Pag-alagad sing Mainunungon Upod sa Organisasyon ni Jehova

“Sa isa nga mainunungon magahikot ikaw sing mainunungon.”​—⁠2 SAMUEL 22:⁠26.

1, 2. Ano ang pila ka huwaran sang pagkamainunungon nga mahimo makita naton tanan sa kongregasyon?

SANG isa ka mahinagob nga gab-i nagahanda ang isa ka gulang sing pamulongpulong para sa isa ka Cristianong miting. Luyag niya kuntani mag-untat kag magpahunayhunay; sa baylo, padayon sia nga nagtuon, nga nagapangita sing Makasulatanhon nga mga huwaran kag mga ilustrasyon nga magapahulag sa tagipusuon kag magapalig-on sa panong. Sang gab-i sang miting, luyag kuntani sang kapoy na nga duha ka ginikanan sa amo man nga kongregasyon nga indi magguwa sa ila puluy-an sadto nga gab-i; sa baylo, mapailubon nga ginhanda nila ang ila mga anak kag nagkadto sa miting. Pagkatapos sang miting, isa ka grupo sang mga Cristiano ang nagahambalanay tuhoy sa bahin sang isa ka gulang. Daw luyag na gid sambiton sang isa ka utod nga babayi nga sang una nasaklaw gid sia sa sini nga utod; sa baylo, malipayon nga ginsambit niya ang isa sang mga punto nga iya ginpalutaw. Makita mo bala ang isa ka kinaandan nga butang sa sining mga kahimtangan?

² Ina nga butang amo ang pagkamainunungon. Ang isa ka gulang mainunungon nga nagtuon agod atipanon ang panong sang Dios; ang mga ginikanan mainunungon nga nagtambong sa mga miting sang kongregasyon; ang utod nga babayi mainunungon nga nagsakdag sa mga gulang. (Hebreo 10:​24, 25; 13:​17; 1 Pedro 5:2) Huo, sa tanan nga bahin sang kabuhi, makita naton ang katawhan sang Dios nga determinado sa pag-alagad sing mainunungon upod sa organisasyon ni Jehova.

3. Ngaa importante gid nga magpabilin kita nga mainunungon sa dutan-on nga organisasyon ni Jehova?

³ Kon tulukon ni Jehova ining malaut nga kalibutan, diutay lamang nga pagkamainunungon ang iya makita. (Miqueas 7:2) Pat-od gid nga nalipay ang iya tagipusuon kon makita ang pagkamainunungon sang iya katawhan! Huo, ang imo mismo pagkamainunungon nagapahalipay sa iya. Apang, nagapaakig ini kay Satanas, ang una nga rebelde, kag nagapamatuod ini nga butigon sia. (Hulubaton 27:​11; Juan 8:44) Paabuta nga si Satanas magatinguha nga paluyahon ang imo pagkamainunungon kay Jehova kag sa Iya dutan-on nga organisasyon. Binagbinagon naton ang pila ka paagi nga ginahimo ini ni Satanas. Sa amo, mahangpan naton sing maayo pa kon paano kita makapabilin nga mainunungon tubtob sa katapusan.​—⁠2 Corinto 2:⁠11.

Ang Pagpadaku sa mga Dikahimpitan Amat-amat nga Makapaluya sa Pagkamainunungon

4. (a) Ngaa madali lang magmulay sa mga yara sa awtoridad? (b) Paano si Kore nangin dimainunungon sa organisasyon ni Jehova?

