mga butang nga yara sa langit kag sa duta, ginabayaw niya ang imol gikan sa yab-ok.” (Salmo 113:⁠6, 7) Bangod sang iya daku nga kaluoy, ginapatawad niya kita sa aton mga kaluyahon pasad sa iya pinakadaku nga dulot sa katawhan, ang hamili nga halad-gawad sang iya hinigugma nga Anak, nga si Cristo Jesus. Dapat gid kita magpasalamat tungod sining dibagay nga kaluoy!

16. Paano malab-ot sang mga utod nga lalaki ang mga pribilehiyo sa kongregasyon?

¹⁶ Si Jesus gid nagapahanumdom sa aton: “Ang bisan sin-o nga magpakataas sang iya kaugalingon paubson, kag ang bisan sin-o nga magpaubos sang iya kaugalingon pataason.” (Mateo 23:12) Upod ang pagpaubos, ang bawtismado nga mga utod nga lalaki dapat magtinguha nga malab-ot ang mga responsabilidad sa Cristianong kongregasyon. Apang, dapat tamdon sang mga manugtatap ang pagtangdo sa ila, indi subong simbulo sang tindog, kundi subong kahigayunan sa paghimo sang isa ka hilikuton, sing mapainubuson, mainapresyahon, hanuot, subong sang ginhimo ni Jesus, nga nagsiling: “Ang akon Amay padayon nga nagapangabudlay tubtob karon, kag nagapangabudlay ako.”​—⁠Juan 5:17; 1 Pedro 5:​2, 3.

17. Ano ang dapat naton tanan kilalahon, nga nagadul-ong sa anong hilikuton?

¹⁷ Kabay nga pirme naton kilalahon sing mapainubuson kag mapangamuyuon nga yab-ok lamang kita sa itululok ni Jehova. Daw ano ka malipayon kita, nian, nga “ang mahigugmaon nga kalulo ni Jehova kutob sa tion nga dinapat-od tubtob sa tion nga dinapat-od sa mga nagakahadlok sa iya, kag ang iya pagkamatarong tubtob sa mga anak sang mga anak”! (Salmo 103:​14, 17) Busa kita tanan dapat mangin hanuot nga mga estudyante sang Pulong sang Dios. Ang tion nga ginhinguyang sa personal kag sa pamilya nga pagtuon, kag sa mga miting sa kongregasyon, dapat nalakip sa aton pinakahamili nga oras kada semana. Sa sining paagi ginapabakod naton ang “ihibalo sang Labing Balaan nga Isa.” Amo ina “ang paghangop.”​—⁠Hulubaton 9:⁠10.

“Sa Tanan Mo nga Dalanon . . . ”

18, 19. Paano naton mahimo maaplikar ang Hulubaton 3:6 sa aton kabuhi, kag upod ang anong resulta?

¹⁸ Nagatuytoy sa aton kay Jehova, ang balaan nga Ginhalinan sang paghangop, ang Hulubaton 3:6 masunod nga nagasiling: “Sa tanan mo nga dalanon kilalaha sia, kag magatuytoy sia sa imo mga banas.” Ang pagkilala kay Jehova nagalakip sang pagpakigsuod sa iya sa pangamuyo. Diin man kita kag ano man nga kahimtangan ang mahimo magautwas, makapalapit gilayon kita sa iya sa pangamuyo. Samtang ginabuhat naton ang aton matag-adlaw nga mga hilikuton, samtang nagahanda kita para sa pag-alagad sa latagon, samtang nagapamalaybalay kita nga nagabantala sang iya Ginharian, ang aton dalayon nga pangamuyo amo nga pakamaayuhon niya ang aton hilikuton. Sa amo, matigayon naton ang dimabanta nga pribilehiyo kag kalipay sa ‘paglakat sa Dios,’ nagasalig nga ‘tadlungon niya ang aton mga banas,’ subong sang ginhimo niya para sa mahadlukon sa Dios nga si Enoc, si Noe, kag sa matutom nga mga Israelinhon, subong nanday Josue kag Daniel.​—⁠Genesis 5:22; 6:9; Deuteronomio 8:6; Josue 22:5; Daniel 6:23; tan-awa man ang Santiago 4:​8, 10.

