Ano ang Ginasiling sang Biblia Parte sa Natural nga mga Kalamidad?
Ang sabat sang Biblia
Indi ang Dios ang nagapahanabo sang natural nga mga kalamidad subong, pero nagaulikid sia sa mga tawo nga apektado sini. Ang natural nga mga kalamidad amo ang isa sa mga rason sang pag-antos kag dulaon ini sa ulihi sang Ginharian sang Dios. Samtang wala pa ini, ang Dios nagahatag sing paumpaw sa mga biktima sang natural nga mga kalamidad.—2 Corinto 1:3.
Ngaa makasiling kita nga ang natural nga mga kalamidad indi silot halin sa Dios?
Ang natural bala nga mga kalamidad tanda nga ari na kita sa katapusan nga mga adlaw?
Paano ginabuligan sang Dios ang mga biktima sang natural nga mga kalamidad?
Makabulig bala ang Biblia para mangin handa kita sa natural nga kalamidad?
Mga bersikulo sa Biblia nga makapaumpaw sa mga biktima sang natural nga mga kalamidad
Ngaa makasiling kita nga ang natural nga mga kalamidad indi silot halin sa Dios?
Mabasa sa Biblia nga naggamit ang Dios sang una sang puersa sang kinaugali, pero lain ini sangsa natural nga mga kalamidad.
Wala sing pili kon sin-o ang mahimo mapatay kag mahalitan sang natural nga mga kalamidad. Pero, sang gingamit sang Dios ang puersa sang kinaugali sa pagsilot, mga malauton lamang ang iya ginlaglag. Halimbawa, sang ginlaglag sang Dios ang siudad sang Sodoma kag Gomorra sang una, ginluwas niya ang maayo nga tawo nga si Lot kag ang duha niya ka bata nga babayi. (Genesis 19:29, 30) Nabasa sang Dios ang tagipusuon sang mga tawo sadto kag ginlaglag niya ang mga malauton.—Genesis 18:23-32; 1 Samuel 16:7.
Sa masami, ang natural nga mga kalamidad nagakatabo nga wala sing paandam. Pero, ang Dios nagahatag sing paandam sa mga malauton antes niya sila silutan paagi sa puersa sang kinaugali. Ang mga nagpamati sa paandam naluwas.—Genesis 7:1-5; Mateo 24:38, 39.
Ang ginahimo sang mga tawo nangin kabangdanan man sang natural nga mga kalamidad. Paano? Kay ginaguba nila ang palibot kag nagapatindog sila sang mga balay kag bilding sa mga lugar nga pirme ginalinugan, ginabahaan, kag ginabagyuhan. (Bugna 11:18) Indi Dios ang balasulon sa malain nga resulta sang ginahimo sang mga tawo.—Hulubaton 19:3.
Ang natural bala nga mga kalamidad tanda nga ari na kita sa katapusan nga mga adlaw?
Huo, ginapakita sang Biblia nga may matabo nga mga kalamidad sa “hingapusan sang sistema sang mga butang” ukon “katapusan nga mga adlaw.” (Mateo 24:3; 2 Timoteo 3:1) Halimbawa, si Jesus nagsiling parte sa aton tion: “May kakulang sa pagkaon kag mga linog sa nagkalainlain nga mga lugar.” (Mateo 24:7) Malapit na lang dulaon sang Dios ang mga rason sang tanan nga kasakit kag pag-antos, pati na ang natural nga mga kalamidad.—Bugna 21:3, 4.
Paano ginabuligan sang Dios ang mga biktima sang natural nga mga kalamidad?
Ginapaumpawan sang Dios ang mga biktima paagi sa iya Pulong, ang Biblia. Ginapasalig kita sang Biblia nga nagaulikid ang Dios sa aton kag nabatyagan niya ang aton pag-antos. (Isaias 63:9; 1 Pedro 5:6, 7) Ginapakita man sini ang iya promisa nga sa ulihi wala na sing natural nga mga kalamidad.—Tan-awa ang “Mga bersikulo sa Biblia nga makapaumpaw sa mga biktima sang natural nga mga kalamidad.”
Ginabuligan sang Dios ang mga biktima paagi sa iya mga sumilimba. Ginagamit sang Dios ang iya mga sumilimba sa duta sa paghatag sing paumpaw sa iban bilang pag-ilog nila sa halimbawa ni Jesus. Gintagna nga paumpawan ni Jesus ang “mga nagakalisod” kag ang “tanan nga nagalalaw.” (Isaias 61:1, 2) Amo man ini ang ginatinguhaan nga himuon sang mga sumilimba sang Dios.—Juan 13:15.
Ginagamit man sang Dios ang iya mga sumilimba para maghatag sing praktikal nga bulig sa mga biktima sang natural nga mga kalamidad.—Binuhatan 11:28-30; Galacia 6:10.
Ang mga Saksi ni Jehova nga nagabulig sa mga biktima sang bagyo sa Puerto Rico
Makabulig bala ang Biblia para mangin handa kita sa natural nga kalamidad?
Huo. Bisan pa ang Biblia indi libro parte sa paghanda sa mga kalamidad, may mga prinsipio ini nga makabulig sa aton. Halimbawa:
Planuha na nga daan kon ano ang himuon mo kon may mga kalamidad. “Makita sang tawo nga maalamon ang katalagman kag nagapanago sia,” siling sang Biblia. (Hulubaton 22:3) Maalamon gid ang pagplano sing abanse. Mahimo nalakip sa pagplano ang paghanda sang emergency kit nga puede mo dayon madala sa tion sang emerhensia kag ang pagpraktis kon diin makitaay ang inyo pamilya kon may matabo nga kalamidad.
Unaha ang kabuhi sangsa mga pagkabutang. Ang Biblia nagasiling: “Sang natawo kita sa kalibutan wala kita sing dala, kag wala man kita sing madala kon mapatay kita.” (1 Timoteo 6:7, 8) Dapat handa kita nga bayaan ang aton puluy-an kag mga pagkabutang para maluwas sa kalamidad. Dapat naton dumdumon nga mas importante ang aton kabuhi sangsa bisan ano nga pagkabutang.—Mateo 6:25.