⁴ Kon ang isa ka utod yara sa posisyon nga may responsabilidad, ang iya mga sayop mas madali makita. Madali mamulalungan ang ‘puling nga yara sa mata sang aton utod samtang wala naton ginasapak ang balayanon nga yara sa aton kaugalingon nga mata’! (Mateo 7:​1-5) Apang, ang pirme nga pagmulalong sa mga sayop makadul-ong sa pagkadimainunungon. Sa pag-ilustrar, binagbinaga ang pagkatuhay ni Kore kag ni David. Si Kore may daku nga responsabilidad, kag mahimo gid nga nangin matutom sia sa sulod sang madamong tinuig, apang nangin ambisyuso sia. Ginkahisaan niya ang awtoridad ni Moises kag ni Aaron, nga iya mga pakaisa. Bisan pa si Moises amo ang pinakamahagop nga tawo, mahimo gid nga si Kore nagsugod sa pagtulok sa iya nga may mamulayon nga mga mata. Mahimo gid nga nakakita sia sing mga sayop kay Moises. Apang, ining mga sayop wala magpakamatarong sa pagluib ni Kore batok sa organisasyon ni Jehova. Ginlaglag sia gikan sa tunga sang kongregasyon.​—⁠Numeros 12:​3; 16:​11, 31-33.

5. Ngaa mahimo kuntani masulay si David sa pagrebelde batok kay Saul?

⁵ Si David, sa pihak nga bahin, nag-alagad sa idalom ni Hari Saul. Bisan pa isa anay ka maayo nga hari, si Saul nangin malaut. Nagkinahanglan si David sing pagtuo, pagbatas, kag sing pagkamapahituon agod malampuwasan ang mga pag-atake ni Saul bangod sa kahisa. Apang, sang makakita si David sing higayon nga makabalos sia, nagsiling sia nga ini ‘indi makatarunganon, gikan sa pagtamod ni Jehova,’ nga maghimo sia sing isa ka dimainunungon nga buhat batok sa isa nga hinaplas ni Jehova.​—⁠1 Samuel 26:⁠11.

6. Bisan pa kon makakita kita sing mga kaluyahon kag mga sayop sa mga gulang, ano ang indi gid naton dapat himuon?

⁶ Kon ang pila nga nagapanguna sa tunga naton daw nagsayop sa pagdesisyon, naghambal sing masakit nga mga pulong, ukon daw nagpakita sing paboritismo, magareklamo bala kita batok sa ila, ayhan magpalapta sing mamulayon nga espiritu sa kongregasyon? Magalikaw bala kita sa Cristianong mga miting subong isa ka porma sang pagprotesta? Indi sa pagkamatuod! Kaangay ni David, indi gid naton pagtugutan ang mga sayop sang iban nga magpahulag sa aton nga mangin dimainunungon kay Jehova kag sa iya organisasyon!​—⁠Salmo 119:​165.

7. Ano ang pila ka malaut nga mga buhat nga nag-utwas may kaangtanan sa templo sa Jerusalem, kag ano ang ginbatyag ni Jesus sa sini?

⁷ Ang labing daku nga huwaran sa pagkamainunungon subong tawo amo si Jesucristo, nga ginlaragway sing matagnaon subong “mainunungon nga isa” ni Jehova. (Salmo 16:10) Mahimo nga nangin mabudlay ang pagpakita sing pagkamainunungon bangod sang kalautan nga ginhimo sa templo sa Jerusalem. Nahibaluan ni Jesus nga ang hilikuton sang mataas nga saserdote kag ang mga halad naglaragway sa iya ministeryo kag mahalaron nga kamatayon, kag nahibaluan niya kon daw ano ka importante nga makatuon ang katawhan gikan sa sini. Gani puno gid sia sing matarong nga kaakig sang makita niya ang templo nga nangin “isa ka lungib sang mga kawatan.” Bangod sang awtoridad nga ginhatag sang Dios, makaduha nga naghimo sia sing mga tikang agod tinluan ini.⁠a​—⁠Mateo 21:​12, 13; Juan 2:​15-17.

8. (a) Paano si Jesus nagpakita sing pagkamainunungon sa kahimusan sa templo? (b) Paano naton mapakita nga ginaapresyar naton ang pagsimba kay Jehova upod sa iya matinlo nga organisasyon?