¹⁹ Kon isugid naton kay Jehova ang aton mga pangabay, makasalig kita nga ‘ang paghidait sang Dios nga nagalabaw sa tanan nga paghangop magatipig sang aton mga tagipusuon kag sang aton mga painoino sa kay Cristo Jesus.’ (Filipos 4:⁠7) Ining paghidait sang Dios, nga mabanaag sa malipayon nga pangguyahon, mahimo makarekomendar sang aton mensahe sa mga tagbalay nga masugilanon naton sa aton pagbantala nga hilikuton. (Colosas 4:​5, 6) Mahimo man ini makapalig-on sa mga nasit-an sang mga pag-ipit ukon mga inhustisya nga kinaandan gid sa karon nga kalibutan, subong sang ginapakita sang masunod nga kasaysayan.⁠d

20, 21. (a) Sadtong panahon sang kapintas sang Nazi, paano ang integridad sang mga Saksi ni Jehova nagpalig-on sa iban? (b) Anong pamat-od ang dapat mapukaw sa aton sang tingog ni Jehova?

²⁰ Si Max Liebster, isa ka kinaugali nga Judiyo nga paagi sa daw isa ka milagro nakalampuwas sa Holocaust, naglaragway sang iya paglakbay pakadto sa kampo nga palatyan sang Nazi sa sining mga tinaga: “Ginkandaduhan kami sa mga bagon nga ginhimo nga madamong magagmay nga mga selda para sa duha ka tawo. Ginsipa pasulod sa isa sini, naatubang ko ang isa ka bilanggo nga ang mga mata nagpabanaag sing kalinong. Didto sia bangod sang iya pagtahod sa kasuguan sang Dios, nagpili sang bilangguan kag posible nga kamatayon sa baylo nga patuluon ang dugo sang iban nga mga tawo. Sia isa sang mga Saksi ni Jehova. Ang iya mga kabataan ginkuha sa iya, kag ang iya asawa ginpatay. Ginapaabot niya nga patyon man sia. Ang 14-ka-adlaw nga paglakbay naghatag sing sabat sa akon mga pangamuyo, kay sa sini gid nga paglakbay pakadto sa kamatayon nga nasapwan ko ang paglaum nga kabuhi nga walay katapusan.”

²¹ Pagkatapos maeksperiensiahan ang “lungib sang leon” sa Auschwitz, subong sang pagtawag niya sini, kag pagkatapos sia mabawtismuhan, ginpangasawa sini nga utod ang isa sang mga Saksi ni Jehova nga nabilanggo man kag nga ang amay niya nag-antos sa kampo konsentrasyon sa Dachau. Samtang didto ang iya amay, nabalitaan niya nga ang iya asawa kag ang iya lamharon nga anak nga babayi gindakop man. Ginlaragway niya ang iya reaksion: “Nabalaka gid ako. Nian isa ka adlaw samtang nagalinya ako para makapaligo, nabatian ko ang isa ka tingog nga nagakutlo sang Hulubaton 3:​5, 6 . . . Naglanog ini kaangay sang isa ka tingog nga naghalin sa langit. Amo gid ini ang ginkinahanglan ko agod mapasag-uli ang akon pagkatimbang.” Sa katunayan, ang tingog iya sang isa pa ka bilanggo nga nagakutlo sining teksto, apang ang hitabo nagapadaku kon daw ano nga gahom ang mahatag sa aton sang Pulong sang Dios. (Hebreo 4:12) Kabay nga ang tingog ni Jehova magapamulong sing mabaskog sa aton karon paagi sa mga tinaga sang aton 1994 nga tuigan nga teksto: “Salig kay Jehova sa bug-os mo nga tagipusuon”!

[Mga footnote]

Sa Pagsumaryo

◻ Anong sahi sang laygay ang ginapresentar sang Hulubaton?

◻ Paano kita makabenepisyo sa pagsalig kay Jehova?

◻ Ano ang nalakip sa pagsandig kay Jehova?

◻ Ngaa dapat naton kilalahon si Jehova sa tanan naton nga dalanon?

◻ Paano ginatadlong ni Jehova ang aton mga banas?

[Mga piktyur sa pahina 15]

Ang makalilipay nga mensahe sang Ginharian nagaganyat sa mga tawo nga may bunayag sing tagipusuon