⁸ Sa gihapon, mainunungon nga ginsakdag ni Jesus ang kahimusan sa templo. Halin sa pagkabata, nagtambong sia sa mga kapiestahan sa templo kag masami nga nagpanudlo didto. Nagbayad pa gani sia sing buhis sa templo​—⁠bisan pa indi sia obligado sa sini. (Mateo 17:​24-27) Gindayaw ni Jesus ang imol nga babayi nga balo bangod ginhulog niya sa bahandian sang templo ang “tanan nga inugpangabuhi niya.” Wala madugay pagkatapos sadto, ginsikway ni Jehova sing dayon yadto nga templo. Apang tubtob sa amo nga tion, si Jesus mainunungon sa sini. (Marcos 12:​41-44; Mateo 23:38) Ang dutan-on nga organisasyon sang Dios karon labaw gid sa Judiyong sistema upod ang templo sini. Matuod, indi ini himpit; amo kon ngaa may mga pagbag-o nga ginahimo kon kaisa. Apang indi ini puno sing kalautan, kag wala sing katuyuan si Jehova nga Dios nga islan ini. Indi gid naton pagtugutan ang bisan anong dikahimpitan nga makita naton sa sini nga magpabatyag sa aton sing hinakit ukon magpahulag sa aton nga maghupot sing mamulayon kag negatibo nga espiritu. Sa baylo, ilugon naton ang pagkamainunungon ni Jesucristo.​—⁠1 Pedro 2:⁠21.

Ang Aton Mismo mga Dikahimpitan

9, 10. (a) Paano ginahingalitan sang sistema sang mga butang ni Satanas ang aton mga dikahimpitan agod sulayon kita sa paghimo sing dimainunungon nga paggawi? (b) Ano ang dapat himuon sang isa nga nakakomiter sing mabug-at nga sala?

⁹ Nagatinguha man si Satanas nga palig-unon ang pagkadimainunungon paagi sa paghingalit sa aton mga dikahimpitan. Ginahimuslan sang iya sistema sang mga butang ang aton mga kaluyahon, kag ginasulay kita nga himuon kon ano ang malain sa mga mata ni Jehova. Sing makapasubo, kada tuig linibo ang nagapadaug sa imoralidad. Ginapagrabe pa sang iban ining pagkadimainunungon paagi sa doble nga sahi sang pagkabuhi, padayon nga nagahimo sing sala samtang nagapakunukuno nga matutom gihapon nga mga Cristiano. Bilang sabat sa mga artikulo sa sining topiko sa “Young People Ask . . .” nga mga serye sa Awake! nga magasin, ang isa ka lin-ay nagsulat: “Ang mga artikulo amo gid ang natabo sa akon kabuhi.” Sing patago, nakig-abyan sia sa mga pamatan-on nga wala sing gugma kay Jehova. Ang resulta? Sia nagsulat: “Naglain gid ang akon kabuhi, kag nakahimo ako sing imoralidad kag ginsabdong. Nahalitan ang akon kaangtanan kay Jehova, kag nadula ko ang pagsalig sang akon mga ginikanan kag sang mga gulang.”⁠b

¹⁰ Ining lin-ay nangayo sing bulig gikan sa mga gulang kag nag-alagad liwat sing mainunungon kay Jehova. Apang, makapasubo nga madamo ang nag-antos sing mas grabe nga mga resulta, kag ang iban wala na gid nagabalik sa kongregasyon. Gani, mas maayo gid nga mangin mainunungon kag pamatukan ang pagsulay sining malaut nga kalibutan! Pamatii ang mga paandam gikan sa Lalantawan kag Magmata! nga mga magasin tuhoy sa mga butang subong sang kalibutanon nga pagpakig-upod kag malaw-ay nga kalingawan. Kabay nga indi gid kamo mahulog sa dimainunungon nga paggawi. Apang kon matabo gid man ini, indi magpakunukuno nga wala ini matabo. (Salmo 26:4) Sa baylo, mangayo sing bulig. Amo sina kon ngaa yara ang Cristianong mga ginikanan kag mga gulang.​—⁠Santiago 5:⁠14.

11. Ngaa sayop nga tamdon ang aton kaugalingon subong wala na sing paglaum nga malain, kag ano nga kaso sa Biblia ang makabulig sa aton nga tadlungon ang aton pagtamod?

¹¹ Ang aton mga dikahimpitan mahimo magbutang sa aton sa katalagman sa isa pa ka paagi. Ang pila nga nakakomiter sing dimainunungon nga buhat nagauntat sa pagtinguha nga pahamut-an si Jehova. Dumduma, si David nakakomiter sing mabug-at gid nga mga sala. Apang, pagligad sang malawig nga tion sang patay na si David, gindumdom sia ni Jehova subong isa ka matutom nga alagad. (Hebreo 11:​32; 12:1) Ngaa? Bangod wala gid sia mag-untat sa pagtinguha nga pahamut-an si Jehova. Ang Hulubaton 24:​16 nagasiling: “Ang matarong nga tawo mahimo mapukan sing makapito, kag nagabangon liwat.” Sa pagkamatuod, kon makahimo kita sing diutay nga mga sala​—⁠huo sing makapila​—⁠bangod sang isa ka kaluyahon nga aton ginabatuan, mahimo nga matarong gihapon kita sa mga mata ni Jehova kon padayon kita nga “magbangon”​—⁠buot silingon, sinsero nga maghinulsol kag padayunon ang dalanon sang mainunungon nga pag-alagad.​—⁠Ipaanggid ang 2 Corinto 2:⁠7.

Mag-andam sa Malalangon nga mga Porma sang Pagkadimainunungon!

12. Sa kaso sang mga Fariseo, paano ang isa ka estrikto, legalistiko nga pagtamod nagdul-ong sa pagkadimainunungon?

¹² Ang pagkadimainunungon ginahimo man sa mas malalangon nga mga porma. Mahimo nga magapakunukuno pa gani ini subong pagkamainunungon! Halimbawa, mahimo gid nga ginkilala sang mga Fariseo sang adlaw ni Jesus ang ila kaugalingon subong talalupangdon nga mainunungon.⁠c Apang wala nila mahangpi ang kinatuhayan sa ulot sang isa nga mainunungon kag sang isa nga madampigon sa himo-sang-tawo nga mga kasuguan, kay estrikto sila kag wala kaluoy nga mahukmanon. (Ipaanggid ang Manugwali 7:⁠16.) Sa sining paagi aktuwal nga sila dimainunungon​—⁠sa katawhan nga dapat alagaran nila, sa katuyuan sang Kasuguan nga ila ginapangangkon nga ginatudlo, kag kay Jehova mismo. Si Jesus, sa kabaliskaran, nangin mainunungon sa katuyuan sang Kasuguan, nga napasad sa gugma. Sa amo, napabakod niya kag napalig-on ang katawhan, subong amo ang gintagna tuhoy sa Mesias.​—⁠Isaias 42:​3; 50:​4; 61:​1, 2.

13. (a) Paano ang Cristianong mga ginikanan mahimo mangin dimainunungon? (b) Ngaa dapat likawan sang mga ginikanan ang sobra nga kapintas, mamulayon, ukon negatibo sa pagdisiplina sa ila mga anak?

¹³ Ang mga Cristiano nga may isa ka kasangkaron sang awtoridad nagabenepisyo sing daku gikan sa modelo ni Jesus sa sining bahin. Halimbawa, ang mainunungon nga mga ginikanan nakahibalo nga dapat nila disiplinahon ang ila mga anak. (Hulubaton 13:24) Apang ginapat-od nila nga wala nila ginapaakig ang ila mga anak paagi sa mapintas nga disiplina nga ginapadapat sa kaakig ukon paagi sa masunson nga pagmulay. Ang kabataan nga nagabatyag nga indi gid nila mapahamut-an ang ila mga ginikanan ukon nagabatyag nga ang pagsimba sang ila mga ginikanan daw nagahimo lamang sa ila mga ginikanan nga negatibo kag mamulayon mahimo nga mahanusbo kag, subong resulta, magabulag sa ulihi gikan sa matuod nga pagtuo.​—⁠Colosas 3:⁠21.

14. Paano mangin mainunungon ang Cristianong mga manugbantay sa panong nga ila ginaalagaran?

¹⁴ Sing kaanggid, ang Cristianong mga gulang kag nagalakbay nga mga manugtatap nagahatag sing igtalupangod sa mga problema kag mga katalagman nga ginaatubang sang panong. Subong mainunungon nga mga manugbantay, nagahatag sila sing laygay kon kinahanglanon, ginapat-od anay nga nakuha na nila ang tanan nga katunayan kag mahalungon nga ginapasad ang ila ginahambal sa Biblia kag sa mga publikasyon sang Sosiedad. (Salmo 119:​105; Hulubaton 18:13) Nahibaluan man nila nga ang mga karnero nagasandig sa ila para sa espirituwal nga pagpalig-on kag pagpakaon. Gani nagatinguha sila nga ilugon si Jesucristo, ang Maayong Manugbantay. Sila mainunungon nga nagaministro sa mga karnero kada semana sa Cristianong mga miting​—⁠wala sila ginapukan kundi, sa baylo, ginapatindog sila kag ginapalig-on sa ila pagtuo.​—⁠Mateo 20:​28; Efeso 4:​11, 12; Hebreo 13:​20, 21.

15. Paano ginpakita sang pila sang unang siglo nga wala sa lugar ang ila pagkamainunungon?

¹⁵ Ang isa pa ka malalangon nga porma sang pagkadimainunungon amo ang wala sa lugar nga pagkamainunungon. Ang matuod nga pagkamainunungon suno sa Biblikanhon nga kahulugan wala nagatugot nga unahon ang bisan anong butang sangsa aton pagkamainunungon kay Jehova nga Dios. Madamo nga Judiyo sang unang siglo ang nagaid sa Mosaikong Kasuguan kag sa Judiyong sistema sang mga butang. Apang nag-abot ang tion nga ginhalin ni Jehova ang iya pagpakamaayo gikan sa sadtong rebelyuso nga pungsod padulong sa pungsod sang espirituwal nga Israel. Pila lamang ang nag-unong kay Jehova kag nagpasibu sa sining importante nga pagbag-o. Bisan sa tunga sang matuod nga mga Cristiano, ang pila nga dampig sa prinsipio sang mga Judiyo nag-insister nga magbalik sa sadtong “maluya kag nahauna nga mga butang” sang Mosaikong Kasuguan, nga natuman na kay Cristo.​—⁠Galacia 4:​9; 5:​6-12; Filipos 3:​2, 3.

16. Paano ginatamod sang mainunungon nga mga alagad ni Jehova ang mga pagpasibu?

¹⁶ Sa kabaliskaran, ang katawhan ni Jehova sa karon nga tion nagpamatuod sang ila kaugalingon nga mainunungon sa panahon sang pagbag-o. Samtang ang kapawa sang ginapahayag nga kamatuoran padayon nga nagasanag, may mga pagbag-o nga ginahimo. (Hulubaton 4:18) Sining karon lang, ginbuligan kita sang “matutom kag mainandamon nga ulipon” nga padalisayon ang aton paghangop sa termino nga “kaliwatan” nga ginagamit sa Mateo 24:​34 kag sa tion sang paghukom sa “mga karnero” kag “mga kanding” nga ginasambit sa Mateo 25:​31-46, subong man ang aton pagtamod sa pila ka sahi sang pag-alagad sa komunidad. (Mateo 24:45) Wala sing duhaduha nga malipay ang pila ka apostata kon madamo nga Saksi ni Jehova ang magpabilin sa nagligad nga paghangop sa sini nga mga tema kag magdumili sa pag-uswag. Wala ini matabo. Ngaa? Ang katawhan ni Jehova mainunungon.

17. Paano mahimo tilawan sang aton mga hinigugma kon kaisa ang aton pagkamainunungon?

¹⁷ Apang, ang butang tuhoy sa wala sa lugar nga pagkamainunungon mahimo nga mag-apektar sa aton mismo. Kon ang isa ka suod nga abyan ukon isa ka katapo sang pamilya magpili sa dalanon nga nagasumpakil sa mga prinsipio sang Biblia, mahimo naton batyagon nga ang aton pagkamainunungon ginatunga. Natural lamang nga magbatyag kita sing pagkamainunungon sa mga katapo sang pamilya. Apang indi gid naton pag-unahon ang aton pag-unong sa ila sangsa aton pag-unong kay Jehova! (Ipaanggid ang 1 Samuel 23:​16-18.) Indi naton pagbuligan ang mga nakasala nga taguon ang isa ka mabug-at nga sala ukon magdampig sa ila batok sa mga gulang nga nagatinguha sa ‘pagpasibu sa ila sa espiritu sang pagkalulo.’ (Galacia 6:1) Ang paghimo sini mangin pagkadimainunungon kay Jehova, sa iya organisasyon, kag sa isa nga hinigugma. Ang matuod, ang pagpugong sa nakasala nga mahatagan sia sing disiplina nga ginakinahanglan niya daw subong sa pagbalabag sa gugma ni Jehova nga makalab-ot sa isa nga nakasala. (Hebreo 12:​5-7) Dumduma man, nga “matutom ang mga pilas gikan sa isa nga nagahigugma.” (Hulubaton 27:6) Ang prangka, mahigugmaon nga laygay nga napasad sa Pulong sang Dios mahimo nga magapilas sa bugal sang isa ka nakasala nga hinigugma, apang mahimo nga ini sa ulihi makaluwas sing kabuhi!

Padayon nga Mag-unong Walay Sapayan sang Paghingabot

18, 19. (a) Ano ang luyag ni Ahab nga makuha kay Nabot, kag ngaa nagdumili si Nabot? (b) Takus bala sa natabo sa iya ang pagkamainunungon ni Nabot? Ipaathag.

¹⁸ Kon kaisa ang mga pag-atake ni Satanas sa aton pagkamainunungon direkta. Binagbinaga ang kaso ni Nabot. Sang ginpilit sia ni Hari Ahab nga ibaligya ang iya ulubasan, sia nagsabat: “Indi makatarunganon sa akon bahin, gikan sa pagtamod ni Jehova, nga ihatag ko sa imo ang panublion sang akon mga ginikanan.” (1 Hari 21:3) Si Nabot indi matig-a sing buot; mainunungon sia. Ginpatuman anay sang Mosaikong Kasuguan nga indi dapat pag-ibaligya sang bisan sin-o ang panublion nga duta sing dayon. (Levitico 25:​23-28) Nahibaluan gid ni Nabot nga mahimo sia ipapatay sining mapintas nga hari, kay gintugutan na ni Ahab ang iya asawa nga si Jezebel, nga ipapatay ang madamo sang mga manalagna ni Jehova! Apang malig-on nga nanindugan si Nabot.​—⁠1 Hari 18:⁠4.

¹⁹ Ang pagkamainunungon may bayad kon kaisa. Upod sa bulig sang pila ka “wala sing pulos nga mga tawo,” ginbutangbutangan ni Jezebel si Nabot sing krimen nga wala niya mahimo. Subong resulta, sia kag ang iya mga anak nga lalaki ginpatay. (1 Hari 21:​7-16; 2 Hari 9:26) Nagakahulugan bala ina nga ang pagkamainunungon ni Nabot sayop! Indi! Si Nabot isa sa madamong mainunungon nga lalaki kag babayi nga ‘buhi’ sa memorya ni Jehova karon, nagakatulog sa lulubngan tubtob sa adlaw sang pagkabanhaw.​—⁠Lucas 20:​38; Binuhatan 24:⁠15.

20. Paano ang paglaum makabulig sa aton nga huptan ang aton pagkamainunungon?

²⁰ Amo man sini nga saad ang nagapasalig sa mga mainunungon kay Jehova karon. Nahibaluan naton nga sa sining kalibutan mahimo nga daku ang ibayad naton sa aton pagkamainunungon. Kabuhi ni Jesucristo ang ginbayad niya sa iya pagkamainunungon, kag ginsilingan niya ang iya mga sumulunod nga amo man ang matabo sa ila. (Juan 15:20) Subong nga ginpabaskog sia sang iya paglaum sa palaabuton, mapabaskog man kita sang aton paglaum sa palaabuton. (Hebreo 12:2) Sa amo, makapabilin kita nga mainunungon walay sapayan sang tanan nga sahi sang paghingabot.

21. Anong mga pasalig ang ginatanyag ni Jehova sa mga mainunungon sa iya?

²¹ Matuod, pila lamang sa aton karon ang nakaeksperiensia sing direkta nga mga pag-atake sa aton pagkamainunungon. Apang mahimo nga ang katawhan sang Dios magaatubang sing dugang pa nga paghingabot sa wala pa ang katapusan. Paano naton mahuptan sing pat-od ang aton pagkamainunungon? Paagi sa paghupot sang aton pagkamainunungon karon. Ginhatagan kita ni Jehova sing isa ka dakung komisyon​—⁠ang pagbantala kag pagpanudlo tuhoy sa iya Ginharian. Himuon naton sing mainunungon ining importante nga hilikuton. (1 Corinto 15:58) Kon dumilian naton ang mga dikahimpitan nga paluyahon sing amat-amat ang aton pagkamainunungon sa organisasyon ni Jehova kag kon magbantay kita batok sa malalangon nga mga porma sang pagkadimainunungon subong wala sa lugar nga mga pagkamainunungon, nian makahanda kita sing mas maayo kon ang aton pagkamainunungon tilawan sing mabaskog. Kon ano man ang matabo, kabay nga magsalig kita pirme nga si Jehova dayon nga mainunungon sa iya mainunungon nga mga alagad. (2 Samuel 22:26) Huo, amligan niya ang mga mainunungon sa iya!​—⁠Salmo 97:⁠10.

[Mga footnote]

Paano Mo Sabton?

◻ Paano naton malikawan nga ang mga dikahimpitan sang iban maghimo sa aton nga mangin dimainunungon?

◻ Sa anong mga paagi ang aton mismo mga dikahimpitan mahimo magdul-ong sa aton sa dimainunungon nga paggawi?

◻ Paano naton mapamatukan ang huyog sa wala sa lugar nga pagkamainunungon?

◻ Ano ang magabulig sa aton sa paghupot sang aton pagkamainunungon bisan sa tion sang paghingabot?

[Kahon sa pahina 9]

Pag-alagad Sing Mainunungon sa Bethel

“Kabay nga ang tanan nga butang matabo sing disente kag suno sa kahimusan.” Amo ang ginsulat ni apostol Pablo. (1 Corinto 14:40) Nahibaluan ni Pablo nga agod makapanghikot ang isa ka kongregasyon, kinahanglan ang “kahimusan,” ang pag-organisar. Sa karon man, ang mga gulang dapat maghimo sing mga desisyon tuhoy sa praktikal nga mga butang, subong sang pagtangdo sa mga katapo sang kongregasyon sa nanuhaytuhay nga lokasyon para sa pagtinuon sa libro, paghimos sing mga miting para sa pag-alagad sa latagon, kag pag-usisa kon ano nga mga teritoryo ang natuptupan. Ini nga mga kahimusan mahimo nga kon kaisa magatilaw sa pagkamainunungon. Indi ini mga sugo nga ginhatag sang Dios, kag mahimo nga indi ini maluyagan sang tanan nga indibiduwal.

Nabudlayan ka bala, kon kaisa, sa pag-unong sa pila ka praktikal nga mga kahimusan nga ginahimo sa Cristianong kongregasyon? Kon amo, mahimo nga mabuligan ikaw sang huwaran sa Beth­el. Ang ngalan nga Beth­el, isa ka Hebreong tinaga nga nagakahulugan sing “Balay sang Dios,” amo ang ngalan sang tanan nga 104 ka sanga sang ­Watch Tow­er So­ciety, lakip ang ulong-talatapan sa Estados Unidos.⁠d Luyag sang mga boluntaryo nga nagapuyo kag nagapangabudlay sa Beth­el nga ining mga duog magpakita sing pagtahod kag kahadlok kay Jehova. Nagakinahanglan ini sing pagkamainunungon sa bahin sang tagsatagsa.

Masami ginakomentuhan sang mga nagaduaw sa Bethel ang kahim-ong kag katinlo nga makita nila didto. Ang mga manugpangabudlay organisado kag malipayon; ang ila panghambal kag pamatasan kag bisan gani ang ila panagway nagapakita sing hamtong, nahanas-sa-Biblia nga Cristianong konsiensia. Ang tanan nga katapo sang pamilya Bethel mainunungon nga nagasunod sa mga talaksan sang Pulong sang Dios.

Dugang pa, ang Nagadumala nga Hubon nagahatag sa ila sing isa ka man­u­al nga natig-uluhan Dwelling Together in Unity, nga nagapakita sa maluluy-on nga paagi sing pila ka praktikal nga mga kahimusan nga kinahanglanon agod makapangabudlay sing mahim-ong ining daku nga pamilya. (Salmo 133:1) Halimbawa, ginasambit sini ang tuhoy sa pagsinalayo sa sulod sang kuwarto, sa pagkaon, sa katinlo, sa pagpanapot kag pagpamustura, kag sa kaanggid sini nga mga butang. Ang mga katapo sang pamilya Bethel mainunungon nga nagasakdag kag nagasunod sa sining mga kahimusan, bisan pa ang ila personal nga mga luyag mahimo nga sa lain nga direksion. Ginatamod nila ining man­u­al, indi subong isa ka estrikto nga mga pagsulundan kag mga regulasyon, kundi subong isa ka listahan sang mapuslanon nga mga panuytoy agod mapauswag ang paghiusa kag kahim-ong. Ang mga manugtatap mainunungon sa pagsakdag sa sining napasad-sa-Biblia nga mga paagi, kag ginagamit nila ini sa isa ka positibo nga paagi agod mapabakod kag mapalig-on ang pamilya Bethel sa pagpadayon sang ila balaan nga pag-alagad sa Bethel.

[Kahon sa pahina 10]

Ang Loyalista kag ang Legalista

Sadto anay sang 1916 ang Encyclopædia of Religion and Ethics nagsiling nga “ining kinatuhayan sa ulot sang loyalista kag legalista mahimo masapwan sa tanan nga tion kag sa tanan nga duog.” Ini nagpaathag: “May legalista nga nagahimo sang kon ano ang ginasugo sa iya, wala nagalapas sa pagsulundan; matutom sia sa pulong nga nasulat kag mabasa. May loyalista nga nagahimo sini apang . . . masaligan sa paghimo sing kapin pa, nga nagapatuhoy sang iya bug-os nga hunahuna sa iya katungdanan, nga nagapahisuno sang iya panimuot sa katuyuan nga dapat himuon.” Sa ulihi nga bahin, ini gihapon nga libro nagsiling: “Ang pagkamainunungon labaw pa sa pagkamasinulundon sa kasuguan. . . . Ang tawo nga mainunungon ginapatuhay sa tawo nga masinulundon sa kasuguan subong isa nga nagaalagad upod sa bug-os nga tagipusuon kag hunahuna . . . Wala niya ginatugutan sa iya kaugalingon ang boluntaryo nga mga sala sa paghimo sing isa ka butang, indi paghimo sing isa ka butang, ukon pagkawalay hinalung-ong.”